Month: September 2017

2017 онд улсын хэмжээнд 393.6 мянган га-д үр тариа, үүнээс 367.2 мянган га-д буудай, 14.9 мянган га-д төмс, 7.5 мянган га-д хүнсний ногоо, 78.2 мянган га-д тосны ургамал, 28.2 мянган га-д тэжээлийн ургамал, 1.9 мянган га-д эмийн ургамал, нийтдээ 524.3 мянган га-д тариалалт хийсэн.

Ургацын урьдчилсан балансаар 271.8 мянган тонн үр тариа, үүнээс 259.2 мянган тонн буудай, 102.3 мянган тонн төмс, 75.7 мянган тонн хүнсний ногоо, 23.6 мянган тонн тосны ургамал, 47.3 мянган тонн малын тэжээлийн ургамал тус тус хураан авахаар байна. 9 дүгээр сарын 12-ны байдлаар 12.3 мянган га-г ангилан хадаж, нийтдээ 36.0 мянган га-гаас 29.7 мянган тонн үр тариа, 1.3 мянган га-гаас 13.1 мянган тонн төмс, 1.8 мянган га-гаас 19.3 мянган тонн хүнсний ногоо, 2.1 мянган га-гаас 3.4 мянган тонн тэжээлийн ургамал, 2.4 мянган га-гаас 1.1 мянган тонн тосны ургамал тус тус хураан аваад байна.

(Хураасан талбайн хэмжээг хүснэгтээр үзүүлэв.)

Энэ сарын 7, 8-ны өдрүүдэд Нийслэлийн Иргэний танхим, Нийслэлийн Залуучуудын хөгжлийн газар (НЗХГ)-ын дэргэдэх “Залуучуудын хөгжлийг дэмжих төв”-д Монгол, Солонгосын мэдээллийн технологийн салбарын ажлын байрны нээлттэй өдөрлөг зохион байгуулагдах юм байна. Тус өдөрлөгөөр IT чиглэлээр ажлын байрны сонгон шалгаруулалт явагдах талаар Нийслэлийн залуучуудын хөгжлийн газраас мэдээлэл өглөө.

Нийслэлийн Залуучуудын хөгжлийн газар БНСУ-ын Засгийн газрын агентлаг “КОЙКА”-гийн санхүүжилттэй төслийг хэрэгжүүлэгч “Эм Кэй Ай Ти” /MKIT/ сургалтын төвтэй хамтран залуучуудыг мэдээллийн технологийн чиглэлээр нарийн мэргэжил үнэ төлбөргүй эзэмшүүлдэг. Төгсөгчдийг БНСУ-ын мэдээллийн технологийн тэргүүлэх аж ахуйн нэгжүүдтэй холбож, ажлын захиалгаар хангах “Аутсорсинг” тогтолцоо бий болгох, дадлагажих ажилтнаар Солонгос руу явуулах зэрэг ажлуудыг зохион байгуулдаг ажээ.

Энэхүү төслийн хүрээнд мөн энэ сарын 7-нд Өмнөд Солонгосын IT-ийн томоохон компаниудын төлөөлөл “WHOIS Holdings Co”, “Ипал” зэрэг компаниудын захирлууд манай улсын залуучуудад зориулан дэлхийн мэдээллийн технологийн чиг хандлага болон Солонгосын мэдээллийн технологийн салбарын компаниуд хэрхэн олон улсад амжилтад хүрсэн талаар илтгэл тавих юм байна.

Сонгон шалгаруулалтад хэн ч оролцож болох бөгөөд https://www.facebook.com/Niisleliinzaluuchuud/ хаягаар анкетаа бүртгүүлж, 70122999, 89017101 лавлаж болно. Харин сонгон шалгаруулалтад оролцох залуучууд дээрх хаягаар анкетаа өгөх юм байна. Үүний дараа цахим анкетаар шалгарсан залуучууд анхан шатны ярилцлга болон гүнзгий шатны ярилцлагад орох эрхтэй болох аж. Энэ удаагийн сонгон шалгаруулалтад тэнцсэн залуучуудыг гурван сарын хугацаатайгаар Солонгосын IT-ийн компанид дадлагажих ажилтнаар явуулж, өрсөлдөх чадвартай залуучууд болгож бэлтгэх юм байна.

Энэ талаар “Эм Кэй Ай Ти” /MKIT/ Сургалтын төвийн ерөнхий захирал Хуан Ин Гюү “Энэ төслийг 2015 оноос хэрэгжүүлж эхэлсэн. Төслийн хугацаанд олон залуус суралцаж төгссөн боловч 2017 оноос Нийслэлийн Залуучуудын хөгжлийн газартай хамтран төслөө үргэлжлүүлж эхэлснээр цар хүрээ нь улам өргөжиж олон нийтэд илүү хүртээмжтэй болж байгаад баяртай байна.

Монгол залуучууд гадаадад очоод ихэвчлэн биеийн хүчний ажил хийдэг. Тэгвэл манай сургалтад хамрагдсанаар мэдээллийн технологийн салбарт оюуны хөдөлмөр эрхлэх боломжтой болж байгаараа давуу талтай юм. Энэхүү төсөл нь 2019 оныг дуустал үргэлжлэх тул олон залуучууд хамрагдаасай гэж хүсэж байна” гэв.

Өнөөдрөөс цахим ертөнцөөр ОУВС Монголбанк, Сангийн яамтай байгуулсан гэрээний хэрэгжилт зогссон тухай түгж эхлэв. Тухайн Монголбанк, Сангийн яам, ОУВС-ийн Монгол дахь суурин төлөөлөгчийн газраас лавлав. Дээрх байгууллагууд энэ талаар ямар нэгэн өөрчлөлт гараагүй хэмээн нэгэн дуугаар хариулж байна. Түүн дотроо ОУВС-ийн ажилтан “Одоогоор бидэнд мэдэгдсэн зүйл байхгүй. Тэгээд ч Монголбанк, Сангийн яамтай гэрээ байгуулсан болохоос хувь хүмүүстэй байгуулаагүй” гэж хариулав. Харин гэрээний хэрэгжилтийн явцыг дүгнэх ажиллагаа нь түр хойшилсон юм байна.

Х.БАТ

Үндэсний статистикийн хорооноос гаргасан судалгаагаар Монгол Улсад нийт 100993 хөгжлийн бэрхшээлтэй хүн амьдарч байгаагийн 10 хувийг хүүхэд эзэлдэг. Тэдний дийлэнх нь буюу 27 хувийг хөдөлгөөний бэрхшээлтэй хүүхдүүд эзэлж байна. Тэгвэл өнөөдөр хөгжлийн бэрхшээлтэй хүүхдийн хөгжил, хамгаалал үндэсний форумыг үндэсний хэмжээнд анх удаа зохион байгуулагдаж байгаа ажээ. Чуулганд 21 аймаг, есөн дүүрэг, тусгай сургуулийн хөгжлийн бэрхшээлтэй хүүхдүүд, тэдний эцэг эх, асран хамгаалагчид, төрийн болон төрийн бус байгууллагын төлөөлөл нийт 250 гаруй хүн оролцсон юм.

Ш.САМДАН: БИ ӨӨРИЙГӨӨ АЗТАЙ ХҮН ГЭЖ БОДДОГ

Энэ үеэр МУИС-д программ хангамжийн чиглэлээр хоёрдугаар дамжаанд сурч байгаа Ш.Самдангаас энэ удаагийн форумын талаар санал бодлыг нь сонслоо. Тэрбээр өөрийгөө азтай хүн гэж боддог. Багаасаа би жирийн хүүхдүүдтэй хамт цэцэрлэгт явж, сургуульд сурч өссөн. Тийм болохоор өөрийгөө хөгжлийн бэрхшээлтэй гэж боддоггүй. Харин Улаанбаатар хотод их сургуульд ирсэн эхний жилээ жаахан ганцаардсан. Манай сургуульд налуу зам байхгүй учраас шатаар өгсөх гэх мэт орчны асуудлууд тулгарч байна. Эцэг эхчүүд өөрийн хүүхдээ хөгжлийн бэрхшээлтэй гэж ичиж зоволгүй боловсролд нь анхаарах хэрэгтэй. Тэгвэл хүүхэд бүр сайн боловсрол эзэмших боломжтой” гэж ярилаа.

С.СЭЛЭНГЭ: ХӨГЖЛИЙН БЭРХШЭЭЛТЭЙ ХҮҮХДИЙН СӨБОЛОВСРОЛЫГ ЭЦЭГ ЭХЧҮҮД МАРТАЖ, ТӨР ЗАСАГ АЧ ХОЛБОГДОЛ ӨГӨХГҮЙ БАЙНА

Харин хөгжлийн бэрхшээлтэй хүүхдийн эцэг эхийн холбооны гүйцэтгэх захирал С.Сэлэнгэ Бүх хүн суурь боловсрол эзэмших эрхтэй, Хөгжлийн бэрхшээлтэй хүүхдүүдийн 60 хувь нь ямар нэг боловсрол эзэмшдэг. 40 хувь нь зүгээр л гэртээ байдаг. Хүн гэдэг нийгмийн амьтан. Тэр хүмүүс жаахан хүүхэд шиг эцэг эх, асран хамгаалагчийн хайр халамжид бүх насыг өнгөрөөнө гэдэг бол нийгмийн амьдрал биш. Ургамал юм уу тэжээвэр амьтан болж байна. Энэ бол хүний суурь эрхийг зөрчиж байгаа явдал юм. Харин өнөөдөр тэдний дуу хоолойг сонсох гэж байгаа нь маш зөв. Цаашид юу хийх талаар боловсролын яамыг төлөөлж ирсэн хүн зөвхөн тусгай зургаан сургуулийн асуудлыг яриад өнгөрсөн нь надад харамсалтай санагдлаа. Тэнд 1800 хүүхэд л сурдаг. Харин үлдсэн гурав дөрвөн мянган хүүхдийг орхигдуулах нь зүйд нийцэхгүй зүйл. Мөн 0-5 насанд хүний хөгжлийн 70-80 хувь явагддаг. Гэтэл цэцэрлэгийн насны хөгжлийн асуудлыг эцэг эхчүүд мартаж, төр засаг ач холбогдол өгөхгүй байгаа нь хүний эрхийг зөрчиж байна.

Б.НАРАН

UBS телевекийн хамт олон 25 жилийн ойн баяртаа зориулан олон нийтийг хамарсан дугуйн уралдааныг зохион байгуулах гэж байна. Энэхүү уралдаанд эрэгтэй 16-50, эмэгтэй 16-35-аас дээш насныхан оролцох боломжтой аж. Харин мэргэжлийн дугуйчид хамаархгүй оролцох боломжтой гэсэн.

Энэхүү уралдааны гол зорилго нь биеийн тамир спортыг хөгжүүлэх, нийтийн оролцоог нэмэгдүүлэх, хүүхэд залуучуудын эрүүл мэндийг сайжруулах, чөлөөт цагийг зөв боловсон өнгөрүүлэх, дугуйн ашиг тусыг иргэдэд ойлгуулж сурталчилах юм. Тэмцээн ес дугээр сарын 16 буюу бямба гаригт 10 цагаас “Буянт Ухаа” сторт цогцолбороос Айдсан даваа, Өлзийт хороололын чиглэлд зохион байгуулана. Дугуйчидыг 40 км засмал зам, 10 км шороо нь замаар уралдуулахаар төлөвлөж байгаа юм байна.

UBS телевизийн ерөнхий редактор Ө.Гэрэлцэцэг “25 жилийнхээ ойн баяртаа зориулан дугуйн холбоотой анх удаа хамтран ажилж “UBS 25” спортын арга хэмжээг зохион байгуулж байна. Цаашд олон нийтийг олоны хамарсан дугуйн уралдаан зохион байгуулах төлөвтэй байгаа” гэсэн юм. Харин Монголын дугуйн холбооны ерөнхий нарийн бичгийн дарга З.Наран “Энэ жилийнх UBS телевизтэй хамтарч ажилж байгаагаараа онцлог юм. Энэ нь дугуйн уралдаан гэхээс илүү дугуйн аялал гэж хэлж болно. Дугуй сонирхож ундаг хүмүүс олширсон. Харин тэр бүр хүмүүс өдөр тутамдаа хэрэглээ болгох нөхцөл бололцоо байхгүй байгаа. Тиймээс бид аль болох олон дугуйчидыг зуглуулж нэг өдрийг хөгжилтэй сонирхолтой өнгөрүүлээсээ гэж хүсэж байна. Дугуйчид өөрсдийн аюулгүй байдлын ханган толгойн хамгаалалтай байх шаардлагатай. Мөн шороон замаас засмал орох эргэлтэд ус, ундааны цэгүүд байрлуулсан. Бидэнтэй ЗЕГ-ын албан хаагчид хамтран ажилж аюугүй байдлыг хянах болно” гэлээ. Уралдаанд оролцогчид өнөөдрөөс эхлэн цахим үнэмлэхээр бүргүүлэж дугаараа авна.

С.ОЮУНЖАРГАЛ