Month: September 2017

Тусгай хяналтын дэд хорооны хуралдаанаар Eрөнхий сайд, Шадар сайдыг тагнаж чагнасан гэх асуудлыг хэлэлцсэн юм.

Дэд хорооны хуралдаанд оролцоод гарч ирсэн Н.Номтойбаяр гишүүн “Манай бүлэг дээр ярилцахдаа Eрөнхий сайд тагнаж чагнах ажиллагаа явуулсан бол огцруулах бус, бүр хуулийн хариуцлага хүлээлгэх асуудал яригдана. Эсрэгээрээ Шадар сайд өөрөө өөрийгөө тагнаж чагнасан гэж тогтоогдвол түүнд хариуцлагын асуудал яригдана гэсэн хоёр шийдэлд хүрсэн. Тиймээс энэ асуудлыг эцэслэхээр Тусгай хяналтын дэд хороог хуралдтал чуулганаас завсарлага авсан юм. Сая Тусгай хяналтын дэд хорооны хуралдаанаар АТГ-ын өмнө нь хийсэн мэдэгдлийг нарийвчилж сонслоо. Ямар гаргалгаагаар Шадар сайд өөрийгөө тагнасан гэж үзсэн талаар сонссон гэсэн үг. Бусад асуудал нь нууцын зэрэглэлтэй учир хэлэх боломжгүй” гэлээ. УИХ-ын чуулган энэ асуудлаар хаалттай хуралдаж эхэллээ.

УИХ-ын чуулган хаалттай хуралдаж эхэллээ. Т.Аюурсайхан гишүүн “Ерөнхий сайд, Шадар сайдыг тагнаж чагнасан асуудлыг ээлжит бус чуулганаар хэлэлцэх ёсгүй. Засгийн газрыг огцруулах асуудлыг хэлэлцэх ёстой” гэлээ. Ерөнхий сайд Ж.Эрдэнэбат, Шадар сайд У.Хүрэлсүхийг тагнаж чагнасан асуудлыг чуулган хаалттай горимоор хэлэлцэх юм.

Тусгай хяналтын дэд хорооны дарга Сү.Батболдын мэдээллийг хаалттай горимоор сонссоны дараа Засгийн газрыг огцруулах асуудлыг нээлттэй хэлэлцэнэ.

Э.ЭНХ

Эрүүл мэндийн сайд А.Цогцэцэг өнөөдөр Бутаны Вант улсын гадаад хэргийн сайд Дамчо Доржийг хүлээн авч уулзлаа. Уулзалтын үер талууд Монгол улсын эрүүл мэндийн яам болон Бутаны Вант улсын эрүүл мэндийн яамтай хамтран ажиллах, уламжлалт анагаах ухааны чиглэлээр талууд хамтран ажиллах боломжийн талаар харилцан ярилцаж, санал солилцлоо.

Уулзалтын эхэнд сайд А.Цогцэцэг Бутаны Вант улсын гадаад хэргийн сайд Дамчо Доржийг Монгол улсад ажлын айлчилд нь амжилт хүсч, Монгол, Бутан хоёр улс түүх, соёлын өв, шашин шүтлэгийн хувьд ижил төстэй бөгөөд уламжлалт анагаах ухааны эртний түүхтэй орнууд учир цаашид уламжлалт, болон орчин үеийн анагаах ухааны салбарт бүс нутгийн түвшинд хамтын ажиллагаагаа гүнзгийрүүлэх эрмэлзэлтэй байгаагаа илэрхийллээ. Мөн түүнчлэн Монгол улс Бутаны Вант улстай 2012 оноос дипломат харилцаа тогтоосноос хойш 2 улсын анагаах ухааны салбар, тэр дундаа Уламжлалт анагаах ухааны салбарт дахь хамтын ажиллагаа хөгжиж, Бутаны Вант улсын эмч мэргэжилтнүүд энэ чиглэлээр суралцаж эхэлсэн болохыг тэмдэглэв. Манай улсын эмнэлгийн тусламж үзүүлдэг төрийн өмчтэй бүх эрүүл мэндийн байгууллагуудын дэргэд Уламжлалт анагаах ухааны салбар, тасаг, нэгж, кабинет байгуулагдан үйл ажиллагаа явуулдаг арвин туршлагатай. Тиймээс манай улстай мөн адил Уламжлалт анагаах ухаан өндөр хөгжсөн Бутаны Вант улстай хамтран ажиллаж, Уламжлалт анагаах ухаанд нэн шаардлагатай ховор зүйлийн эмийн ургамал нийлүүлэх, Дэлхийд алдартай Монголын шаваран эмчилгээг нэвтрүүлэн, энэ чиглэлээр судалгаа шинжилгээг эхлүүлэх боломж нээлттэй байгааг онцлов.

Ноён Дамчо Доржи Уламжлалт анагаах ухааны олон жилийн түүхтэй Монгол улстай энэ салбарт хамтран ажиллах боломж нээлттэй болж байгаад баяртай байна. Монгол улсын Уламжлалт анагаах ухааны салбарт өргөн ашиглагддаг шаваран эмчилгээ Бутаны Вант улсад төдийлөн нэвтрээгүй учир, энэ чиглэлээр эмч мэргэжилтэн бэлтгэн, сургалт, дадлага явуулах нь зүйтэй гэдэгт сайд А.Цогцэцэгтэй санал нийлж байгаагаа хэллээ. Монгол улсын Эрүүл мэндийн яамтай олон чиглэлээр хамтран ажиллах албан ёсны хүсэлт тавин 2 улсын улсын эрүүл мэндийн яамдуудын хамтын ажиллагааг өргөжүүлэхэд өөрийн зүгээс дэмжин ажиллана гэдгээ илэрхийллээ.

УИХ-ын Тусгай хяналтын дэд хороо хуралдаж дууслаа. Дэд хорооны хуралдаанаар Ерөнхий сайд Ж.Эрдэнэбат, Шадар сайд У.Хүрэлсүх нарын тагнаж, чагнасан асуудлыг хэлэлцсэн юм. Дэд хороо санал дүгнэлтээ Их хуралд танилцуулахаар бэлдэж байна. Чуулганы нэгдсэн хуралдаан 15 цагт товлогдсон тул гишүүд чуулгандаа орохоор цуглаж эхэллээ.

Монгол Улсын Их Хурлын дарга М.Энхболдод өнөөдөр (2017.09.07) Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хуульд нэмэлт, өөрчлөлт оруулах тухай хуулийн төслийг УИХ-ын дэд дарга, Цагаатгах ажлыг удирдан зохион байгуулах улсын комиссын дарга Я.Санжмятав өргөн мэдүүллээ.

Улсын Их Хурлын дэд дарга, Улсын Их Хурлын гишүүн, Цагаатгах ажлыг удирдан зохион байгуулах комиссын дарга Я.Санжмятав өнөөдөр (2017.09.07) “Улс төрийн хэлмэгдүүлэлт шалтгаан, үр дагавар, сургамж” сэдэвт эрдэм шинжилгээний бага хуралд оролцов.

Тэрбээр бага хурлыг нээж, хэлсэн үгэндээ “Улс төрийн хэлмэгдүүлэлтийн талаархи үнэн бодит шалтгаан нөхцлийг түүхэн үйл явц төдийгүй тухай үеийн нийгэм, улс төрийн болоод шашин, үзэл суртал, хувь хүн талаас нь судлан, бодит байдлыг тодорхойлж, улмаар өнөө болон хойч үеийнхэндээ сургамж болгон үлдээхэд энэ эрдэм шинжилгээний хурлын ач холбогдол орших болно.

Монгол Улсын тусгаар тогтнол, хөгжлийн түүхийн оноо нь ч, алдаа нь ч бидэнд өв болон үлдэх учиртай. 20 дугаар зууны Монголын түүх бол бидний дээд өвөг Чингис хаан, Хөх монголчуудын түүхийн үргэлжлэл учраас Хэлмэгдүүлэлт хэмээх гунигт боловч үнэнд гүйцэгдсэн түүхийг Монголын түүхээс баллуурдах юм уу, бүхнийг өнгөрсөн цаг хугацаанд тохож болохгүй. Түүхээ бодитоор нь шастирлан үлдээж, түүхэн үйл хэрэг, түүхэн хүн, түүхэн цаг үеийг бодитой зөв үнэлэн дүгнэж өнөөгийн болон хойшдын ажил амьдралын зам мөртөө зөвөөр тусгаж чадаж гэмээнэ бид ирээдүй рүүгээ итгэлтэй замнаж чадна. Эрдэм шинжилгээний хурлын үйл ажиллагаанд амжилт хүсье” гэв.

Тус эрдэм шинжилгээний бага хуралд ХБНГУ, ОХУ, Япон болон Шинжлэх ухааны академи, МУИС, МУБИС, БХИС-ийн эрдэмтэн судлаачид, “Конрад-Аденауэр” сан, Монголын улс төрийн хэлмэгдэгсдийн холбоо зэрэг байгууллагын төлөөллүүд оролцож, илтгэл хэлэлцүүлж байна.

Монгол Улсад улс төрийн хэлмэгдүүлэлт нийгмийн олон салбар, давхаргыг хамран өрнөсөн 1937 оны есдүгээр сарын 10-ны өдрөөр төлөөлүүлэн жил бүрийн есдүгээр сарын 10 –ныг “Улс төрийн хэлмэгдэгсдийн дурсгалын өдөр” болгон улс орон даяар тэмдэглэх тухай УИХ-ын тогтоолын дагуу энэ өдрийг 22 дахь жилдээ тэмдэглэж буй юм.

“Улс төрийн хэлмэгдэгсдийн дурсгалын өдөр”-ийг угтан Монгол Улсын Цагаатгах ажлыг удирдан зохион байгуулах улсын комиссоос “Улс төрийн хэлмэгдүүлэлт шалтгаан, үр дагавар, сургамж” сэдэвт эрдэм шинжилгээний бага хурлыг зохион байгуулж байна гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.