Идлэг шонхрын тоо толгой сүүлийн жилүүдэд эрс цөөрчээ. Тодруулбал, эн сарын эхээр Кыргыз Улсад болсон Олон улсын шувуулахуйн болон идлэг шонхрын хурлын үеэр мэргэжилтнүүд “Сүүлийн хоёр жилд дэлхийн идлэг шонхрын тоо 40 орчим хувиар буурсан” гэж мэдээлжээ. Үүний гол шалтгаан нь хоол тэжээлийн хомсдол гэнэ.
Шонхор өвсөн тэжээлт мэрэгчид, жижиг шувууд, шавьж зэргээр хооллодог. Үүнтэй холбоотойгоор Дэлхийн байгаль хамгаалах сангийн мэргэжилтнүүд болон шувуу судлаачид идлэг шонхрын тоо толгойг өсгөх, зүй зохистой ашиглах гарцыг судалж, 2018 он гэхэд цогц төлөвлөгөө боловсруулахаар болжээ.
Монгол Улсын Ерөнхий Прокурорийн орлогч, Төрийн хууль цаазын шадар зөвлөх Г.Эрдэнэбатийн баталсан хөтөлбөрийн дагуу Улсын Ерөнхий Прокурорын газрын Сургалт, судалгааны төвийн прокуроруудын дотоод сургалтыг энэ сарын 14-15-ны өдрүүдэд буюу өчигдөр, өнөөдөр зохион байгуулан явуулж дуусчээ. Уг сургалтанд Монгол Улсын багшийн их сургуулийн заах арга зүйн танхимийн багш нар “Орчин үеийн суралцахуйн чиг хандлага”, “Сургалтанд сургалтын идэвхитэй аргуудыг хэрэглэх нь”, ” Насанд хүрэгчдийн суралцахуйн онцлог”, “Харилцааны сэтгэл зүй” сэдвүүдээр хичээл заасан байна. Сургалтанд Улсын Ерөнхий Прокурорын орлогч Г.Эрдэнэбат оролцож сургалтын үр дүн, сургалтыг төлөвлөх, зохион байгуулахад анхаарах асуудлуудаар прокуроруудад заавар зөвлөгөө өгөн харилцан санал солилцож, цаашид хийж гүйцэтгэх ажлын талаар үүрэг, чиглэл өгчээ. Мөн уг сургалтаар Шүүхэд төрийг төлөөлөх хэлтсийн хяналтын прокурор Х.Батчимэг болон тус төвийн сургагч багш нарын заан явуулдаг хичээлийн хөтөлбөрийг хэлэлцэж, хичээлийн хөтөлбөрүүдийг шинэчлэн загвар модул, боловсруулж гаргахаар болсон байна.
Өмнөд бүсийн төв-Өмнөговь аймгийн Онцгой байдлын газрын Гал түймэр унтраах, аврах 21 дүгээр ангийн түүхт 40 жилийн ойн баярыг 2017 оны 09 дүгээр сарын 08-15-ны өдрүүдэд тэмдэглэн өнгөрүүллээ. Арга хэмжээний үеэр албан үүргээ нэр төртэй биелүүлж, үүрэгт ажилдаа амжилт гаргасан албан хаагчдыг салбарын шагналаар шагнаж урамшуулжээ. Мөн баярын жагсаал, урлаг, уран сайхны арга хэмжээзохион байгуулсан байна.
Эрдэнэс-Тавантолгой” компани нүүрс худалдан авах нээлттэй тендер зарлажээ. Тус компанийн мэдэгдэлд “ Энэхүү сонгон шалгаруулалт нь компаниудаас ирүүлсэн үнийн санал, нийт худалдан авах нүүрсний хэмжээ, урьдчилгаа төлбөрийн хэмжээ, сар бүрийн худалдан авалтын хэмжээ, болон тээврийн асуудлыг бодитоор хамгийн сайн гүйцэтгэх чадварын талаар дүн шинжилгээ хийж, боломжит давуу нөхцөлтэй санал ирүүлсэн худалдан авагч компанийг сонгоход оршино. “Эрдэнэс тавантолгой” ХК нь Цанхийн уурхайгаас олборлосон дор дурдсан чанар бүхий 100,000 тонн коксжих нүүрсийг тонн тутмыг 68.0 ам.доллараас багагүй үнээр борлуулах боломжтой болохыг үүгээр мэдэгдэж байна” хэмээн онцолжээ.
Монголын төр нийгмийн зүтгэлтэн, Монгол Улсын Хөдөлмөрийн баатар, Монгол Улсын баатар, маршал Ю.Цэдэнбалын мэндэлсний 101 жилийн ой тохиож байна. Тэрбээр 1916 оны есдүгээр сарын 17-ны өдөр төрсөн юм. Түүний хөшөөнд цэцэг өргөхөөр МАН-ын ерөнхий нарийн бичгийн дарга Д.Амарбаясгалан, УИХ-ын гишүүн, Батлан хамгаалахын сайд Б.Бат-Эрдэнэ, УИХ-ын гишүүн Ч.Хүрэлбаатар, Н.Цэрэнбат, Я.Содбаатар болон МАН-ын Удирдах зөвлөлийн ажлын алба, иргэдийн төлөөлөл оролцсон юм.
БНСУ-ын Засгийн газраас 2018 оноос эхлэн суралцах Бакалаврын зэрэг олгох дөрвөн жилийн болон Мэргэжлийн сургалтад хамруулж үнэмлэх олгох хоёр жилийн тэтгэлгийн сонгон шалгаруулалтыг зарласан байна. Монгол Улсаас бакалаврын зэрэгт мэргэжил, сургууль харгалзахгүйгээр гурван оюутныг БНСУ-с Монгол Улсад суугаа Элчин сайдын яамаар дамжуулан сонгон шалгаруулах юм. Сонгон шалгаруулалтад оролцох хүсэлт гаргагчдын материалыг 2017 оны есдүгээр сарын 28-наас аравдугаар сарын 5-ны хооронд Элчин сайдын яамны байранд хүлээн авах ажээ.
Хүйтэн сэрүүний улирал ирж байгаатай холбогдуулан уушгины хатгалгаа үүсгэдэг 13 хэв шинжийн үүсгэгчийн эсрэг вакциныг Сүхбаатар, Сонгинохайрхан, Баянзүрх дүүргийн эмнэлгүүдэд хийж байна.
“Автомат робот-2017” тэмцээн өчигдөр Сүхбаатарын талбайд эхэлсэн. Тэмцээнд хүүхдүүд өөрсдийн хийсэн автомат роботыг 4 төрлийн замаар уралдуулдаг бөгөөд энэ удаагийн тэмцээнд 5-20 насны 250 гаруй хүүхэд залуус оролцлоо. Өчигдөр шулуун зам болон робот хөлбөмбөг гэсэн хоёр төрлийн уралдаан зохион байгуулж дүнгээ гаргасан. Өнөөдөр тойрог замын болон шоо цуглуулагч роботын төрлөөр үргэлжилнэ.