Month: November 2017

Нийслэлийн Засаг дарга бөгөөд Улаанбаатар хотын захирагчийн үйл ажиллагааны хөтөлбөрт технологийн шийдлийг ашиглан иргэдэд нээлттэй “Ухаалаг хот бий болгоно” гэсэн зорилт дэвшүүлсэн. Уг ажлын хүрээнд төрийн үйлчилгээг цахим системд нэвтрүүлэх байнгын ажиллагаатай ажлын хэсгийг байгуулсан бөгөөд энэ талаар нийслэлийн Мэдээллийн технологийн газрын дарга О.ЧИНЗОРИГТОЙ ярилцлаа.

-Төрийн үйлчилгээг иргэдэд ойртуулах зорилгоор цахим системийг нэвтрүүлэх ажлын хэсэг байгуулсан. Энэ талаар мэдээлэл өгнө үү?

-Нийслэлийн Засаг дарга бөгөөд Улаанбаатар хотын захирагч нь хотынхоо 1.3 сая иргэнд төрийн үйлчилгээг хүндрэл чирэгдэлгүй үзүүлэхийн тулд энэ ажлын хэсгийг байгууллаа. Нийслэлээс үзүүлж байгаа төрийн үйлчилгээг цахимжуулах, Нийслэлийн засаглалын үйл ажиллагааг мэдээллийн технологийн шийдлүүдийг ашиглан сайжруулах, нийслэлийн иргэдийг ил тод мэдээллээр хангах бодлогыг боловсруулж хэрэгжүүлэх үүрэг бүхий ажлын хэсэг юм.

– Мэдээллийн технологийн чиглэлээр ямар ямар ажил хэрэгжүүлж байна вэ?

-Нийслэлийн орон зайн дундын мэдээллийн санг бий болгох томоохон ажил ид өрнөж байна. Нийслэлийн харьяа байгууллагуудад төрөл бүрийн мэдээллүүд байдаг боловч энэ мэдээллүүдийг нэгтгэн харж дүн шинжилгээ хийх боломж хязгаарлагдмал байна. Үүнээс шалтгаалан судалгаа шинжилгээ муутайгаар шийдвэр гаргах явдал байдаг. Үүнийг шийдвэрлэх зорилгоор орчин үеийн хотуудын ашиглаж байгаа газарзүйн мэдээллийн системд суурилсан мэдээллийн сантай болж байгаа юм. Энгийнээр тайлбарлавал, орон зайн буюу газарзүйн байршилтай холбоотой мэдээллийг бусад нийгэм, эдийн засгийн статистикийн тоон мэдээллүүдтэй хамтад нь харж хотын удирдлагууд дүн шинжилгээ судалгаанд суурилсан шийдвэр гаргахад дэмжлэг үзүүлэх, иргэдийг нээлттэй мэдээллээр хангах гээд олон давуу талыг бий болгоно.

– Авто тээврийн хэрэгсэлтэй холбоотой аппликейшн нэвтрүүлэх гэж байгаа талаар тодруулбал?

-Нийслэлд өдөр тутмын хөдөлгөөнд оролцож байгаа 460 мянга орчим тээврийн хэрэгсэл байна. Тээврийн хэрэгсэлтэй холбоотой асуудлууд олон байдаг шүү дээ. Тухайлбал, жолооч, тээврийн хэрэгсэл, даатгал, оношлогоо, торгууль, татвар осол, мэдээж замын түгжрээ, зогсоол агаарын бохирдол такси, нийтийн тээвэр гэх мэт олон асуудлыг зохицуулах шаардлага үүсч байна. Иймд Нийслэлийн Мэдээллийн технологийн газраас иргэдийн амьдралын өдөр тутмын хэрэглээ болсон авто тээврийн хэрэгслийн мэдээллийн дундын санг бий болгож тээврийн хэрэгсэлтэй холбоотой мэдээ мэдээллийг иргэд олон нийтэд нэг дороос өгөх боломжийг бүрдүүлэх, үйлчилгээг хурдан шуурхай тэгш хүртээмжтэй хүргэхээр SmartCar цахим системийг нэвтрүүлэхэд бэлэн болоод байна. Уг цахим систем болон ухаалаг утасны аппликейшнээр дамжуулан эзэмшиж буй тээврийн хэрэгслийн мэдээллийг хянах, aгаарын бохирдлын татвар, зам ашигласны төлбөрөө орон зайг үл хамааран онлайнаар төлөх боломжтой болж байгаа юм.

– Нийслэлийн хөрөнгө оруулалтаар ямар ажил хийж байна вэ?

-Нийслэлийн төрийн үйлчилгээнд Төрийн мэдээлэл солилцооны “ХУР” системээр дамжуулан нэгэн шинэ системийг нэвтрүүлж эхэллээ. Иргэд төрийн үйлчилгээг авах гэж өөр төрийн байгууллагаас лавлагаа хуулбар авдаг, чирэгдэл үүсдэг асуудлыг шийдэх зорилготой юм. Нийслэлийн үйлчилгээний нэгдсэн төвөөс үйлчилгээ авч буй иргэд цахим үнэмлэхтэйгээ байхад зарим төрлийн лавлагааг хуулбар нотариат шаардахгүй төрийн үйлчилгээг түргэн шуурхай авах, хөрөнгө мөнгө, цаг хугацаа хэмнэх боломжтой болж байна. Мөн нийслэлийн хөрөнгө оруулалтаар хийж байгаа бүтээн байгуулалтыг иргэд олон нийт хянах, дугаар хорооны иргэн манай хороонд эсвэл дүүрэгт нийслэлээс ямар бүтээн байгуулалт хийх гэж байгаа, ямар төсөвтэй, ямар гүйцэтгэгч гүйцэтгэж байгаа, ажлын явц ямар байгаа зэрэг дэлгэрэнгүй мэдээллийг харж болох орон зайн мэдээллийн системд суурилсан Шилэн тендер системийг хөгжүүлж 2018 оны нэгдүгээр сарын 1-нээс олон нийтэд танилцуулахаар ажиллаж байна.

-Нийслэлийн албан хаагчид тоон гарын үсэг хэрэглэж байна гэж мэдээлэл авсан. Энэ талаар тодруулбал?

-Мэдээлэл технологийн салбар хурдацтай хөгжиж байгаа энэ үед интернэт орчинд төрийн үйлчилгээ авах, гэрээ хэлцэл хийх болон албан бичиг илгээх, хүлээн авах зэрэг олон төрлийн хэрэгцээ үүсч байна. Эдгээр хэрэгцээг хангахад цахим орчинд холбогдсон хүмүүс хоорондын итгэлцлийг бий болгох, мэдээллийг аюулгүй дамжуулах, нууцлан хамгаалах, бүрэн бүтэн байдлыг хангах, цахим орчинд иргэнийг таних, аливаа үйлдэл, хэлцэл, баримт бичгийн эзэн, эх сурвалжийг тогтоох, түүнээсээ үл татгалзах шинжийг хангах зайлшгүй шаардлага тулгаран гарч байна. Иймд нийслэлийн нутгийн захиргааны байгууллагуудаас үзүүлдэг үйлчилгээ, албан бичиг, иргэд аж ахуйн нэгжүүдэд үзүүлэх үйлчилгээнд тоон гарын үсгийг нэвтрүүллээ. Нийслэлийн нутгийн захиргааны байгууллагуудад анх удаа тоон гарын үсэг ашиглах болсноор албан хаагчид албан хэргийг цахимаар хөтөлж эхлээд байна. Тоон гарын үсгийг нэвтрүүлж цаасан бичиг баримт солилцох асуудлыг цахимаар шийдсэн нь цаг хугацаа, хөрөнгө мөнгө хэмнэсэн шийдэл юм. Цаашид тоон гарын үсгийг зөвхөн албан хэрэг хөтлөлтөөр зогсохгүй төрийн үйлчилгээнд хэрэглэх нь төрийн үйлчилгээ ухаалаг болоход томоохон дэвшил авчирна. Түүнчлэн тоон гарын үсгийг нэвтрүүлснээр үйл ажиллагааны зардал, бичиг хэрэг, шуудан хүргэлт, архивын зардал багасгах, нийслэлээс үзүүлж буй үйлчилгээний шийдвэрлэлтийн явц хурдсах, үйлчилгээний хүртээмж чанар сайжирч байгаа юм. Цаашид нийслэлээс үзүүлж буй үйлчилгээг онлайнаар үзүүлэх боломжтой болно.

-Төрийн үйлчилгээг иргэдэд хүргэх анхан шатны нэгж нь хороо байдаг. Нийслэлийн 9 дүүргийн хороодод төрөөс үзүүлж байгаа үйлчилгээг нэвтрүүлэх ажил ямар шатандаа явж байна вэ?

-Нийслэлийн засаг захиргааны анхан шатны нэгж болох хороодоос иргэдэд төрийн үйлчилгээг түргэн шуурхай үзүүлэх, үйлчилгээний нэр төрлийг нэмэгдүүлэх, нутгийн захиргааны байгууллагууд хоорондоо өндөр хурдны сүлжээгээр мэдээлэл солилцох, орчин үеийн ухаалаг тоног төхөөрөмж, системийн шийдлүүдийг нэвтрүүлэх, мэдээ мэдээллийг цаг алдалгүй, түргэн шуурхай авах боломжийг НМТГ бүрдүүлэн ажиллаж байна. Тухайлбал, Баянгол дүүргийн Засаг даргын Тамгын газар болон 23 хороог нийслэлийн нэгдсэн өндөр хурдны шилэн кабелийн сүлжээнд холбосноор өндөр хурдтай, найдвартай, түргэн шуурхай үйлчилгээ авах боломжоор иргэдийг хангалаа. Ингэснээр Оюуны өмч, улсын бүртгэлийн ерөнхий газар, нийслэлийн Газрын алба, нийслэлийн Цагдаагийн газар, нийслэлийн Төрийн сан, нийслэлийн Эрүүл мэндийн газар, нийслэлийн Мэдээллийн технологийн газар зэрэг зургаан байгууллагаас үзүүлж буй үйлчилгээг Баянгол дүүргийн 23 хороонд шууд үзүүлэх боломж бүрдсэн.

-Цахим сүлжээг нэвтрүүлсэн нь сайн боловч мэдээллийн аюулгүй байдлыг хамгаалах нь чухал. Энэ талаар юу хэлэх вэ?

-Нийслэлийн нутгийн захиргааны байгууллагуудын цахим мэдээллийн сангийн аюулгүй байдал, найдвартай ажиллагааг хангах, мэдээлэл солилцох, төрөөс иргэдэд үзүүлэх үйлчилгээг түргэн шуурхай, нэг цэгээс үзүүлэх нөхцөлийг бүрдүүлэх зорилгоор нийслэлийн Дата төвийг 2011 онд байгуулсан бөгөөд сервер, систем болон гадаад, дотоод сүлжээ, шилэн кабелийн үндсэн тоног төхөөрөмжүүдийн өдөр тутмын хэвийн найдвартай ажиллагааг хариуцан ажиллаж байна. Иймээс мэдээллийн аюулгүй байдлыг хангахад онцгой анхаарч, хадгалах тоног төхөөрөмжийн хүчин чадлыг нэмэгдүүлэх, сүлжээ, серверийн хэвийн найдвартай ажиллагааг хангах стандартын шаардлага хангасан өрөөний зай багтаамжийг нэмэгдүүлэх ажлыг зохион байгуулж хэт шахуу байрласны улмаас нэмэлт тоног төхөөрөмж суурилуулах боломжгүй, хөргөлт, чийгшүүлэгч систем бүрэн хүчин чадлаараа ажиллахгүй, засвар үйлчилгээ үзүүлэхэд хүндрэлтэй байсан зэрэг асуудлыг шийдвэрлэсэн.

Нийслэлийн удирдах ажилтны ээлжит шуурхай зөвлөгөөн өнөөдөр боллоо. Хуралдааны эхэнд өнгөрсөн зөвлөгөөнөөр нийслэлийн Засаг даргын өгсөн үүрэг даалгавар болон түүний биелэлтийн талаар НЗДТГ-ын Хяналт шинжилгээ, үнэлгээний хэлтсийн дарга Х.Гантулга танилцууллаа.

Танилцуулгын дараа нийслэлийн Засаг даргын Тамгын газрын Төрийн захиргааны удирдлагын хэлтсийн дарга Ү.Ганболд нийслэлийн нутгийн захиргааны зарим байгууллагын шинээр томилогдсон удирдах албан тушаалтнуудыг танилцууллаа.

Нийслэлийн цагдаагийн газрын дарга, цагдаагийн хурандаа Д.Ядамдорж “Өнгөрсөн 14 хоногийн хугацаанд гэмт хэрэг, зөрчил, зам тээврийн ослын шинжтэй 26302 дуудлага, мэдээлэл хүлээн авсан нь өмнөх 14 хоногтой харьцуулахад 1.1 хувиар, гэмт хэргийн шинжтэй 1021 үйлдэл бүртгэгдсэн нь 8.8 хувиар тус тус буурсан үзүүлэлттэй байна. Явган эргүүлийн 2588 чиглэлд 4168 цагдаагийн алба хаагч, олон нийтийн цагдаа, сонсогч, машинт эргүүлд 56 автомашинтай 112 офицер, цагдаа үүрэг гүйцэтгэн бусдын амгалан тайван байдлыг алдагдуулсан 1841 иргэнийг саатуулж, биеэ авч явах чадваргүй 294 иргэнийг ар гэр асран хамгаалагчид нь хүлээлгэн өгч, 78 гэмт хэргийг халуун мөрөөр нь илрүүлж ажилласан” гэж танилцуулав.

“Замын цагдаагийн албаны Мэдээлэл шуурхай удирдлагын хэлтэст 3355 дуудлага мэдээлэл ирснээс хүн гэмтсэн хэргийн шинжтэй 112, зөрчлийн шинжтэй 966 дуудлагад очиж хойшлуулшгүй ажиллагаа явуулан, 1078 ослыг материалжуулан шалгаж байна. Гудамж замд хийсэн шалгалтаар согтуугаар тээврийн хэрэгсэл жолоодсон зөрчил өмнөх оны мөн үетэй харьцуулахад 9.4 хувиар буурсан байна” гэж Замын цагдаагийн албаны Замын хөдөлгөөнийг зохицуулах хэлтсийн дарга хурандаа Б.Батболд хэллээ.

“Хөгжлийн бэрхшээлтэй иргэдийн хөдөлмөр эрхлэлтийн байдалд хийсэн шалгалтад 636 аж ахуйн нэгж байгууллага хамрагдсан. Эдгээрээс 192 нь хөгжлийн бэрхшээлтэй иргэнийг зохих орон тоонд ажиллуулаагүй, ажлын байрны төлбөрийг төлөөгүй байна. Улсын байцаагчийн 116 акт үйлдэж 348 сая төгрөгийн нөхөн төлбөр тавьснаас 97 байгууллагад 277 сая төгрөгийг хөгжлийн бэрхшээлтэй иргэдийн хөдөлмөр эрхлэлтийн санд төвлөрүүлсэн. Мөн 125 аж ахуйн нэгж байгууллагад 25.4 сая төгрөгийн захиргааны хариуцлага ногдуулж, 100 аж ахуйн нэгжид 6 заалт бүхий улсын ахлах байцаагчийн зөвлөмжийг хүргүүлсэн” гэж Нийслэлийн Мэргэжлийн хяналтын газрын дарга Л.Эрдэнэчулуун ярилаа.

Зөвлөгөөний төгсгөлд Нийслэлийн Засаг дарга бөгөөд Улаанбаатар хотын захирагч С.Батболд “Засгийн газраас гаргасан “Сахилга хариуцлага, дэг журмыг чангатгах тухай” албан даалгаврыг хэрэгжүүлж, үр дүнг сар бүрийн 5-ны дотор тайлагнаж ажиллах, төсвийн сахилга батыг сайжруулж, байгууллагын үргүй зардлыг багасгаж, нийслэлийн өмчийн үр ашгийг дээшлүүлэх, дотоод хяналт шалгалтаа сайжруулж, үр дүнг шаардаж ажиллах нь зүйтэй” гээд Нийслэлийн эдийн засаг нийгмийг 2017 онд хөгжүүлэх үндсэн чиглэлээс хөрөнгө шаардагдахгүй ажлуудыг эрчимжүүлж ажиллах, он дуустал үлдэж буй хугацаанд төсвийн орлого бүрдүүлэх ажлыг эрчимжүүлэн, төсвийн орлогын ногдол төлөлтийг бүрэн хийж, өр авлагыг барагдуулах, газрын дуудлага худалдаа, өмч хувьчлалыг шуурхай зохион байгуулснаар төсөвт төвлөрөх орлогын бүрдүүлэлтийг ханган ажиллах, нийслэлийн нутгийн захиргааны байгууллага, албан тушаалтанд хандаж иргэд, аж ахуйн нэгжээс ирүүлсэн албан бичиг, өргөдөл, гомдлын шийдвэрлэлтэд бүх шатанд анхаарч, дутагдал гаргасан холбогдох албан тушаалтанд тухай бүр хариуцлага тооцож ажиллахыг холбогдох албан тушаалтнуудад үүрэг болгов гэж нийслэлийн Засаг даргын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн Хот тохижилтын газрынхан өнөө өглөө 05.00 цагаас эхлэн хариуцсан нийтийн эзэмшлийн гудамж талбай, авто зам, явган замын цасыг түргэн шуурхай арилгах арга хэмжээг авахаар нийт 37 машин техник, 360 хүний бүрэлдэхүүнтэй ажиллаж байна.

Өнөөдөр 10.00 цагийн байдлаар давс бодис цацах зориулалтын 11 камаз машинаар Энхтайваны өргөн чөлөө, Чингисийн өргөн чөлөө, Нийслэл хүрээ өргөн чөлөө, Зайсангийн гудамж, Баянхошуу, Толгойт, Дүнжингарав, Наадамчдын зам, Баянзүрхийн товчоо зэрэг газарт 67 тонн бодис цацав. Жанжин Д.Сүхбаатарын нэрэмжит талбайн цас цэвэрлэгээнд 3 машин, явган хүний замын цэвэрлэгээнд бичил механик шүүр, цас үлээгч төхөөрөмжүүдийг ашиглаж байна гэж нийслэлийн Хот тохижилтын газраас мэдээллээ.

Нийслэлийн Засаг даргын хэрэгжүүлэгч агентлаг Нийслэлийн Залуучуудын хөгжлийн газар, Нийгмийн Шинжлэх Ухааны Залуу эрдэмтдийн холбоо төрийн бус байгууллагатай хамтран оны шилдэг бүтээл шалгаруулах “Хүрэлтогоот-2017” эрдэм шинжилгээний бага хурлыг 2017 оны 11 дүгээр сарын 04-ний өдөр Одон орон судлалын Хүрэлтогоот цогцолборт зохион байгууллаа.

Тус хурлыг нээж Нийслэлийн Залуучуудын хөгжлийн газрын дарга С.Сүх-Очир, Монголын Залуу Эрдэмтдийн Холбооны тэргүүн Д.Баттогтох, Ниигмийн Шинжлэх Ухааны Залуу Эрдэмтдийн Холбооны тэргүүн Б.Пүрэвсүрэн нар үг хэлэв.

Нийслэлийн Залуучуудын хөгжлийн газрын дарга С.Сүх-Очир “Залуучуудын хөгжил судлалын залуу эрдэмтэн, судлаачдын судалгааны ажил, тоог нэмэгдүүлэх, эрдэмтдийн залгамж халааг бэлтгэх, шинжлэх ухааны салбарт өндөр технологи, инновацийн бүтээлч тогтолцоог бий болгох, залуу эрдэмтдийн эрдэм шинжилгээний бүтээл, судалгааны ажлыг дэмжин олон нийтэд таниулах, төсөл хөтөлбөрт хамруулах боломжийг бий болгоход томоохон хувь нэмэр оруулж буй “Залуу эрдэмтдийн холбоо” ТББ-аас жил бүр уламжлал болгон зохион байгуулдаг “Хүрэлтогоот-2017” эрдэм шинжилгээний бага хурлыг хамтран зохион байгуулж байна.

Энэ оноос тус эрдэм шинжилгээний бага хурлын нийгмийн ухааны салбар хуралдаанд “Залуучууд судлал”-ыг тусгай чиглэл болгон оруулах болсныг Та бүхэнд уламжлахад таатай байна. Энэ жил нийгмийн ухааны салбар хуралдаанд илтгэлээ хэлэцүүлж буй 14 залуу судлаачдад Нийслэлийн Залуучуудын хөгжлийн газрын нэрэмжит мөнгөн шагнал, мэдээллийн технологийн чиглэлийн нарийн мэргэжлийн хоёр сургалтад үнэ төлбөргүй суух эрхийн бичгээр шагналаа” хэмээв.

Тус хуралд Залуучууд судлалын хөгжлийн чиг хандлага сэдэвт илтгэлийг МУИС-ийн Социологи Нийгмийн ажлын тэнхимийн багш доктор П.Цэрэнбазар танилцууллаа. , МУИС-ийн Монгол хэл, хэлшинжлэлийн тэнхимийн багш, доктарант Т.Эрдэнэ-Очир “Хэлний судлалын үүднээс метофорыг харьцуулан судлах арга зүй” сэдвээр илтгэл хэлэлцүүлж нэгдүгээр байрт, ХСИС-ийн докторант Б.Мөнхдорж “Хорих ялыг дүйцүүлэн тооцоход математик, статистикийн аргачлал ашигласан нь” сэдэвт илтгэл хэлэлцүүлж хоёрдугаар байрт, ШУТИС-ийн докторант М.Бурмаа “Ухаалаг хотын түвшний үнэлгээ” сэдэвт илтгэл хэлэлцүүлж гуравдугаар байрт тус тус шалгарав.

Нийт 14 илтгэл хэлэлцүүлснээс магистр Н.Батзоригийн “Моргейжийн зээлийн социал үр дагавар, зээлдэгчдэд үзүүлж буй нөлөө”, докторант Б.Дөлгөөний “Нийтийн тээврийн үйлчилгээний эдийн засагт гүйцэтгэх үүрэг, нөлөөлөх хүчин зүйл”, зэрэг илтгэлүүд сонирхол татахуйц, дэвшүүлсэн асуудлыг нарийвчлан судалж, хэрэгжүүлж болохоор давуу талтай байлаа. Дашрамд хэлэхэд эхний хоёр байрт шалгарсан илтгэгчид БСШУСЯ-ны сайдын нэрэмжилт мөнгөн шагнал болох дөрвөн сая төгрөгөөр шагнуулж, судалгаа шинжилгээний ажилдаа зарцуулахаар болсон юм.

Цаашид Нийслэлийн Засаг даргын хэрэгжүүлэгч агентлаг Нийслэлийн Залуучуудын хөгжлийн газар залуу эрдэмтдийг дэмжих, залуучууд судлалыг хөгжүүлэхэд онцгой анхаарч ажиллах болно гэж нийслэлийн Залуучуудын хөгжлийн газраас мэдээллээ.

“Автотээврийн үндэсний төв” ТӨҮГ–аас “11.00 цагийн байдлаар хаагдсан зам даваа байхгүй байна” гэж мэдээллээ.

Тус төвөөс орон нутгийн автотээврийн төвүүд, холбогдох байгууллагуудтай шуурхай холбогдож замын нөхцөл байдлын талаар мэдээг тогтмол авч байгаа аж. Гэхдээ хүчтэй салхи шуурганы үеэр авто замын зорчих хэсэгт хальтиргаа гулгаа үүсч, хальтиргааны улмаас зам тээврийн осол гарах, тээврийн хэрэгсэл олноор замд саатах, холбоо тасрах, зорчигчдын амь нас, эрүүл мэндэд эрсдэл үүсэх магадлалтайг сэрэмжлүүлэв.

Мөн ард иргэд онцын шаардлагагүй бол хувийн тээврийн хэрэгслээр зорчихгүй байх, зорчих тохиолдолд хурдаа зөв тохируулан замын хөдөлгөөнд анхаарал болгоомжтой оролцох, тээврийн хэрэгслийн техникийн бүрэн бүтэн байдлыг хангах, хамгаалах бүсээ тогтмол хэрэглэж, аюулгүй байдлаа сайтар ханган хөдөлгөөнд оролцох, мэргэшсэн жолоочтой, 24 цагийн хяналттай тээврийн хэрэгслийг сонгон үйлчлүүлэхийг анхааруулж байна.

Засгийн газрын өнгөрсөн долоо хоногийн хуралдаанаар ЦЕГ-ын даргаар Тэргүүн комиссар С.Баатаржавыг томилсон билээ. Хууль сахиулах их сургуулийн захирлаар ажиллаж байсан тэрбээр цагдаагийн байгууллагад 30 гаруй жил ажиллаж байгаа юм. Түүнчлэн Хууль Сахиулах Их сургуулийн дэд дарга, хурандаа Д.Ядамдоржийг Цагдаагийн Ерөнхий газрын дэд бөгөөд Нийслэлийн цагдаагийн газрын даргаар, ЦEГ-ын тэргүүн дэд даргаар цагдаагийн хурандаа Р.Отгонжаргалыг, Сүхбаатар дүүргийн Цагдаагийн хоёрдугаар хэлтсийн дарга асан цагдаагийн хурандаа З.Дашдавааг ЦEГ-ын дэд даргаар томилсон. Харин Нийслэлийн Цагдаагийн газрын дарга асан цагдаагийн хурандаа Ж.Эрдэнэболдыг ЦEГ-ын Санхүү аж ахуйн газрын даргаар, ЦEГ-ын тэргүүн дэд дарга асан цагдаагийн хурандаа П.Батбаатарыг Улсын мөрдөн байцаах газрын дарга болгоод буй. Мөн Баянгол дүүргийн цагдаагийн хоёрдугаар хэлтсийн дарга, дэд хурандаа П.Энхбаярыг Эрүүгийн цагдаагийн газрын даргаар тус тус томилсон билээ. Тэгвэл Монголын цагдааг удирдахаар болсон дарга нарыг хэн бэ гэдгийг уншигч та бүхэнд танилцуулж байна.

ЦЕГ-ЫН ДАРГА С.БААТАРЖАВ

Тэргүүн комиссар С.Баатаржавын хувьд 1985 оноос Монголын цагдаагийн байгууллагад ажилласан туршлагатай. Жирийн мөрдөгчөөс агентлагийн дарга болтлоо тасралтгүй ажилласан гэдгийг эх сурвалжууд хэлж байв. Тэрбээр ОХУ-ын Дотоод явдлын яамны сургуулийг төгсч ирээд анх Төв аймгийн Цагдаагийн газарт мөрдөн байцаагчаар ажлынхаа гарааг эхэлж байсан түүхтэй. Удалгүй Төв аймагтаа эрүүгийн төлөөлөгч, ахлах эрүүгийн төлөөлөгчөөр хэдэн жил ажилласан юм. С.Баатаржав Дархан-Уул аймгийн Засаг даргын дэргэдэх Цагдаагийн газрын дэд даргаар ажиллаж байсан. Үүнээсээ албан тушаал ахиж Цагдаагийн ерөнхий газрын Дотоод хяналт, шалгалтны хэлтсийн даргаар томилогдож Улаанбаатарт ирсэн байдаг. Мөн эргээд Дархан-Уул аймгийн цагдаагийн даргаар очсон юм. Үүний дараа Нийслэлийн засаг даргын дэргэдэх цагдаагийн газрын дарга, Улсын мөрдөн байцаах газрын дарга, Сэлэнгэ аймгийн Засаг даргын дэргэдэх цагдаагийн газрын дарга, Цагдаагийн ерөнхий газрын тэргүүн дэд дарга, Цагдаагийн ерөнхий газрын дарга, Хууль сахиулахын их сургуулийн захирлаар тус тус ажиллаж байсан билээ. С.Баатаржавыг Хууль зүйн сайд Ц.Нямдоржын ойрын хүн гэх мэдээлэл байдаг. Гэхдээ эгэл жирийн цагдаа нарын ажлыг ойлгож, зовлон бэрхшээлийг мэдэх хүн гэдгийг уулзсан хүн бүр хэлж байв. С.Баатаржав өмнө нь ЦЕГ-ын даргаар ажиллаж байхдаа олон зуун цагдааг орон сууцанд хямд үнээр оруулж байсан гэдгээрээ бусдынхаа дунд нэлээд ам сайтай байдаг юм байна лээ.

НИЙСЛЭЛИЙН ЦАГДААГИЙН ДАРГА Д.ЯДАМДОРЖ

Д.Ядамдорж дэд комиссар Өвөрхангай аймгийн Баян-Өндөр суманд төрсөн.Аймгийнхаа нэгдүгээр арван жилийг 1982 онд төгсч, 1983-1987 онд Нийгмийг аюулаас хамгаалах яамны Цэргийн дээд сургууль төгссөн юм. Сургуулиа төгсөөд Өвөрхангай аймагтаа хэсгийн төлөөлөгчөөр ажлынхаа гарааг эхэлж байсан аж. Д.Ядамдорж ахлах төлөөлөгчөөр есөн жил ажиллаад Булган аймгийн цагдаагийн хэлтэст эрүүгийн ажил эрхэлсэн дэд дарга, Сэлэнгэ аймгийн Мандал суманд сум дундын цагдаагийн хэлтсийн даргаар тус тус ажиллаж байжээ. Тэндээсээ Дорнод аймгийн цагдаагиин хэлтсийн даргаар томилогдож очсон байна. Дараа нь ОХУ-ын Дотоод явдлын яамны академид гурван жил суралцсан. Тэндээсээ Замын цагдаагийн дарга болон дэвшиж байсан. Замын цагдаагийн хэлтэст ажиллаж байхдаа эмх замбараагаа алдаад байсан нийтийн тээврийн салбарыг эмх журманд нь оруулж өгсөн. Мөн байнга дүрэм зөрчдөг жолооч нарт хатуухан арга хэмжээ авч байсан билээ. Д.Ядамдорж ЦЕГ-ын дэд даргаар ажиллаж байсан туршлагатай нэгэн юм. Сүүлд ШШГЕГ-ын даргаар томилогдож ажилласан. Тэрбээр ажлаа өгөх болсон шалтгаан нь цагдан хорих төвд Ашигт малтмал газрын тосны газрын дарга Д.Амарсайхан амь насаа алдсан. Үүнтэй холбоотойгоор “Хэн нэгэн хариуцлага хүлээх бол би хариуцлага хүлээхэд бэлэн байна” хэмээн мэдэгдэж байсан.

Үүний дагуу түүнийг ШШГЕГ-ын даргын албан тушаалаас буулгаж байсан. Үүний дараа Баянзүрх дүүргийн цагдаагийн нэгдүгээр хэлтсийн даргаар ажиллаж байгаад ХСИС-ийн дэд захирал болсон билээ. Д.Ядамдорж мөн л насаараа цагдаагийн байгууллагад ажиллаж байсан нэгэн. Тэрбээр Замын цагдаа, ЦЕГ-т ажиллаж байхдаа “Сандлаасаа босдоггүй, өрөөнөөсөө гардаггүй дарга нарыг ажлыг нь хийлгэдэг болно” хэмээн мэдэгдэж шуугиан тарьж байсан билээ.

ЦЕГ-ЫН ДЭД ДАРГА Р.ОТГОНЖАРГАЛ

ЦEГ-ын тэргүүн дэд даргаар томилогдсон цагдаагийн хурандаа Р.Отгонжаргалын хувьд Говь-Алтай аймгийн Чандмань сумынх. Монголын үндэсний бөхийн холбооны тэргүүн Р.Нямдоржийн дүү гэдгээр нь хүмүүс андахгүй. Улсын мөрдөн байцаах газарт Эдийн засгийн гэмт хэрэгтэй тэмцэх хэлтэст ажиллаж байхдаа нэлээд хэл аманд өртөж байсан. 2008 оны долдугаар сарын 1-ний хэрэгтэй холбоотойгоор О.Магнай, Б.Жаргалсайхан нарыг цагдан хорьж, мөрдөн байцаалт хийж байсан юм. О.Магнай ганц худагт хоригдож байгаад биеийнх нь байдал муудаж, эмнэлэгт хүргэгдэж байсан. Үүнээс үүдэлтэйгээр Иргэний хөдөлгөөний гишүүд Р.Отгонжаргалд нэлээд таагүй ханддаг. Мөн “Дедиктив” гэх нэртэй нэвтрүүлэг гарсантай холбоотойгоор прокурорт гомдол гаргаж, нэр төрөө сэргээлгэж байсан түүхтэй. Р.Отгонжаргал “Улаанбаатар” хэвлэх үйлдвэрийн хувьчлалтай холбоотой хэрэгт мөрдөн байцаагчаар ажиллаж байсан. Н.Энхбаяр болон, дэд сайд М.Тулга нарт холбогдох хэргийг шалгаж байсан юм. Ер нь УМБГ-ын эдийн засгийн гэмт хэрэгтэй тэмцэх хэлтэст ажиллаж байхдаа монголын томоохон гэгдэх эдийн засгийн гэмт хэргийг шалгаж байсан. ЦЕГ-ын тусгай ажиллагааны газрын даргаар ажиллаж байгаад ийнхүү дээшээ албан тушаал ахиад байгаа юм.

УДАМ ДАМЖСАН ЦАГДАА Ж.ЭРДЭНЭБОЛД

ЦEГ-ын Санхүү аж ахуйн газрын даргаар томилогдож байгаа хурандаа Ж.Эрдэнэболд удам дамжсан цагдаа. Түүний аав Эрүүгийн цагдаагийн газрын дарга, Улсын ерөнхий прокурорын орлогчоор ажиллаж байсан Ц.Жамъянсэнгээ агсны хүү. Цагдаагийн анхан шатны нэгжээс эхлээд ЭЦГ-ын Эдийн засгийн гэмт хэрэгтэй тэмцэх хэлтэс, ЦЕГ-ын Гадаад харилцааны хэлтэс, Баянгол дүүргийн Цагдаагийн I хэлтэс, Улаанбаатар хотын Цагдаагийн газрын Гэмт хэрэгтэй тэмцэх асуудал хариуцсан дэд дарга, Улаанбаатар хотын Цагдаагийн газрын даргаар ажиллаж байгаа залуухан хурандаа нарын нэг.

МӨРДӨН БАЙЦААХ ГАЗРЫН ДАРГА П.БАТБААТАР

Цагдаагийн ерөнхий газрын дэд даргаар ажиллаж байгаад Мөрдөн байцаах газрын даргаар томилогдон ажиллаж байгаа хурандаа П.Батбаатар 1974 онд төрсөн, дээд боловсролтой, хуульч мэргэжилтэй нэгэн. Нийслэлийн 24 дүгээр сургуулийг төгссөн тэрбээр 1993-1996 онд Цагдаагийн дээд сургуулийг төгссөн юм. Сонгинохайрхан дүүрэг дэх цагдаагийн хэлтсийн Мөрдөн байцаах тасагт Мөрдөн байцаагч, Мөрдөн байцаах газрын Онц хүнд гэмт хэрэг мөрдөх хэлтэст ахлах мөрдөн байцаагчаар ажиллаж байсан. Мөн Сүхбаатар дүүргийн Цагдаагийн хэлтсийн Мөрдөн байцаах тасгийн дарга, Мөрдөн байцаах газрын Эрэн сурвалжлах, хулгайн гэмт хэрэг мөрдөх хэлтсийн дарга болон дэвшиж байсан. 2012-2014 онд Замын цагдаагийн газрын Дэд бөгөөд, Гэмт хэрэгтэй тэмцэх газрын даргаар ажиллаж байгаад Чингэлтэй дүүрэг дэх цагдаагийн нэгдүгээр хэлтсийн дарга болсон байдаг. Үүний дараа 2016 оны есдүгээр сараас ЦЕГ-н Тэргүүн дэд даргаар томилогдон ажилласан. П.Батбаатар онц хүнд гэмт хэрэгтэй тэмцэх хэлтэс, эдийн засгийн гэмт хэрэгтэй тэмцэх хэлтэст байхдаа олон ноцтой хэргийг илрүүлж байсан гэдгийг эх сурвалж онцолж байсан юм.

ЭРҮҮГИЙН ЦАГДААГИЙН ХЭЛТСИЙН ДАРГА П.ЭНХБАЯР

Дэд хурандаа П.Энхбаяр нь Цагдаагийн сургуулийг 1996 онд төгсөөд Сэлэнгэ аймагт хэсгийн төлөөлөгчөөр ажлынхаа гарааг эхэлж байсан гэнэ. Цагдаагийн байгууллагын анхан шатнаас эхэлж дээшээ дэвшин ажиллаж байгаа цөөн хүмүүсийн нэг нь П.Энхбаяр аж. 2002 онд Эрүүгийн цагдаагийн газарт ажиллаж байгаад Налайх дүүргийн цагдаагийн хэлтсийн дарга болсон байдаг. Налайх дүүргийн цагдаагийн даргаар ажиллаж байхдаа “Хаан” банкинд гурван хүн рүү буудсан А.Бат-Ялалтын хэргийг шуурхай илрүүлж байсан түүхтэй.

2014 онд Зохион байгуулалттай гэмт хэрэгтэй тэмцэх газрын даргаар ажиллаж байгаад Булган аймгийн цагдаагийн хэлтсийн дарга болсон. Мөн Орхон аймаг, Сэлэнгэ аймагт цагдаагийн хэлтсийн даргаар ажиллаж байсан юм. Хөдөө орон нутагт ажиллаж байсан тэрбээр өнгөрсөн жил Баянгол дүүргийн цагдаагийн хоёрдугаар хэлтсийн даргаар томилогдож ирээд ажиллаж байсан билээ. Дэд хурандаа П.Энхбаяр Сэлэнгэ аймагт хүн шатаасан хэрэг, Хүдэр суманд нэгэн иргэнийг онц хэрцгий аргаар амь насыг нь хөнөөсөн хэргийг хурдан шуурхай илрүүлж байсан нь тухайн үедээ шуугиан тарьж байсан юм.