Month: July 2017

Шашин төрийг хослуулсан энэ арга хэмжээнд Төрийн тэргүүн очдог. Ханхөхий хайрханыг 2012 онд тахихад Ерөнхийлөгч Ц.Элбэгдорж оролцож байсан бол шинэ Ерөнхийлөгч төлөөллөө оролцуулан өөрөө явахаас татгалзсан. Ерөнхийлөгч Х.Баттулга Хан Хөхий уулын тэнгэрийг тайх төрийн тахилгын ёслолд оролцох төрийн элч төлөөлөгчдийн тэргүүнээр УИХ, Засгийн газрын гишүүн, Сангийн сайд Б.Чойжилсүрэнг томилсон. Төлөөлөгчдийн бүрэлдэхүүнд:

• Увс аймгийн Засаг дарга Д.Батсайхан,
• Увс аймгийн Иргэдийн төлөөлөгчдийн Хурлын дарга Э.Насанбат,
• Зэвсэгт хүчний Жанжин штабын дарга, дэслэгч генерал Д.Даваа,
• Төрийн ёслолын албаны дарга Х.Жанцан,
• Гандантэгчэнлин хийдийн хамба лам Д.Чойжамц, болон Ерөнхийлөгчийн Тамгын газрын төлөөллийг оролцуулахаар болжээ.

“Төрийн тахилгатай уул овооны тэнгэрийг тайх тахилгын ёслолын журам”-ын 2.2 дахь хэсэгт Монгол Улсын Төрийн тэргүүн өөрийн биеэр оролцох боломжгүй тохиолдолд Төрийн тахилгын ёслолд оролцох төлөөлөгчийг томилж болох тухай заасан байдаг юм. Төрийн тахилгын ёслолд Төрийн элч төлөөлөгч оролцуулдаг байсан төрт ёсны уламжлалтай.

Монгол Улс тусгаар тогтносон даруйдаа 1911 онд “Тайх тахиглах ёслолын хууль” гаргаж, 1912 онд Отгонтэнгэр хайрханыг анх тахиж байжээ. Уг тахилгад Зарлигаар тайх сайдаар Улиастайн сайдыг гаргах тухай Богд Живзундамба хутагт зарлиг буулгаж байсан түүх байна.

Монгол Улсын Ерөнхийлөгч нэг удаа овоо тахилгад оролцохоор явахад 30 сая төгрөгийн зардал гардаг. Энэ жил Хан Хөхий, Алтан овооны тахилга болно. Ерөнхийлөгч тахилгад биечлэн оролцолгүй элч төлөөлөгчөө томилж явуулснаар улсын төсвөөс нийт 60 сая төгрөг хэмнэнэ хэмээн мэдэгдсэн билээ.

Ханхөхий хайрханы тэнгэрийг тайх ёслолын дараа баруун бүсийн “Увс хурд-2017” хурдан морины уралдаан зохион байгуулахаар орон нутаг хөлтэй бэлджээ.

Тахилгын ёслол өнөөдөр 06.00-13.00 цагт Хан хөхий хайрханы овоон дээр болно. Дараа нь эрлийз морьдын гурван насны уралдаан болох юм. Маргааш хурдан морины уралдаан азарганы уралдаанаар эхэлнэ.

ХАНХӨХИЙ ХАЙРХАНЫ ТЭНГЭРИЙГ ТАЙХ ЁСЛОЛ, БАРУУН БҮСИЙН ХУРДАН МОРИНЫ УРАЛДААНЫ ДАНШИГ НААДМЫН ХӨТӨЛБӨР

2017 оны 07 дугаар сарын 28-ны өдөр
06:00-13:00 Хан Хөхүй хайрханы тэнгэрийг тайх тахилгын ёслол /Хан Хөхүй хайрханы овоон дээр/
15:00 Эрлийз бага насны хурдан морины гараа
17:00 Эрлийз морьдын дунд насны хурдан морины гараа
19:00 Эрлийз морьдын дээд насны хурдан морины гараа

2017 оны 07 дугаар сарын 29-ны өдөр
6:00 Хурдан азарганы гараа
09:00-11:00 Баяр наадмын нээлт – Цагаан сүлд цэнгүүлэх ёслолын үйл ажиллагаа
9:30 Хязаалан насны хурдан морины гараа
11:00 Хүчит бөхийн барилдааны 1,2-ийн даваа
11:00 Сурын харвааны тэмцээн
13:00 Өсвөрийн бөхийн барилдааны 1,2-ийн даваа
13:00 Дааган насны хурдан морины гараа
17:00 Хүчит бөхийн барилдааны үргэлжлэл
17:00 Шүдлэн насны хурдан морины гараа
17:00 Эрлийз насны морь цоллох
21:00-24:00 Үдшийн цэнгүүн

2017 оны 07 дугаар сарын 30-ны өдөр
7:00 Их насны хурдан морины гараа

ӨНДӨРХАНГАЙ СУМЫН “ТҮМЭН АДУУНЫ БАЯР”-ЫН ХӨТӨЛБӨР

2017 оны 07 дугаар сарын 30-ны өдөр
09:00 Ташуур шүүрэх тэмцээн
Морь булгиулах тэмцээн
Хос морьтныг шалгаруулах
Унаганы уралдаан
Тамганы ёслол
11:00 Азарга, Даага, Шүдлэн, Хязаалан насны морь цоллох
11:00 Хүчит бөхийн барилдааны үргэлжлэл
12:00 Соёолон насны хурдан морины гараа
15:00 Хүндэт зочид гийчид, Өндөрхангай сумын Хүн эмнэлгийн 80 жилийн ойн төлөөлөгчдөд хүндэтгэл үзүүлэх, бэлэг дурсгал гардуулах
16:00 Их нас, Соёолон насны морь цоллох
17:00 Хүчит бөхийн барилдааны шагнал гардуулах
19:00 Наадмын хаалтын ёслол

Улаанбаатар хотын хэмжээнд зам засварын болон бүтээн байгуулалтын ажлууд ид үргэлжилж байна. Өнөөдрийн байдлаар Сүхбаатар дүүргийн нутаг “Өгөөж” ХК-ны уулзвар, “Авто_плаза” төвийн уулзвар, Хан-Уул дүүргийн нутаг “Оргил” худалдааны төвийн уулзвар, Зайсангийн уулзвар, ХААИС-ийн зүүн хойд уулзваруудын нэвтрүүлэх чадварыг сайжруулах өргөтгөл, шинэчлэлтийн ажлууд хийгдэж байна.

Иймд эрхэм жолооч, явган зорчигч та хөдөлгөөний аюулгүй байдлыг ханган, бие биедээ хүндэтгэлтэй хандан замын хөдөлгөөндөө соёлтой оролцоорой.

Сонгинохайрхан дүүргийн 21 дүгээр хороонд энэ сарын 25-ны өдөр хүчтэй аадар бороо орсны улмаас үер бууж гамшгийн хэмжээний нөхцөл байдал үүсээд байгаа юм. Нийслэлийн Онцгой комиссын орлогч дарга Ж.Батбаясгалангаар ахлуулсан баг өчигдөр тухай бүс нутагт очиж ажиллав. Үерийн улмаас орон гэргүй болсон 12 өрхөд гэр олгох ажлыг нийслэлийн онцгой комиссоос яаралтай шийдвэрлэсэн байна. Мөн Улаанзагалмайн нийгэмлэг, Дэлхийн зөн зэрэг сайн дурын байгууллагууд гамшигт өртөж хохироод байгаа иргэдэд гудас, хөнжил, хувцас зэрэг эд материалын тусламж үзүүлжээ. Улс, нийслэл, дүүргийн онцгой комисс, сайн дурын байгууллагууд, иргэд хамтран үерт автаж бохирдсон талбайг цэвэрлэх, ариутгах, халдваргүйжүүлэх, сэргээн босгох ажлыг хийж байна.

“Хүчтэй аадар бороо орсны улмаас Сонгинохайрхан дүүргийн 21-р хороо, Жаргалант тосгонд үүссэн гамшгийн хохирлыг барагдуулах, сэргээн босгох, ариутгал, халдваргүйжүүлэлтийн ажил ид өрнөж байна. Улс, нийслэл, дүүргийн Онцгой комисс бүрэн бүрэлдэхүүнээрээ ажиллаж байна. Мөн сайн дурынхан, гэрээт цэргүүд, оршин суугчид хамтран ажиллаж байна. Хохирлын үнэлгээг тогтоох тусгай ажлын хэсэг байгуулагдан ажиллаж байна. Олон айлын мал, эд хөрөнгө гамшигт өртсөн. Жаргалант тосгоны төвд ундны усны 11 худаг байдаг. Худгууд үер буусан гол гудамжинд байрладаг. Мэргэжлийн хяналтын байгууллага иргэдийн эрүүл аюулгүй байдлыг хангах үүднээс тухайн өдөр хууль тогтоомжийн дагуу дээж авч шинжилгээнд явуулсан. Шинжилгээний хариу хамгийн багадаа 72 цагийн дараа гардаг. Тиймээс УСУГ-аас иргэдийг зөөврийн усаар хангаж байна” хэмээн нийслэлийн Онцгой комиссын орлогч дарга, НЗД-ын орлогч Ж.Батбаясгалан ярилаа.

Нийслэлийн Онцгой комиссын гишүүн, СХД-ийн Засаг дарга Ж.Сандагсүрэн “Жаргалант тосгонд нийслэл, дүүргийн Онцгой комисс хамтран ажиллаж байна. Сүүлийн хоёр өдрийн турш үерийн усаар хуралдсан лаг шаврыг арилгах, орон гэргүй болсон айлуудад гэр олгох, бохирдсон хөрсийг ариутгаж, цэвэрлэх гэх мэт ажлыг хийж байна. Улаан загалмайн нийгэмлэг, Дэлхийн зөн ОУ-ын байгууллага, тойргоос сонгогдсон УИХ-ын гишүүн Д.Сумъяабазар, дүүргийн хоршоологчид зэрэг олон байгууллага, хүмүүс гамшигт өртсөн иргэдэд тусалж, дэмжлэг үзүүлж буйд талархсанаа илэрхийлмээр байна. Дүүргийн зүгээс шаардлагатай хөрөнгө, мөнгийг шийдвэрлэж, хуульд заасан үүргийнхээ дагуу иргэдтэйгээ хамтран сэргээн босголтын ажлыг хийж байна” хэмээв.

НОБГ-ын дарга Н.Уламбаяр “Гамшгийн дараах сэргээн босголтын ажил хийж байна. Олон айл хашаа хороо, гэр оронгүй болсон. Бид айл өрхүүдийн хашаа, хороог барьж босгож өгч байна. Мөн айлуудын жорлон дүүрсэн тул бүх талбайг ариутгах шаардлагатай байгаа. Үүнээс шалгаалан элдэв халдварт өвчин гарах магадлал өндөр байдаг. Нийслэлийн Онцгой байдлын газраас мэргэжлийн ариутгал, халдаргүйжүүлэлтийн бүлгээр тусгай зориулалтын ариутгалын бодисоор ариутгал хийлгэж, айл өрх бүрт хүрч ажиллаж байна” хэмээлээ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Өнгөрсөн зургаадугаар сард Архангай, Булган аймгуудын нутагт хүчтэй салхи шуурч, мөндөр орсны улмаас Эрдэнэт – Булганы чиглэлийн 110 КВ-ын цахилгаан дамжуулах агаарын шугамд гэмтэл гарч, зургаан аймгийн 125 сум тог цахилгаангүй болсон билээ. Тухайн үед яамнаас ажлын хэсэг гарч, гэмтэл засах ажлыг эрчимжүүлснээр гурав, дөрөв хоногийн дараа дахин тогтой болж байсан.

Гэтэл Өвөрхангай, Архангай аймагт дахин цахилгаан тасарчээ. Тодруулбал, тулгуур баганыг босгож, холболт хийх үед агаарын шугамыг буруу холбосон нь дахин гэмтэл гарахад нөлөөлсөн байж болзошгүй аж.
Гэмтлийг өчигдөр оройноос засварлаж эхэлсэн байна.

Монголын Уулчдын үндэсний холбоk, Нийслэлийн нийтийн биеийн тамирын хороотой хамтран Хаданд авиралтын Улаанбаатар хотын аварга шалгаруулах тэмцээнийг жил бүр уламжлан болгон зохион байгуулдаг.

2017 оны Улаанбаатар хотын аварга шалгаруулах тэмцээн ирэх сарын 19-ны бямба гаригт Горхи-Тэрэлжийн байгалийн цогцолборт газар зохион болно.

Жембори хэмээх Скаут хүүхдүүдийн майхант Чуулга-Зуслан өчигдрөөс эхэлсэн. Энэхүү чуулга уулзалт Олон улсын хүүхдийн “Найрамдал” цогцолборт зохион байгуулагдаж байна. Тус чуулга уулзалтад 40 орны 2000 скаут, Монголын 21 аймаг, 9 дүүргийн 4000 гаруй скаутууд болон сайн дурын удирдагч нар нийлээд 7500 хүүхэд залуучууд оролцож байгаа. Чуулга уулзалтын зохион байгуулалтад Нийслэлийн мэргэжлийн хяналтын газрын Эрүүл мэнд,боловсрол, Соёлын хяналтын хэлтэс, Дэд бүтцийн хяналтын хэлтэс, Хүнсний аюулгуй байдал, Хөдөө аж ахуйн хяналтын хэлтсүүдийн улсын байцаагчид болзошгүй хордлого, халдвараас урьдчилан сэргийлэх, түүхий эд, бүтээгдэхүүн нь чанар, аюулгүй байдлын шаардлага хангаж буй эсэх, ажиллагсдын эрүүл мэнд, ажлын байр, орчны цэвэрлэгээ, үйлчилгээ, халдваргүйтгэл, хоол үйлдвэрлэлд ашиглаж буй баллонт хий, газны угсралт, аюулгүй ажиллагаанд 24 цагийн турш хяналт тавин ажиллаж байна.