Month: September 2017

Улаанбаатар хотод өнөөдөр үүлэрхэг. Хур тунадас орно. Салхи баруун хойноос секундэд 7-12 метр, зарим үед секундэд 14-16 метр хүрч ширүүснэ. Хүйтэрч 6-8 градус дулаан байна.

Төв болон зүүн аймгуудын нутгаар үүлэрхэг. Бусад нутгаар үүлшинэ. Төв болон зүүн аймгуудын ихэнх нутаг, говийн аймгуудын нутгийн хойд хэсгээр хур тунадас, нойтон цас орно.

Өнөөдөр Өвөрхангай, Дундговь, Өмнөговь, Дорноговь, Сүхбаатарын нутаг, Төв, Хэнтийн өмнөд хэсгээр салхи секундэд 18-20 метр, зарим үед секундэд 24 метр хүртэл ширүүсч шороон шуурга шуурна гэж Ус цаг уур, орчны шинжилгээний хүрээлэнгээс мэдээллээ.

Салхи нутгийн зүүн хэсгээр баруун өмнөөс хойш эргэж, бусад нутгаар баруун хойноос секундэд 9-14 метр, говь болон зүүн аймгуудын ихэнх нутаг, төвийн аймгуудын нутгийн өмнөд хэсгээр секундэд 18-20 метр, зарим үед секундэд 24 метр хүртэл ширүүсч шороон шуурга шуурна.

Алтай, Хангай, Хөвсгөл, Хэнтийн уулархаг нутгаар 4-9 градус, говь болон зүүн аймгуудын нутгийн зүүн хэсгээр 18-23 градус, Алтайн өвөр говь болон Их нууруудын хотгороор 14-19 градус, бусад нутгаар 8-13 градус дулаан байна.

БСШУСЯ-наас багш нарт хандан мэдэгдэл гаргав. Уг мэдэгдлийг бүрэн эхээр нь хүргэж байна.
Багшийн цалинг нэмэгдүүлэх түр хорооноос хэвлэл мэдээлэл, нийгмийн сүлжээгээр цэцэрлэг, ерөнхий боловсролын сургуулиудад 2017 оны 9 дүгээр сарын 21-ний өдөр сануулах ажил хаялт зохион байгуулах гэж байгаа тухай мэдээлэл гарч байна.

Ажил хаялтыг зохион байгуулах, хөдөлмөрийн хамтын маргааныг зохицуулах асуудал нь Монгол Улсын Хөдөлмөрийн тухай хуулийн “Хөдөлмөрийн хамтын маргаан зохицуулалт” гэсэн 10 дугаар бүлэгт заасны дагуу шийдвэрлэгдэнэ.

Хууль тогтоомжид заагдсан нөхцөл, шаардлагыг хангаагүй, хууль бус ажил хаялтыг зохион байгуулсны улмаас үүдэн гарах аливаа үр дагаврыг үүнийг зохион байгуулсан иргэн, хуулийн этгээд хариуцна. Хууль бус аливаа үйл ажиллагааг хууль хяналтын байгууллагуудаар шийдвэрлүүлэх болно.

БСШУСЯ-наас багшийн цалинг нэмэгдүүлэх асуудлыг хууль тогтоомжийн хүрээнд харилцан ойлголцол, хамтын оролцоо, нээлттэй зарчмаар хэлэлцэж, шийдвэрлэх байр суурийг баримталж байна.

Багшийн цалинг нэмүүлэх түр хорооноос цэцэрлэг, ерөнхий боловсролын сургуулийн багш нарын үндсэн цалингийн доод жишгийг 1,600,000 төгрөгт хүргэх шаардлагыг тавьсан.

Засгийн газраас багшийн цалинг нэмүүлэх шаардлагыг хууль тогтоомжид заасны дагуу хөдөлмөр, нийгмийн зөвшлийн гурван талт Улсын хэлэлцээрийн хүрээнд шийдвэрлэх, Монголын Үйлдвэрчний эвлэлийн холбооноос ирүүлсэн төрийн албан хаагчдын цалин хөлсийг 2018 оны 01 дүгээр сарын 01-ний өдрөөс үе шаттайгаар 30 хүртэл хувиар нэмэгдүүлэх саналыг холбогдох талуудын хэлэлцээг зохион байгуулж, нэмэлт хэлэлцээрийг байгуулан шийдвэрлэх байр суурийг илэрхийлээд байгаа билээ.

БСШУСЯ-наас багшийн цалин, хөлсний шинэ тогтолцоог нэвтрүүлэх гэж байгаатай холбогдуулан нээлттэй хэлэлцүүлгийг улсын хэмжээнд зохион байгуулж эхэлсэн бөгөөд багшийн хөдөлмөрийн үнэ цэнийг дээшлүүлэх, цалин хөлсийг нэмэгдүүлэх, ажлын үр дүнгээр цалинждаг цалин хөлсний шинэ тогтолцооны эрх зүйн багц зохицуулалтыг энэ ондоо багтаан хэлэлцүүлж, шийдвэрлүүлэхээр ажиллаж байна.

Иймд бүх шатны боловсролын сургалтын байгууллагын дарга, захирал, эрхлэгч нарт Боловсролын тухай, Бага дунд боловсролын тухай, Сургуулийн өмнөх боловсролын тухай хуульд заасан сургалтын хэвийн үйл ажиллагааг хангах, Хөдөлмөрийн хуульд заасан хөдөлмөрийн хамтын маргаан, ажил хаялтыг зохион байгуулах тухай хуулийн зохицуулалтуудыг нийт багш, ажилтнуудад таниулах, хууль тогтоомжийн дагуу ажиллахыг зөвлөж байна” гэжээ.

Монгол, Хятадын хилийн авто замын боомтууд ирэх сард дөрөв хоног амарна гэж ГХЯ-наас мэдэээллээ.

“Хилийн боомт тэдгээрийн дэглэмийн тухай” Монгол Улс, БНХАУ-ын Засгийн газрын хэлэлцээрийн дагуу Монгол, Хятадын хилийн авто замын боомтууд 2017 оны аравдугаар сарын 1,2,3,4-ний өдрүүдэд Хятад Улсын Үндэсний баяр болон Намрын баярын өдөр тус тус тохиож байгаатай холбоотойгоор ажиллахгүй.

Харин олон улсын галт тэрэг болон нисэх онгоц хуваарийн дагуу зорчих болно.

2017 оны эхний 8 сарын байдлаар гэхэд улсын хэмжээнд зам тээврийн ослын улмаас 47 хүүхдийн амь нас хохирч, 129 хүүхэд хүнд, хүндэвтэр байдлаар гэмтэж бэртсэн байна.

Орон нутагт зам тээврийн ослын улмаас хүүхэд амь насаа алдсан тохиолдол 85 хувийг эзэлж байхад нийслэлд ослын улмаас гэмтсэн хүүхэд 64,3 хувийг тус тус эзэлж байна.

Үүнээс үзвэл нийслэлийн хэмжээнд хүүхдүүд гарцгүй газраар зам хөндлөн гарах, ойртон ирж байгаа тээврийн хэрэгслийн урдуур гэнэт гүйх, замын зорчих хэсэг болон ойролцоо тоглох түүнчлэн эцэг эхчүүд бага насны хүүхдийг харгалзах хүнгүй хөдөлгөөнд оролцуулдаг, хүүхэдтэйгээ хамт явж байхдаа замын хөдөлгөөнд аюулгүй, зөв оролцох мэдлэг олгодоггүй, буруу үлгэр дуурайлал үзүүлдэг, хүүхдүүд замын хөдөлгөөний дүрмийн мэдлэгтэй байх боловч дадал суугаагүй, жолооч нар замын хөдөлгөөний дүрмээ биелүүлдэггүй зэрэг нь осолд өртөх нөхцлийг бүрдүүлж байна.

Иймд Замын цагдаагийн алба, “Хүүхэд зорчиж байна” төрийн бус байгууллагатай хамтран сургуулийн өмнөх насны буюу цэцэрлэгийн насны хүүхэд багачууд, тэдгээрийн эцэг эхэд Замын хөдөлгөөний хууль, дүрмийн мэдлэг олгох, хөдөлгөөнд аюулгүй, зөв оролцох дадал эзэмшүүлэх зорилгоор “АЛТАН НАМАР” өртөөчилсөн сургалтыг аялал хэлбэрээр Горхи Тэрэлжийн “Болор” зусланд зохион байгуулан явуулж байна.

Уг арга хэмжээнд өнөөдрийн байдлаар 160, 161, 191, 2, 68, 54 дүгээр зэрэг цэцэрлэгийн 900 гаруй хүүхэд, 320 орчим эцэг, эх, багш ажилтнуудыг хамруулаад байна.

Баянхонгор аймгийн Галуут, Бууцагаан сумын иргэд тус суманд “Тулгажаргалант” ХХК хууль бусаар алт олборлох гэж байгааг эсэргүүцэж хэвлэлийнхэнд хандлаа. Уг компани олборлолт явуулах газар нь дэрс, эмийн ургамал ихтэй газар гэдгийг онцлов.

Баянхонгор аймгийн Бөмбөгөр суман дахь Байдраг голын сав дагуу нийт 25 уурхай ажилладаг бөгөөд эдгээр уурхайг иргэд өнөөг хүртэл дэмжсээр иржээ. “Тулгажаргалант” компани олборлолтоо эхэлбэл Жаргалантын голд сөргөөр нөлөөлж болзошгүй гэж нутгийн иргэд үзэж байгаа бөгөөд энэ гол нь Галуутын хавцалд цутгадаг гэнэ. Мөн нэн ховордсон амьтан болох ирвэсийн тоо толгойд нөлөөлөх эрсдэлтэй түүнчлэн ирвэсийн нутагт ажиллаад эхэлбэл айлын мал руу дайрдаг аюултай ажээ.

Эдгээр иргэд Ерөнхийлөгч, БОАЖЯ, аймгийн удирдлагууд, Баянхонгор аймгийг төлөөлөн УИХ-д ажилладаг М.Билэгт, Н.Занданшатар, Л.Элдэв-Очир нарт гомдол саналаа хүргүүлсэн ч хариу аваагүй тул олон нийтэд мэдээлэл түгээхээр болжээ. Иргэд Галуут сумын газар нутгийг ухах биш, улсын хамгаалалтанд авах нь зүйтэй хэмээн аймгийн удирдлагуудадаа хандахад элдэв үг яриа гаргалаа гэж Зөрчлийн тухай хуулиар айлган сүрдүүлэх болжээ.

Сумын ИТХ-ын дарга, зарим багийн дарга болон иргэд хэвлэлийн хуралд оролцон, хууль бусаар алт олборлохыг эсэргүүцлээ. Хууль бус гэдэг нь Галуут сумын онгон дагшин газарт буюу өмнө нь уул уурхайн үйл ажиллагаа явуулж байгаагүй газарт дээрх компани нөхөн сэргээлт хийнэ хэмээн машин техникээ долдугаар сард байрлуулж эхэлжээ. Одоогоор компанийн 11 гэрт ажилчид нь төвхнөсөн аж. Сумын ИТХ, тухайн газрын багийн дарга нар компанийн удирдлагуудтай уулзахад “Бид А лицензтэй, зохих зөвшөөрлийг аймаг, нийслэл дэх байгууллагаас авсан. Уулын ажлын төлөвлөгөөгөө батлуулсан. Удахгүй үйл ажиллагаагаа эхэлнэ” гэжээ. Гэвч лиценз гэх бичиг баримтуудаа үзүүлээгүй тул нийт хэчнээн га газарт үйл ажиллагаа явуулахыг мэдэхгүй байгаа юм байна.

“Уг нь орон нутагт уурхай эрхлэх бол юуны өмнө тухайн багийн иргэдийн саналыг сонсож, багийн иргэдийн хурлаар хэлэлцэн батлуулах ёстой. Гэтэл Бууцагаан сумын Нарангийн тавдугаар багийн дарга Ц.Батсайхан хууль бусаар ИНХ-ыг зарлан явуулсан гэв. Уг нь багийн иргэдийн нийтийн хуралд сонгуулийн насны иргэд оролцдог хуультай. Мөн дөрвөн өрх тутмаас нэг өрхийн гишүүн хуралд суух ёстой гэж заажээ. Гэтэл дээрх компани олон хүнтэй өрхүүдийг зориуд сонгон хуралд авчирсан, мөн нутгийн бөхчүүдийг айлуудаар явуулж, иргэдийг ятгаж, гарын үсэг цуглуулсан тул хурлыг хүчингүй гэж үзэж байгаа гэнэ.

Б.ҮРЖИГ

Хот тохижилтын газар ОНӨААТҮГ, “Базалт нэгдэл” ХХК, “Мөнхбуян оргил” ХХК зэрэг газрууд хотын хэмжээнд энэ онд 82 мянга орчим золбин нохой, муурыг устгах төлөвлөгөө гарган ажилж байна. Үүүнээс эхний есөн сарын байдлаар 58 мянга орчим золбин нохойг устгасан байна.

Устгалын ажилд “Бид туслая” ТББ нь энэ оны гуравдугаар сарын 27-оом эхлэн устгасан нохойг хот тохижилтын газрын мэргэжилтэнтэй хамтран нэг бүрчлэн тоолж, устгалд оруулах, дүүргүүдийн хороо бүрт хүрч ажиллах, сар бүр график гаргах, анчдад хөдөлмөр хамгаалал, аюулгүй ажиллагааны дүрмийг мөрдөж ажиллуулах зэрэг шаардлагыг өдөр бүр хяналт тавин ажиллаж байна.

Мөн энэ оны тав, зургаадугаар сард Чингэлтэй, Сүхбаатар дүүргүүдийн гэр хорооллын 15 мянган эзэнтэй нохойг бүртгэлжүүлэсэн.

Мөн нохдод пайз зүүх, паспортжуулах, вакцин хийх, ариутгал хийсэн юм. Үүнтэй холбоотой иргэдээс санал хүсэлт, сэтгэл ханамжийн судалгаа авч байгаа гэв.

С.ОЮУНЖАРГАЛ

Сүүлийн жилүүдэд байгаль, цаг агаарын өөрчлөлт, хүний буруутай үйл ажиллагаанаас болсон ослын тоо өссөөр байна. Тиймээс Онцгой байдлын ерөнхий газраас аврах үйл ажиллагаанд нохойг ашиглан сургаж дадлагажуулах, сургагч, хөтлөгчийг бэлтгэх ажлыг эхлүүлж байна. 282 дугаар тогтоолын дагуу ОБЕГ-ын харьяа Эрэлч нохойн албыг байгуулаад байна.

Нохой нь аврагчийн бүтэн хоногт хийх эрлийн ажлыг хоёроос дөрвөн цагт гүйцэтгэх чадвартай бөгөөд үнэрлэх чадвар нь хүнийхээс арав дахин илүү байдаг гэнэ.

Эрэлч нохойн албыг НОБГ-ын Хан-Уул дүүргийн ОБХ-ийн Гал түймэр унтраах, аврах 65 дугаар ангийн харьяа байгуулж, нээлтийн ажиллагааг өнөөдөр зохион байгууллаа. Энэ албыг байгуулснаар Онцгой байдлын гамшигтай тэмцэх, бэлэн байдлыг хангах, аврагчдын аюулгүй байдал болон тэдний ажлыг хөнгөвчлөх ажиллагааг шуурхай явуулах, эрлийн ажиллагаанд ашигладаг тоног төхөөрөмжийн зардлыг хэмнэх, аврах ажиллагаа явуулахад цаг хугацаа хожих зэрэг олон давуу талтай юм.

Тус алба нь дөрвөн сургагч багш, 7-13 сартай 10 нохойтой юм. Нохойг зургаан сартайгаас нь эхэлж сургаж эхэлдэг байна. Ингэж бэлтгэгдсэн эрэлч нохой нь долоогоос есөн жил үүрэг гүйцэтгэх боломжтой байдаг ажээ.