Сангийн яамын Нээлттэй хаалганы өдөрлөг энэ сарын 7-8-нд Жанжин Д.Сүхбаатарын талбайд болно. Энэ үеэр тээврийн хэрэгслийн албан татвар, төлбөрийг харьяалал харгалзахгүй /торгуульгүй/ төлөх боломжтой юм байна.
Тээврийн хэрэгслийн албан татвар, төлбөр төлөх хуулийн хугацаа 2017 оны зургаадугаар сарын 1-ний өдрөөр дуусгавар болсон. Тиймээс тээврийн хэрэгслийнхээ албан татварыг хугацаандаа төлөөгүй жолооч нар маргааш төв талбайд болох өдөрлөгийн үеэр төлбөрөө ямар нэгэн торгуульгүйгээр төлөх бүрэн боломжтой.
Албан татвар, төлбөр төлөөгүй тээврийн хэрэгслийг замын хөдөлгөөнд оролцуулахгүй бөгөөд дэлгэрэнгүй мэдээллийг 1800-1288, 7011-0705 дугаараас лавлана уу гэж нийслэлийн Татварын газраас мэдээллээ.
Нийслэлийн Засаг даргаас Улаанбаатар хотын суурьшлын бүсийн дотор түгээмэл тархацтай ашигт малтмал хайх, ашиглах зөвшөөрөл олгохгүй байх, одоо үйл ажиллагаа явуулж буй аж ахуйн нэгжүүдэд байгаль орчны хуулийн хэрэгжилтийг чанд мөрдүүлэх үүргийг холбогдох байгууллагуудад өгсөн. Энэ ажлын хүрээнд нийслэлийн Сонгинохайрхан дүүргийн Баянхошууны суурьшлын бүсэд 162 га талбай эзэлдэг “Найрамдал” шаврын ордод үйл ажиллагаа явуулж буй аж ахуйн нэгжүүдэд нэгдсэн нэг тээвэрлэлтийн зам маршруттай, тоосжилт үүсгэхгүй байх үүднээс усалгааг тогтмолжуулах, нуралтаас хамгаалсан бэхэлгээ, хаалт хашлага хийх, уурхайн тэмдэг тэмдэглэгээг сайжруулах, дүйцүүлэх нөхөн сэргээлт хийх тохиолдолд тухайн дүүрэг дэх булаг шандыг тохижуулж хамгаалах зэрэг үүрэг даалгаврыг өгч, дээрх ажлууд хийгдэж эхлээд байна. Нийслэлийн Байгаль орчны газар, нийслэлийн Мэргэжлийн хяналтын газрын хамтарсан хяналт шалгалтын хүрээнд “Найрамдал” шаврын ордод ашигт малтмалын тусгай зөвшөөрөл эзэмшигч аж ахуйн нэгжүүдэд Байгаль орчинд нөлөөлөх байдлын үнэлгээний тухай хууль, Байгаль орчны менежментийн төлөвлөгөө, түүний биелэлтийн талаар сургалтыг зохион байгуулж тус ордод ашиглалтын үйл ажиллагаа явуулдаг бүх аж ахуйн нэгжид улсын байцаагчийн албан шаардлагыг хүргүүлсэн юм. Сонгинохайрхан дүүргийн “Найрамдал” шаврын ордыг 1945 онд нээж илрүүлэн 1962 оноос ашиглаж эхэлсэн, Улаанбаатар хотын тоосгоны үйлдвэрийн гол түүхий эд болох шар шаврын хамгийн том орд бөгөөд тухайн хэсэгт амьдардаг иргэдийн зүгээс аж ахуйн нэгжүүд олон салаа замаар тээвэрлэлт хийснээр их хэмжээний тоосжилт, дуу чимээ, бохирдол үүсч, иргэдийн хашаа, байшинтай хаяа залгасан эгц налуу ухсан талбай нь нуралт үүсэх эрсдэл бий болгож байгаа талаар удаа дараа хүсэлт гаргаж байсан юм гэж нийслэлийн Байгаль орчны газраас мэдээллээ.
Өчигдөр цахим ертөнцөөр ээж, охин хоёр зам дээр цэвэрлэгээ хийж явсан ТҮК-ийн ажилтныг цохиж, зодож буй бичлэг шуугиан тарив. Бичлэгээс харахад ээж, охин хоёр нийлж нэгэн ТҮК-ийн ажилтанг зодож байгаа нь харагдана. Хүмүүс ТҮК-ийн ажилтны талд орон ээж, охин хоёрыг буруутгах нь их байсан. Тэгвэл ийм явдал ажилчдад өдөрт хэд хэд тохиолддог аж. Иргэд хажуугаар нь өнгөрөхдөө лааз, шил сав, хогоо шидэх нь энүүхэнд гэнэ.
Монгол улсын Замын хөдөлгөөний дүрэмд “Тээврийн хэрэгслийн хурдыг Хорооллын доторх замд цагт 20 км-ээс хэтрүүлэхгүйгээр явна” гэж заасан байдаг. Сүүлийн үед орон сууц болон гэр хорооллын доторх замд жолооч нар хөдөлгөөнд оролцохдоо анхаарал болгоомжгүй, хурд хэтрүүлсний улмаас байрныхаа гадаа тоглож байгаа хүүхдүүд, явган зорчигчдыг мөргөж гэмтээх явдал нэмэгдэж байна.
Ференц Пушкашийн нэрэмжит академид 2016 онд суралцахаар Унгар улсыг зорьсон Монголын дөрвөн хүүгийн нэг Г.Ганбаяр Пушкашийн академийн багийн өмсгөлтэй “Сузуки кап” тэмцээнд ур чадвараа сорьж байна. 
Харин тэдний нэг Г.Ганбаяр академийнхаа багийн хамтаар дэлхийн шилдэг клубын хүүхдүүд оролцдог “Сузуки кап” тэмцээнд оролцох гэж байгаа нь содон үйл явдал болж байна. Тус тэмцээнд “Байерн Мюнхен”, “Реал Мадрид” гэсэн шилдэг клубүүдийн 17 хүртэлх насны багууд оролцоно.
Сүүлийн хагасын 72 дахь минутад Г.Ганбаяр сэлгээгээр орж ирсэн нь Монгол хөлбөмбөгчин дэлхийн хэмжээний тоглолтод оролцсон түүхэн үйл явдал боллоо. Түүнийг талбайд гараад долоон минутын дараа “Пушкашийн академи”-ийн тоглогч Тимари Норман торгуулийн талбайн гаднаас гоол оруулан, баг нь 1:0-ээр хожжээ.
БНХАУ-аас Монгол Улсад суугаа Элчид сайдын яамны дэмжлэгтэйгээр барьж, байгуулсан Хүүхэд залуучуудын сургалт хүмүүжлийн тусгай цогцолборын хөлбөмбөгийн талбайн нээлт өнөөдөр боллоо. Уг арга хэмжээнд БНХАУ-аас Монгол Улсад суугаа Онц бөгөөд Бүрэн эрхт Элчин сайд, ноён Шин Хай Мин, Соёлын зөвлөх Ли Вэй, нийслэлийн ЗДТГ-ын Гадаад харилцааны хэлтсийн дарга Ш.Сүхбаатар, НЗДТГ-ын Нийгмийн бодлогын хөгжлийн хэлтсийн дарга М.Эрдэнэжаргал, нийслэлийн Хүүхэд гэр бүлийн хөгжлийн газрын дарга Ө.Ган-Өлзий болон бусад албаныхан оролцсон юм.
Математикийн хичээлээс гадна нийгэм, англи хэлний тест задарсан гэх мэдээллийн талаар Боловсролын үнэлгээний төвийн захирал Ж.Ган-Эрдэнээс тодруулсан ярилцлага Өдрийн сонины өнөөдрийн дугаарт гарчээ. Тэрээр энэ асуултанд “Математикийн тестнээс гадна англи хэлний тест орон нутагт задарсан. Нийгмийн ухааны тест нийслэлийн Сүхбаатар дүүргийн нэгэн хувийн сургуулиас задарсан. “ОТ” сургуулийн сургалтын менежер компьютер дээр сайн ажиллаж чаддаггүй учраас өөр хүнээр нээлгэсэн юм билээ. Тухайн сургууль энэ багшийг цалингийн 20 хувиар торгоод өнгөрсөн байсан.
Засгийн газар болон Монголбанк 2017 оны тавдугаар сард нийт 50.5 тэрбум төгрөгийн 8 хувийн хүүтэй ипотекийн зээлийн эх үүсвэрийг банкуудад олгожээ. Энэхүү эх үүсвэрээр 722 иргэний зээлийн хүсэлтийг шийдвэрлэсэн бөгөөд үүнээс 265 иргэний 15.9 тэрбум төгрөгийн зээлийн санхүүжилтийг Монголбанк өөрийн өмчлөлийн ипотекийн зээлээр баталгаажсан бондын үндсэн төлбөрөөр олгосон бол Засгийн газар төсөвт тусгаснаар 457 иргэний 34.6 тэрбум төгрөгийн ипотекийн зээлийн санхүүжилтийг олгосон байна.