Month: June 2017

Хүнс, хөдөө аж ахуй, хөнгөн үйлдвэрийн салбар нь дотоодын нийт бүтээгдэхүүний 36.1 хувийг бүрдүүлж, нийт ажиллах хүчний 53.8 хувь тус салбарт ажиллаж байна. Энэхүү салбарын нээлттэй хаалганы өдөрлөг өчигдөр Сүхбаатарын талбайд нээлтээ хийж өнөөдөр үргэлжилж байна.

Хүнс хөдөө аж ахуй хөнгөн үйлдвэрийн яамны Төрийн нарийн бичгийн дарга Л.Баяртулга “Иргэн танд зөвлөе” сэдэвт нээлттэй хаалганы өдөрлөгийг нээж үг хэлэв. “Хүнс хөдөө аж ахуй хөнгөн үйлдвэрийн салбарын бодлогыг “ЭРҮҮЛ ХҮНС-ЭРҮҮЛ МОНГОЛ ХҮН” зорилтын хүрээнд “Мах сүүний анхдугаар аян”, “Атрын гуравдугаар аян”ыг эрчимжүүлэн өрнүүлэх, “Монгол мал” үндэсний хөтөлбөр, “Үйлдвэржилт 21:100” болон “Ноолуур” хөтөлбөрийг тус тус хэрэгжүүлэх юм. 2017 онд улсын хэмжээнд 450,0 орчим мянган га талбайд тариалалт хийж, 20.6 сая төл хүлээн авч, төл бойжилт 97.9 хувьтай байна.

Хүнс хөдөө аж ахуй хөнгөн үйлдвэрийн салбарын нээлттэй хаалганы өдөрлөг 06 дугаар сарын 9, 10-ны өдөр Сүхбаатарын талбайд үргэлжилнэ. Энэхүү нээлттэй хаалганы өдөрлөгөөс мал аж ахуй, газар тариалан, хүнс, хөнгөн, жижиг дунд үйлдвэрлэлийн бодлого, шинэ техник технологи, худалдаа үйлчилгээ, хуульзүйн зөвлөгөөг нэг дороос авах боломжтой юм. Тодруулбал Хүнс, хөнгөн, жижиг дунд үйлдвэрлэл, мал аж ахуй, газар тариалангийн салбарт төрөөс баримталж буй бодлого, инновацийн бүтээгдэхүүний үзэсгэлэн, тариаланчдад үзүүлэх дэмжлэг, жижиг дунд үйлдвэрлэлийг дэмжих зээл, тусгай зөвшөөрөл, хөдөө аж ахуй их сургууль, эрдэм шинжилгээний байгууллагын сургалт мэдээ мэдээлэл, зөвлөгөөг өгөх юм.

Мөн төмс хүнсний ногоо, жимс жимсгэнэ тариалахад зориулсан техник тоног төхөөрөмж, үрсэлгээ суулгац, малын зохиомол хээлтүүлгийн талаар энэхүү нээлттэй хаалганы өдөрлөгийн үеэр сонирхох боломжтой юм. Монгол Улсад “ДЭЛХИЙН СҮҮНИЙ ӨДРҮҮД”–ийг тэмдэглэн өнгөрүүлэх арга хэмжээний хаалт, малын чанарыг сайжруулах аянг улсын хэмжээнд өрнүүлэх арга хэмжээний нээлт боллоо.

Улаанбаатар хотын Захирагчийн ажлын албаны захиалгаар Нийслэлийн Зураг төслийн хүрээлэнгийн хийсэн зураг төслийн дагуу “Улаанбаатар зам засвар, арчлалтын газар” ОНӨААТҮГ нь Баянгол дүүргийн 5, 6 дугаар хорооны нутаг дэвсгэр, 10 дугаар хорооллын туслах замын 812метр зам талбайн тохижилтын ажлыг 04 дүгээр сарын 10-ны өдөр эхлүүлсэн.

Уг ажлыг хоёр сарын турш тус газрын хамт олон 20 гаруй техник, 60 хүний бүрэлдэхүүнтэйгээр цаг наргүй ажилласны үр дүнд өнөөдөр буюу 2017 оны 06 дугаар сарын 10-ны өдөр, төлөвлөсөн хугацаандаа бүрэн дуусгалаа.

“Улаанбаатар зам засвар, арчлалтын газар” ОНӨААТҮГ нь өнгөрсөн онд П.Н.Шастины нэрэмжит Улсын Гуравдугаар эмнэлгийн өмнөх 149 авто машины зогсоолтой, 300 метр урт 5830 метр квадрат талбайг иж бүрэн тохижуулж хүлээлгэн өгсөн гэж “Улаанбаатар зам засвар, арчлалтын газар” ОНӨААТҮГ-аас мэдээллээ.

Тулгар төрийн 2226 Их Монгол улсын 811, Ардын хувьсгалын 96 жилийн ойн баяр энэ жил тохиож байгаа. Баяр наадмын өмнөх бэлтгэл ажлын явц ямар байгааг Шадар сайд У.Хүрэлсүх, Хотын дарга С.Батболд нар газар дээр нь очиж танилцлаа.

Үндэсний их баяр наадмыг угтан төв цэнгэлдэх хүрээлэнгийн засварын ажил ид өрнөж байна. Засварт төсөвлөсөн 2 тэрбум төгрөг, өмнөх жилийн наадмын орлогоор төв цэнгэлдэх хүрээлэнгийн үзэгчдийн суудал, сүүдрэвч, сурын талбайн гадна хашаа, шагайн талбайн зам зэргийг засч сольж байна.

Төв цэнгэлдэх хүрээлэнд баяр наадмын бэлтгэл ажил 60 хувьтай байгааг цэнгэлдэх хүрээлэнгийн дарга Т.Нямдаваа хэллээ. Цэнгэлдэхийн гадна талын авто замын асфальтыг сольж, 1500 автомашины зогсоол барьж байгаагаас гадна дотор гүйлтийн замыг орчин үеийн стандартын замаар солих ажил хийгдэж байна. Мөн үзэгчдийн суудлыг угааж, засварлах, төв асарт 230 ширхэг сандал шинээр суурилуулах ажил хийгдэж байгааг комиссын гишүүдэд танилцууллаа.

Шадар сайд У.Хүрэлсүх “Бид жил бүр тодорхой асуудлыг шийдвэрлэж байна. Тухайлбал, 2015 онд төв талбайгаа орчин үеийн стандартын хөл бөмбөгийн талбай болгосон. Энэ жил гадуурх тойрог замыг стандартад нийцсэн замаар сольж байна. Ирэх жил цэнгэлдэхийн гэрэлтүүлгийг солих төлөвлөгөөтэй байна.” хэмээв.

Мөн нийтийн бие засах газар, сүүдрэвч зэргийг шинээр хийснээс гадна шагайн асарт иж бүрэн засвар хийж байгааг танилцууллаа. НМХГ-ын дарга Л.Эрдэнэчулуун хэлэхдээ “Бид газын байгууллагуудтай гэрээ хийсэн. Онцгой байдлын газраас аюулгүй ажиллагаанд хяналт тавина. Хоол үйлдвэрлэлийн стандарт журам батлагдсан. Энэ жил энэхүү журмын дагуу аж ахуйн нэгж байгууллагуудыг шалгаруулна. Үйлдвэрлэлийн технологийн багаж тоног төхөөрөмжийн шаардлага хангасан эсэхийг харгалзан, ихэвчлэн нийтийн хоол үйлдвэрлэлээр аж ахуйн нэгжид зөвшөөрөл олгохоор тооцоолж байна. Мөн худалдааг хүүхдийн тоглоом гэх зэргээр төрөлжүүлнэ.” хэмээлээ.

Монголчуудын дийлэнх хувь нь гэртээ цэнхэр дэлгэцээрээ наадмын нээлтээ үздэг. Тиймээс баяр наадмын нээлтийг сурвалжлах хэвлэл мэдээллийн байгууллагынхны зохион байгуулалтад анхаарахыг хотын дарга санууллаа.

Зуны улирал эхэлсэнтэй холбогдуулан зургаадугаар сарын 10-наас шөнийн тээврийн ШҮ:1 ”5 шар-Ботаник”, ШҮ:2 “Нисэх-МУБИС-Ард”, ШҮ:3 “Зунжин-7 буудал-МУБИС” чиглэлд нийтийн тээврийн автобус үйлчилнэ. Тус чиглэлд 22:30 цагаас 01:30 цаг хүртэл явна.

Алслагдсан өрхийн эрүүл мэндийн төв, тосгодуудад түргэн тусламжийн автомашин гардуулж өгөх үйл ажиллагаа өнөөдөр /2017.06.10/ Д.Сүхбаатарын талбайд болж өнгөрлөө. Энэ удаа 25 фургон маркийн автомашиныг Эрүүл мэндийн яамнаас холбогдох газруудад хүлээлгэн өглөө.

Орон нутаг, хөдөө замд саадгүй зорчих давуу талтай гэсэн эмч нарын санал хүсэлтээр фургон автомашиныг сонгожээ. Улсын хэмжээнд нийт 159 сумад түргэн тусламжийн автомашин өгөхөөр төлөвлөсөн байгаагаас өнөөдрийн байдлаар 100 орчмыг нь гардуулаад байгаа юм байна.