Month: January 2018

Улсын Онцгой комиссын шуурхай бүлэг өнөөдөр Баянхонгор аймагт ажиллаж байна. Энэ үеэр ОБЕГ-ын дарга, хошууч генерал Т.Бадрал, тус газрын УНХТГ-ын дарга, хошууч Ч.Цогбаяр нар аймгийн Онцгой байдлын газрын үйл ажиллагаатай танилцан, бие бүрэлдэхүүнтэй уулзлаа. Тус газрын хамт олон 2017 онд аймгийн хэмжээнд 74 удаагийн аюулт үзэгдэл, ослын дуудлагаар ажиллаж 18 хүний амь нас, төр, аж ахуйн нэгж байгууллага, иргэдийн 228,8 сая төгрөгийн эд хөрөнгийг авран хамгаалсан байна. Өнгөрсөн 2017 онд өөрсдийн хүч, нөөц бололцоог ашиглан алба хаагчдын чөлөөт цагийг зөв боловсон өнгөрүүлэх, бие бялдрыг дэмжих, албаны спортыг хөгжүүлэх зорилгоор улс, бүсийн хэмжээний уралдаан тэмцээн зохион байгуулах хүчин чадал бүхий спорт заалыг барьж ашиглалтад оруулсан. Мөн 25 айлын орон сууцыг ашиглалтад оруулан алба хаагчдын нийгмийн асуудлыг шийдвэрлэсэн томоохон ажлуудыг хэрэгжүүлэн ажилласан юм. Мөн Баянхонгор аймгийн 2017 оны “Бахархалт үйлстэн”-ээр шалгарсан төдийгүй Онцгой байдлын байгууллагын төв, орон нутгийн Онцгой байдлын анги байгууллагуудаас ажил, үйлсээрээ долдугаар байрт орсон.

Баянзүрх дүүрэг, Архангай аймгийн Тариат сумын Засаг даргын Тамгын газар хамтран дөрөв дэх жилдээ “Тариатын цагаан идээ” үзэсгэлэн худалдааг зохион байгуулж байна. Өнөөдөр тус үзэсгэлэнгийн нээлт болсон бөгөөд нээлтийн арга хэмжээнд Баянзүрх дүүргийн Эдийн засгийн хөгжлийн асуудал хариуцсан төслийн удирдагч-Засаг даргын орлогч Д.Уламбаяр, дүүргийн Засаг даргын Тамгын газрын дарга Б.Амартүвшин Тариат сумын Засаг дарга Г.Алтан-Очир болон албаны бусад хүмүүс оролцлоо.

Энэ сарын 29-ний өдрийг хүртэл үргэлжлэх тус үзэсгэлэн худалдаанд уламжлалт арга технологиор экологийн цэвэр бүтээгдэхүүнийг малчид өөрсдийн гар дээрээс нийслэлчүүдэд борлуулж, үйлдвэрлэгч эцсийн хэрэглэгч хоёр ямар нэгэн шат дамжлаггүйгээр холбогдож худалдан авалт хийгдэж байгаагаараа онцлогтой юм. Дашрамд дурдахад, Тариат сумын цагаан идээ нь “Архангай түншлэл” үзэсгэлэн худалдаанд аймгийн шилдэгийн шилдэг бүтээгдэхүүнээр хоёр удаа шалгарсан цагаан идээ юм хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Улаанбаатар хотын агаарын бохирдлыг хэмждэг 11 цэгээс ирүүлсэн мэдээгээр өнөөдөр 08.30 цагийн үед агаарын чанарын индекс Баянхошуу орчимд хамгийн өндөр буюу 1202 байна.

Харин Нисэх орчимд 285, Амгаланд 251 зааж байна. Агаарын чанарын индекс 51-100 заасан тохиолдолд агаарын чанар шаардлага хангах боловч зарим бохирдуулах бодисын нөлөөлөлд хэт мэдрэг хүмүүс өртөж болзошгүй юм. Харин ДЭМБ-ын тогтоосноор агаарын чанарын индекс 500-гаас дээш давсан тохиолдолд хүүхэд, хөгшдийг гэрээсээ гарахгүй байх, гадаа биеийн хүчний ажил хийхгүй байхыг зөвлөдөг аж.

Багш нар цалингаа нэмүүлэх асуудлаар Олон улсын валютын сангийн үүдэнд жагсаал хийлээ. Жагсагчид “Бид Олон улсын валютын санд шаардах бичиг хүргүүлж байна. Өнгөрсөн наймдугаар сараас хойш жагсаж, цалин нэмэх шаардлага тавьж байхад Засгийн газар ОУВС-тай хатуу гэрээ байгуулсан” гэх ганцхан хариултыг өгсөөр ирлээ” гэж байв. Мөн Засгийн газар удаа дараагийн шаардлагыг хүлээн аваагүй учраас Олон улсын валютын сангийн үүдэнд жагсаал зохион байгуулахаас өөр арга байгаагүй гэдгийг зохион байгуулагчид хэлсэн юм. Тэд шаардлагадаа Монголын багш нарын үндсэн цалинг 50 хувиар нэмэгдүүлж, тэтгэврийн насыг урагшлуулах, зөрүүг арилгах асуудлыг тусгажээ. Хэрэв шаардлагыг хүлээн авахгүй бол дахин ажил хаялт зарлах болно хэмээн мэдэгдлээ.

Өмнөд Солонгосын зүүн өмнөд нутгийн Мирян хотын эмнэлэгт гал гарсны улмаас 31 хүн амиа алдаж, 40 гаруй хүн түлэгдэж бэртсэн тухай “Ёнхап” агентлаг мэдээллээ.

Эх сурвалжийн мэдээлснээр, Сөүлээс зүүн өмнөд зүгт 280 км зайтай орших Мирян хотын “Сэжун” эмнэлэгт өнөө өглөө үүрээр гал гарчээ. Өндөр настнууд голдуу 100 орчим өвчтөн хэвтэн эмчлүүлж байсан тус эмнэлгийн яаралтай тусламжийн тасгаас гал гарч эхэлсэн аж.

Гал чухам юуны улмаас гарсан, амиа алдсан хүмүүсийн хэд нь өвчтөн байсан гэдэг нь одоогоор хараахан тодорхойгүй байна.

НИТХ-ын ээлжит XIII хуралдаан өнөөдөр боллоо. Хуралдаанаар Нийслэлийн Засаг даргын Ногоон хөгжил агаарын бохирдлын асуудал хариуцсан орлогч Ж.Батбаясгалан Агаарын бохирдлыг бууруулах талаар авч хэрэгжүүлж буй зарим ажил болон цаашид авах арга хэмжээний талаар танилцуулсан юм.
2017 оны арванхоёрдугаар сарын 27-ны Нийслэлийн Засаг даргын А/1042 дугаар захирамжаар хөдөө орон нутгаас нийслэлд байнга оршин суухаар ирэх иргэдийн шилжилт хөдөлгөөнийг 2020 оны нэгдүгээр сарын 1-ний өдөр хүртэлх хугацаанд үргэлжлүүлэн түр зогсоосон. Тус захирамжийг өнгөрсөн онд хэрэгжүүлснээр 2017оны арванххоёрдугаар сарын 31-ний байдлаар 9949 иргэн шилжин ирж, 11256 иргэн шилжин явжээ.
Улаанбаатар хотын төвийн 6 дүүрэгт 202 мянган өрхөөс гадна 11-100 кВт хүртэлх хүчин чадалтай усан халаалтын -2724 зуух, 101 кВт-аас дээш хүчин чадалтай уурын болон ус халаалтын -321 зуух утаа үйлдвэрлэж байна. Үндэсний хөтөлбөрт туссанаар 101 кВт-аас дээш хүчин чадалтай 228 зуух буулгахаас одоогоор 45 халаалтын зуухыг буулгаж, 56 хэрэглэгчийг нь төвлөрсөн халаалтын системд холбох ажлыг хийсэн. 2017 оны төсвийн тодотголоор гэр хорооллын дулааны шугам сүлжээний хүчин чадлыг нэмэгдүүлэх, зураг төсөл нь бэлэн болсон 68 халаалтын зуухыг буулгаж, хэрэглэгчийг төвлөрсөн системд холбох 23 тэрбум төгрөгийн санхүүжилт шийдэгдэж, 9 багц болгон ажлыг эхлүүлээд байгаа аж. Үүний дүнд жилд 59’000 тн түүхий нүүрсний хэрэглээг бууруулах юм.
Сургууль, цэцэрлэг зэрэг орон байрны доторх агаарын бохирдлыг бууруулах, урьдчилан сэргийлэх чиглэлээр багш, эмнэлгийн ажилтан, оюутан, сурагчдыг оролцуулсан сургалтыг үе шаттайгаар, тогтмол зохион байгуулж байна. 2017 онд 93 цэцэрлэг, 26 сургуулийн бага анги, 12 эмнэлгийн хүүхдийн тасаг, эрчимт эмчилгээний тасагт нийт 1413 агаар шүүгч төхөөрөмж олгосон. Энэ арга хэмжээнд нийслэлийн төсөв болон Дэлхийн банкны санхүүжилтээр 1,1 тэрбум төгрөг зарцуулаад байна.
Батлан хамгаалах яамны Зэвсэгт хүчин жанжин штабын 300 айлын орон сууц, Баянгол дүүргийн 11-р хорооны 36-р байр, ерөнхий боловсролын 34, 63, 39, дүгээр сургууль, 124 дүгээр цэцэрлэг, Хан-Уул дүүргийн Нэгдсэн эмнэлэг, Яаралтай түргэн тусламжийн байрыг төвлөрсөн дулаан хангамжийн сүлжээнд холбох, гадна шугам сүлжээ, холигч насосны узель суурилуулах ажлуудыг нийслэлийн төсвийн хөрөнгөөр хийж хэрэгжүүлсэн. Түүнчлэн Монгол Улсын Засгийн газраас өнгөрсөн 1-3-р сард авч хэрэгжүүлсэн гэр хорооллын шөнийн цахилгааныг тэглэх урамшуулалд 114’512 хэрэглэгч хамрагдаж, үүнд 3.5 тэрбум төгрөгийг БОАЖ сайдын багцаас зарцуулсан ба үүний дүнд РМ2.5, РМ10 тоосонцор, хүхэрлэг хийн хэмжээ 5-8 хувиар буурсан үзүүлэлт гарсан. Хөнгөлөлтийн хугацаанд шөнийн ачаалал 17 хувиар өссөн нь нийт хөнгөлөлт үзүүлсэн айл өрхийн 15 хувиар нь цахилгаан халаагуур ашигласан гэсэн тооцоо гарчээ. Уг арга хэмжээг энэ өвлийн саруудад үргэлжлүүлэн хэрэгжүүлэх аж гэж нийслэлийн ЗДТГ-ын хэвлэл мэдээлэл, олон нийттэй харилцах хэлтсээс мэдээллээ.