Монгол Улсын Ерөнхийлөгчийн ээлжит сонгуулийн сурталчилгаа энэ сарын 6-нд буюу мягмар гаригт эхэлнэ.
Ерөнхийлөгчийн сонгуульд нэр дэвшигч нь сонгуулийн сурталчилгааг санал авах өдрөөс 20 хоногийн өмнө эхлүүлж санал авах өдрөөс 1 хоногийн өмнө дуусгах ёстой. Тодруулбал сонгуулийн сурталчилгаа зургадугаар сарын 6-24-ны өдөр хүртэл 18 хоног үргэлжилнэ.
Харин сонгуулийн сурталчилгааг санал авах өдрөөс 24 цагийн өмнө буюу санал авах өдрийн өмнөх өдрийн 00.00 цагаас өмнө зогсоох ёстой.
Монгол Улсын Их Хурлын дарга М.Энхболдод өнөөдөр (2017.06.02) Эрүүгийн хуульд өөрчлөлт оруулах тухай хуулийн төслийг УИХ-ын гишүүн Б.Батзориг өргөн мэдүүлэв.
Монгол Улсын Их Хурал 2015 оны 12 дугаар сарын 03-ны өдөр Эрүүгийн хуулийн шинэчилсэн найруулгыг баталсан. Энэ хуулийг 2017 оны 07 дугаар сарын 01-ний өдрөөс эхлэн дагаж мөрдөнө.
2002 оны Эрүүгийн хуульд “Эх орноосоо урвах” гэж нэрлэн заасан “Монгол Улсын иргэн тус улсын тусгаар тогтнол, үндэсний аюулгүй байдал, батлан хамгаалах хүчин чадалд хохирол учруулах зорилгоор гадаад улсын тагнуулын албанд элссэн, төрийн нууцыг гадаад улс, түүний тагнуулын албанд шилжүүлэн өгсөн, Монгол Улсын эсрэг дайсагнасан үйл ажиллагаа явуулдаг гадаад улсын байгууллагатай хамтран ажилласан, дайны байдалд буюу дайн бүхий байдал зарласан үед дайсны талд шилжин орсон бол арван зургаагаас хорин таван жил хүртэл хугацаагаар хорих ял шийтгэнэ” гэсэн гэмт хэргийг 2015 оны Эрүүгийн хуулийн шинэчилсэн найруулгад 19.1 дүгээр зүйл “Эх орноосоо урвах”, 19.4 дэх хэсэг “Гадаадын тагнуулын алба, байгууллага, иргэнтэй хууль бусаар хамтран ажиллах” гэсэн хоёр гэмт хэрэгт хуваан тодорхойлсон байна.
Эх орноосоо урвах болон гадаадын тагнуулын алба, байгууллага, иргэнтэй хууль бусаар хамтран ажиллах гэмт хэргүүдийн субьект нь Монгол Улсын иргэн, Монгол Улсын тусгаар тогтнол, үндэсний аюулгүй байдал, батлан хамгаалах хүчин чадалд хохирол учруулах зорилго нь гэмт хэргийн субьектив шинж, дайны, дайн бүхий байдал, зэвсэгт халдлага, мөргөлдөөн, түрэмгийллийн үед дайсны талд дэмжлэг үзүүлсэн, хамтран ажилласан үйлдэл, эс үйлдэхүй нь гэмт хэргийн обьектив шинж болдог. Дээрх 2 гэмт хэргийн субьект, субьектив, обьектив шинжүүд ижил байгааг УИХ-ын гишүүн Б.Батзориг хэллээ.
Иймд Үндэсний аюулгүй байдлыг сахин хамгаалах чиглэлийн байгууллагуудад ажиллаж байсан ахмадууд, мэргэжлийн судлаачид, холбогдох төрийн бус байгууллагуудаас Эрүүгийн хуулийн шинэчилсэн найруулгын 19.1 “Эх орноосоо урвах”, 19.4 “Гадаадын тагнуулын алба, байгууллага, иргэнтэй хууль бусаар хамтран ажиллах” гэсэн гэмт хэргүүдийг нэгтгэж “Эх орноосоо урвах” гэсэн нэг гэмт хэргийн шинжид багтаах санал тавьж байгааг харгалзан энэхүү хуулийг төслийг боловсруулжээ гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.
Шадар сайд У.Хүрэлсүхийн удирдлага дор өнөөдөр Баяр наадмын комисс хуралдлаа. Хуралд зохион байгуулах хорооны гишүүд, салбар хороодын дарга, Нарийн бичгийн дарга нар оролцож, холбогдох асуудлуудаар мэдээлэл хийн, саналаа нэгтгэсэн юм.
Баяр наадмын комиссын өнөөдрийн хуралдаанаар бэлтгэл ажлыг хангах асуудлаар Үндэсний бөхийн салбар хороо, хурдан морины салбар хороо, сурын салбар хороо, урлаг, соёлын арга хэмжээний салбар хороо, тохижилт, засвар, худалдаа, үйлчилгээний салбар хороо, хэв журмын салбар хороо, төрийн ёслолын үйлчилгээний салбар хороо, шагайн харвайн салбар хороо, хэвлэл мэдээллийн салбар хороод ажлаа тайлагнав. Мөн баяр наадмын санхүүжилт, бусад чиглэлээр мэдээлэл өглөө.
Хуралдаанаар Шадар сайд У.Хүрэлсүх салбар хороодын дарга нарт үүрэг чиглэл өгч, бэлтгэл ажлыг сайтар хангахыг үүрэгдэв. Мөн тэрээр ирэх долоо хоногт Төв цэнгэлдэх хүрээлэн, Хүй долоон худаг зэрэг наадам зохион байгуулагдах газруудаар явж бэлтгэл ажилтай танилцаж, тулгамдсан асуудал байвал газар дээр нь шийдвэрлээд явна гэдгээ онцоллоо гэж Шадар сайдын ажлын албанаас мэдээлэв.
БНХАУ-ын Засгийн газрын хөнгөлөлттэй зээлээр хэрэгжүүлэх Баянзүрхийн 321у/м гүүрний шав тавих ёслол өнөөдөр боллоо. “Туул гол дээгүүрх Баянзүрхийн 321 урт метр болон Сонсголонгийн 289,4у/м төмөрбетон гүүрийг шинээр барих” төсөл хэрэгжих юм.
Шинээр барихаар төлөвлөж буй гүүр нь Гачууртын уулзвараас Баянзүрхийн товчоо хүртэлх 3,4 км авто замд Туул гол дээр байрлах юм. Улаанбаатар хотын замын хөдөлгөөний менежментийг сайжруулахад 1960-1986 оны үед баригдаж, 40-өөс дээш жил болсон гүүрүүдийг засварлан шинэчлэх зайлшгүй шаардлага тулгарч байна. Тиймээс БНХАУ-ын Засгийн газрын хөнгөлөлттэй зээлийн хөрөнгөөр дөрвөн том төслийг хэрэгжүүлэхээр төлөвлөсөн. Үүнээс Яармагийн хуучин гүүрийг сэргээн засварлах болон шинээр барих төсөл, мөн Замын цагдаагийн газрын ойролцоох гүүрэн гарцын ажил эхлээд явж байна.
Өнөөдөр Туул гол дээгүүр барих Баянзүрхийн 321 урт метр гүүрний шавыг тавилаа. Гачууртын уулзвараас Налайх, Чойрын уулзвар хүртэлхи авто зам нь1963, 1965 онуудад БНМАУ болон БНХАУ-ын Засгийн газар хоорондын хэлэлцээрийн хүрээнд баригдсан бөгөөд 50-иас дээш жил болж, ашиглалтын шаардлага хангахаа больсон тул Налайхын авто замын техник ашиглалтын түвшинг нэмэгдүүлж, нэг чиглэлдээ хоёр эгнээ болгон өргөтгөхөөр төлөвлөн энэ жил ажлыг нь эхлүүлэхээр бэлтгэл хангаж байна. Тиймээс тус замын хөдөлгөөний аюулгүй байдлыг уялдуулах үүднээс Туул гол дээрхи Баянзүрхийн гүүрийг дөрвөн эгнээ, дугуйн болон явган замтай барихаар төлөвлөж байна.
Гүүрийг шинээр барьснаар замын хөдөлгөөний ачааллыг бууруулж, аюулгүй байдлыг сайжруулах, зорчигч тээвэрлэгчдийн цаг хугацаа, шатахуун хэмнэх, ая тухтай байдлыг хангах эдийн засгийн өндөр ач холбогдолтой юм.
БНХАУ-ын Засгийн газрын хөнгөлөлттэй зээлийн хөрөнгөөр хэрэгжүүлэх уг төслийн ажлыг Бээжин Юни-Констракшн групп компани гүйцэтгэх бөгөөд захиалагчаар Нийслэлийн Засаг даргын Тамгын газар, Нийслэлийн Авто замын хөгжлийн газар ажиллаж байна. Төслийн ажил хоёр жил үргэлжилнэ. Баянзүрхийн 321 у/м гүүрийн шавыг Нийслэлийн Засаг дарга бөгөөд Улаанбаатар хотын захирагч С.Батболд, УИХ-ын гишүүн Б.Батзориг, БНХАУ-аас Монгол Улсад суугаа Онц бөгөөд Бүрэн Эрхт Элчин сайд Шин Хай Мин, Нийслэлийн Засаг даргын орлогч П.Баярхүү, Нийслэлийн Авто замын хөгжлийн газрын дарга Ж.Тогтохбаяр болон албаны бусад хүмүүс тавилаа гэж Нийслэлийн Авто замын хөгжлийн газраас мэдээллээ.
“Нээлттэй хаалга”-ны үйл ажиллагаанд Харилцаа холбоо, Мэдээллийн технологийн газар, нийслэлийн Мэдээллийн технологийн газар, Харилцаа холбооны зохицуулах хороо, “Монголын цахилгаан холбоо” ХК, “Мэдээлэл, холбооны сүлжээ” ТӨХК, Үндэсний дата төв, Мобиком, Скайтел, Жи Мобайл, Юнител, “Монгол Шуудан” ХК зэрэг байгууллага оролцож байна. Монгол Улсын Засгийн газар болон нийслэлээс мэдээллийн технологийн салбарт хэрэгжүүлж буй бодлого, үйл ажиллагаа, хувийн хэвшлийн үйлчилгээ, дэвшлийн талаарх мэдээллийг уг өдөрлөгөөс ирж авах боломжтой.
Өдөрлөгийг нээж Харилцаа холбоо, Мэдээллийн технологийн газрын дарга Б.Чинбат “Энэ жилийг Харилцаа холбоо, Мэдээллийн технологийн салбарын хууль эрх зүйн орчныг шинэчлэх жилээр зарласан. Одоо Харилцаа холбооны тухай хууль, Радио долгионы тухай хууль, Шуудангийн тухай хуульд нэмэлт өөрчлөлт оруулах ажлууд хийгдээд явж байна. Хууль эрх зүйн орчноос гадна төрийн байгууллагуудын мэдээллийн солилцоог сайжруулах мэдээллийн систем хийгдэж байгаа. Ирэх жилдээ багтаад 36 үйлчилгээг цахим хэлбэрт оруулна” хэмээн онцоллоо гэж нийслэлийн Мэдээллийн технологийн газраас мэдээллээ.
Солонгосын алдарт “Big bang” хамтлагийн дуучин 30 настай Топ буюу Чой Сэюн Хьюн хар тамхины төрлийн каннабис хэрэглэсэн тухай хэвлэл мэдээллийн хэрэгслүүдээр гарчээ.
Сөүл хотын цагдаагийн газрын Мансууруулах бодистой холбоотой гэмт хэргийг мөрдөх албанаас дөрөвдүгээр сард Топын үсэнд хийсэн шинжилгээний хариу эерэг гарч каннабис хэрэглэсэн нь тогтоогдсон гэж мэдэгдсэн байна. Мөн түүнийг өнгөрсөн оны аравдугаар сард хар тамхи хэрэглсэсэн ба 20 настай эмэгтэй дуучин А-г уруу татан хамт хэрэглэсэн тухай цагдаагийнхан хэлжээ.
Дуучин Топ цагдаагийн газар өгсөн мэдүүлэгтээ “Би электрон тамхи татсан. Тэрийг хар тамхины хольцтой байсныг мэдээгүй” хэмээжээ.
Түүний хэргийг мөрдөх ажиллагаа явагдаж байгаа бөгөөд урт хугацаанд үргэлжлэх магадлалтай учир түүний оронд шинэ гишүүн авах яриа гараад байгаа аж.
Мөрдлөгийн явцад хамтлагийн бусад гишүүд ч хар тамхи хэрэглэсэн байж болзошгүй баримтууд гарч иржээ.
Петербургийн эдийн засгийн чуулга уулзалт өнөөдөр (2017.06.02) хоёр дахь өдрөө амжилттай үргэлжилж байна.
Чуулга уулзалтын хүрээнд өчигдөр (2017.06.01) Монгол Улс, ОХУ хооронд зарим салбарын хамтын ажиллагааг өргөжүүлэх баримт бичгүүдэд гарын үсэг зурлаа.
Дулааны IV цахилгаан станцын хүчин чадлыг нэмэгдүүлнэ
Монгол Улсын эрчим хүчний зах зээлийг хөгжүүлэх, “Дулааны IV цахилгаан станц” ТӨХК болон “Уралын турбины завод” концерн хооронд хамтран ажиллах тухай баримт бичиг байгууллаа. Ингэснээр Дулааны IV цахилгаан станцын найдвартай ажиллагааг хангахаас гадна станцын ажиллах насыг 30 орчим жилээр уртасгаж, хүчин чадлыг нь 90 мвт-аар нэмэгдүүлэх юм. Цаашдаа ОХУ-ын эрчим хүчний салбарын үйлдвэрлэгчид, хөрөнгө оруулагчид Монголын зах зээлд орж ирж ажиллах боломжууд ч нээгдэж байна.
Дулааны IV цахилгаан станц нь Улаанбаатар хотын дулааны эрчим хүчний 70 орчим хувийг дангаараа хангадаг ч турбинууд нь 30-аас дээш жилийн настай, шинэчлэх шаардлага тулгарчээ.
ОХУ-аас 4 сая тун вакцин нийлүүлнэ
Монгол Улсад ОХУ-аас хүмүүнлэгийн тусламж үзүүлэх тухай хоёр улсын Хөдөө, аж ахуйн яам хооронд хэлэлцээрийн хүрээнд ОХУ-аас 4 сая тун вакцин нийлүүлэх боллоо. Вакцины ачиж авчрах шууд хийгдэж бэлтгэлээ Хүнс, хөдөө аж ахуй, хөнгөн үйлдвэрийн яам хангасан байна.
Мөн энэ үеэр талууд махны экспортыг нэмэгдүүлэхэд онцгой үр дүн гаргаж ажиллахаар боллоо. Ингэхдээ Монгол, Оросын бизнесменүүд махны хамтарсан үйлдвэр байгуулж, бүтээгдэхүүнээ ОХУ-д экспортлох тохиролцоонд хүрчээ.
Хөдөө аж ахуйн салбарыг хөгжүүлэхтэй холбоотой бас нэг асуудал нь “Ноолуур” хөтөлбөрт хамтарч ажиллах саналыг Засгийн газраас Оросын талд тавиад байна.
Хэдийгээр хэлэлцээр байгуулагдсан ч Монголын тал энэ чиглэлээр тодорхой ажил яаралтай хийх ёстой. Олон сая малтай улсын хувьд энэ салбарт өөрчлөлт шинэчлэлт хийж, эрүүл ахуй, аюулгүй байдлыг энэ тэргүүнд тавих зайлшгүй шаардлагатай гэж ОХУ-ын Хөдөө аж ахуйн орлогч сайд Евгений Громыко хэллээ. Удахгүй ОХУ-ын Хөдөө аж ахуйн сайд А.Н.Ткачев манай улсад айлчлах үеэр ярилцахаар төлөвлөжээ.
Хэвлэл, мэдээллийн салбарт хамтарч ажиллана
Олон нийтийн харилцаа холбооны салбарт хамтран ажиллах тухай хэлэлцээр байгуулснаар сэтгүүлчдийг харилцан солилцох, Монголын сэтгүүлчдийг ОХУ-д сургах, баримтат кино хийх, харилцан түгээх боломж нээгдэж байна.
ОХУ-ын Олон нийтийн харилцаа, холбооны сайд Н.А. Никифоров хэлэхдээ, “Энэ бол зөвхөн эхлэл гэж найдаж байна. Бид цаашид хамтын ажиллагаагаа өргөжүүлэн хөгжүүлэхээр тохиролцлоо. Тухайлбал ОХУ, Монгол Улсын нутаг дэвсгэрээр дамжуулан БНХАУ-руу гарах холбооны шилэн кабелийн сүлжээ татах судалгааны ажлыг эхлүүлж, программ хангамж, интернет, кибер аюулгүй байдлыг хангах чиглэлээр хамтран ажиллахаар боллоо” гэлээ гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.
УИХ-ын чуулганы үдээс өмнөх хуралдаанаар Монгол Улсын Ерөнхийлөгчийн 2017 оны ээлжит сонгуулийн өмнөх “Монгол Улсын эдийн засаг, санхүү, төсвийн төлөв байдлын талаархи мэдээлэл” сонсов. Уг мэдээллийг ХЗДХ-ийн сайд С.Бямбацогт танилцууллаа.
Ё.БААТАРБИЛЭГ: ТӨСВИЙНХӨӨ ЗАРДЛЫГ ГОЗОЙТОЛ ӨСГӨЧИХӨӨД БУУЛГАСАН
ДҮР ҮЗҮҮЛЖ ЖҮЖИГЛЭДЭГ
Ё.Баатарбилэг гишүүн: Ерөнхийлөгчийн сонгуулийн өмнө нийгэм, эдийн засаг, санхүүгийн төлөв байдлыг ярьж байгаа нь үндсэндээ дөрвөн жил улс орныг удирдаж жолоодож ирсэн Ерөнхийлөгчтэй холбоотой яригдаж байгаа гэж ойлгож байна. Өнгөрсөн дөрвөн жил Монголын ард түмний алдсан зүйл олон л байгаа байх. Тэрийг түүх дэнслээд өгөх байх. Бидний хамгийн их алдсан зүйл төсөв мөнгөөр хэмжигдэхгүй хүний эрх, эрх чөлөө, хэвлэн нийтлэх эрх чөлөө хойшилсон ухарсан байдалтай дөрвөн жилийг үдлээ л дээ. Энэ бол үнэхээр ухралт болсон. Монголчууд “Түмэн засагт хааны үед хөл хөсөр гар газар энхжин жаргав” гэх мэтээр төр толгойлж байсан хүмүүстэйгээ холбож тухайн цаг үе, улс орныхоо байдлыг дүгнэж явдаг. Өнгөрсөн дөрвөн жилийг тэр маягаар дүгнэх байлгүй. Би Ерөнхийлөгчийн хаврын чуулганы нээлтэн дээр хэлсэн нэг үгийг онцгой анхаарч үзсэн юм. Ерөнхийлөгч төсвийн зардлыг бууруулах тал дээр чухал санаа хэлсэн. Жил бүр өөрийнхөө төсвийг танасаар байгаад сүүлийн дөрвөн жилд 11 тэрбумаас дөрвөн тэрбум болтол бууруулсан шүү, та нар үзээрэй гээд байхаар нь би үзсэн юм. 2009 онд 1,8 тэрбум байсан төсвийг 2013 он хүртэл долоон тэрбум болгож өсгөчихөөд, түүнийгээ бага багаар буулгаад, буулгах ч юу байхав, төсөв нь угаасаа хумигдмал байсан болохоор тэгсэн байлгүй дөрвөн тэрбум руу орсон байна лээ. Өөрсдөө ингэж төсвийнхөө зардлыг гозойтол өсгөчихөөд, түүнийгээ буулгасан дүр үзүүлж, жүжиглэдэг байдал өнгөрсөн дөрвөн жилд газар авсан л даа.
Улсын Дээд шүүхийн шүүгчдийн зөвлөгөөн энэ сарын 6-нд болох тов нь гарчээ.
Уг зөвлөгөөнөөр Үндсэн хуулийн цэцийн гишүүнд нэр дэвшүүлэх тухай асуудлыг хэлэлцэхээр тогтсон байна.
Улсын дээд шүүх цэцэд 3 хүнийг нэр дэвшүүлдэг. Одоогоор нэг орон тоо сул байгаа тул тэрхүү орон тоон дээр нэр дэвшилтийг явуулах аж.
УИХ-ын чуулганы өнөөдрийн хуралдаанаар “Эрүүл мэндийн даатгалын үндэсний зөвлөлийг байгуулах тухай” УИХ-ын тогтоолын төслийг хэлэлцлээ.
Энэ үеэр УИХ-ын гишүүн Д.Тогтохсүрэн, “Эрүүл мэндийн даатгалын сан жилд тодорхой үлдэгдэлтэй байдаг тул үүнийг тухайн жилд нь зарцуулдаг байх хэрэгтэй. Мөн Эрүүл мэндийн даатгалын үндэсний зөвлөлийг Эрүүл мэндийн сайд ахалдаг байх нь зүйтэй” гэсэн саналтай байгаагаа хэллээ.
Ингэхэд Хөдөлмөр, нийгмийн хамгааллын сайд Н.Номтойбаяр, “Эрүүл мэндийн сайд уг зөвлөлийг ахалж болохгүй. Учир нь хуулиндаа тийм заалт байхгүй” гэсэн тайлбарыг хийж байв.
Ингээд хуралдаанаас Н.Номбаярыг ЭМДҮЗ-ийн тэргүүнээр, Д.Дэмбэрэлийг дэд тэргүүнээр, зөвлөлийн гишүүнээр Б.Чойжилсүрэнг, А.Цогцэцэгийг, Ч.Цолмонгэрэлийг, Д.Чимиддамбыг, Х.Мягмарыг, Х.Ганбаатар, Ц.Ганхүү нарыг томилов.