Month: June 2017

Ой, хээрийн түймрийн голомтод олон хоногоор ажиллаж байгаа Онцгой байдлын албаны алба хаагчдад сэтгэл санааны болон эд материалын дэмжлэг үзүүлэхийг хүссэн иргэд, аж ахуйн нэгж байгууллага олон байгаа нь сайшаалтай. Тухайлбал, Гамшгаас хамгаалах Хүнс, хөдөө аж ахуйн улсын албаны штабын 133 гишүүн сэтгэлийн хандив цуглуулж түймрийн голомтод үүрэг гүйцэтгэдэг алба хаагчдад зориулан гар утас бэлэглэлээ.

Энэхүү гар утас нь мобиком, юнителийн хос симтэй, сүлжээ сайн барьдаг аж. Ялангуяа ой, хээрийн түймрийн голомтод олон хоногоор үүрэг гүйцэтгэдэг алба хаагчдад зориулагдсан энэхүү гар утас нь радиогийн суваг барьдаг, чанга яригчтай, 30 хоног цэнэгээ барьдгаараа давуу талтай юм.

Мөн mp3 тоглуулагчтайгаас гадна цаг агаар, зурхай зэрэг өдөр тутмын хэрэглээний программуудыг багтаасан, гар чийдэн болгон ашиглах боломжтой. Нийслэлийн Онцгой байдлын газрын Хан-Уул, Сонгинохайрхан дүүргийн Онцгой байдлын хэлтэст энэхүү зургаан ширхэг гар утсыг хүлээлгэн өгсөн.

Гэрэл, цахилгаангүй, хөдөө, хээрийн нөхцөлд ашиглахад тохиромжтой энэхүү гар утастай болсноор алба хаагчид ар гэрийнхэнтэйгээ холбогдохоос гадна түймрийн голомтоос мэдээлэл дамжуулах, албаны бэлэн байдлыг хангахад чухал дэмжлэг боллоо гэж Онцгой байдлын ерөнхий газраас мэдээллээ.

Монгол Улсын Ерөнхийлөгчийн хүний эрх, хуулийн бодлогын зөвлөх, хууль зүйн ухааны доктор Ч.Өнөрбаярт Шүүхийн ерөнхий зөвлөлийн дарга, гишүүд, ажлын алба өнөөдөр хүндэтгэл үзүүллээ.

Ч.Өнөрбаяр зөвлөх Оксфордын их сургуулийн урилгаар зочин профессороор ажиллахтай нь холбогдуулан ийнхүү хүндэтгэл үзүүлж буй юм.

Шүүхийн ерөнхий зөвлөлийн дарга, доктор, профессор Н.Лүндэндорж хэлсэн үгэндээ “Монгол Улсын Ерөнхийлөгчийн санаачилж эхлүүлсэн шүүхийн шинэтгэлийн төлөөх нөр их хөдөлмөрөө Ч.Өнөрбаяр зөвлөх түр завсарлуулж байна. Энэ хугацаандаа Их Британи улс дахь Оксфордын их сургуульд зочин профессороор ажиллахаар болсон нь сайхан мэдээ юм. Улс төрийн ажлаа завсарлаж, дэлхийн сод сургуульд зочин профессороор ажиллах хувь тохиол тэр бүр хүнд тохиохгүй.

Шүүхийн шинэтгэлийн том хөдөлгөөнийг бид маш хүнд цаг үед хийсэн. Энэ хүнд цаг үеийг хамтдаа туулж, том өмөг түшиг болон шүүхийн шинэтгэлийг 10 үр дүнд хүргэхэд Ч.Өнөрбаяр зөвлөхийн оруулсан хувь нэмэр их. Ч.Өнөрбаяр маань Монгол Улсын Ерөнхийлөгчийн итгэлийг олж ажиллалаа. Хүний итгэлийг олох ухаан, хүн чанарын асуудал байдаг” гэж онцлов.

Цаашид шүүхийн шинэтгэлийн төлөө ажиллахыг билэгдэж тэрбээр “Шүүхийн шинэтгэл цаашид ч үргэлжилнэ. Шавь нар минь, энд байгаа хүмүүс шүүхийн шинэтгэлийн талаар асар их туршлага хуримтлуулсан. Ийм залуу үетэй Та бүхэн олон жил хамтран ажиллаж, шүүхийн шинэтгэлийг хэрэгжүүлнэ гэж найдаж байгаа. Цаашдаа олон он жилүүдэд хамтран ажиллахыг ерөөе. Эрдэм номын их үйлс, урт холын замд нь амжилт хүсье” гэв.

“Шүүхийн шинэтгэлийн төлөө хамтдаа” гэсэн уриа, үнэт зүйл, зарчимд нэгдсэн бүх хүн шинэтгэлийг хийсэн. Энэ бол эхлэл. Цаашид эхлүүлсэн ажлаа илүү чамбайруулах ёстой. Би залуу хүн. Монголын төрд хүчин зүтгэнэ. Хийж бүтээхээр бодож, санасан зүйл ч их бий” гэсэн юм.

Архангай аймагт он гарснаас хойш малын галзуу өвчин Хашаат, Жаргалант, Цэцэрлэг, Өндөр-Улаан, Хотонт гэсэн таван суманд нийт 11 удаагийн малын галзуу өвчний тохиолдол бүртгэгджээ. Тус аймгийн Хотонт суманд хамгийн сүүлийн тохиолдол нь тавдугаар сарын 31-нд гарчээ. Энэхүү тохиолдлыг улсын мал эмнэлгийн лабораторийн шинжилгээгээр малын галзуу өвчин мөн болохыг тогтоосон байна. Ийнхүү галзуу өвчин гарсантай холбогдуулан өчигдөр аймгийн Онцгой комиссын хурлын шийдвэрээр галзуу өвчин гарсан сум, багуудад мэргэжлийн багийн бүрэлдэхүүнтэй ажлын хэсгийг ажиллуулах шийдвэр гарсан байна.

Өнөөдрийн байдлаар өвчин гарснаас хойш Жаргалант сумын Хоолт, Зуслан баг, Хотонт сумын Өндөрсант, Хашаат сумын Номгон багуудад мал амьтны халдварт галзуу өвчинтэй тэмцэж, нийт 103 мал, амьтан устган, малчдад мэдээлэл сурталчилгаа түгээх ажлуудыг хийсэн байна.

Галзуу өвчин гарах болсон шалтгаан нь ихэнх нь үнэг, чоно мэтийн зэрлэг амьтан мал руу ноцож хазсантай холбоотойгоор гарсан байна. Хазуулж халдвар авсан таван үхэр, таван хонь, хоёр ямаа, нэг ишиг, нэг адуу, нэг согоо, нэг үнэг, нэг нохойг өвчин гарсан тухай бүр нь даруй устгаж байжээ. Цаашид ч нэмэгдэж гарч болзошгүйг Зоонозын төвөөс хэлж байгаа аж. Галзуу өвчний вакциныг захиалсан байгаа ч одоог хүртэл ирээгүй байгааг ХХААГ-аас мэдээлэв.

Улсын Их Хурлын Тамгын газар, “Нийгмийн дэвшил эмэгтэйчүүд хөдөлгөөн” төрийн бус байгууллагаас хэвлэл мэдээллийн байгууллагын ажилтнуудад зориулан “Хэвлэл мэдээллийн хэрэгслээр дамжуулан нөлөөллийг нэмэгдүүлэх нь” сэдэвт мэдээлэл өгөх уулзалтыг Төрийн ордонд зохион байгуулав.

“Нийгмийн дэвшил эмэгтэйчүүд хөдөлгөөн” төрийн бус байгууллага нь НҮБ-ын Ардчилал сангийн дэмжлэгтэйгээр УИХ-ын Тамгын газартай хамтран “Цахим засаглалаар дамжуулан хууль боловсруулах үйл явцад иргэдийн оролцоог нэмэгдүүлэх нь” төслийг хоёр жилийн хугацаанд хэрэгжүүлсэн бөгөөд энэхүү төслийн хүрээнд энэхүү уулзалтыг зохион байгуулсан юм.

Уулзалтаар хууль санаачлагчдын боловсруулсан хуулийн төслүүдэд иргэд, иргэний нийгмийн байгууллагууд болон бусад сонирхлын бүлгүүдийн саналыг авах, нэгтгэх, тусгах, тухайн талуудад санал нь төсөлд хэрхэн туссан талаар эргэн тайлагнаж, харилцан мэдээлэл солилцоход зориулагдсан http://forum.parliament.mn цахим системийг танилцуулж, системийг хэрхэн ашиглах талаар мэдээлэл өгөв.

http://forum.parliament.mn цахим хэлэлцүүлгийн систем нь УИХ-ын http://parliament.mn/цахим хуудасны дэд хуудас бөгөөд нэг талаас хууль тогтоох байгууллагад зориулсан хууль тогтоомжийн төсөлд олон нийтийн саналыг авах, нөгөө талаас хуулийн төсөлд иргэд, олон нийт саналаа өгөх боломжийг хангасан, хууль санаачлагч ба олон нийтийг орон зай, цаг хугацаа, мөнгө санхүүгийн бэрхшээлгүйгээр холбосон талбар болохын хувьд хууль санаачлагч нь өөрийн санаачилсан хуулийн төслийг системд байршуулж, олон нийтийн хэлэлцүүлэг явуулахыг УИХ-ын Тамгын газрын Мэдээлэл, технологийн хэлтсийн ахлах референт Ч.Тунгалаг хэлсэн.

Одоогоор уг системд Монгол Улсын Үндсэн хуульд нэмэлт, өөрчлөлт оруулах асуудлаар явуулсан анхдугаар зөвлөлдөх санал асуулгын зөвлөмжийг үндэслэн боловсруулсан Монгол Улсын Үндсэн хуульд оруулах нэмэлт, өөрчлөлтийн төслийг байршуулсан байгаа бөгөөд байршуулснаас хойших долоо хоногийн хугацаанд 1000 гаруй хүн үзэж, танилцжээ.

Хэлэлцүүлгийн системийг ашиглаж эхэлснээсээ хойш 20 орчим хуулийн төслийг байршуулж, иргэд, олон нийтээс санал авсан бөгөөд Төрийн албаны тухай хуульд нэмэлт оруулах тухай хуулийн төслийг 30 гаруй мянган хүн үзэж, 1000 орчим хүн саналаа өгсөн хэмээн “Нийгмийн дэвшил эмэгтэйчүүд хөдөлгөөн” төрийн бус байгууллагын гүйцэтгэх захирал Ш.Оюунтуяа хэллээ.

http://forum.parliament.mn цахим хэлэлцүүлгийн системээр иргэд хуулийн төсөлд саналаа өгөхөөс гадна хоорондоо харилцах, мэдээлэл солилцох, зөвшилцөж асуудлыг шийдвэрлэх, хэлэлцүүлэг өрнүүлэх боломжтой гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Эрүүл мэнд, спортын сайд асан Г.Шийлэгдамбыг шүүх хурал дахин хойшиллоо. Түүнийг Эрүүгийн хуулийн тусгай ангийн 268 дугаар зүйлийн 268.2, Г.Ганчимэгийг мөн хуулийн тусгай ангийн 268 дугаар зүйлийн 268.2, 269 дүгээр зүйлийн 269.1, С.Насанбатыг Эрүүгийн хуулийн тусгай ангийн 268 дугаар зүйлийн 268.2-т заасан гэмт хэрэгт буруутгаж буй юм.

Гэвч Г.Шийлэгдамбын өмгөөлөгч Б.Энхзаяа, шүүгдэгч О.Даваасүрэнгийн өмгөөлөгч Дэлгэрням нар нь эрүүл мэндийн шатгааны улмаас шүүх хуралдаанд оролцох боломжгүй талаар шүүхэд бичгээр мэдэгдэж энэ талаарх баримтаа хүсэлтийн хамт ирүүлсэн. Иймд шүүгдэгч нарыг өмгөөлүүлэх эрхээр хангах үүднээс шүүх хуралдааныг 2017 оны 07 дугаар сарын 06-ны өдрийн 09-00 цаг хүртэл хугацаагаар хойшлууллаа.

Улсын хэмжээнд өнөөдрийн байдлаар нийт 21 сая төл хүлээн аваад байна. Мал төллөлт одоогийн байдлаар оны эхний нийт 26.1 сая хээлтэгчийн 81.8 хувь буюу 21.4 сая хээлтэгч төллөж 21.0 сая төл буюу гарсан төлийн 98.1 хувь нь бойжиж байгаа аж. Үүнээс 56.6 мянган ботго, 620.0 мянган унага, 998.6 мянган тугал, 10.6 сая хурга, 8.8 сая ишиг бойжиж байна.

Сарын өмнөх байдлаар нийт хээлтэгчийн 74.5 хувь буюу 19.5 сая хээлтэгч төллөөд байсан. Тодруулбал, 19.2 сая төл төллөж, гарсан төлийн 98.0 хувь нь бойжиж байна. Үүнээс 50.8 мянган ботго, 394.2 мянган унага, 742.0 мянган тугал, 10.0 сая хурга, 8.3 сая ишиг бойжиж байв. Мал төллөлт өмнөх долоо хоногоос 900.0 мянгаар нэмэгджээ.

Нийслэлийн Засаг дарга бөгөөд Улаанбаатар хотын захирагч С.Батболд өнөөдөр Ус сувгийн удирдах газарт 40 гаруй жил үр бүтээлтэй ажилласан н.Сүхбат агсны гэр бүл болон УСУГ-т ажил үүргээ гүйцэтгэж байхдаа нурангид даруулж хөдөлмөрийн чадвараа алдсан н.Төрмөнх нарын гэр бүлийн нийгмийн асуудлыг шийдвэрлэж, орон сууц эзэмших эрхийг гэрчилгээг олголоо.

Мөн нийслэлд үйл ажиллагаа явуулж байгаа нийслэлийн өмчит 700 орчим төр захиргаа, боловсрол, эрүүл мэндийн байгууллагын удирдлагуудтай нийслэлийн Өмчийн харилцааны газар “Нийслэлийн өмчийг эзэмшүүлэх гэрээ” байгуулан, гэрээний биелэлтийг жил бүр дүгнэж, нийслэлийн удирдлагуудад танилцуулан цаашид хийж хэрэгжүүлэх ажлаа тодорхойлж, тэргүүний сайн ажиллаж байгаа байгууллагыг шагнаж урамшуулах, хангалтгүй ажиллаж байгаа байгууллагын удирдлагуудад хариуцлага тооцох ажил уламжлал болоод байна.

Энэ оны хувьд нийт 650 орчим байгууллагын гэрээг дүгнэснээс 78.1% бүрэн хангалттай, 17.7% хангалттай, 3.7% ажил сайжруулах үнэлгээ авсан байна.

Бүрэн хангалттай дүгнэгдсэн байгууллагуудаас гэрээгээр хүлээсэн үүргээ бүрэн биелүүлэн, нийслэлийн өмчийг нэмэгдүүлэх талаар санал санаачлагатай, бусдыгаа манлайлан ажиллаж байгаа Чингэлтэй дүүргийн Засаг даргын тамгын газар, СХД-ийн 65 дугаар сургууль, ЧД-ийн “Эрүүл мэндийн төв”, БЗД-ийн 147 дугаар цэцэрлэг, СХД-ийн 163 дугаар цэцэрлэгүүдийг “НИЙСЛЭЛИЙН ӨМЧИЙГ ЭЗЭМШИГЧ ТЭРГҮҮНИЙ БАЙГУУЛЛАГА”-аар шалгаруулж өргөмжлөл гардуулав гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Их Британи, Умард Ирландын нэгдсэн вант улс Уэлсийн нийслэл Кардифф хотноо болсон ‘BBC Cardiff Singer of the World” тэмцээнд тэргүүн байр эзэлж, дэлхийн шилдэг таван дуучны нэгээр шалгарсан МУГЖ Г.Ариунбаатар өнөөдөр эх орондоо ирлээ.

Тэрбээр “BBC” агентлагаас жил жил бүр зохион байгуулдаг “Cardiff singer of the world” буюу “Дэлхийн дуучин” уралдаанд оролцож, тус тэмцээний романс болон ари төрөлд өрсөлдсөн билээ. Г.Ариунбаатар “Романс” төрөлд тэргүүн байр эзэлж, ари төрөлд шилдэг таван дуучны нэгээр шалгаран, шилдэг баритон хоолойтой дуучны шагналыг хүртсэн юм.

Дэлхийн тайзнаа монгол сонгодог урлагийг дахин эгшиглүүлсэн түүнийг ар гэрийнхэн болон “Сүлд” чуулгын хамт олон онгоцны буудалд угтан авлаа.

Монгол Улсын гавьяат жүжигчин Г.Ариунбаатар эх орондоо хөл тавиад баярын сэтгэгдлээ хуваалцсан юм. “Нар хур тэгширсэн, сайхан өдөр эх орондоо ирж байна, сайхан байна. “Cardiff singer of the world” тэмцээнд хоёр төрлөөр оролцож, хоёуланд нь финалд үлдэж, нэг төрөлд нь тэргүүн байр эзэлж, Монголынхоо амжилтыг шинэчилсэндээ маш их баяртай байна. Сэтгэл дүүрэн байна сайхан байна” гэлээ. “Миний хувьд дэлхийн тайзан дээр Монголынхоо агуу хөгжмийн зохиолчдын бүтээлийг эгшиглүүлэх юмсан гэсэн мөрөөдөл байсан. Миний мөрөөдөл биеллээ. Олон хүнд их таалагдсан нь мэдэгдэж байлаа. Гадаадад байгаа монголчууд төдийгүй маш олон хүн надад урмын үг хайрлаж, дэмжиж байлаа. Сүүлийн хэдэн өдөр аз жаргалаар бялхсан сайхан өдрүүд байна. Монгол Улс сонгодог урлагтай, бид бас юм бүтээдэг хүмүүс шүү дээ гэдгийг харуулахыг хичээж, тэмцээндээ оролцлоо. Үзэгчид ч маш сайхан хүлээж авсан” гэж тэр ярьсан юм.

Мөн “Төрүүлж өсгөсөн ээж, аавдаа баярлалаа. Намайг өдий зэрэгтэй авч яваа СУИС, миний багш нар, Цагдаагийн ерөнхий газрын “Сүлд” чуулга, Соёлын төв өргөөний хамт олон, Улсын филармони гээд миний ажиллаж, амьдарч байсан байгууллага хамт олон бүхий л хүмүүстээ талархаж байна. Дээрээс нь миний хажууд дэм болсон Буриад зон олон, Буриадын дуурь бүжгийн театрын хамт олон гээд энэ сайхан хүмүүсийн халуун цус, халуун дулаан уур амьсгал, намайг дэмждэг сэтгэл дээр миний амжилт тогтдог юм болов уу гэж боддог. Эх орноо, эх нутгаа байнга бодож, бахархаж, баярлаж явдаг” гэлээ.

Дуучин Г.Ариунбаатар Чингис хааны хөшөөнд хүндэтгэл үзүүлсний дараа хотын удирдлагууд, БСШУС-ын сайд Г.Чулуунбаатар хүлээн авч авч, баяр хүргэлээ.