Month: September 2017

Нэгдсэн арга хэмжээний хүрээнд өчигдөр Нарантуул ОУХТөвд эргүүлийн үүрэг гүйцэтгэж байсан Баянзүрх дүүрэг дэх цагдаагийн нэгдүгээр хэлтсийн хэсгийн цагдаа, цагдаагийн ахлагч А.Чөдөрпүрэв, Батлан хамгаалахын Их сургуулийн оюутан М.Амартүвшин, Л.Ганбат, М.Бат-Очир нар автомашинаас эд зүйл бүлэглэн хулгайлсан гэмт хэргийг шуурхай эрэн сурвалжилж илрүүлжээ.

Үл хөдлөх хөрөнгийн “Тэнхлэг Зууч” ХХК Монгол банктай хамтран орон сууцны үнийн индексийг судлан гаргадаг. Тус компаниас наймдугаар сарын дүн мэдээг танилцууллаа. Судалгаанд нийт хуучин, шинэ байрны 90 хувь буюу 4986 орон сууцны хамарагджээ. Зах зээл дэх судалгааны үнэн бодит байдлыг 95 хувь гэж үзэж байгаагаа “Тэнхлэг Зууч” ХХК-ийн захирал Д.Должинсүрэн онцлов.

Судалгаагаар орон сууцны индекс 1.01 байна. Өнгөрсөн сараас 0.6 хувь өссөн ч өмнөх оныхоос 0.6 хувиар буурчээ. Шинэ орон сууцны үнэ өссөн нь индекс өмнөх сараас бага зэрэг өсөхөд нөлөөлжээ. Шинэ орон сууцны нэг метр кв-ын дундаж үнэ 2 сая 91 мянган төгрөг байна. Энэ нь өмнөх сараас 3.8 хувиар, өнгөрсөн оноос 3 хувиар өссөн дүн юм. Өнгөрсөн сард энэ үзүүлэлт 2 сая 20 мянга байжээ.

Долдугаар сард бүх нийтээр амардаг тул орон сууцны худалдаа, түрээс зогсонги байдалд орж, найм, есдүгээр сард эргээд эрэлт хэрэгцээ их болсон. Иймд шинэ орон сууцны дундаж үнэ өсчээ. Харин хоёр өрөө хуучин орон сууцны дундаж үнэ 72 сая төгрөг болж, өмнөх сараас болон өмнөх оныхоос буурчээ.

Сүхбаатар дүүрэгт хуучин орон сууцны үнэ хамгийн өндөр 88.8 сая төгрөг байгаа бол Сонгино хайрхан дүүрэгт хамгийн хямд 54.8 сая төгрөг байна.

С.ОЮУНЖАРГАЛ

Нийслэлийн Засаг даргын 2017 оны А/594 дүгээр захирамж, дүүргийн Засаг даргын 2017 оны А/184 дүгээр захирамжаар нийслэл, дүүрэгт байгалийн голомтот болон мал амьтнаас хүнд халдварладаг өвчин зөөгдөн орохоос сэргийлэх, гамшгаас хамгаалах албадын харилцан ажиллагааг сайжруулах зорилгоор тарваган тахал өвчнөөс урьдчилан сэргийлэх дадлага сургуулийг 2017 оны 09 дүгээр сарын 15-ны өдөр Багахангай дүүрэгт зохион байгууллаа.

Тус дадлага сургуулийн үйл ажиллагаанд мэргэжлийн чиг үүргийн дагуу НОБГ-ын хурандаа А.Дашням, Э.Эрдэнэбаатар, НЭМГ-ын мэргэжилтэн Ж.Энхцэцэг, Э.Навчаа, НЦГ-ын ахмад Ганбаяр, дүүргийн онцгой комиссын дарга С.Эрдэнэбаяр болон онцгой комиссын гишүүд оролцсон ба дүүргийн Эрүүл мэндийн төв, Онцгой байдлын хэлтэс, Мэргэжлийн хяналтын тасаг, цагдаагийн тасаг, Нийслэлийн зоонозын өвчин судлалын төв хамтран тарваган тахалын шинж тэмдэг илэрсэн үед авах арга хэмжээ, ариутгал халдваргүйжүүлэлт, автомашин сэжигтэй мах тээвэрлэсэн тохиолдолд ямар арга хэмжээ авах талаар дадлага сургуулийг хийлээ.

Дадлага сургууль бүрэн явагдаж дууссаны дараа НОБГ-ын хурандаа А.Дашням, НЭМГ-ын мэргэжилтэн Ж.Энхцэцэг, Нийслэлийн мэргэжлийн хяналтын газрын мал эмнэлэгийн хяналтын улсын байцаагч У.Жавхлант, НЦГ-ын ахмад Ганбаяр нар мэргэжлийн заавар зөвлөмж, санал дүгнэлт өгч ажиллалаа.

Нийслэлийн засаг даргын мөрийн хөтөлбөр, Нийгэм эдийн засгийн 2017 оны зорилтын хүрээнд агаарын чанарыг сайжруулах бүсэд авч хэрэгжүүлж буй ажлаа олон нийтэд танилцуулах, өвлийн улирлын бэлтгэл ажил хангах зорилгоор “Байгаль орчинд ээлтэй дэвшилтэт техник технологи ” үзэсгэлэн зохион байгуулах гэж байна. Тус арга хэмжээ энэ сарын 28-30-нд Сүхбаатарын талбайд болох юм.

Жил бүр болдог энэхүү үзэсгэлэнд орчны бохирдлыг бууруулах байгаль орчинд ээлтэй дэвшилтэт технологи бүхий цахилгаан болон хийн халаагуур, гэр болон байшингийн дулаалга, сэргээгдэх эрчим хүч, сайжруулсан болон био түлш, агаар цэвэршүүлэгч зэрэг бүтээгдэхүүнүүдийг оруулж ирдэг эсвэл зохион бүтээсэн аж ахуйн нэгж, байгууллага, иргэд оролцох боломжтой. Тиймээс уг үзэсгэлэнд оролцох хүсэлтэй аж ахуйн нэгж, байгуулага, иргэд саналаа нийслэлийн Агаарын бохирдлыг бууруулах газарт ирүүлнэ үү гэж нийслэлийн Агаарын бохирдлыг бууруулах газраас мэдээллээ.

Манай улс 1993 оноос хойш эдүгээ 24 дэх жилдээ Соёл, урлагийн ажилтны өдрийг тэмдэглэж байна. Уг өдрийг тохиолдуулан Баянзүрх дүүргийн иргэдэд урлаг соёлыг тасралтгүй түгээж, уламжлан хөгжүүлж, соён гэгээрүүлж буй Соёлын ордны хамт олон багагүй ажлуудыг санаачлан хийжээ.

Тухайлбал, тус Соёлын ордны хамт олны санаачлагаар Туул гол орчмоор их цэвэрлэгээ хийж, гол дагуух хог хаягдлыг цэвэрлэсэн байна. Мөн Нийслэлийн Соёл урлагийн газраас есөн дүүргийн Соёлын ордны уран бүтээлчдийн дунд олон төрөлт спортын арга хэмжээ зохион байгуулжээ. Тус тэмцээний гар бөмбөгийн төрөлд Баянзүрх дүүргийн Соёлын ордны баг тамирчид гутгаар байр эзэлсэн амжилтыг үзүүлсэн байна хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ