Month: June 2017

Эрчим хүчний салбарын нээлттэй хаалганы өдөрлөгт /2017.06. 12, 13-ны өдрүүдэд/ 30 орчим үйлдвэр, компани оролцож байна. Өдөрлөгийн үеэр цахилгаан халаагуур тоног төхөөрөмж танилцуулж, эрчим хүчний үнэ тариф, эрчим хүчний тусгай зөвшөөрөл эзэмшигч компаниудын үйл ажиллагаа, цахилгаан, дулааны техникийн нөхцөл, эрчим хүчний барилга угсралтын тусгай зөвшөөрөл, эрчим хүчний салбарт мэргэжлийн боловсон хүчин бэлтгэх, давтан сургах, мэргэшүүлэх талаар мэдээлэл өгч, цогц үйлчилгээ үзүүлж байгаа аж.

Нээлттэй хаалганы өдөрлөгийг нээж, Эрчим хүчний сайд П.Ганхүү үг хэллээ. Тэрбээр Монгол Улсын Засгийн газрын 2016 – 2020 оны үйл ажиллагааны хөтөлбөрт багтсан томоохон төсөл хөтөлбөрүүдийн талаар танилцуулаад “Монгол Улсын эрчим хүчний нэгдсэн системийн өсөн нэмэгдэж буй хэрэглээг дотоодын үйлдвэрлэлээр хангах, импортын эрчим хүчний хэмжээг бууруулах зорилгоор одоо үйл ажиллагаа явуулж буй Эрдэнэтийн дулааны цахилгаан станцыг 35 МВт-аар, Дарханы дулааны цахилгаан станцыг 35 МВт-аар, Чойбалсангийн дулааны цахилгаан станцыг 50 МВт-аар, Дулааны гуравдугаар цахилгаан станцыг 250 МВт-аар тус тус өргөтгөх шийдвэрийг гаргаад байна. Энэ шийдвэрийг хэрэгжүүлэхэд шаардлагатай зохион байгуулалтын арга хэмжээг авч ажиллаж байгаа бөгөөд Эрдэнэт, Дарханы дулааны цахилгаан станцын өргөтгөлийн ажлыг хийх гүйцэтгэгчийг шалгаруулан гэрээ байгууллаа.

Сэргээгдэх эрчим хүчний үйлдвэрлэлийг нэмэгдүүлэх, байгаль орчинд ээлтэй дэвшилтэт технологийг нэвтрүүлэх зорилтын хүрээнд Дархан-Уул аймгийн Хонгор сумын нутагт 10 МВт-ын суурилагдсан хүчин чадалтай нарны станцыг 2017 оны нэгдүгээр сард ашиглалтад орууллаа. Мөн Өмнөговь аймгийн Цогтцэций сумын нутагт 50 МВт-ын салхин станцын ажил өрнөж байгаа бөгөөд 2017 онд ашиглалтад оруулахаар зорьж байна. Одоогийн байдлаар угсралтын ажил 60 гаруй хувьтай үргэлжилж байна.

Монгол Улсын Засгийн газраас томоохон цахилгаан дамжуулах агаарын шугам, дэд станцуудыг өргөтгөх, шинэчлэх, шинээр барих шийдвэр гаргасны дагуу Оюутолгой-Цагаансуваргын 220 кВ-ын 2 хэлхээт 159.5 км цахилгаан дамжуулах агаарын шугам, дэд станц барих ажил хийгдэж, барилга угсралтын ажил 90хувьтай байна. Мөн Багануур-Чойрын 220 кВ-ын 178 км ЦДАШ, Багануур дэд станцын өргөтгөл, Улаанбаатар-Мандалговийн цахилгаан дамжуулах агаарын шугам, дэд станцыг барих төслийн бэлтгэл ажил гээд их бүтээн байгуулалт өрнөсөөр байна.

Агаарын бохирдлыг бууруулж, ард иргэдийн ая тухтай амьдрах нөхцлийг бүрдүүлж, өрхийн зардлыг бууруулах бодлогын хүрээнд Улаанбаатар хотын гэр хорооллын айл өрхийн шөнийн цахилгааны төлбөрийг 100 хувь хөнгөлөх шийдвэрийг Монгол Улсын Засгийн газраас гаргасан. Хөнгөлөлтөд нийслэлийн гэр хорооллын хоёр тарифт тоолууртай 110 мянга гаруй хэрэглэгч хамрагдсанаар нийт 3,363.7 сая төгрөгийн хөнгөлөлт үзүүллээ.

Гэрэл цахилгаангүй болон хүчдэлийн уналттай байсан нийслэлийн захын гэр хорооллын нийт 22 байршлын 1562 айл өрхийг цахилгаан эрчим хүчээр хангалаа. Ард иргэдийн зүгээс олон жилийн турш хүсэлт болгон тавьсан энэ ажлыг үргэлжлүүлж, 2017 онд нэмж 6000 айл өрхийг цахилгаан эрчим хүчээр хангахаар төлөвлөн нийтдээ 43 багц тендерийг зарлан ажиллаж байна.

Нийслэлийн агаарын бохирдлыг бууруулах ажлын хүрээнд гэр хорооллын бүсэд одоо үйл ажиллагаа явуулж буй нийт 123 халаалтын зуухыг буулгаж, хэрэглэгчдийг төвлөрсөн дулаан хангамжид холбож эхэллээ. Эхний ээлжинд Хан-Уул дүүргийн нутаг дэвсгэрт үйл ажиллагаа явуулж буй зарим халаалтын зуухыг татан буулгаж, тус уурын зуухнаас халаалтаа авч байсан сургууль, цэцэрлэг, эмнэлгийг төвлөрсөн дулаан хангамжийн системд холбох ажлыг эхлүүлээд байна. Мөн Хөвсгөл нуурын жуулчны баазуудыг төвлөрсөн эрчим хүчээр хангах хүрээнд Хатгал тосгоноос Тойлогт нуур хүртэлх 40 км цахилгаан дамжуулах агаарын шугам, дэд станцыг барих ажил өрнөж байна. Өнөөдрийн байдлаар тус шугамын барилга угсралтын ажил 90 гаруй хувьтай явж байгаа бөгөөд зургадугаар сарын дунд үеэр ашиглалтад оруулахаар төлөвлөөд байна” гэв.

Нээлттэй хаалганы өдрийн хүрээнд цахилгаан дулаан, эрчим хүчний хангамжтай холбоотой санал, хүсэлтийг хүлээн авч, нэг цэгийн үйлчилгээ үзүүлж байна.Өдөрлөг хоёр өдөр үргэлжилнэ.

13-нд баруун аймгуудын нутгийн зүүн, төвийн аймгуудын нутгийн баруун хэсгээр, 14-нд төвийн аймгуудын нутгийн зарим газраар, 15-нд зүүн аймгуудын нутгаар, 16-нд зарим газраар түр зуурын бороо орно. Дуу цахилгаантай. Салхи 13,16-нд зарим газраар, 14,15-нд говь тал хээрийн нутгаар түр зуур секундэд 18-20 метр хүрч ширүүснэ. Дархадын хотгор, Алтай, Хангай, Хөвсгөлийн уулархаг нутгаар шөнөдөө 6-11 градус, өдөртөө 21-26 градус, говийн бүс нутгийн өмнөд хэсгээр шөнөдөө 15-20 градус, өдөртөө 30-35 градус, бусад нутгаар шөнөдөө 9-14 градус, өдөртөө 26-31 градус дулаан байна. 13,16-нд нутгийн хойд хэсгээр бага зэрэг сэрүүснэ гэж Цаг уур орчны шинжилгээний газраас мэдээллээ.

Баянгол дүүргийн 3 дугаар хороо Нарны хороолол хотхоны 22 давхрын салхивчаар 22 настай Ж нь унаж амиа алдсан хэрэг энэ сарын 5-ны орой гарсан билээ. Энэ хэргийн талаар “Өдрийн сонин”-д талийгаачийн эгчийнх нь ярилцлага гарсан.

Талийгаач Ж нь тавилгын их дэлгүүр болох “Сохо мебель” компанийн ерөнхий захирал Жадамба гэж хүний туслахаар ажиллаад удаагүй байжээ. Хэргийг цагдаагийн байгууллагаас шалгаж байгаа бөгөөд урьдчилсан байдлаар “Амиа хорлосон” гэж үзэж байгаа бол ар гэрийнхэн нь “Амиа хорлоогүй, гадны нөлөөтөй амиа алдсан байж болзошгүй. Тиймээс цагдаагийн байгууллагаас үнэнийг зөвөөр олж тогтоож, буруутай этгээдэд хариуцлага хүлээлгэхийг хүсэж буйгаа” илэрхийлсэн юм.

Талийгаачийн ар гэрийнхний зүгээс тус компанийн захирал Жадамбыг охины үхэлд буруутгаж байгаа. Харин хэрэг мөрдөн байцаалтын явцад буюу өнгөрөгч амралтын өдөр “Сохо мебель”-ийн захирал Жадамбаа Монгол улсын хил давсан тухай эх сурвалж мэдээлж байна.

Г.Шийлэгдамба нарт холбогдох шүүх хуралдаан өнөөдөр 13:30 цагаас Сүхбаатар дүүргийн Эрүүгийн хэргийн анхан шатны шүүхэд товлогджээ. Тэрбээр ажлынхаа өрөөнд байхдаа 500 сая төгрөгийн хахуул авч байхдаа үйлдэл дээрээ АТГ-ын албан хаагчдад баривчлагдсан. Энэ талаараа Г.Шийлэгдамба хорихоос илгээсэн захидалдаа” өрөөндөө хадгалж байсан 50 мянган ам.долларыг намын дарга Н.Энхбаяртаа өгсөн. Хэрэв баривчлагдаагүй бол нэмж 120 мянган ам.долларыг өгөх гэж байсан” хэмээн дурьдсан байдаг.

Г.Шийлэгдамбыг Эрүүгийн хуулийн тусгай ангийн 268 дугаар зүйлийн 268.2-р буруутгаж шүүнэ.

Г.Шийлэгдамба нь өнгөрсөн оны сүүлээр батлан даалтад гарсан бөгөөд гадуур шалгагдаж байгаа юм. Түүнийг буруутгаад буй Эрүүгийн хуулийн тусгай ангийн 268 дугаар зүйлийн 268.2-д “Энэ хэргийг хясан боогдуулах замаар, эсхүл давтан буюу урьд хээл хахуулийн хэрэгт шийтгүүлсэн этгээд, түүнчлэн зохион байгуулалттай бүлэг, гэмт бүлэглэл үйлдсэн, эсхүл их буюу онц их хэмжээний хээл хахууль авсан бол эд хөрөнгийг хурааж, таваас дээш арван жил хүртэл хугацаагаар хорих ял шийтгэнэ” гэж заасан байдаг.

Гадаад улсад ажиллаж, сурч, амьдарч байгаа монголчууд зургадугаар сарын 10, 11-нд Монгол Улсын Ерөнхийлөгчийн сонгуульд оролцон саналаа өгсөн. Харин газар зүйн байршил, цагийн зөрүүгээс шалтгаалж АНУ-ын Сан-Франциско хотод амьдарч байгаа монголчуудын хувьд саналыг Улаанбаатар хотын цагаар өнөөдөр 13.00 цагт авч дуусна.

Энэ талаар маргааш ГХЯ-наас мэдээлэл хийх аж. Гадаад дахь монголчуудын сонгуульдаа оролцсон байдал урьдчилсан дүнгээр 60 гаруй хувийн ирцтэй байгаа гэнэ.

Гадаад улсад байгаа иргэдийн санал авах ажлыг зохион байгуулахаар Монгол Улсын дипломат төлөөлөгчийн газар байрладаг 33 улсад 45 салбар комисс ажилласан бөгөөд 7209 иргэн саналаа өгөхөөр бүртгэгдсэн билээ.

Өнөөдрийн байдлаар Сэлэнгэ аймгийн Ерөө сум, Хэнтий аймгийн Өмнөдэлгэр суманд хоёр түймэр асч байна. Харин Сэлэнгэ аймгийн Ерөө сум, нийслэлийн Сонгинохайрхан, Хан-Уул дүүрэгт гарсан түймрийг цурманд оруулж, бүрэн унтраахаар ажиллаж байгаа бол Төв, Дорнод аймагт гарсан ойн түймрийг бүрэн унтраан орон нутгийн захиргаанд хүлээлгэн өгсөн.

Тухайлбал, өнөөдрийн байдлаар Сэлэнгэ аймгийн Ерөө сумын Тавин багийн “Гэр чулуут” гэдэг газар /сумын төвөөс зүүн урд зүгт 62 км-т/ ойн түймэр гарсан тухай дуудлагаар /2017.06.08/ аймгийн Онцгой байдлын газрын 22 албан хаагч, орон нутгийн 26 иргэн, нийт 48 хүн түймрийг унтраахаар ажиллаж байна.

Хэнтий аймгийн Өмнөдэлгэр сумын Баянзүрх багийн “Дааган дэл” гэдэг газар /сумын төвөөс баруун хойд зүгт 150 км-т/ ойн түймэр гарсан тухай дуудлагаар /2017.06.11/ аймгийн Онцгой байдлын газрын 12 албан хаагч, орон нутгийн 23 иргэн, Хан Хэнтийн тусгай хамгаалалтын газрын долоон ажилтан, нийт 42 хүн, таван техник хэрэгсэлтэйгээр түймрийг унтраахаар ажиллаж байна.

Сэлэнгэ аймгийн Ерөө сум, Төв аймгийн Эрдэнэ сумын зааг “Арцат” уулын орчим /Төв аймгийн Эрдэнэ сумаас хойд зүгт 200 км-т, Сэлэнгэ аймгийн Ерөө сумаас зүүн урд зүгт 120 км-т, Сэлэнгэ аймгийн Мандал сумаас зүүн зүгт 110 км-т/ ойн түймрийн голомтод /2017.05.17/ ОБЕГ-ын харьяа Аврах тусгай ангийн 12 албан хаагч, Мандал суман дахь Онцгой байдлын хэлтсийн 27 албан хаагч, Дархан-Уул аймгийн Онцгой байдлын газрын 21 албан хаагч, Хан Хэнтийн тусгай хамгаалалтын газрын дөрвөн ажилтан, орон нутгийн гурван хүн, нийт 67 хүн, ажиллаж, 2017.06.07-ны өдөр цурманд оруулан, бүрэн унтраахаар ажиллаж байна.

Нийслэлийн Сонгинохайрхан дүүргийн 24 дүгээр хороо, “Бумбатын-Ам” гэдэг газар ойн түймэр гарч байна гэсэн дуудлагаар /2017.06.10/ дүүргийн Онцгой байдлын хэлтсийн Гал түймэр унтраах, аврах 26 дугаар ангийн 21 албан хаагч ажиллаж, цурманд оруулсан.

Мөн дүүргийн 25 дугаар хороо, “Хустайн-Ам”, “Төмөртийн цоорхой” гэдэг газар ойн түймэр гарч байна гэсэн дуудлагаар /2017.06.10/ дүүргийн Онцгой байдлын хэлтсийн 26 албан хаагч, дөрвөн автомашин, нэмэлтээр Аврах тусгай ангийн 24 албан хаагч, хоёр автомашин, орон нутгийн найман иргэн, нийт 58 хүн, зургаан техник хэрэгсэлтэйгээр ажиллаж, 2017.06.11-ний өдөр цурманд оруулсан.

Хан-Уул дүүргийн 11 дүгээр хороо, Богдхан уулын “Зайсангийн-Ам”-анд ойн түймэр гарсан тухай дуудлагаар / 2017.06.08/ дүүргийн Онцгой байдлын хэлтсийн Гал түймэр унтраах, аврах 30 дугаар ангийн 45 албан хаагч, зургаан техник хэрэгсэлтэйгээр ажиллаж, 2017. 06.08-ны өдөр цурманд оруулсан.

Мөн дүүргийн 11 дүгээр хороо “Түргэний-Амны дээд эх Баруун ширээт” гэдэг газар ойн түймэр гарсан тухай дуудлагаар /2017.06.10/ Төв аймгийн Онцгой байдлын газрын Гал түймэр унтраах, аврах 24 дүгээр ангийн 12 албан хаагч ажиллаж, 2017.06.10-ны өдөр цурманд оруулан бүрэн унтраахаар ажиллаж байна.

Харин Төв аймгийн Баянцогт сумын Гуна багийн “Баруун салааны-Эх” гэдэг газар /сумын төвөөс зүүн урд зүгт 27 км-т/ ойн түймэр гарсан тухай дуудлагаар /2017.06.09/ аймгийн Онцгой байдлын газрын 12 албан хаагч, орон нутгийн 60 хүн, нийт 72 хүн, 10 техник хэрэгсэлтэйгээр ажиллаж, 2017.06.11-ний өдөр бүрэн унтрааж, орон нутгийн захиргаанд хүлээлгэн өгсөн.

Дорнод аймгийн Халхгол сумын Ялалт багийн “Чандмань-Овоо” гэдэг газар /сумын төвөөс зүүн урагш 250 кмт/ хээрийн түймэр гарсан тухай дуудлагаар /2017.06.11/ Сүхбаатар аймгийн Онцгой байдлын газрын 12 албан хаагч, Хилийн 0146 дугаар ангийн 21 албан хаагч, орон нутгийн 17 иргэн, нийт 50 хүн, 6 техник хэрэгсэлтэйгээр ажиллаж, 2017.06.12-ны өдөр бүрэн унтрааж, орон нутгийн захиргаанд хүлээлгэн өгсөн.

Ихэнх нутгаар хур бороо багатай, хуурайшилтын зэрэглэл өндөр байгаа нь ой, хээрийн түймэр гарах эрсдэлийг бүрдүүлж тул иргэд та бүхэн амралт, аялал зугаалгаар явахдаа, ногоон бүсэд зорчихдоо ил задгай гал түлэхгүй байх, асаасан гал, шүдэнз, тамхины галыг бүрэн унтраах, халуун үнс нурамыг ил задгай асгахгүй байж ой, хээрийн түймрээс урьдчилан сэргийлэхийг Онцгой байдлын ерөнхий газраас анхааруулж байна.

Өнгөрсөн баасан гаригт Төрийн ордонд “Мансууруулах эм, сэтгэцэд нөлөөт бодисын хууль бус эрэлттэй тэмцэх үндэсний хөтөлбөрийг хэрэгжүүлэхэд талуудын оролцоо” сэдэвт үндэсний чуулган болсон. Энэ чуулганы үеэр Ерөнхий сайд Ж.Эрдэнэбат цагдаагийн алба хаагчид өөрсдөө хар тамхи хэрэглэж байгаа тухай дурдсан юм.

Тэрбээр “Монгол Улсад мансууруулах бодистой холбоотой гэмт хэрэг, холбогдогчдын тоо жилээс жилд нэмэгдэх боллоо. Гэтэл хар тамхины хэрэглэгч, худалдаачид нь өөрсдөө цагдаагийн байгууллагад шургалан орж, төрийн албан хаагчийн хувцасаар өөрсдийгөө хамгаалж, хууль бус үйлдэл хийж байсан хэрэг саяхан гарлаа” хэмээн ярьсан юм.

Тодруулбал, өнгөрсөн тавдугаар сарын 29-нөөс 30-нд шилжих шөнийн 01:00 цагийн орчимд Эрүүгийн цагдаагийн газрын Хар тамхитай тэмцэх хэлтсийн алба хаагчид, нийслэлийн Хан-Уул дүүргийн нутаг дэвсгэр хуучнаар “Бриллиант” шөнийн клубын орчмоос “41..” улсын дугаартай цагаан өнгийн автомашинаас хар тамхи хэрэглэсэн нэгэн этгээдийг баривчилсан байна. Хэргийн газрын үзлэгээр, сэжигтнээс 0,5 грамм айс буюу метафетамин илэрч, унаж явсан автомашин дотроос нь цагдаагийн албаны жагсаал хувцас гарч иржээ.

Сэжигтнийг шалгахад, Хан-Уул дүүргийн замын цагдаагийн тасгийн алба хаагч Б гэгч байжээ. Эх сурвалжийн мэдээлж буйгаар, алба хаагч Б гэгч нь хар тамхины хэрэглэгч төдийгүй хар тамхи, мансууруулах бодис худалдан борлуулдаг диллер байжээ. Улмаар тэрээр хар тамхины хэрэглэгчдийг өөрийгөө цагдаа хэмээн сүрдүүлж зарим тохиолдолд хар тамхи, мансууруулах, сэтгэцэд нөлөөлөх эм бэлдмэлийг нь үнэгүй авч байсныг хэлж байв.

Сэжигтэн Б-г баривчлагдах үедээ хар тамхи хэрэглэсэн байсан нь шинжилгээгээр тогтоогджээ. Тэрээр цагдаагийн байгууллагад өгсөн мэдүүлэгтээ “Хар тамхины хэрэглэгч төдийгүй зарим талаараа энэ бодист хамааралтай болсон байсан тул өөрийгөө татаж авахаар цагдаагийн албанд орсон. Цагдаа болчихвол өөрийгөө хар тамхинаас татан гаргаж чадна гэж бодсон” хэмээсэн байна.

Цагдаагийн алба хаагч хар тамхи, мансууруулах бодис хэрэглэсэн, худалдан борлуулсан хэрэг гарсантай холбогдуулан Цагдаагийн ерөнхий газрын даргын даалгавраар энэхүү хэргийн тухай ямар нэгэн мэдээлэл гадагш задруулахгүй байх үүргийг холбогдох албан тушаалтнуудад өгсөн гэх мэдээлэл байна. Энэхүү хэргийг Улсын мөрдөн байцаах газарт үргэлжлүүлэн шалгаж буй бөгөөд хар тамхины хэрэгт холбогдсон этгээдийг цагдаагийн албаны үүрэгт ажлаас нь түр чөлөөлжээ.