Month: August 2017

Categories
мэдээ улс-төр

​Ерөнхийлөгч Х.Баттулга үндэсний үйлдвэрлэгчдийн төлөөллийг хүлээн авч уулзав

Монгол Улсын Ерөнхийлөгч Х.Баттулга өнөөдөр үндэсний үйлдвэрлэгчдийн төлөөллийг хүлээн авч уулзлаа.

Уулзалтын үеэр Ерөнхийлөгч Х.Баттулга “Бизнесийн салбарыг ойлгодог, зовлонг нь мэддэг хүн Ерөнхийлөгч болсны хувьд Монголд үндэсний үйлдвэрлэл хөгжихөд ямар бэрхшээл, саад учирдгийг би сайн мэднэ” хэмээгээд “Үндэсний үйлдвэрлэлийг дэмжихийн тулд хувьсгал, реформын шинжтэй өөрчлөлтийг нэгдэж нийлэн хийцгээе. Үүнийг Монгол Улсын Ерөнхийлөгчийн зүгээс дэмжихэд бэлэн байна” гэлээ.

Монголд худалдааны эдийн засаг удаан хугацаанд ноёрхлоо. Одоо худалдааны эдийн засгаас үйлдвэрлэлийн эдийн засагт шилжихийн тулд үндэсний үйлдвэрлэгчид хүсэл, зорилгоо нэгтгэн ажиллах цаг боллоо. Монгол Улсын эдийн засаг импортоос хэт хараат, үйлдвэрлэлийг дэмжих бодлогоо сул тавьснаас баялаг үйлдвэрлэгчид хүнд байдалд орсон. Арилжааны зээлээр аж үйлдвэрийг хөгжүүлэхгүй. Үйлдвэрлэлийг хөгжүүлэх нэгдсэн бодлого, хөтөлбөр хэрэгтэй. Мөн зах зээлийн эдийн засгийг өөрчилж нэмүү өртөг шингээсэн бүтээгдэхүүн үйлдвэрлэх ёстой гэдгийг Ерөнхийлөгч онцолж байлаа.

Тэрээр АНУ-аас Монгол Улсад суугаа Онц бөгөөд Бүрэн эрхт Элчин сайд Женифер Зимдал Галтыг хүлэн авч уулзах үеэрээ АНУ нь Монгол Улсад үйлдвэрлэсэн оёмол, сүлжмэл бүтээгдэхүүнийг тус улсад татваргүй экспортлох тухай шийдвэрийг 1992 онд Монгол Улсын шинэ тутам ардчиллыг дэмжих зорилгоор гаргаж байсан боловч тухайн үеийн зах зээлийн боломж бололцооноос шалтгаалан Монголын компаниуд ашиглаж чадаагүй, харин одоо энэ ажлыг шинээр эхлүүлэх боломж байгаа эсэх талаар санал солилон ярилцсан тухайгаа уулзалтын үеэр мөн дурдлаа.

Үйлдвэрлэгчид санаа бодол, дуу хоолой, хүч бололцоо, үйл ажиллагаагаа нэгтгэж, дор дороо салбараа байгуулж, Худалдаа, аж үйлдвэрийн танхимыг шахаж ажиллахыг Ерөнхийлөгч Х.Баттулга үйлдвэрлэгчдэд анхааруулаад Төрийн тэргүүний зүгээс тэднийг дэмжин ажиллахаа илэрхийлэв.

Categories
мэдээ улс-төр

Өргөтгөсөн санхүүжилтийн хөтөлбөрийн эхний шатыг амжилттай хэрэгжүүлсэн гэж ОУВС дүгнэлээ

Монгол Улсын Ерөнхий сайд Ж.Эрдэнэбат өнөөдөр Олон Улсын Валютын сангийн ажлын хэсгийн ахлагч Коши Матайг хүлээн авч уулзлаа.

Ажлын хэсэг ОУВС-тай хамтран хэрэгжүүлж байгаа Өргөтгөсөн санхүүжилтийн хөтөлбөрийн эхний үнэлгээг хийхээр манай улсад ажиллав. Хөтөлбөрийн хүрээнд авч хэрэгжүүлэх нэн тэргүүний бодлогын арга хэмжээг цаг хугацаанд нь амжилттай хэрэгжүүлж, хөтөлбөрийн эхний шатанд хүрэх ёстой үр дүнд хүрсэн байгаа тул эхний шатны үнэлгээг “Амжилттай хэрэгжүүлсэн” гэж дүгнэх боломжтой боллоо.

Эдийн засгийг сэргээх, макро эдийн засгийн тэнцвэрийг тогтоох талаар Засгийн газраас авч хэрэгжүүлж буй бодлогын нөлөөлөл түргэн хугацаанд нааштай үр дүн гарч байна. Тухайлбал, төгрөгийн ханш тогтворжин, хөрөнгө оруулагчдын итгэл сэргэж, ажлын байр нэмэгдэх, эдийн засгийн идэвхжил сэргэх, төсвийн алдагдал буурах зэрэг үр дүн гарч байгааг ОУВС-гийн ажлын хэсгийн ахлагч дурдлаа. Хэдийгээр эдийн засгийн өсөлт бий болж байгаа ч, эмзэг хэвээр байгааг анхаарч цаашид өсөлтийг баталгаажуулах, тогтвортой байлгахын тулд Засгийн газар тууштай ажиллаж, шинэтгэлийг үргэлжлүүлэх нь чухал байгааг тэрээр онцоллоо.

Эдийн засагт тулсан байсан эрсдлийг хазаарлан, эдийн засгаа сэргээх замд орсноор Засгийн газар үйлдвэржилт, дэд бүтэц, экспорт, хөгжлийн төсөл арга хэмжээг хэрэгжүүлэх боломж олгож байгааг Ерөнхий сайд Ж.Эрдэнэбат тэмдэглээд цаашид хөтөлбөрийг амжилттай хэрэгжүүлж, улс орноо хямралаас гаргахын тулд Монгол Улсын Засгийн газар хичээж ажиллана гэлээ гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Categories
мэдээ нийгэм

​С.Батцэцэг: Энэ эрхэм хүндтэй цолыг авсандаа баяртай байна

Ерөнхийлөгч Х.Баттулга Үндэсний шигшээ багийн тамирчин Соронзонболдын Батцэцэгт Хөдөлмөрийн баатарын Алтан соёмбо тэмдэг, Сүхбаатарын одон тэмдгийг нь гардууллаа.

Ерөнхийлөгч Х.Баттулга тангараг өргөснөөсөө хойш олгож буй анхны шагнал нь энэ билээ.

Архангай аймгийн Хашаат сумын харьяат, гавьяат тамирчин Соронзонболдын Батцэцэг “Лондон-2012” олимпийн хүрэл, 2010, 2015 оны ДАШТ-ий алт, 2013 оны мөнгө, “Казань-2013” “Универсиад” их наадмын аварга, насанд хүрэгчдийн Азийн АШТ-ий алт, мөнгө, залуучуудын Азийн АШТ-ий мөнгө, өсвөр үеийн Азийн АШТ-ий мөнгө, Иван Ярыгиний “Алтан Гранпри”-гийн алт, хүрэл, Польшийн нээлттэй тэмцээний алт, хүрэл, Киевын ОУТ-ий хүрэл, Чувашийн Ерөнхийлөгчийн нэрэмжит цомын нээлттэй тэмцээний мөнгө, Сассаригийн ОУТ-ий хүрэл, “Mongolia Open” ОУТ-ий 2012, 2013, 2015, 2016 оны аварга, 2011 оны мөнгө, 2017 оны хүрэл, 2009, 2010, 2012, 2013, 2016 оны насанд хүрэгчдийн улсын аварга юм.

С.Батцэцэг спортын тамирчдаас 18, чөлөөт бөхийн спортоос төрсөн тав дахь хөдөлмөрийн баатар болж байна. Түүнээс өмнө Хорлоогийн Баянмөнх 1992, Жигжидийн Мөнхбат 1994, Зэвэгийн Ойдов 1994, Дашдоржийн Цэрэнтогтох 2006 онд Хөдөлмөрийн баатар болж байв. Шинэхэн хөдөлмөрийн баатар маань гадаадад эмчлүүлж байгаад эх нутагтаа ирсэн даруйдаа баатрын тэмдэгээ гардан авсан юм.

Хөдөлмөрийн баатар С.Батцэцэг: “Өнөөдөр энэ эрхэм хүндтэй цолыг авсандаа баяртай байна. Намайг чөлөөт бөхийн спортод оруулсан Дондов багшдаа, бөхийн эрдмийг дэлхийн тавцанд хүргэхэд надад тусалж, зааж сургасан З.Дүвчин багшдаа, шигшээ багийн багш Б.Батбаяр, Сүхбаатар, Цэдэнсодном багш нартаа маш их баярлалаа” гэж хэллээ.

Categories
гадаад мэдээ

Сэжигтнүүд зугтахыг завдаад амиа алджээ

Related imageОХУ-ын нийслэл Москва хотын шүүхэд сэжигтэн этгээдүүд зугтахыг завдсанаас амиа алдсан хэрэг гарчээ. Сэжигтнүүд шүүхийн танхимд хамгаалагчдаас бууг нь булаан авч зугтахыг оролдсон байна. Энэ үеэр гурван сэжигтэн амь үрэгдэж, нөгөө хоёр нь шархтсан бол аюулгүй байдлын гурван офицер гэмтэж бэртэл авсан байна.

Сэжигтнүүд нь “Grand Theft Auto” видео тоглоомоос санаа авч, өөрсдийгөө “GTA Gang” гэж нэрийдсэн бүлэглэлийн гишүүд аж. Төв Ази үндэстнүүдээс бүрдсэн тус бүлэг 2012-2014 оны хооронд 17 мотоцикльтой хүмүүсийг хөнөөсөн хэрэгт буруутгагджээ.

Categories
мэдээ нийгэм

​Есөн түймэр асч байна

Сэлэнгэ аймаг Мандал сумын нутагт гурван түймэр, Ерөө сумын нутагт гурван түймэр, Хүдэр сумын нутагт нэг түймэр, Хөвсгөл аймаг Цагаан-Үүр сумын нутагт нэг түймэр, Булган аймаг Хутаг-Өндөр сумын нэг түймэр нийт есөн түймэр асч байна.

Харин Сэлэнгэ аймаг Мандал сумын хоёр түймэр, Булган аймаг Гурванбулаг сумын нэг, Хутаг-Өндөр сумын нэг түймэр, Завхан аймаг Яруу сумын нэг түймэр нийт таван түймрийг цурманд оруулж бүрэн унтраахаар ажиллаж байна.

Дээрх түймрүүд дээр онцгой байдлын байгууллагаас 254 алба хаагч, 22 автомашин, орон нутгаас 244 иргэн, 34 автомашин, нийт 498 хүн, 56 автомашин, таван мотоцикльтой ажиллаж байна гэж Онцгой байдлын ерөнхий газраас мэдээллээ.


Categories
мэдээ нийгэм

​Өнөөдөр “Монголын төмөр замчдын өдөр”” тохиож байна

Монгол Улсад төмөр замын салбар үүсэн хөгжсөн 79 жилийн ой, “Монголын төмөр замчдын өдөр” өнөөдөр тохиож байна.

1938 онд Улаанбаатар – Налайхын хооронд 43 км нарийн төмөр зам тавигдаж, уурын галт тэрэг давхиж эхэлснээс хойш эдүгээ 79 жил болжээ. Анхны төмөр зам нь Налайхын нүүрсээр нийслэлийн үйлдвэр аж ахуйн газрууд, байгууллага, хүн амыг нүүрсээр хангах зорилготой байв. Төмөр замыг барьж байгуулах болон ашиглах асуудлыг зөвлөлтийн мэргэжилтэн А.Ф.Чайковский, А.Н.Кудряшов, А.М.Кузнецов, И.Н.Коновалов нар удирдаж байсан юм. Тухайн үед ЗХУ-ын төмөр замын нэг жилийн курст 1938 онд 50, 1939 онд 63 хүнийг явуулан сургаж бэлтгэсэн байна. Дэлхийн II дайны үед 1938- 1939 онд улсын дорнод хязгаарт цэргийн зориулалттай төмөр зам барьсан нь өнөөгийн Эрээнцав- Баянтүмэн чиглэлийн 268 км зам юм.

Харин 1947 оноос хоёр жилийн хугацаанд барьсан Наушки-Улаанбаатарын 400 км зам анхны олон улсын чанартай төмөр зам билээ. Энэхүү төмөр замыг 1946 онд БНМАУ болон ЗСБНХУ -ын хооронд байгуулсан хамтын ажиллагааны тухай гэрээний дагуу барьжээ. Улмаар1955 онд ЗХУ-ын хөрөнгөөр Улаанбаатар-Замын-Үүд чиглэлд 700 гаруй км урт төмөр замыг барьж, ашиглалтад хүлээлгэн өгсөн байна. Ийнхүү Монголын умард хилээс өмнөд хил хүртэл 1115км төмөр замтай болжээ. Уг замын туршид 508 гүүр, 35 өртөө зөрлөг, 5 депо, Улаанбаатарт төв буудал барьснаас гадна, орон сууцны хороолол, эмнэлэг, сургууль, гуанз, дэлгүүр, клуб бүхий олон тосгон суурин бий болжээ.
Өнөөдөр Монголын төмөр замын сүлжээ 1520 км бөгөөд туслах болон салаа замуудыг нэмбэл 1815 болдог байна. Төмөр замаар жилд 20 сая гаруй тонн ачаа тээвэрлэдэг, 2020 он гэхэд 45 сая тоннд хүргэх зорилт тавин ажиллаж байгаа юм.

“Монголын төмөр замчдын өдөр”-ийн хүрээнд өнөөдөр УБТЗ-ын Удирдах газрын өмнөх талбайд “Ган зам” дууны хөшөөнд цэцэг өргөх ёслол болох юм. Мөн тус дууны үгийг зохиосон төрийн шагналт яруу найрагч Ч.Лхамсүрэн агсны амьдрал уран бүтээлийн тухай гэрэл зургийн үзэсгэлэн нээгдэнэ.

Categories
мэдээ нийгэм

Улз голын усны түвшин багассан гэв

Сүүлийн жилүүдэд хэт халж буйн улмаас Дорнод аймгийн хойд сумдын нутгаар урсан өнгөрдөг Улз голын урсгал 60 км газар тасарч, адагтаа хүрэхээ больжээ.Голын урсацын эх үүсвэр нь хурын ус байдаг бөгөөд урсгал нь шургах үзэгдэл байнга давтагдах болсон.Энэ удаагийх шиг “60 км-ээр тасарч байгаагүй” хэмээн нутгийн иргэн мэдээлэв.

Улз гол нь Хэнтий аймгийн Норовлин сумын нутаг дахь Их, Бага бүрд хэмээх булгаас эх авч, Хэнтий, Дорнод аймгийн нутгаар зүүн хойш урсан улсын хил давж ОХУ-ын Тарь нууруудын хонхорт орших Баруун Тарь нуурт цутгадаг.Нийт урт нь 520 км, үүний 495 км нь манай улсын нутаг дэвсгэрт хамаардаг.

Өнгөрсөн сард Онон, Улз голын сав газрын захиргааны хийсэн шалгалтаар Улз гол Дорнод аймгийн Дашбалбар сумын нутагт очоод шургаж, адагтаа хүрч чадаагүйг тогтоосон байна.Уртаараа улсад дээгүүрт бичигддэг Улз голын усны түвшин 1996 оноос хойш багассаар иржээ.

Categories
мэдээ нийгэм

П.Сэргэлэн сайд аймаг, нийслэлийн Засаг дарга нарт албан даалгавар өглөө

Хүнс хөдөө аж ахуй хөнгөн үйлдвэрийн сайд П.Сэргэлэн зуншлагын байдал, мал өвөлжилтийн бэлтгэл ажлыг эртнээс хангахтай холбогдуулан аймаг нийслэлийн Засаг дарга, Хүнс хөдөө аж ахуйн газрын дарга нартай /2017.07.27 /цахим хурлыг хийж, албан даалгавар өгсөн. Энэхүү албан даалгаварыг албан бичгээр аймаг нийслэлийн Засаг дарга, ХХААГ-ын дарга нарт хүргүүллээ.

Хүнс хөдөө аж ахуй хөнгөн үйлдвэрийн сайд П. Сэргэлэн орон нутгийн удирдлага, Хөдөө аж ахуй газрын дарга нарт дараах үүрэг даалгаварыг өгсөн юм.

1.Засгийн газрын 186 дугаар тогтоолын дагуу Хөдөө аж ахуйн салбарын 2017-2018 оны өвөлжилт, хаваржилтын бэлтгэл хангуулах, байгаль цаг уурын болзошгүй хүндрэлээс урьдчилан сэргийлэх төлөвлөгөөг баталж, нэгдсэн удирдлагаар хангаж ажиллах,

2.Хадлангийн нөөцгүй гантай байгаа аймгууд хадлангийн нөөцтэй аймаг, сумын удирдлагуудтай харилцан тохиролцож хадлан бэлтгэх ажлыг шуурхай зохион байгуулах, /энэ жил байгалийн хадлан өвс, тэжээл экспортлохыг хориглосон тул зүүн аймгуудын ААН-үүдыг дотоодын зах зээлд нийлүүлэх ажлыг оновчтой зохион байгуулах/

3.Улсын болон орон нутгийн тусгай хэрэгцээний отрын бүс нутаг, тусгай хамгаалалттай газар, хилийн зурвас газруудад отроор өвөлжих малчин өрх, малын тоог тодорхой гаргаж холбогдох газруудад хүсэлт гаргаж, гэрээ байгуулан малчдыг отроор өвөлжүүлэхэд нь дэмжлэг үзүүлэх,

4.Дотоодын зах зээл дээрх махны үнийг тогтворжуулах, дотоод хэрэгцээнээс илүүдэлтэй байгаа нөөцийг эргэлтэд оруулж, экспортыг нэмэгдүүлэх, малчдын орлогыг нэмэгдүүлэх бодлоготой уялдуулан эрүүл бүсчлэл бий болгон мах бэлтгэн экспортод гаргадаг аж ахуйн нэгжүүдийг дэмжих,

5. Мал сүргийг эрүүл мэндийн үзлэг, шинжилгээнд бүрэн хамруулж аймаг, сум дамжуулан отор нүүдэл, шилжилт хөдөлгөөн хийхэд нь дэмжиж ажиллах

6.Малын тэжээл үйлдвэрлэлийн чиглэлээр үйл ажиллагаа явуулж байгаа өөрийн аймгийн аж ахуйн нэгжүүдээс аймаг, сумынхаа нөөц бүрдүүлж малчиддаа хүргэх зохион байгуулалтын арга хэмжээ авах,

7.Улсын төсвийн 2017 оны тодотголын хөрөнгө оруулалтаар батлагдсан инженерийн хийцтэй худаг барьж байгуулах ажлыг ХХААХҮСайдын А/74 дугаар тушаалаар батлагдсан хуваарийн дагуу 10 дугаар сард багтааж хүлээн авах,

8.Малын гоц халдварт, паразиттах өвчнөөс урьдчилан сэргийлэх, эмчлэх арга хэмжээг технологит хугацаанд нь чанартай зохион байгуулах, удирдлага зохион байгуулалт, арга зүй, заавар зөвлөмж, туслах хүн, хүчээр хангаж, гүйцэтгэлийн хяналт, үр дүнг дээшлүүлж ажиллах;

9.Мал сүргийг зун, намрын угаалгад бүрэн хамруулж, өвчтэй мал байсан болон хил залгаа нутгийн нийт хот бууц, хашаа хороог ариутган халдваргүйжүүлэх ажлыг орон нутгийн хэмжээнд Засаг даргын шийдвэр гарган 10 сард компанит ажил болгон зохион байгуулах;

10.Харъяа нутаг дэвсгэртээ байгаа мал сүргийг эрүүл мэндийн үзлэгт бүрэн хамруулан малын гоц халдварт өвчний тандалт, шинжилгээ, дархлаажуулалтын ажлыг зохион байгуулах, гоц халдварт өвчнүүдээс урьдчилан сэргийлэх ухуулга, сургалт, сурталчилгааны ажлыг тогтмолжуулах, орон нутгийн болон хил залгаа нутагт дахь ард иргэдийн сонор сэрэмжийг дээшлүүлэх;

11.Ургацын урьдчилсан балансыг 8 дугаар сарын 18-ны дотор таримлын төрөл тус бүрээр нарийвчлан гаргах, хураах арга технологийг боловсруулах,

12.Ургац хураалтын бэлтгэлийг эртнээс хангах, намхан тачир, алаг цоог болцтой тариаг хаягдалгүй хураахад зориулсан техник тоног төхөөрөмжийг тоноглож бэлэн байдлыг хангаж ажиллах,

13.Ургац хураалтад ажиллах хүн хүчний тооцоог гаргаж захиалгаа өгөх, техник, тоног төхөөрөмж, зоорь, агуулах, үтрэмийн засвар үйлчилгээг шуурхайлж бэлэн байдлыг хангах,

14.Тариалан эрхлэгч аж ахуйн нэгж, иргэн бүр дотоодын ургацаасаа боловсруулж бэлтгэсэн уриншиндаа хүрэлцэхүйц хэмжээний үрийн буудайн нөөц бүрдүүлэх

Categories
мэдээ нийгэм

​ Монгол-Хятадын II удаагийн экспо ирэх сарын 26-30-ны өдрүүдэд Хөх хотод болно

Categories
мэдээ улс-төр

​Амлалтаасаа ухарч, хүүхдийн мөнгө олгож эхэлсэнийг ОУВС шүүмжилжээ

Ерөнхийлөгч Х.Баттулга Монголбанкны ерөнхийлөгч Н.Баяртсайханыг хүлээн авч уулзаад ОУВС-гийн өргөтгөсөн санхүүжилтийн хөтөлбөрийн хэлэлцээрийн явц, хэрэгжилт, гарч буй хүндрэлүүдийн талаар санал солилцсон юм.

ОУВС-гийн ажлын хэсэг төгсгөлийн уулзалтаа хийх бөгөөд хэлэлцээр амаргүй нөхцөлд явж байгаа тухай Монголбанкны ерөнхийлөгч мэдэгдлээ. ОУВС-гийн өргөтгөсөн санхүүжилтийн хөтөлбөрт орсноор Монголбанкны зүгээс банкны салбарт бүтцийн өөрчлөлт хийхээр болсон байна.

ОУВС-тай хамтран өргөтгөсөн санхүүжилтийн хөтөлбөр баталснаас хойш хоёр сарын дараа амлалтаасаа ухарч, хүүхдийн мөнгө өгч эхэлснийг ОУВС-гийн зүгээс шүүмжилж буйг Монголбанкны ерөнхийлөгч хэллээ.

ОУВС, Азийн хөгжлийн банкны зүгээс мал, ашигт малтмалын лиценз зэргийг арилжааны банкны барьцаанд авах ёстой зүйл биш гэж үзэж байгаа аж. Гэтэл монголчуудын хувьд банкны барьцааны гол хэрэгсэл нь мал байдаг. Хэрэв ийм байдлаар үнэлгээ хийгдвэл арилжааны банкуудын байдалд мэдэгдэхүйц муу нөлөө үзүүлж магадгүй гэдгийг Монголбанкны ерөнхийлөгч Н.Баяртсайхан танилцуулсан.

Ерөнхийлөгч Х.Баттулга энэ үеэр иргэдийн цалин, тэтгэвэр, оюутны зээлийн талаар асуун тодруулж, тэтгэвэр, цалингийн зээл нь эрсдэлгүй зээл атал арилжааны банкууд мөнгө хүүлэх байдлаар, тухайлбал, тэтгэврийн зээлд сарын хоёр хувь, жилийн 24 хувийн хүү ногдуулж байгаа нь бодит байдалд нийцэхгүй гэдгийг онцлов.

Ерөнхийлөгч Х.Баттулга тодорхой асуудлуудаар Монгол банкнаас тайлбар, тодруулга авахаар боллоо.