Month: January 2018

Нийслэлийн Баянзүрх дүүрэг, Архангай аймгийн Тариат сумын ЗДТГ хамтран дөрөв дэх жилдээ зохион байгуулж буй “Тариатын цагаан идээ” үзэсгэлэн худалдаа өнөөдөр эхэллээ.

Энэ сарын 29-нийг хүртэл Монгол бөхийн өргөөний гадна талбайд үргэлжлэх уг үзэсгэлэн худалдаанд Тариат сумын 80 малчин оролцож,уламжлалт арга технологиор боловсруулсан экологийн цэвэр бүтээгдэхүүн, сүү, цагаан идээгээ борлуулж байна. Тариат сумын цагаан идээ нь “Архангай түншлэл” үзэсгэлэн худалдаанд аймгийн “Шилдэгийн шилдэг бүтээгдэхүүн”-ээр хоёр удаа шалгарсан юм.

Өнөөдөр болсон үзэсгэлэнгийн нээлтэд Тариат сумын Засаг дарга Г.Алтан-Очир, Баянзүрх дүүргийн Эдийн засгийн хөгжлийн асуудал хариуцсан төслийн удирдагч-Засаг даргын орлогч Д.Уламбаяр, дүүргийн ЗДТГ-ын дарга Б.Амартүвшин болон албаны бусад хүмүүс оролцлоо.

“Хөдөө аж ахуйн бирж” ХХК хил дамнасан арилжаа зохион байгуулахаар болсон байна. БНХАУ-ын “Бохай” таваарын /ВОСЕ/ биржтэй Хөдөө аж ахуйн бирж хамтран ажиллах стратегийн түншлэлийн гэрээ байгууллаа.

Энэхүү гэрээг байгуулснаар хөдөө аж ахуйн түүхий эдийг БНХАУ-ын үйлдвэрийн төлөөлөл ирж, ченжүүдээс авдаг байсныг халж, бүтээгдэхүүнээ шууд “Бохай” биржээр арилжаалах боломжтой боллоо. Тодруулбал, БНХАУ-ын үйлдвэрүүд Монголд ирэхгүйгээр манай биржээр дамжуулан “Бохай” биржээс түүхий эд авах боломж бүрдэж байна. 2018 онд арьс шир, мал, мах, ноос ноолуур гээд олон төрлийн бүтээгдэхүүнийг арилжих бөгөөд түүхий эдийн зах зээлийг шинэ шатанд гаргах суурийг тавилаа” хэмээн Монголын Хөдөө Аж Ахуйн Биржийн Гүйцэтгэх захирал Х.Баатар ярилаа.

Манай талаас стандартын шаардлага хангасан чанартай түүхий эдийг бирж дээрээ арилжаалахад анхаарах аж. Бэлтгэл ажлыг хангахаар хоёр талын ажлын хэсгийг байгуулжээ. Ирэх дөрөвдүгээр сар гэхэд бэлтгэл ажлаа дуусгаж анхны арилжааг зохион байгуулах юм байна.

Тяньжин Бохайн таваарын бирж нь хөдөө аж ахуйн бараа түүхий эдийн биет хүргэлттэй, гэрээний спот арилжааг зохион байгуулдаг байна. Тус бирж 2009 оноос хөдөө аж ахуйн гаралтай түүхий эдийн спот гэрээний арилжааг эхлүүлснээс хойш нийт гүйлгээний хэмжээ 20 их наяд юань болсон аж.

Нийслэлийн цагдаагийн газрын Хүүхдийг гэмт хэргээс урьдчилан сэргийлэх хэлтсийн алба хаагчид нийслэлд гурван ээлжээр хичээллэж буй 19 сургуулийн гадна орчин, явган болон авто замын аюулын эрсдлийг тодорхойлж, хүүхдийн аюулгүй байдлыг хангах зорилгоор сургуулийн удирдлага, багш нартай хамтран ажиллаж аян “Гараас гарт” аян эхлүүллээ.

Сургуулийн орчинд гэрэлтүүлэг, хяналтын камер хангалтгүй, авто замын тэмдэг, тэмдэглэгээ стандартын шаардлага хангаагүй, хүүхдийн сургуульдаа очих, буцах зам хол, эцэг, эх, асран хамгаалагч хүргэж өгдөггүй, сургууль орчмын бүс, ойролцоо цахим болон интернэт тоглоом, баар цэнгээний газар, зочид буудал олон байгаа нь хүүхэд гэмт хэрэгт өртөх, үйлдэх эрсдлийг бий болгож байна. Иймд сургууль, эцэг эх, асран хамгаалагч нар “Гараас гарт аян”-ыг дэмжих, “School police” эргүүлийг бодитой, чанартай хийж хүүхдийг гэмт хэрэг, зөрчилд өртөх, үйлдэхээс урьдчилан сэргийлж ажиллахыг энэ аянаараа уриалж байна.

Баруун болон төвийн аймгуудын өвөлжилт, орон нутгийн Онцгой комиссын үйл ажиллагаатай танилцаж, мэргэжил, арга зүйн туслалцаа үзүүлэх, аймаг, орон нутагт тулгамдсан асуудлыг газар дээр нь шийдвэрлэх,гамшгаас хамгаалах улсын албадын бэлтгэл, бэлэн байдлыг шалган үүрэг чиглэл өгөхөөр орон нутагт ажиллаж байгаа Улсын онцгой комиссын дарга, Шадар сайд Ө.Энхтүвшинээр ахлуулсан ОБЕГ-ын дарга, хошууч генерал Т.Бадрал,ХХААХҮ-ийн сайд Б.Батзориг, МХЕГ-ын дарга Н.Цагаанхүү тэргүүтэй Шуурхай бүлэг өнөөдөр Баянхонгор аймгийн Онцгой комиссыг хуралдуулав.

Засаг дарга Г.Батжаргал “Баянхонгор аймагт 2017 онд зуншлага тааруу болж, малчид чадлынхаа хэрээр хадлан базаасан ч хангалттай хэмжээнд бэлтгэж чадаагүй. Энэ өвөл өнтэй эхэлсэн боловч энэ сарын 20-ноос хүйтний эрч эрс чангарч байна. Аймгаас отор нүүдлээр явсан малчин өрхүүдэд болон манай аймагт оторлож байгаа өөр аймгийн иргэдийг эмнэлгийн хяналтад бүрэн авсан” хэмээв. Тус аймгийн хамгийн алслагдсан Шинэжинст суманд оторлож байгаа өрхүүд эмнэлгийн тусламж авах боломжоор хязгаарлагдмал байгаагаас жирэмсэн эхчүүд болон нярай хүүхэдтэй ээжүүд, өндөр настнуудыг төв суурин газарт байлгах арга хэмжээ авч эхэлжээ.
Аймгийн хэмжээнд нийт 4587.7 мянган мал тоологдсон бол өвөл эхэлснээс хойш 21 мянган мал хорогджээ. Одоогийн байдлаар Баянхонгор аймгийн 8 суманд өвс, 9 суманд тэжээлийн нөөц дууссан мэдээтэй байна. Аймаг, сумдын өвс тэжээлийн аюулгүйн нөөцийг нөхөн бүрдүүлэхэд Баянхонгор аймагт мал болон сумын тоонд харьцуулан 414.6 сая төгрөг олгосноор 294.1 сая төгрөгөөр 32468 боодол буюу 650 тн өвс, 119.9 сая төгрөгөөр 235 тн тэжээл худалдан авчээ. Засгийн газрын 186 дугаар тогтоолоор цаг үеийн асуудлыг шийдвэрлэхэд зориулж тус аймагт 60.0 сая төгрөг нэмж олгосон. Уг санхүүжилтээр сум бүрт өвс, тэжээл худалдан авсан боловч малчдын нөөц шавхагдаж байгаа учраас дахин худалдан авах хүсэлтэй байгаа аж.
Засаг дарга Г.Батжаргал “Манай аймагт малын тоо толгой энэ онд 900 мянга орчмоор буурсан нь өвс, тэжээл бэлдэхэд зориулан малаа худалдан борлуулсан гэсэн үг. Малчид одоо бэлэн мөнгөө дуусаж байгаа учраас зээлээр өвс, тэжээл өгөөч гэсэн хүсэлт ирж байгаа. Тиймээс улсын нөөцийн өвс тэжээлээс хуваарилсан хэмжээг нэмж олгохыг хүсэж байна” гэв.
МХЕГ-ын дарга Н.Цагаанхүү “Баянхонгор аймагт өвөлжилт хүндрэх нөхцөл нэгэнт үүссэн учраас хүн амь нас, эрүүл мэндээр хохирох эрсдэл гаргахгүйн тулд аймгийн эрүүл мэнд болон мэргэжлийн хяналтын байгууллага хамтран онцгой нөхцөлд шуурхай ажиллах шаардлагатай. Наад зах нь гэхэд л, оторчдын гэрт хадгалагдаж байгаа хүнс муудаж эрүүл мэндээрээ хохирох шалтгаан болох вий. Тиймээс тэдэнд хүнсний аюулгүй байдлын талаар зөвлөгөө өгөх зэргээс гарч болзошгүй бүхий л эрсдэлээс урьдчилан сэргийлж ажиллаарай. Малын шүлхий өвчнөөс урьдчилан сэргийлэх ажилд мэргэжлийн хяналтын байгууллага гойд анхаарал хандуулаарай. Өвөрхангай аймгийн Нарийнтээл сумын Хорио цээрийн хяналтын цэгт тээврийн хэрэгслийг ариутгах ажилд хөрш зэргэлдээ Баянхонгор аймгийн зүгээс ч хамтран ажиллах ёстой” гэлээ.

ЭМЯ-ны Эмнэлгийн тусламжийн газрын мэргэжилтэн М.Оюунчимэг “Баянхонгор аймгийн отроор нүүдэллэн өвөлжиж байгаа өрхүүдэд 23 жирэмсэн эх бүртгэгдсэнээс 18 нь өрхийн эмнэлгийн хяналтад орсон байгаа. Эмнэлгийн түргэн тусламж үзүүлэхэд машин, шатахуун, эмч нарыг дулаан хувцсаар хангах шаардлагатай байна. Эмнэлгийн тусламж үйлчилгээ, үзлэг хяналт үзүүлэх тал дээр Баянхонгор аймгийн хувьд сайн ажиллаж байгаа” гэв.
Шадар сайд, Улсын онцгой комиссын дарга Ө.Энхтүвшин “Баянхонгор аймгийн иргэд, малчид харьцангуй бэлтгэл сайтай өвлийг угтжээ. Аймгийн удирдлага өнтэй өвөлжихийн тулд Шадар сайдын эрхлэх хүрээний агентлагуудтай хамтын ажиллагаагаа уялдуулан ажиллаж байгаатай танилцлаа. Гэхдээ иргэд, малчдын тухай нарийн мэдээлэл муу байгаа нь анзаарагдлаа. Тиймээс ажлаа эрчимжүүлэх шаардлагатай байна” гээд “Цаг агаарын, бэлчээрийн тухай зэрэг шуурхай мэдээллээр малчдыг хангах, тэдэнд гар утсаараа мэдээлэл авах тухай зөвлөмжийг яаралтай хүргэ. Өвөлжилтийн хүрээнд хүний эрүүл мэнд, аюулгүй байдалтай холбоотой бусад мэдээллийг тогтмол авч, тэр дагуу шуурхай ажиллах менежменттэй бай. Нэн түрүүнд оторчидтой заавал очиж уулзаж байж төрөөс ямар үйлчилгээ шаардлагатай байгааг нарийн мэдэж ажлаа уялдуул” гэсэн даалгаврыг өглөө.
“Засгийн газрын хуралдаанаар Баянхонгор аймагт 430 тонн өвс, 760 тонн тэжээл хуваарилсан байсныг аймгийн удирдлагаас тавьсан хүсэлтийн дагуу өвс, тэжээл тус бүрийг 150 тонноор нэмж олгохыг энэ хуралдаанаар шийдэж байна” гэж Шадар сайд, Улсын онцгой комиссын дарга Ө.Энхтүвшин Баянхонгор аймгийн Онцгой комиссын хуралдааны үеэр мэдэгдлээ. 50 хувийн хөнгөлөлттэй үнээр олгож байгаа тэжээлийг малчдад худалдахдаа тэдний гар дээр бэлэн мөнгө байхгүйг бодолцож төлбөр дээр уян хатан хандахыг Шадар сайд Ө.Энхтүвшин Засаг дарга Г.Батжаргалд даалгалаа. Одоогоор Баянхонгор аймагт шүлхийн тохиолдол илрээгүй боловч хавар болж отроос малчид бууж ирэхээс өмнө шүлхийтэй мал бий, эсэхийг сайтар шалгах хэрэгтэй гэдгийг Шадар сайд Ө.Энхтүвшин анхааруулав. Түүнчлэн шүлхийгээс урьдчилан сэргийлэх вакцин ОХУ-аас оруулж ирэх ажлыг Засгийн газар түргэтгэж байгааг дуулгалаа гэж Шадар сайдын Ажлын албанаас мэдээллээ.