Month: November 2017

2017 оны 10 дугаар сарын 24-26-ны өдрүүдэд ОХУ-ын Москва хотноо зохион байгуулагдсан Пауэрлифтингийн Дэлхийн аварга шалгаруулах тэмцээнд Сүхбаатар аймгаас Монгол Улсаа төлөөлөн оролцсон багш, шавь хоёр Дэлхийн хошой медальтан боллоо.

WRPF холбооны Дэлхийн аварга шалгаруулах тэмцээнд Сүхбаатар аймгийн Шүүхийн шийдвэр гүйцэтгэх газрын Цагдан хорих газрын дарга, дэд хурандаа З.Мөнх-Эрдэнэ -100 кг-ын төрөлд аваргын алтан медаль, Онцгой байдлын газрын аврагч-гал сөнөөгч, дэд ахлагч М.Лувсанданзан -82,5 кг-ын нээлттэй төрөлд мөнгөн медаль хүртжээ.

Тэд 2016 оны Дэлхийн аварга шалгаруулах тэмцээнд анх удаа оролцож З.Мөнх-Эрдэнэ алт, М.Лувсанданзан мөнгөн медаль, хүртэж байсан юм. Тэдний хувьд дэлхийн аваргын хошой медальтнууд болж, спортын түүхэнд бичигдэхүйц томоохон амжилтын эзэд боллоо.

Пауэрлифтингийн Дэлхийн аварга шалгаруулах тэмцээн-2017 тэмцээнд 30 гаруй орны тамирчид оролцсон байна гэж Сүхбаатар аймгийн Онцгой байдлын газраас мэдээллээ.

УДЭТ-ын ээлжит уран бүтээл Оросын болон дэлхийн утга зохиолын ноён оргил хүн төрөлхтний суут ухаантнуудын нэг Лев Толстойн “Холстомер” алдарт туужаас сэдэвлэн бичсэн Марк Розовскийн Европ болон дэлхий дахинаа нэрд гарсан “Адууны түүх” хоёр бүлэгт жүжиг үзэгчдэд хүрэх гэж байна.

Эл бүтээлийг Н.Пүрэвдагвын орчуулга, УГЗ Б.Бямбабаярын хөгжим чимэглэл, зураач О.Баярмагнайн тайз декораци, УГЗ Б.Баатарын найруулгаар Монгол хөрсөнд буулган морио дээдэлдэг монголчуудад толилуулах юм.Энэхүү зохиол нь мориор төлөөлүүлж хүний нийгмийн үзэгдлийг гүн ухааны түвшинд ёгтлон харуулсан сонгодог бүтээл юм. Жүжигт адууны амьдралаар хүмүүний мөн чанар, амьдралын утга учрыг ёгтлон харуулна.
Нээлтийн тоглолт энэ сарын 24-нд болох бол ирэх сарын 03-ныг дуустал үзэгчдийн хүртээл болох юм.

Шинэ номондоо Дауны синдромыг тодорхойлохдоо “монголизм” гэдэг нэр томъёог ашигласан зохиолч эмэгтэй уучлалт гуйхын сацуу 20 мянган номоо зах зээлээс эргүүлэн татах шийдвэр гаргаснаа мэдэгдлээ.

“Би-Би-Си” телевизийн мэдээлснээр, Австралийн тэргүүлэх биохимичдын нэг, зохиолч Либби Уивер 21 дэх хромсом хос биш 3 болж хуваагдсанаар үүсдэг удамшлын санамсаргүй гажуудал буюу Дауны синдромыг “Би юу идэх ёстой вэ?” хэмээх шинэ номондоо тодорхойлон бичихдээ “монголизм” гэдэг нэр томъёог ашигласныхаа төлөө уучлалт гуйхын сацуу “Энэ үгийг одоо ч анагаах ухааны салбарт ашигласан хэвээр гэж би бодож байлаа. Мөн энэ үгийг доромж утгаар ашигладаг гэдгийг ч мэдлээ. Миний энэ алдаа хэн нэгэнд таагүй сэтгэгдэл төрүүлсэн байж магадгүй юм. Намайг үнэхээр уучлаарай” гэжээ.

“Монголизм” ба “монголойд” гэдэг нэр томъёог 1960-аад оны сүүлч үе хүртэл Дауны синдромыг тодорхойлоход ашигладаг байсан юм.

Жон Лэнгдон Хэйдон Даун гэдэг Их Британийн физикч төрөлхийн ургийн гажигтай хүмүүсийг судалж, оюуны хомсдолтой энэ хүмүүсийн өвчний оношийг тогтоож, “Дауны синдром” гэж өөрийн нэрээр нэрлэсэн түүхтэй. Ийм синдромтой хүмүүс нь монголжуу төрхтэй гэх үндэслэлээр “монголизм”, “монголойд” гэж нэрлэдэг байжээ. Харин эдгээр нэршлийг зохисгүй, монгол хүмүүсийг доромжилсон утга агуулж байна гэж Монгол Улсын төлөөлөгчид эсэргүүцлээ илэрхийлснээр 1965 онд ДЭМБ Дауны синдромыг “монголизм” гэж нэрлэхгүй байх шийдвэрийг гаргаж байжээ.

“Утааны эсрэг ээж аавууд” ТББ-аас агаарын бохирдлыг бууруулах чиглэлд төр, засгаас амласан амлалтаа биелүүлэхийг шаардаж жагсаал зохион байгуулахаар болжээ. Энэ талаар өнөөдөр тус байгууллагын удирдлагууд мэдээлэл хийлээ. Эхний жагсаал энэ сарын сарын 10-нд Нийслэлийн Засаг Даргын Тамгын Газрын гадна талбайд зохион байгуулах юм. Дараагийн жагсаал энэ сарын 17-нд Агаарын бохирдлыг бууруулах газар, 24-нд Хүний эрхийн үндэсний комиссын гадна талбайд тус тус болох ажээ.

“Утааны эсрэг ээж аавууд” ТББ-ын тэргүүн Ц.Пүрэвхүү хэлэхдээ: “Улаанбаатар хотын агаарын бохирдлыг бууруулахад Нийслэлийн Засаг Дарга тэргүүлэх үүрэгтэй оролцох ёстой. Тиймээс эхний жагсаалаа нийслэлийн удирдлагуудад хаяглаж байгаа юм. Нийслэлийн агаарын бохирдлын дийлэнх хувь нь гэр хорооллын утаанаас үүдэлтэй байна. Тиймээс гэр хорооллын дэд бүтцийг шийдвэрлэж, орон сууц барих замаар агаарын бохирдлыг бууруулах боломжтой. Нийслэлийн удирдлагуудын төлөвлөгөөний дагуу бол энэ онд 5000 айлыг дэд бүтцэд холбосон байх ёстой. Гэвч өнөөдрийг хүртэл зөвхөн газар чөлөөлөлтийн ажил хийлээ. Мөн “Орлогод нийцсэн орон сууц” хөтөлбөр, “Түрээсийн 6000 айлын орон сууц” зэрэг төслүүд хэрэгжүүлэх амлалт нь ч хэрэгжихгүй байна. Түүнчлэн 2017-2020 онд гэр хороололд 100 сервис центр байгуулна гэсэн. Өөрөөр хэлбэл, жилд 33-ыг байгуулах ёстой. Гэтэл энэ онд ердөө эхний таван байршилд л сервис центр барих шав тавилаа. Энэ мэт гэр хорооллын дэд бүтцийн асуудал шийдэгдэхгүй байгаа учраас барилга, орон сууц барих ажлууд ч хойшилж байгаа юм. Тиймээс дээр дурдсан ажлуудаа шуурхай зохион байгуулахыг нийслэлийн удирдлагуудаас шаардах болно” гэв.

Монголын төр ирэх онд утааг арилгахад нийт 28 тэрбум төгрөг зарцуулахаар төлөвлөсөн бол утаанаас болж өвчлөгсөд эмчилгээндээ 160 тэрбум төгрөг зарлагадах тооцоо байна хэмээн хэвлэлийн бага хурал зохион байгуулагчид онцолж байсан юм.

“Утааны эсрэг ээж аавууд” ТББ-ын зохицуулагч Т.Мандахжаргал хэлэхдээ: “Агаарын бохирдлыг бууруулах, гэр хорооллын иргэдийг гэр, байшингаа дулаалах, цахилгаан халаагуур худалдан авах боломжийг бүрдүүлэх зорилго бүхий “Ногоон зээлийн сан”-гийн үйл ажиллагаа хангалтгүй байна. Уг сан өнөөдрийг хүртэл иргэд зээл өгч чадахгүй байгаа юм. Харин арилжааны банкнууд иргэдэд 17-19 хувийн хүүтэй Ногоон зээл олгож байгаа. Нэг айл байшингаа дулаалж, цахилгаан халаагуур худалдан авах, хоёр тарифтай тоолуур, цахилгааны утас авахад 10 сая төгрөг шаардлагатай. Ингэж тооцвол иргэн нэг сая төгрөг аваад гурван жилийн хүүнд 6 сая төгрөг төлнө. Энэ нь маш өндөр хүү. Харин гадаадын орнууд Ногоон зээл маш бага хүүтэй байдаг. Тухайлбал Холбооны Бүгд Найрамдах Герман Улс жилд 1.7 хувийн хүүтэй байна. Тиймээс төр, засгаас ногоон зээлийн хүүг бууруулах чиглэлд анхаарах шаардлагатай байна” гэлээ.

Нийслэлээс эмнэлгийн хүүхдийн тасаг, цэцэрлэг, сургуулийн бага ангиудад агаар цэвэршүүлэгч тавихаар ажиллаж байгаа билээ. Энэ жил 200 ширхэг агаар цэвэршүүлэгчийг тавьсан гэж бидэнд ирүүлсэн албан бичигт дурдсан байсан. Нийслэлд агаар цэвэршүүлэгч шаардлагатай нийт 3500 орчим цэцэрлэг, бага ангиуд байна гэж багцаалдсан. Хотын захиргаа жилд 200 агаар цэвэршүүлэгчээр хангах хурдаар ажиллавал 17 жилийн дараа бүх хүүхдүүд агаар цэвэршүүлэгчтэй болно. Иймээс жилд 200 гэдэг дэндүү хангалтгүй байна. Энэ тоогоо нэмэхийг хотын даргаас шаардаж байна хэмээн “Утааны эсрэг ээж аавууд” ТББ-ын гишүүн Б.Эрдэнэ мэдээллийн үеэр дурдсан юм.

“Мир ном”-ын дэлгүүр намрын хямдралтай худалдааг энэ сарын 9-12-ны хооронд зохион байгуулах гэж байна. Тухайн дэлгүүрт худалдаалагдаж байгаа дотоодын болон гадаадын бүх ном, сэтгүүл 18-81 хувь хүртэл хямдрах аж. Хямдралтай худалдаа эхлэх өдөр шинээр хэвлэлтээс гарсан номууд худалдаалагдаж эхлэх бөгөөд эдгээр номууд мөн хямдралтай зарагдах юм.Уг хямдралтай худалдаа нь хэрэглэгчид өөрсдийн оюуны цэнгэл эдлэх номоо дараагийн хямдрал хүртэл бэлдэж авах боломж өгч байгаагаараа онцлог юм.

Худалдан авагчдаа хүлээлгэж ачаалал үүсгэхгүйн тулд нийт 6 касс ажиллах аж. Жирэмсэн, өндөр настан, 3-с доош насны хүүхэдтэй хүн болон хөгжлийн бэрхшээлтэй хүнд зориулж тусгайлан нэг касс үйлчлэх юм байна. Супер хямдралтай худалдаан Гранд плазагийн 5 давхарт байрлах “Мир ном”-ын төвд зохион байгуулах юм байна. Бусад “Мир ном”-ын салбар дэлгүүрүүд хямдрал зарлагдсан дөрөв хоногийн хугацаанд ажиллахгүй ажээ.