Month: September 2017

“Ид шидийн орон” хүүхэд хамгаалал, хөгжлийн төвийн барилгын нээлт маргааш /2017.09.15/ болох гэж байна.

Барилгын ажил өнгөрсөн дөрөвдүгээр сараас эхэлсэн бөгөөд 8х15 метрийн харьцаатай хоёр давхар хоёр барилга ашиглалтад орж буй нь энэ юм.

Баянхошууны Зүүн салаанд байрлалтай, 200 метр квадрат талбайг хамарсан уг цогцолборт 50 хүүхэд тойрч суух саравч, өв соёл, уламжлалын зургаан ханатай гэр, тоглоомын талбай, усан оргилуур, ухаалаг агуулах, сургалтын танхим, номын сан, хөгжмийн өрөө, сагсан бөмбөгийн талбай, хүлэмж, зам талбайн гэрэлтүүлэг, бага оврын цэвэрлэх байгууламж, шалны халаалт гээд олон бүтээн байгуулалт хийжээ.

Энэхүү байгууламжтай есдүгээр сарын 15-17-ны өдрүүдэд танилцан “Зэрэгцээ ертөнц” гэрэл зургийн үзэсгэлэнг үзэх боломжтой. Мөн нээлтийн үеэр цаашдаа авч хэрэгжүүлэх ажил, төлөвлөгөөний талаар танилцуулах юм байна.

Жил бүр зохион байгуулагддаг Монгол Улсын Тогтвортой санхүүжилт форум энэ удаа “Тогтвортой санхүүжилтийг түгээн дэлгэрүүлэх олон талт хамтын ажиллагаа” сэдвийг хөндөж байна.

Монголын банкны холбоо, Байгаль орчин, аялал жуулчлалын яамтай хамтран “Монгол Улсын Тогтвортой санхүүжилт /ТоС/-ийн Форум 2017” арга хэмжээг Шангри Ла зочид буудлын хурлын танхимд зохион байгуулж буй нь энэ юм. Форумд БОАЖ-ын сайд Д.Оюунхорол, НҮБ-ын Байгаль орчны хөтөлбөрийн дарга Эрик Солхайм тэргүүтэй гадаад, дотоодын 400 гаруй төлөөлөгч оролцож байна.

Энэ үеэр Монголын банкны холбооны Ерөнхийлөгч О.Орхон “Монголын банкны холбооны удирдах зөвлөлөөс банкнаас бусад бизнесийн салбарууд Тогтвортой санхүүжилтийг түгээн дэлгэрүүлэхэд нэгдэж хамтран ажиллах боломжийг бүрдүүлэх зорилгоор Тогтвортой санхүүжилтийн хөтөлбөрийг албан ёсоор тусад нь гаргахаар шийдвэрлэлээ.

Тун удахгүй Монгол Улсын Тогтвортой санхүүжилтийн холбоонд гишүүнээр элсэх урилга та бүхний гарт хүрэх болно. Олон талт хамтын ажиллагааны хүрээнд ТоС зөвхөн банкны салбарт төдийгүй Банк бус санхүүгийн байгууллага, даатгал зэрэг байгууллагад барилга, уул уурхай, хүнс хөдөө аж ахуй, боловсруулах үйлдвэр гээд олон салбарт шинэ боломжийг бий болгоно” гэдгийг онцоллоо.

Замын цагдаагийн газрын Урьдчилан сэргийлэх хэлтсийн дарга, Цагдаагийн хурандаа Э.Бөхбат “Иргэдэд мэдээлэл хүргэхэд жолооч зам тээврийн осолд холбогдоод иргэний маргаан гараагүй тохиолдолд заавал цагдаа дуудах шаардлагагүй. Даатгал ирээд даатгалаа олгох үүрэгтэй олгохгүй цагдаагийн тодорхойлолт нэхээд байгаа даатгалыг санхүүгийн зохицуулах хороонд мэдэгдэж үйл ажиллагааг нь зогсоох хүртэл арга хэмжээ авахуулж болно.

Иргэний маргаан гарсан тохиолдолд цагдаагийн үйлчилгээг авч Монгол Улсын Замын хөдөлгөөний аюулгүй байдлын тухай хууль, дүрэм зөрчсөн нь эрх бүхий албан тушаалтны шийдвэрээр тогтоогдвол зөрчлийн хуулиар арга хэмжээ авч оноо хасагдах болно” хэмээн өөрийн цахим хуудастаа бичжээ. Өөрөөр хэлбэл, ослын үеэр цагдаа дуудаж, оноогоо хасуулах, давхар торгууль төлөх шаардлагагүй аж.

Манай улсын хүн амын дунд сүүлийн үед эрчимтэй тархаж байгаа өвчлөл нь шүд цоорох өвчин юм. Ихэвчлэн бага насны хүүхдүүдийг хамрах болсон уг өвчнөөс хэрхэн сэргийлж, шүдэнд ээлтэй хүнсний бүтээгдэхүүнийг яаж сонгох талаар НЭМГ-аас дараах зөвлөмжийг гаргажээ.

• Шүд цоорох өвчинд өртөх эрсдэл үүсгэх байдлаараа тэнцвэржсэн хоол хүнсийг түлхүү хэрэглэх /жимс, ногоо, буудай г.м/
• Шүд цоорох өвчинд өртөх эрсдлийг бууруулахын тулд чихэрлэг хоол хүнсийг цоорол үүсгэдэггүй бусад хүнсний бүтээгдэхүүнтэй хамт хэрэглэх
• Сахар агуулсан амттаныг үндсэн хоолноос гадна хоол хоорондын зайд хэрэглэх нь шүд цоорох өвчнийг ихэсгэдэг тул хоол хоорондын зайд амттан хэрэглэх давтамжийг бууруулах
• Шүдэнд наалдамхай, бөөгнөрч хуримтлагдах шинжтэй хоол хүнс нь шүд цоорох өвчнийг нэмэгдүүлдэг тул эдгээр бүтээгдэхүүнээс татгалзах, наалдсан тохиолдолд даруй цэвэрлэж байх
• Паалангийн эргэн эрдэсжих үйл явцыг дэмжихийн тулд хоол хоорондын зайд шүлсний ялгарах хурдыг сайжруулах зорилгоор сахаргүй бохь зажлах, шүлс ихээр ялгаруулдаг исгэлэн амттай хүнс хэрэглэх
• Унтах үед шүлсний ялгарах хэмжээ багасдаг тул орондоо орохын өмнө амттан болон чихэрлэг ундаа, жүүснээс татгалзах
• Бага насны хүүхдийг унтах үед сүү, жүүс болон бусад сахар агуулсан шингэн зүйлийг угжаар өгөхгүй байх,
• Ээжүүд аль болох шөнө хүүхдээ хөхүүлж унтуулахгүй байх. Хүүхэд унтаж байхдаа хөхсөн сүүгээ цааш гүйцэд залгилгүй, амандаа удаан байлгаснаас болж чихэрлэг сүү хуримтлагдан, шүд цоорох шалтгаан болдог.

Эрчим хүчний яам маргаашнаас (2017.09.15) айл өрхүүдийн халаалтыг өгөхөд бэлэн болсныг мэдэгдлээ. Албан байгууллагын халаалтыг аравдугаар сарын 1-ний өдөрт багтаан өгч дуусахаар төлөвлөж байгаа бөгөөд “Улаанбаатар дулааны сүлжээ” дулааны төв шугам тоноглолд хийгдэх засварын ажлаа дуусгасан тул албан байгууллага, аж ахуйн нэгжийн хэрэглээнд тохирсон халаалт залгах ажлыг есдүгээр сарын 05-наас эхлүүлж, 800 гаруй барилга, объектын халаалтыг залгаад байгаа аж. Байгууллагууд хүсвэл аравдугаар сарыг хүлээлгүй, хэрэглээний халаалтаа өнөөдөр ч залгуулах боломжтой аж. Даваа гаригт болсон Эрчим хүчний салбарын шуурхай хуралдааны үеэр нийслэлийн гэр хорооллын дөрвөн байршлын 71 халаалтын зуухыг зогсоож, төвлөрсөн дулаан хангамжид холбох ажил хийгдэж байгааг албаны хүмүүс танилцуулсан.

Мөн шөнийн цахилгааны тарифыг хөнгөлөхтэй холбоотойгоор цахилгаан сүлжээ, дэд станцуудыг шинэчлэх, өргөтгөх ажлыг үргэлжлүүлж байгаа ажээ. Айл өрх, албан байгууллагуудын халаалт өгч байгаа энэ өдрүүдэд иргэд гэр болон байгууллагаа эзэнтэй байлгахыг зөвлөж байна. Дулаан хангамжтай холбоотой дэлгэрэнгүй мэдээлэл авахыг хүсвэл 7004-7005 утсаар холбогдох боломжтой. “Улаанбаатар дулааны сүлжээ” ТӨХК-ийн вэб сайтад маргаашнаас халаалт залгах цагийн хуваарийг нийтлэх ажээ.

Хотын ногоон бүс орчимд хэрэм олноороо бууж ирэх болсон байна. Уулын модонд эрх тааваараа амьдардаг эдгээр амьтад хотын захын айлуудын үүдний амбаар, хоолны саравчаар гийчилж сандаргасан тухай олон нийтийн сүлжээнд бичиж байгаа. Нийслэлийн Байгаль орчны газар болоод Мэргэжлийн хяналтын байгууллагын мэргэжилтнээс тодруулахад “Хэрэмнүүд уулнаас бууж ирж байгаа тохиолдол олон удаа гарсан. Эдгээр амьтдын хоол тэжээл дутмагтай холбоотой. Энэ намар самрын гарц муу байна. Тиймээс хэрэм хот руу орж ирж байна. Самар муу ургасан болохоор самарчид ч уул руу гарах нь цөөн байгаа. Тиймээс самарчид хэрэмний хоол булааж байна гэж үзэх үндэслэлгүй. Хот руу орж ирдэг товчоод дээр мэргэжлийн байгууллагууд хяналт шалгалт хийж байгаа. Уулын бүс, ойн захад байгаль хамгаалагч нар самарчдыг хянаж байгаа” гэж байсан юм.

НИТХ-ын тэргүүлэгчдийн хурал өнөөдөр боллоо. Хуралдааны эхэнд НИТХ-ын дарга Ц.Сандуй өөрийн хүсэлтээр ажлаа өгч байгаагаа албан ёсоор мэдэгдэв. Тэрбээр “Миний ажлаа өгч байгаа шалтгаан нь цахим орчинд гарч байгаа элдэв асуудал бус Нийслэлийн МАН-ын даргын хувьд өнгөрөгч Ерөнхийлөгчийн сонгуульд нийслэлийн долоон дүүрэгт ялагдал хүлээсэн болохоор ажлаа өгч байна. Үүнээс өөр шалтгаан байхгүй” гэв. Хуралдаанаар энэ сарын 22-нд болох НИТХ-ын ээлжит хуралдааны товыг зарлав. Уг хуралдаанаар НИТХ-ын дарга Ц.Сандуйгийн ажлаа өгөх өргөдлийг хэлэлцэхээс гадна цаг үеийн асуудал хэлэлцэх юм байна.