Сонгууль болоход дөрөв хоног үлдлээ. “Индүү залгахад…” гэдэг шиг агаар хүртэл улс төртэй. Гэхдээ энэ нь буруу биш. Ирэх дөрвөн жилд хэн бидний нүүр царайг гадаад дотоодод төлөөлөх тухай асуудал. Өрх гэрээр бол аавыгаа сонгох биш, алдааг нь хэлэх асуудал. Сүүлийн үед залуус “Хэн ч гарсан ялгаагүй” гэх үг их унагаж байна. Үнэндээ ялгаа нь залуусын гарт байгаа юм. Ялгахад маш хялбар боловч эцсийн үр дүн таны амьдрал. Амьдралаа эхэлж байгаа залуус орон байрнаас эхлээд, анхны үрийнхээ өлгийг авахад маш их анхаарал тавьдаг. Харин үр хүүхдээс эхлээд өвөг дээдэс чинь ямар байх нь сонгуулиас хамаардаг гэдгийг тэр бүр анзаардаггүй. Жаахан л анзаарчих юм бол залуус минь шийдвэр гаргахдаа ядах юмгүй. Аргагүй насныхаа хувиар айкүю нь алдаагүй сонголт хийнэ. Тиймээс залуус гагцхүү сонгуульд л оролцох нь чухал. Нэр дэвшигчдийн хэн нь хэн бэ гэдгийг та нар л сайн ялгаж чадна. Хараа хурц, сонор бүтэн, зүрхний цохилох хэмнэл зөв, тэмүүлэл дүүрэн залуус л алс холыг харж амжина. Сонгуулийн саналын хар хайрцаг руу сонгогчдын сор болсон залуусын эрүүл эрчимлэг санал элбэг орж гэмээ нь Элбэгдоржоос ээлж халаа авах Монгол Улсын Ерөнхийлөгчийг зөв хүнээрээ сонгох магадлал мөн ч өндөр байна даа.
Магадгүй хэн нэг нь “Сонгуульд оролцохгүй байхыг” уриалж болно. Мөн нэр дэвшигчид таалагдахгүй байж болно. Ямар ч тохиолдолд таны өгсөн санал Монгол орноо төртэй болгох алхам. Төр гэдэг нь таны амгалан тайван байдал, үр төлийн чинь аюулгүй байдал, өвчилбөл ирдэг эмч, шатвал хамгаалдаг онцгойнхон юм шүү дээ. Тэд хэн байхыг шийддэг юмыг л сонгууль гээд байгаа юм шүү дээ.
Х.Бат
“Улаанбаатар цом” боксын олон улсын тэмцээн Хандгайт дахь “Их тамир” спортын ордонд гурав дахь өдрөө үргэлжилж байна. Тус тэмцээнд манай тамирчдаас 64 кг жинд Б.Чинзориг хүрэл медалийн болзол хангасан бол энэ жинд Г.Баярхүү, О.Норобал нар өнөөдөр медалийн төлөөх тулалдана. Мөн 49 кг жинд Г.Ган-Эрдэнэ хүрэл медалийн болзол хангасан бөгөөд дараагийн шатанд Индонезийн боксчинтой хүч үзэхээр болжээ. Түүнчлэн 56 кг жинд Х.Энх-Амар хүрэл медалийг гартаа оруулсан бөгөөд маргааш БНАСАУ-ын тамирчинтай мөнгөн медалийн төлөө тулалдахаар боллоо.
УИХ-ын дэд дарга Ц.Нямдорж, УИХ-ын гишүүн Д.Лүндээжанцан, Ө.Энхтүвшин нар дөнгөж сая мэдээлэл хийлээ. УИХ-ын гишүүн Ц.Нямдорж “Ерөнхийлөгчийн сонгуулийн сурталчилгаа дуусах шатандаа орж байна. Бид, тав дахь Ерөнхийлөгчөө сонгох гэж байна. Энэ удаагийн сонгуулийг өмнөх сонгуулиудтай харьцуулахад хар бараан мэдээллээр дүүрэн, олон нийтийг төөрөгдүүлсэн сонгууль болж байгааг онцлон хэлмээр байна. М.Энхболд даргын хөдөө явах ажил дууссан. Бидний зүгээс М.Энхболд даргыг сонгогдоосой, сонгуулийн дүн нааштай гараасай гэдэг хүсэлтийг сонгогчдодоо тавьж байна. Монголын төрийг бүтэн болгоод өгөөч, ноён нуруутай болгоод өгөөч гэж та бүхэнд хэлж байна” гэв. Мөн УИХ-ын сонгуулийн дараа МАН-ын Засгийн газар улсын төсвийг хүлээж авахад эдийн засгийн байдал хүнд байсан. Нэг л эвгүй хөдөлвөл ангал руу нисэх эдийн засгийн хүнд нөхцөл байдал үүссэн байсан юм. Хүнд хэцүү олон нийтэд таалагдахааргүй арга хэмжээнүүдийг авч ажилласнаар улсын эдийн засаг сайжирч байна гэлээ.
Оюуны өмч, улсын бүртгэлийн ерөнхий газраас сонгогчдын нэрсийн жагсаалтын талаар өнөөдөр мэдээлэл хийлээ.
Монгол Улсаас Бүгд Найрамдах Словени Улсад суух Онц бөгөөд Бүрэн эрхт Элчин сайд Г.Баттунгалаг 6 дугаар сарын 19-ний өдөр Бүгд Найрамдах Словени Улсын Ерөнхийлөгч Борут Пахорт Итгэмжлэх жуух бичгээ өргөн барив.
Замын байгууламжийн засварын ажил эхэлжээ
Урин дулаан цаг ирж амралт, аялал зугаалга ихсэх хандлагатай байгаа аж. Иймээс иргэдийг ой, хээрийн түймэр, гол усны осол, үерийн аюул, болзошгүй осол, эрсдлээс болж амиа алдах тохиолдол ихэссэн талаар албаныхан сануулсан юм. Тухайлбал, энэ сарын 22-нд Дорнод аймгийн Хэрлэн сум VI баг, Хэрлэн голд тус сумын харъят Л /эр.52н/ нь живж амиа алдсан харамсалтай хэрэг гарчээ. Он гарсаар улсын хэмжээнд 28 хүн усанд живж, амь насаа алдсан байна. Тэдний зургаа нь хүүхэд байсан бол 22 нь насанд хүрсэн иргэд живж нас барсан тохиолдол бүртгэгдсэн гэв.
Монгол орон даяар ерөнхийлөгчийн сонгуулийн сурталчилгаа энэ сарын 6-ны өдрөөс эхлэн явагдсан. Сонгуулийн тухай хуулийн дагуу маргааш 00:00 цагаас ерөнхийлөгчийн сонгуулийн сурталчилгаа дуусах юм. Сонгуулийн тухай хуулийн 28.2-т “Сонгуулийн сурталчилгааг санал хураах өдрөөс 24 цагийн өмнө буюу санал хураах өдрийн өмнөх өдрийн 00 цагаас өмнө зогсооно. Энэ үеэс эхлэн сонгууль явагдаж дуустал ямар нэг хэлбэрээр ухуулга, сурталчилгаа хийх, санал хураах өдөр хүртэл 7 хоногийн хугацаанд олон нийтийн санал асуулга явуулах, санал асуулгын дүн мэдээг нийтлэхийг хориглоно” гэж заасан байдаг билээ.