Month: September 2017

“Багшийн цалин нэмэгдүүлэх түр хороо”-ноос багш нарын цалинг нэмэгдүүлэх шаардлагыг Засгийн газарт удаа дараа хүргүүлсэн. Шаардлагын хариуг есдүгээр сарын 15-ны дотор ирүүлэх ёстой байсан ч есдүгээр сарын 14-нд Засгийн газраас өгсөн албан бичиг өнөөдөр буюу 9-р сарын 19-нд багш нарт очсон тухай өөрсдийн сүлжээнд оруулжээ.

Уг албан бичигт багш нарын цалинг 2018 оны 1 сарын 01-ны өдрөөс эхлэн 30-аас доошгүй хувь нэмэгдүүлэхээр ажиллаж байгааг дурджээ. Харин Багшийн цалин нэмэгдүүлэх түр хорооны зохицуулагч Н.Мөнхтуяа “Багш нарын тавьсан шаардлага тодорхой. Цалинг 1,6 сая хүртэл нэмэгдүүлэх шаардлага тавьсан. Уг санал бидний тавьсан шаардлагад хүрэхгүй байгаа учир товлосон ажил хаялт болно” гэж мэдэгджээ.

Монгол Улсын Их Сургуулийн Хууль зүйн сургууль, Монголын хууль тогтоомжийн нийгэмлэг ТББ хамтран Япон сангийн санхүүгийн дэмжлэгтэйгээр 9 дүгээр сарын 16-ны “Монгол Улс, Япон Улсын хууль тогтоомжийн хөгжил худалдаа арилжааны эрх зүй” сэдэвт эрдэм шинжилгээний хурлыг амжилттай зохион байгууллаа. ХБНГУ, Франц, Солонгос, Япон гэх мэт эх газрын эрх зүйн тогтолцоотой бүх орнууд Иргэний хуулиас гадна бие даасан Арилжаа (Худалдаа)-ны төрөлжсөн хуулийг батлан хэрэгжүүлж иржээ. Энэ хууль нь гэрээ, хэлцэл шуурхай, маргаан багатай хийгдэх, аж ахуй эрхлэгчдийн эдийн засгийн ашиг сонирхлыг зохистой байдлаар хангах гэх мэт олон ач холбогдолтой байдаг нь бусад улсын туршлагаас харагддаг.

Тиймээс энэхүү туршлагыг судлахаар Япон Улсын Худалдаа (арилжаа)-ны төрөлжсөн хуулийн онцлог, Иргэний хууль болон бусад хуультай уялдах байдал, түүний нийгэмд гүйцэтгэх үүрэг, шүүхийн практикийн талаар болон Монгол улсын Иргэний хууль дахь аж ахуй эрхлэгчийн тухай ойлголт, компани, дампуурал, өрсөлдөөн, бүртгэлийн эрх зүйн зохицуулалтын талаар Япон, Монгол Улсын их сургуулиудын шүүгч, профессор, өмгөөлөгч, судлаачид илтгэл хэлэлцүүлсэн юм. Зохион байгуулагчдын зүгээс тус хурлын илтгэлүүдийг удахгүй хэвлэмэл хэлбэрээр гаргах юм байна.

Мянганы сорилт корпорацийн Монголыг хариуцсан ахлагч шинээр томилогдсонтой холбогдуулан БОАЖ-ын сайдын үүрэг гүйцэтгэгч Д.Оюунхорол хүлээн авч уулзлаа. Тус корпораци нь Засгийн газартай гэрээ байгуулан цэвэрлэх байгууламжаас гарч буй бохир усыг цэвэршүүлэн дулааны цахилгаан станцуудад нийлүүлж, дахин ашиглах ажлыг эхлүүлэхээр тохироод байгаа юм.

Мянганы сорилтын корпорацийн Монголыг хариуцсан ахлагчаар шинээр томилогдсон Жей Шир нь энэ төрлийн гэрээ байгуулан, амжилттай хэрэгжүүлж байсан туршлагатай хүн юм.

БОАЖ-ын сайдын үүрэг гүйцэтгэгч Д.Оюунхорол нэн түрүүнд шийдэх хэд хэдэн асуудал байгааг танилцууллаа. Тэрбээр “Улаанбаатар хотын төв цэвэрлэх байгууламжаас гарч буй усыг цэвэршүүлэн дулааны цахилгаан станцуудад нийлүүлэх гол зорилго болгон хэрэгжүүлэхээр бэлтгэл ажлаа хангаж байгаа. Гэхдээ төслийг хэрэгжүүлэхэд асуудал тулгарсан. Монголын төр засгийн тогтворгүй байдлаас болж төв цэвэрлэх байгууламжийг шинэчлэн барихаар ТЭЗҮ-ээ боловсруулан бэлтгэл ажилдаа ороод байсан компанийн ажил цуцлагдлаа. Энэ нөхцөл байдлаас шалтгаалаад хамтран хэрэгжүүлэхээр төлөвлөсөн төсөл ч үр дүнгүй болох эрсдэл үүсээд байгаа. Тиймээс хамтарч хэрэгжүүлж байгаа төслөө үр дүнд хүргэхийн төлөө төв цэвэрлэх байгууламжийг шинээр барихад шаардлагатай 300 сая ам.долларын санхүүжилтийн асуудлыг шийдэх гарц хайх хэрэгтэй ” хэмээсэн хэлсэн.

Мянганы сорилтын корпорацийн Монголыг хариуцсан ахлагч Жей Шир “Мянганы сорилтын корпорацийн хувьд II шатны компакт гэрээнд гарын үсэг зурсны дараа хэрэгжих төсөлд зориулж 350 сая ам.долларын зээлийг олгохоор болсон. Төв цэвэрлэх байгууламжийг шинэчлэхэд шаардлагатай санхүүжилтийг Монгол Улсын Засгийн газартай хамтран хандивлагч орнуудаас олох боломжийг судалж, гарц хайх хэрэгтэй” гэдгээ хэллээ.

БНХАУ, Монгол Улстай хамтын ажиллагаагаа өргөжүүлэн хөгжүүлж, хоёр орны найрсаг харилцааг бэхжүүлэхийн тулд “Хятадын соёлын өдрүүд” арга хэмжээг манай улсад гуравдахь удаагаа зохион байгуулж байна.

БНХАУ-ын Төрийн зөвлөлийн гадаадад байнга оршин суугаа Хятад иргэдийн хэрэг эрхлэх албанаас зохион байгуулж буй энэхүү арга хэмжээний нээлт өнөөдөр Монгол-Хятадын “Найрамдал” сургууль дээр боллоо.

Энэ үеэр БНХАУ-ын Ши Цуан мужийн Гадаад харилцааны нийгэмлэгийн орлогч дарга Шин Циов “Хятадын соёлын өдрүүд” арга хэмжээг Монгол Улсад гуравдахь удаагаа зохион байгуулах гэж буйдаа маш их баяртай байна. Анх 2012 онд энэхүү арга хэмжээ явагдаж байсан бол өнөөдөр ийнхүү гуравдахь удаагаа болох гэж байна. Арга хэмжээний хүрээнд монголын сурагчдад хятад багш нар хичээл зааж, өнөөгийн хятадын боловсролын чиг хандлага ямар байгаа, ямар чиглэлээр явагддаг гэх мэт олон талын мэдлэг олгох юм. Бид энэхүү арга хэмжээг жил бүр дэлхийн өөр өөр улсад зохион байгуулдаг бөгөөд энэ жил ийнхүү Монгол Улсад ирж, хүүхэд багачуудад соёл уламжлалаа таниулж байгаадаа баяртай байна” гэв.

Тэгвэл уг арга хэмжээг хамтран зохион байгуулж буй Монгол-Хятадын “Найрамдал” сургуулийн захирал Жянь Шянь Мэй “Энэхүү арга хэмжээ нь хоёр улсын найрамдал харилцааг өргөжүүлж, хүүхэд багачууд хоёр орны соёл, боловсролтой эх орондоо танилцах боломжийг олгодогоороо давуу талтай юм. Энэхүү арга хэмжээний хүрээнд сурагчдад хятадын уран зургийн гайхамшигт хичээл, эртний ушугийн хичээл, дуу хөгжим гэх мэт хичээлүүдийг хятад багш нар заана” гэдгийг дуулгасан.

Дашрамд өгүүлэхэд “Хятадын соёлын өдрүүд” арга хэмжээ 14 хоногийн хугацаатай үргэлжлэх юм байна.