Month: June 2017

Нийслэлийн Замын сангийн хөрөнгө оруулалтаар Сонгинохайрхан дүүргийн 1-р хороо, Нарангийн авто замаас Орбитын авто зам хүртэлх 1.3 км авто замын ажлыг хэрэгжүүлэхээр төлөвлөсөн.

2017 оны 06 дугаар сарын 19-ний өдрөөс эхлэн Дархан-Уул, Орхон, Сэлэнгэ, Төв аймаг, Улаанбаатар хотод бороо орж байна.

Цаг уурын байгууллагаас ирүүлсэн мэдээллээр бороо өнөөдөр Сэлэнгэ, Төв, Хэнтий аймаг, Улаанбаатар хотод үргэлжлэн орно гэж Онцгой байдлын ерөнхий газраас мэдээллээ.

Монгол хүний эрүүл мэндийн үзүүлэлтийн мэдээллийг багтаасан “Эрүүл мэндийн үзүүлэлт” номын нээлт өнөөдөр Улаанбаатар зочид буудалд боллоо.

Эрүүл мэндийн үзүүлэлтүүдээс товч дурьдвал:

Монгол улсын хүн ам 2016 оны жилийн эцсийн байдлаар 3 сая 119.9 мянга болж, нийт хүн амын 68.9 хувь нь хот суурин газар, үлдсэн 31.1 хувь нь хөдөө амьдарч байна. Дундаж наслалт 2016 онд 69.57 болж, эмэгтэйчүүдийн дундаж наслалт 75.10, эрэгтэйчүүдийнх 65.58 байна.

2016 онд улсын хэмжээнд 77803 эх амаржсан нь 2015 онтой харьцуулахад төрөлт 2631 тохиолдлоор буюу 3.3 хувиар буурсан байна. Улсын хэмжээнд 78194 хүүхэд амьд төрсөн ба 1681 нь хоёр ихэр, 27 нь гурван ихэр хүүхэд байна.

Хүн амын нас баралтын ерөнхий коэффициент 1990 онд 7.9 байсан бол бол 2016 онд уг үзүүлэлт 5.2 болж 1990 онтой харьцуулахад 2.7-аар буурсан үзүүлэлттэй байна.

Монгол улсад эмнэлгийн нэг оронд ногдох хүний тоо 134, нэг их эмчид ногдох хүний тоо 309 байгаа ба 10000 хүн тутмын 2749 хүн давхардсан тоогоор хэвтүүлэн эмчлэх эмнэлгийн тусламж үйлчилгээг авч, жилд 1 иргэн 5.5 удаа амбулаторийн тусламж үйлчилгээ авсан байгаа нь жилээс жилд тусламж үйлчилгээний хүртээмж өсөж байгааг харуулж байна.

Эрүүл мэндийн үзүүлэлт” номыг Англи, Монгол хэл дээр хэвлүүлэн бүх түвшний мэдээлэл хэрэглэгчид, төрийн байгууллагууд, олон улсын байгууллагууд, төрийн бус байгууллагууд, эрдэм шинжилгээний байгууллагуудын 300 гаруй мэдээлэл хэрэглэгчдэд үнэ төлбөргүйгээр түгээдэг.

Уг эмхэтгэлийг мэдээлэл хэрэглэгчдэд танилцуулах, түгээх, нотолгоонд суурилсан шийдвэр гаргалтыг дэмжих зорилгоор танилцуулах уулзалтыг жил бүр зохион байгуулдаг байна.

Түүнчлэн УИХ, Засгийн газар, ЭМЯ, ДЭМБ, ҮСХ, нийслэлийн эрүүл мэндийн газар, төв эмнэлэг тусгай мэргэжлийн төвүүдийн удирдах ажилтнууд, төрийн бус байгууллагын 50 гаруй мэдээлэл хэрэглэгчдийг хамруулдаг ажээ.

“Улаанбаатар төмөр зам”-ын Үйлдвэрчний эвлэлийн холбооноос өнөөдөр 10.00-12.00 цагийн хооронд жагсаал зохион байгуулахаар төлөвлөөд байсан ч цуцалжээ. Жагсаалыг “Улаанбаатар төмөр зам” нийгэмлэгийн байрны гадаа зохион байгуулахаар төлөвлөөд байсан юм.

“Улаанбаатар төмөр зам”-ын Үйлдвэрчний эвлэлийн холбооноос жагсаалыг ямар шалтгаанаар цуцалсан талаар мэдээлэхдээ: “Улаанбаатар төмөр зам”-ыг мэргэжлийн боловсон хүчнээр хангаж ажиллахад Үйлдвэрчний эвлэлийн холбоотойгоо хамтраад ажиллая. Ажлын хэсэг мөн байгуулъя гэж хоёр талдаа ойлголцолд хүрсэн. Энэ асуудлаар Зам тээврийн хөгжлийн дэд сайдтай зөвшилцсөн. Улаанбаатар төмөр замын мэргэжлийн ажилтныг хувийн болон улс төрийн шалтгаанаар халах ажлыг Шинэчлэлийн болон Шийдлийн Засгийн газрын үед эрчимтэй хийсэн. Энэ алдааг залруулах шаардлагыг бид шинээр байгуулагдсан Зам тээврийн хөгжлийн яам болон холбогдох албан тушаалтнуудад хүргүүлсэн байсан. Шаардлагыг нэлээн эрт хүргүүлсэн байсан, гэвч хариу өгөлгүй нэлээд удсан. Харин өчигдөр шаардлагыг хүлээн авч хамтарч ажиллах шийдвэрт хүрсэн учраас жагсаал цуцлагдсан” гэсэн байна.

Одоогоос 13 жилийн өмнө буюу 2003 оны 06 дугаар сарын 20-ны энэ өдөр Монгол Улсын Их хурлаас Гамшгаас хамгаалах тухай хуулийг батлан гаргаснаар орчин цагийн Онцгой байдлын алба байгуулагдах үндэс суурь тавигдаж Гамшгаас хамгаалах ерөнхий газрыг байгуулахаар заасан байдаг.

2004 оны Засгийн газрын хуралдааны нэгдүгээр тогтоолоор тус газрыг байгуулж, 2005 онд Гамшгаас хамгаалах тухай хуулинд нэмэлт өөрчлөлт орсноор Онцгой байдлын ерөнхий газар болж өөрчлөн зохион байгуулагдсан юм.

Монгол Улсад өнгөрсөн 10 жилийн хугацаанд 38 мянга орчим байгалийн аюулт үзэгдэл, осол тохиолдож, үүний улмаас 2203 хүний амь нас эрсдэж улсын хэмжээнд 1 их наяд 70 тэрбум гаруй төгрөгийн хохирол учирсан байна.

Онцгой байдлын албаны алба хаагчид маань 2007-2016 он буюу сүүлийн 10 жилд 10174 иргэний амь нас, аж ахуйн нэгж байгууллага, иргэдийн 195.8 орчим тэрбум төгрөгийн эд хөрөнгийг авран хамгаалж, болзошгүй аюул, ослоос урьдчилан сэргийлэх, хор уршгийг арилгах, хойшлуулшгүй сэргээн босгох үйл ажиллагааг улсын хэмжээнд удирдан зохион байгуулан улс, эх орныхоо хөгжил цэцэглэлт, бүтээн байгуулалтад өөрийн үнэтэй хувь нэмрээ оруулсаар байна.

Аврагчдын маань мэргэжлийн ур чадвар, үүрэг гүйцэтгэх боломж, чадавхи жилээс жилд өсөн нэмэгдэж, гадаад харилцааг өргөжүүлэн олон улс, хүмүүнлэгийн болон хамтрагч байгууллагуудын хандив, зээл тусламж, улсын төсвийн хөрөнгө оруулалтаар албаны техник, тоног төхөөрөмжөө үе шаттай шинэчлэн сайжруулж гамшигтай тэмцэх техникийн чадавхиа 56 орчим хувьд хүргээд байгаа юм.

Төрийн батлан хамгаалах бодлогын бичиг баримт батлагдсантай холбогдуулан Онцгой байдлын алба нь төрийн цэргийн байгууллын бүрэлдэхүүнд орсноор албан хаагчдын цол хэргэм, цалин тэтгэмж, хангамж, нийгмийн баталгааг хангах эрх зүйн бүрэн үндэс тавигдсан.

Одоогоос 10 жилийн өмнө Монгол Улсын Их Хурлаас Гамшгаас хамгаалах тухай хуулийг батлан гаргасан бөгөөд Онцгой байдлын алба байгуулагдсаны 13 дах жилийн босгон дээр энэхүү хуулиндаа нэмэлт өөрчлөлт оруулж, шинэчлэгдэн батлагдсан Гамшгаас хамгаалах тухай хууль хүчин төгөлдөр үйлчилж эхэллээ.

Гамшгаас хамгаалах тухай хууль шинэчлэн батлагдсанаар Онцгой байдлын байгууллагын хүрээнд хууль, эрх зүйн олон шинэчлэлүүд хийгдэж, албан хаагчдын нийгмийн баталгаатай холбоотой олон асуудлууд шийдвэрлэгдсэн.

Гамшгаас хамгаалах тухай хууль шинэчлэн батлагдаж, стратеги, зохион байгуулалтын шинэчилсэн бүтцээр ажиллаж байгаатай холбогдуулан энэ онд албаны хэмжээнд 20 гаруй дүрэм, журам, төлөвлөгөө, удирдамжийг шинээр болон шинэчлэн боловсруулан ажиллаж байна.

Ирэх 2018 онд Монгол Улсын Засгийн газар, Онцгой байдлын алба Азийн сайд нарын 2 дугаар бага хурлыг Улаанбаатар хотноо зохион байгуулах нэр хүндтэй хариуцлагатай үүргийг хүлээсэн. Бүс нутгийн хэмжээнд гамшгийн эрсдэлийг бууруулах үйл ажиллагаан дах Монгол Улсын манлайллыг харуулах, Онцгой байдлын албаны нэр хүндийг олон улсын түвшинд өргөх түүхэн үйл явдал болох юм гэж Онцгой байдлын ерөнхий газраас мэдээллээ.

Улаанбаатар хотын нутаг дэвсгэрт Хог хаягдлын тухай хуулийн хэрэгжилтийг хангуулах, нийслэлийн хүн амын эрүүл мэндэд үзүүлэх хортой нөлөөллийг арилгах, лууль шарилж бусад хөл газрын ургамал /зэрлэг/-ыг устгах, тархалтын хүрээг хязгаарлах, цаашид ургах нөхцөлийг арилгах зорилгоор Улаанбаатар хотын Ерөнхий менежер бөгөөд Захирагчийн ажлын албаны дарга удирдамж гаргалаа.

Удирдамжийн хүрээнд дүүргүүдийн ЗДТГ, НМХГ, Хот тохижилтын газар ОНӨААТҮГ, Сууц өмчлөгчдийн холбооны дээд зөвлөл, дүүргүүдийн тохижилт үйлчилгээний байгууллагууд хамтран Улаанбаатар хотын есөн дүүргийн нутаг дэвсгэрийн нийтийн эзэмшлийн бүх гудамж, талбай болон аж ахуйн нэгж, байгууллагуудын эзэмшил газар, орон сууц, гэр хорооллын доторх талбайд лууль, шарилж бусад хөл, газрын ургамлыг устгах ажил хийгдэж байна гэж Улаанбаатар хотын Захирагчийн ажлын албанаас мэдээллээ.

Агаарын хөлөг суултанд орох үед газрын навигацийн дэмжлэг үзүүлдэг төхөөрөмжүүдийг хүлээн авах шалгалтын нислэгийг амжилттай хийжээ. Хөшигийн хөндийд шинээр баригдсан Улаанбаатар хотын олон улсын шинэ нисэх буудалд суурилуулагдсан VRB-53D загварын “Бүх чиглэлтэй хэт өндөр давтамжийн радио дохиологч”, LDB-103 загварын “Зай хэмжигч төхөөрөмж” станцуудын тоног төхөөрөмжийг ийнхүү хүлээн авч буй юм. Энэхүү шалгалтын нислэгийг Иргэний Нисэхийн ерөнхий газрын Нислэгийн журам боловсруулалтын албаны шалгалтын нислэгийн баг “Геосан” ХХК-ны Cessna Caravan 208B агаарын хөлгөөр Олон улсын иргэний нисэхийн байгууллагын стандарт шаардлагуудад бүрэн нийцүүлэн 13 цаг 59 минутын нислэгийн блок цагт багтаан шалгасан байна.

Агаарын хөлөг суултанд орох үед газрын навигацийн дэмжлэг үзүүлдэг энэхүү төхөөрөмжүүдийг хүлээн авснаар тус нисэх буудалд агаарын хөлөг хүлээн авах боломжтой болох юм. DVOR, DME станцуудын хүлээн авах шалгалтын нислэгийн дараагаар Normarc 7000B загварын “Хэрэглэлээр буулт үйлдэх” /ILS/ системийн хүлээн авах шалгалтын нислэгийг хийж гүйцэтгэх бөгөөд ILS нь агаарын хөлөг суултанд орох үед дэмжлэг үзүүлдэг хамгийн чухал систем юм. Тус нисэх буудлын газрын навигацийн тоног төхөөрөмжүүдийг ашиглалтанд хүлээн авах шалгалтын нислэгүүдийг энэ сардаа багтаан хийж дуусгахаар ажиллаж байна.