Month: June 2017

Үндэсний аялал жуулчлалын “Улаанбаатар-2017” үзэсгэлэн энэ сарын 03,04-ний өдрүүдэд Д.Сүхбаатарын талбайд гарна. Дотоодын аялагч нарт нэгдсэн мэдээллийг олгох зорилготой тус үзэсгэлэнг нийслэлийн Аялал жуулчлалын газраас Байгаль орчин, аялал жуулчлалын яам, Улаанбаатар аялал жуулчлалын холбоотой хамтран гурав дахь жилдээ зохион байгуулж байна.

Энэ удаагийн үзэсгэлэнд ОХУ, БНСУ, АНЭУ, БНЭУ, БНКУ-ын Монгол улсад суугаа Элчин сайдын яамд, Баян-Өлгий, Баянхонгор, Говьсүмбэр, Дорноговь, Дорнод, Дундговь, Завхан, Өвөрхангай, Өмнөговь, Сэлэнгэ, Төв, Хөвсгөл, Хэнтий аймгийн Байгаль орчин, аялал жуулчлалын газар, тус аймгуудад үйл ажиллагаа эрхэлдэг жуулчны бааз, рашаан сувиллын газрууд, Хил хамгаалах ерөнхий газар, Иргэний нисэхийн ерөнхий газар, Гэрлэх ёслолын ордон, Улаанбаатар төмөр замын “Аялал жуулчлалын товчоо”, Тусгай хамгаалалттай газар нутгийн захиргаад, Монголын Уулчдын үндэсний холбоо, Монголын Рафтингийн холбоо, Аялал жуулчлалын Боловсрол хөгжлийн нийгэмлэг, тур оператор компаниуд зэрэг 80 гаруй байгууллага оролцож, үйл ажиллагаа бүтээгдэхүүнээ сурталчилах юм.

Үзэсгэлэнгийн хамтран зохион байгуулагчаар “Төрийн банк”, “Юнител” компани оролцоно. “Юнител” компани Сүхбаатарын талбайд өндөр хурдын интернэт тавина. Мөн дугуй, авто мото, уулын аялал, фото зураг, анхан шатны тусламжийг үзүүлэх, хээрийн хоолыг хэрхэн бэлтгэх, загасчлах, зөв хувцаслалт, аялагчдын соёлын талаарх мэдээлэл, зөвлөгөөг өгч, аяллын хувцас, хэрэгслүүдийн хямдралтай худалдаа болох юм. Түүнчлэн Хил хамгаалах ерөнхий газраас хил орчмын газар нутагт аялал жуулчлал эрхлэх зөвшөөрөл хүссэн байгууллагуудад зөвлөгөө өгнө гэж нийслэлийн Аялал жуулчлалын газраас мэдээллээ.

Зургадугаар сарын 8-наас эхлэн Монгол Улс, Сингапур улсын иргэд 30 хүртэл хоног харилцан визгүй зорчих боломжтой боллоо.

Монгол Улсын Засгийн газар, Бүгд Найрамдах Сингапур Улсын Засгийн газар хооронд хоёр улсын бүх төрлийн паспорт эзэмшигч иргэд харилцан визгүй зорчих хугацааг 30 хоног болгон өөрчлөх тухай ноот бичиг харилцан солилцсон гэдгийг Гадаад харилцааны яамнаас мэдээллээ.

Өмнө нь визгүй зорчих хугацаа 14 хоног байсан.

Нийслэлийн Засаг даргын Тамгын газраас хэвлэл мэдээллийн байгууллагуудын гэрэл зурагчин болон гэрэл зураг сонирхогч, уран бүтээлчдийн дунд “Орчин үеийн Улаанбаатар” сэдэвт уралдааныг амжилттай зохион байгууллаа. Уралдааныг 2017 оны дөрөвдүгээр сарын 10-аас тавдугаар сарын 14 хүртэлх хугацаанд зарлаж, 27 оролцогч 165 бүтээлээр өрсөлдлөө. Баримтат уран сайхны гэрэл зураг буюу Улаанбаатар хотын бүтээн байгуулалт, өдөр тутмын амьдрал, түүх, өв соёлыг харуулсан байх гэсэн үндсэн гол шалгуураар уралдаанд ирүүлсэн бүтээлийн эхний гурван байрыг тодруулсан юм. Уралдаанд оролцож өрсөлдсөн бүтээлчдээс “Өдрийн сонин”-ы гэрэл зургийн сурвалжлагч Ц.Мягмарсүрэн “Үд дунд” бүтээлээрээ тэргүүн байрт, Itoim.mn сайтын гэрэл зургийн сурвалжлагч Э.Ганзориг “Их хотын амьдрал аз жаргалаар дүүрэн” бүтээлээрээ дэд байрт, гэрэл зурагчин С.Бат-Эрдэнэ “Туулын хөндийн шөнө” бүтээлээрээ гутгаар байрт шалгарав. Тэмцээний тэргүүн байрын эздэд нийслэлийн Засаг дарга бөгөөд Улаанбаатар хотын Захирагч С.Батболд шагналыг гардуулж, амжилт бүтээлийн дээдийг хүслээ. Тэрбээр “Нийслэл маань өдрөөс өдөрт өнгө орж, шинэ барилга багууламж, бүтээн байгуулалтаар хүрээлэгдсээр байгаа билээ. Бид ажил хөдөлмөрөө хийж явсаар хотын хөгжлийн зарим сайхан зүйлсийг анзааралгүй өнгөрөөдөг. Тэгэхээр та бид хотын түүхийг бичиж, хадгалж үлдэх учиртай. Хот ямар байж байгаад ямар болсон. Хотын хуучин гудамж ямар байсныг яаж тохижуулсан гэх баримт зайлшгүй бидний хойч үед үлдэх шаардлагатай. Тиймээс гэрэл зурагчидаа дэмжих үүднээс хотын зүгээс энэ уралдааныг зарласан. Нөгөө талаас Улаанбаатар хотын өнгө төрхийг гадна дотнын гэрэл зураг сонирхогчид, иргэд, жуулчдад харуулах үүднээс гэрэл зургийн фонд үүсгэх зорилгоор уралдааныг зарласан. Идэвхтэй оролцсон гэрэл зурагчиддаа баярлалаа. Та бүхэнд ажлын амжилт сайн сайхан бүхнийг хүсэн ерөөе” гэв.

“Орчин үеийн Улаанбаатар” гэрэл зургийн тэмцээний тэргүүн байрын шагналт Ц.Мягмарсүрэн “”Өдрийн сонин”-ы гэрэл зурагчнаар найм дахь жилдээ ажиллаж байна. “Энэхүү тэмцээнд ирүүлсэн зургийн маань агуулга өгөгдсөн сэдвийнхээ хүрээнд аз жаргалтай гэр бүлийг их хотын шинэ содон бүтээн байгуулалтын хамт цогцлоож харуулахыг хичээсэн. Хамгийн сүүлд хоёр жилд нэг удаа болдог “Монголд монголчууд-Нэг өдөр” тэмцээнд оролцож тусгай байрыг эзэлсэн” гэлээ.

Itoim.mn сайтын гэрэл зургийн сурвалжлагч Э.Ганзориг “Хэвлэлийн салбарт 3 дахь жилдээ ажиллаж байна. Фото зургийн уралдаанд багагүй оролцдог. Энэ удаагийн тэмцээнд ирүүлсэн “Их хотын амьдрал аз жаргалаар дүүрэн” бүтээлээрээ хотын амьдрал нэгэн хэвийн үргэлжилж, бидний дунд аз жаргал, инээд хөөр, зовлон гунигаар ээлжилдэг ч хамгийн чухал нь элэг бүтэн гэр бүлийн аз жаргал байдаг юм шүү гэдгийг харуулахыг зорьсон” хэмээлээ.

Гэрэл зурагчин С.Бат-Эрдэнэ “Энэхүү уралдаанд оролцоод гуравдугаар байр эзэлсэндээ маш их баяртай байна. “Туулын хөндийн шөнө” зургаараа Улаанбаатар хотын хөгжил цэцэглэлтээс гадна байгаль буюу Туул голын хөндийн үзэсгэлэнг тодруулан харуулахыг зорьсон” гэв хэмээн нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

“Чингис хаан Олон улсын нисэх онгоцны буудлаас хөөрөх гэж байсан АН-2 онгоц уналаа” гэх мэдээлэл цахим орчинд цацагдлаа. Сошиалд идэвхитэй “жиргэдэг” Зам, тээврийн хөгжлийн дэд сайд Б.Цогтгэрэл “Хөөрч чадаагүй гэдэг мэдээлэл ирлээ. Хүний амь нас хохироогүй. ОХУ-ын нисгэгч нар байсан байна. Шинжлэн шалгах баг ажилдаа оржээ” хэмээн тайлбарлав.

“Зургадугаар сарын 2-ноос орон нутагт нислэг үйлдэнэ” хэмээн мэдээлж байсан тус онгоц Сэлэнгийн Ерөө, Хүдэр, Хэнтийн Дадал, Өндөрхаан сумдаар тойрох нислэгээ эхлэх гэж байсан ч ийнхүү гэнэтийн саатал гарчээ.

Саяхан жанжин Сүхбаатарын талбайд болсон Зам тээврийн яамны нээлттэй өдөрлөгийн үеэр хуучин “АН-2” онгоцыг хүмүүст сонирхуулсан билээ. Тус онгоцны шинэчилсэн загвар болох “ТВС-2МС” онгоцыг Монголдоо үйлдвэрлэх бэлтгэл ажил хангагдсан” хэмээн мэдээлж байсан юм.

Зам тээврийн хөгжлийн дэд сайд Б.Цогтгэрэл “Далавчинд гэмтэл гарснаас нисэх гээд хөөрч чадаагүй байна, унаж, осолдсон зүйлгүй” гэлээ. “ТВС-2МС” загварын онгоц өмнө нь манай улсад ашиглаж байсан “АН-2” загварын онгоц бөгөөд бүрэн засвар хийж, шинэчилснээр олон талаар ашиглаж болохуйц хэмжээнд шинэчлэгдсэн гэж албаныхан мэдээлж байсан юм. Орос, Монгол мэргэжилтнүүдийн хамтран угсарсан гэх “АН-2 онгоцны шинэчилсэн загвар ТМС-2МС ямарч нөхцөлд бууж, суух боломжтой,ашиглалт сайтай зэргээрээ давуу талтай” гэж мэргэжилтнүүд онцолж байсан юм.

Уг онгоцоор аймгууд болон алслагдсан сумдуудад нислэг үйлдэхээр зэхжээ. Онгоц унахад нэг талын далавчинд эвдрэл үүссэн гэнэ. Онгоцонд ОХУ-ын нисгэгчид болон ИНЕГ-ын захиргаа, хүний нөөцийн газрын дарга Т.Батжаргал, Ерөнхий зориулалтын нисэхийн газрын дарга Г.Энхзориг нар байжээ.

Үндэсний их баяр наадмыг зохион байгуулах хороо өнөөдөр хуралдлаа.

Баяр наадмын нээлт, хаалт болон төрийн хүндэтгэлийн концертод 4000 гаруй хүн оролцуулах бөгөөд “Улаанбаатарын үдэш” цэнгүүн, Хүй долоон худаг дахь урлаг, соёлын цэнгүүн, уран зургийн үзэсгэлэн зэрэг уламжлалт арга хэмжээ болохоос гадна Гурван баритоны концерт зохион байгуулах аж.

Наадмаар үйл ажиллагаа явуулах нийтийн хоол, худалдаа үйлчилгээний тусгай зөвшөөрлийг Нийслэлийн мэргэжлийн хяналтын газар өгдөг байхаар шийдвэрлэжээ. Мөн хоолны эрүүл, аюулгүй байдалд хяналт тавихад онцгой анхаарч ажиллахаа салбар хорооны дарга мэдэгдэв.

Хуралдааны үеэр Шадар сайд “Шинэ Ерөнхийлөгч долдугаар сарын 10-ны өдөр тангараг өргөнө. Мөн өдөр Төрийн далбааны өдрийн арга хэмжээ, цэргийн парад болдог учир наадам эхэлсэнтэй адил өдөр болно. Тиймээс баяр наадмын хөтөлбөрийг зургаадугаар сарын 20-ны өдөр гэхэд бэлэн болгохыг Баяр наадам зохион байгуулах комиссынхонд үүрэг болголоо.

Баярын үеэр иргэдийн амгалан тайван байдлыг хангахаар 86 заалт бүхий хамгаалалтын төлөвлөгөө боловсруулан ажиллаж байгаа аж. Мөн Төв цэнгэлдэх хүрээлэнгийн ойролцоох аж ахуйн нэгжүүдтэй зөвшилцсөнөөр 1660 машины зогсоол гаргахаар болсон бөгөөд наадамчин олон А-гаас У хүртэлх зэрэглэл бүхий зөвшөөрөл авч, наадмын талбайн ойролцоо машинаа тавих боломжтой аж. Хүй долоон худагт 5100 машины зогсоол гаргасан. Баярын үеэр том оврын 702 автобус иргэдэд үйлчилнэ.Хүй долоон худаг руу Рэйлбус үйлчилнэ” гэлээ.

Монсудар хэвлэлийн газраас дэлхийн олон улс орны өсвөр насны хүүхдүүдэд уншихыг зөвлөдөг “Чик” хэмээх зохиолыг монгол хэл дээр хэвлэн гаргажээ. Уг номд Майк, Чик гэх хоёр хүүгийн сонирхолтой адал явдалтай аяллын тухай гардаг аж.

Дунд сургуулийн сурагчдад тулгамддаг асуудлууд, шохоорхол, нөхөрлөл зэрэг тойрч гарах аргагүй хамгийн чухал бүхэн тусгагдсанаас гадна өсвөр насны хүүхдүүдийн сэтгэлзүйг хамгийн чадамгай дүрсэлсэн энэ романаар Германд ижил нэртэй кино хийгдсэн ажээ.

Сонирхолтой нь “Чик” киноны гол дүрд монгол жүжигчин Б.Ананд тоглосон бөгөөд тэрээр тун удахгүй Монголд ирэх юм байна.

Үүнтэй холбогдуулсан Монсудар хэвлэлийн газар Гёте институт хамтран энэ сарын 7-ны 18 цагаас Интерномын төв салбарт “Чик” номын танилцуулга хэлэлцүүлгийг хийх ажээ. Уг хэлэлцүүлэгт киноны гол дүрийн жүжигчин Б.Ананд хүрэлцэн ирж сонирхолтой ярилцлага өрнүүлэх бол 6-р сарын 9-нд “Чик” кино монгол үзэгчдийн хүртээл болох аж.

Ном, кино сонирхогч та бүхэн уг арга хэмжээнд нэгдэж сонирхсон асуултандаа хариулт аваарай.

Хэзээ: 2017-06-07-нд, 18 цагаас
Хаана: Internom Bookstore-ын төв салбарт