Month: June 2017

Монгол Улсын Ерөнхийлөгчийн Тамгын газрын дарга Ц.Баярсайхан ОХУ-ын Бүгд Найрамдах Халимаг Улсын түүх, соёлын “Өв” сангийн тэргүүн Нина Санджариковна Уланова болон түүнийг дагалдан яваа төлөөлөгчдийг өнөөдөр хүлээн авч уулзав. Уулзалтад Ерөнхийлөгчийн зөвлөх Р.Болд оролцов.

Өдгөө 86 нас сүүдрийг зооглож байгаа Н.С.Уланова Монгол Улсын Ерөнхийлөгч Ц.Элбэгдоржийн урилгаар Улаанбаатарт ирээд байгаа юм. Тэрээр Халимагийн нэрт эрдэмтэн, монгол судлаач Очирын Номтын удмын хүн бөгөөд “Өв” санг үүсгэн байгуулсан цагаасаа халимагийн хэл, соёл, түүхийн өвийг залуу, хойч үеийнхэнд өвлүүлэх, хөгжүүлэх чиглэлээр тууштай ажиллаж иржээ. Очирын Номт нь 1910 онд Санкт-Петербургт Халимагийн баатарлаг тууль “Жангар”-ыг анхлан эрхлэн хэвлүүлж байжээ.

“Өв” сангийн шугамаар Халимагийн ард түмний олон түүхэн хүндэтгэлт үйл явдлуудыг тэмдэглэж, ОХУ-ын Волгоград мужид Халимагийн алдарт угсааныхан болох Тундутовынхонд зориулан хуучин суварга байсан буурин дээр нь шинээр суварга босгох, буддын шашны буян номын үйлс эрхлэх зэрэг олон ажил хийж ирсэн байна.

Одоо олон улсын хэмжээний буддын соёлын төв байгуулахаар ажиллаж байгаа бөгөөд түүнд туурга нэгт монголчууд хандив өргөх боломжтойг хатагтай Н.С.Уланова уулзалтын үеэр хэлж байлаа.

Энэ үеэр Монгол Улсын Ерөнхийлөгчийн Тамгын газрын дарга Ц.Баярсайхан хэлэхдээ “Та бүхнийг хүлээн авч уулзахдаа баяртай байна. Таныг өвөг дээдсийнхээ нутагт ирж, Монгол оронтой танилцаж, хийж байгаа буянтай үйлсээсээ танилцуулсанд баяртай байна. Таны хийж байгаа ажлыг Монгол Улсын Ерөнхийлөгч Ц.Элбэгдоржид танилцуулна. Тодорхой хэмжээнд судалж үзнэ.

Таны Ерөнхийлөгчид өргөн барьсан “Жангар” тууль, алд цагаан хадгийг Монгол Улсын Ерөнхийлөгчид дамжуулан өгч, таны сэтгэлийн үгийг хүргэе” гэлээ.

Хатагтай Н.С.Уланова Монгол Улсад ирэхдээ өөрийн өвөг дээдсийн шүтээн болох тугийн бумба /Тугийн зэв/-ийг авчирч Монгол нутагт цэнгүүлж байгаа юм байна. Орос-Францын 1812 оны дайнд Орос орон ялж, Парис хотыг эзлэхэд Халимагийн Торгууд, Хошууд, Дөрвөдийн морьт, тэмээт хороод голлох үүрэг гүйцэтгэсэн бөгөөд Дөрвөдийн хорооны өргөж явсан тугийн зэв нь энэхүү тугийн бумба ажээ.

Хатагтай Н.С.Уланова тугийн зэвийг цагаан хадаг дээр залж, Чингис хааны хөргөөс адис авч хүндэтгэл үзүүллээ.

УИХ-аас Хог хаягдлын тухай хуулийг шинэчлэн баталсантай холбогдуулан БОАЖЯ-наас “Цэвэр сайхан орчин” сарын аяныг зарласан билээ. Энэ хүрээнд хууль сурталчлах зорилготой “Шилдэг шторк” шалгаруулах уралдааныг зарласан байна. Уралдааны эцсийн дүн 2017 оны долдугаар сарын 07-ны өдөр бөгөөд зөвхөн нэг бүтээлийг шалгаруулж, 5 сая төгрөгөөр урамшуулах аж. Оролцогчдод мэргэжлийн төвшинд 30 секундээс хэтрэхгүй хугацаатай бүтээх бөгөөд оюуны өмчийн зөрчилгүй, НD1920x1080,HD1080x720 форматтай, агуулга, илэрхийлэх санааг уралдааны үндсэн зорилгод нийцсэн байх зэрэг шторкний ерөнхий шаардлагууд тавьжээ. Уралдааны гол зорилго иргэн, аж ахуйн нэгж, байгууллагад байгальд ээлтэй хэрэглээний соёл хэвшүүлэх, хог хаягдлыг зүй зохистой хаях, ангилах, дахин ашиглах дадал зуршлыг төлөвшүүлэх, хог хаягдлаас хүний эрүүл мэнд, байгаль орчинд үзүүлэх сөрөг нөлөөллийн талаарх мэдлэг, боловсрол олгоход энэ арга хэмжээний зорилго оршиж байгаа юм.

Нийслэлийн татварын газраас Татвар төлөгчдийн өдрийг тохиолдуулан нийслэлийн шилдэг татвар төлөгчдийг шалгаруулав. Ингэхэд реппер Жий буюу Т.Мөнх-Эрдэнэ “Нийслэлийн шилдэг татвар төлөгч иргэн”-ээр шалгарчээ. Мөн МИГ даатгал, Орчлон бүрэн дунд сургууль, Хаан банк зэрэг арав гаруй аж ахуй нэгжийг шалгаруулж Улаанбаатар хотынхоо их бүтээн байгуулалт, хөгжил цэцэглэлтэд хувь нэмрээ оруулж буйд талархаж өргөмжлөл гардууллаа.

Шагналыг нийслэлийн Засаг даргын орлогч Ж.Батбаясгалан, ЗДТГ-ын дарга М.Отгонбаяр, Татварын ерөнхий газрын дэд дарга Б.Заяабал болон бусад албаныхан гардуулсан юм.

Гол, мөрөн, нуур, тогтоол усны түвшин их, багаас үл шалтгаалан бага насны хүүхэд болон иргэд усанд осолдох тохиолдол гарсаар байна.

Он гарсаар 2017 оны зургадугаар сарын 05-ны өдрийн байдлаар есөн аймгийн 15 сум, нийслэлийн гурван дүүрэгт нийт 17 удаагийн усны осол гарч, 20 хүн амь насаа алдсан байна.

Дулааны улиралд Онцгой байдлын албанд иргэдээс ирдэг дуудлагын ихэнх хувийг гол усны ослын дуудлага зонхилдог. Иргэдийн санамсар болгоомжгүй байдал, бага насны хүүхдийг хараа хяналтгүй орхисноос, согтууруулах ундаа хэрэглэсэн үедээ гол усанд орох зэрэг шалтгаанаар гол усны осол гарч байна.

Амралт, аялал зугаалгын улирал эхэлсэнтэй холбогдуулан иргэд та бүхэн амралт, чөлөөт цагаа өнгөрүүлэхдээ гол, усны ойролцоо амарч зугаалахгүй байх, бага насны хүүхдэд тавих хараа, хяналтаа сайжруулах, голын эрэг дагуу хүүхдийг явуулахгүй, тоглуулахгүй байх, тээврийн хэрэгслийн жолооч нар баталгаатай зам, гүүрээр зорчиж гол усанд унах, осолдох эрсдэлээс урьдчилан сэргийлэхийг Онцгой байдлын ерөнхий газраас анхааруулж байна.

Ази-Номхон далайн орнуудын чуулга уулзалтыг Улаанбаатар хотод зохион байгуулах талаар Гадаад Харилцааны Яам болон Олон улсын JCI байгууллагаас хамтарсан мэдээлэл хийлээ.

“Жэй Си Ай” байгууллагын Ази-Номхон далайн чуулган энэ сарын 8-наас 11-ний өдрүүдэд болох гэж байна.

Тус чуулганд оролцохоор дэлхийн 51 орны 3,500 манлайлагч, бизнес эрхлэгч залуус Монгол Улсад хүрэлцэн ирээд байгаа ажээ.

Гадаад харилцааны дэд сайд Б.Батцэцэг “Зочдын ирэх угтах, визийн асуудал, зохион байгуулалтын асуудал зэрэг дипломат ёслолын үйл ажиллагааны чиглэлээр Гадаад Харилцааны Яамны зүгээс дэмжлэг үзүүлэн ажиллаж байна. Үндсэндээ хурлын бэлтгэл ажил хангагдсан гэж хэлж болно.

3,500 зочноор дамжуулан дэлхий дахинд Монгол Улсаа сурталчлах, Монгол Улсынхаа бизнес эрхлэгчдийн боломжийг нээх, үндэсний үйлдвэрлэгчдийнхээ гадаад харилцааг өргөтгөх, холбоо тогтоох, Монгол залууст дэлхийн томоохон байгууллагын төлөөлөгч залуустай хамтран ажиллах боломжийг олгож байгаагаараа ач холбогдолтой” хэмээв.

JCI байгууллагын Монгол дахь салбарын ерөнхийлөгч П.Батхишиг “Бид JCI байгууллагын Ази-Номхон далайн орнуудын чуулга уулзалтыг зохион байгуулах нь манай улсад нэлээд олон ач холбогдолтой.

JCI бол дэлхийн 120 гаруй оронд салбартай, 200,000 гаруй гишүүнтэй, саяас илүү дэмжигчтэй байгууллага.

Манай Монгол Улсад 1992 онд салбар байгууллагыг бий болгосон. Чуулганы үеэр бид олон олон үндэсний байгууллагын улс орон, нийгэмдээ хийж бүтээсэн сайн сайн өөрчлөлтүүдийг хэлэлцэж, туршлага солилцоно.

120 улсын идэвхтэй залуусын сүлжээгээр бид Монгол Улсаа дэлхий дахинд сурталчилна. Сурталчилгааны тал дээр богино хугацаанд сайн үр дүн гарна гэж бодож байна” гэлээ.

JCI байгууллагын ерөнхийлөгч Давн Хэтзэл “Манай байгууллага гишүүнчлэлийн хувьд ихэвчлэн 18-40 насны залуус байдаг.

Энэхүү чуулганы гол онцлог бол JCI байгууллагын дэлхийн өнцөг булан бүрээс залуус хуран цуглаж, өөрсдийн туршлага, мэдлэгийг солилцдог. Бидний хамтын ажиллагаанд улс үндэстний хил хязгаар үгүй, бүгд нэгдэн ажилладаг.

Ази-Номхон далайн чуулган бол дөрвөн бүсэд явагддаг чуулганаас зохион байгуулалтын цар хүрээгээрээ хамгийн томд тооцогддог.

Ази-Номхон далай бүсийн чуулган боловч бусад бусад бүсээс ирж оролцогчдын тоо олон байгаа гэдгийг хэлмээр байна.

Тэгэхээр дэлхийн маш олон орноос залуу удирдагчид чуулж, бие биенийхээ хэл соёл, мэдлэг боловсролоос суралцах боломжийг олгож байгаа юм” хэмээн тайлбарлалаа.

“Жэй Си Ай 2017 АСПАК” чуулганы үеэр залууст өөрийгөө хөгжүүлэх, бизнес төлөвлөгөө хийх, хаана ямар бизнесийн боломж байна, мэдээлэл технологийн хувьд хэрхэн хамтран ажиллах зэрэг сэдвээр сургалт болж, сургалтад хамрагдсан залууст “JCI”-ийн сургалтын байгууллагаас сертификат олгох юм.

Үүнээс гадна бүс нутгийн хөгжлийн тулгамдсан есөн төрлийн асуудлаар форум, хэлэлцүүлэг хийнэ. Мөн Ерөнхий ассамблей болж, үүнд 1,800 гаруй төлөөлөгчид албан ёсоор оролцон “JCI’’-ийн 2022 он хүртэлх хийх ажлынхаа төлөвлөөг гаргах юм байна.

Сайхан сэтгэлт хүмүүсийн буянаар М.Номин-Эрдэнэ охин эмчилгээний зардалтай болжээ.

Учир нь хүндийг өргөлтийн тамирчин М.Анхцэцэгийн дүү М.Номин-Эрдэнэ өнгөрсөн аравдугаар сард гүн түлэгдэж, эмчилгээ хийлгэж байгаа юм. БНСУ-д түлэгдлийн эмчилгээ хийлгэхэд 65 сая төгрөг шаардлагатай болж, салбар салбарын төлөөллүүд М.Номин-Эрдэнэд туслах хандивын аяныг эхлүүлсэн.

Тэгвэл сайхан сэтгэлт Монголчуудын хандив тусламжаар М.Анхцэцэгийн дүүгийн эмчилгээний төлбөр бүрджээ. “М.Анхцэцэгийн дүүд тусалцгаая” аяны хүрээнд нийт 73 сая төгрөг цугларсан байна.

Иймд М.Номин-Эрдэнэ охин эмчилгээ хийлгэхээр энэ сарын 16-нд БНСУ-ыг зорихоор болжээ.