Month: June 2017

Монгол Улсын Ерөнхийлөгчийн сонгуулийг бүртгэлийн аргаар, иргэдийн саналыг мөнгөөр үнэлэн авах аргаар луйвардах үйл ажиллагаа эрчимжиж байгаа талаар хүний эрхийн байгууллагууд мэдэээлэл хийлээ. Хэвлэлийн бага хуралд “Хүний эрхийн төлөө өмгөөлөгчид”, Иргэний нийгмийн 108 байгууллагын “Нэгдсэн нягтрахын хүч”, “Залуу үе хөгжлийн түлхүүр”, “Нэг үндэс”, “Залуу лидер”, “Дэлхийн монголчуудын зөвлөл” ТББ-ын төлөөлөл оролцлоо.

Хэвлэлийн хурлын эхэнд хүний эрхийн хуульч М.Ичинноров “Эдийн засаг хямарсан энэ хүнд үед төрийн мөнгөөр сонгуулийг худалдаж авахын тулд хайр найргүй цацаж байна. Мөнгө тараах үйл ажиллагаа хэрээс хэтэрч, улайм цайндаа гарч байна.Тухайлбал,Эрүүл мэндийн даатгалаа төлөөгүй иргэдийн даатгалыг төлж, саналыг нь урьдчилан худалдаж авч байна. Тэтгэврийн нэмэгдэл олгож эхэллээ. Өмнөговь аймагт говийн нэмэгдэл нэрээр иргэдэд бэлэн мөнгө тарааж байна. Түүчлэнтөрийн алба хаагч хүртэл доороо хүмүүс элсүүлэн мөнгө өгч саналыг нь өгүүлэх сүлжээ, схемийг ажиллуулж эхэлсэн гэх мэдээлэл бас бидэнд ирлээ. Бүртгэлийн луйвар хэрээс хэтэрч буй өөр нэг жишээ гэхэд л өнөөдөр Жаргалан хотхонд амьдардаг иргэн н.Баярсайхан Хан-Уул дүүргийн 15 хороон дээр очиход тэдний хотхон ердөө 4-5 байртай байхад 48,49 дүгээр байр гээд шинээр байрууд үүсгээд олон тооны сонгогчдын тоог нэмсэн мэдээлэл авч баримтжууллаа. Энэ мэтээр хохтхонуудад шинээр байрууд үүсгэж ийм маягаар бүртгэлийн аргаар луйврын схемээ хэрэгжүүлж эхэллээ” гэв.

Мөн тэрбээр “Иргэдэд бэлэг сэлт өгөх, хөнгөлөлттэй зээл, тусламжинд хамруулах гэх зэргээр бүх аргыг хэрэглэж байна. Энэ баруун солгойгүй тарааж буй их мөнгийг нөхөх мөнгийгөө гаднаас тэр тусмаа Хятад Улсаас зээлж, заримыг нь буцалтгүй тусламж нэрээр авч байгаа. Энэ нь эргээд бид тусгаар тогтнол, газар шороо, эрх чөлөөгөөрөө төлөх маш том бодит аюул бий шүү гэдгийг сануулахыг хүсч байна. Бүр Сонгинохайрхан дүүргийн гэр хороололын томоохон хэсгийг дахин төлөвлөлтийг сэргээх нэрээр Хятадын “буцалтгүй тусламж” гэгчээр хятад хороолол болгохоор зэхэж, түүгээрээ сонгуулийн шоу хийж байгааг иргэд маань ойлгож, сэрэмжлэх хэрэгтэй байна. Түүнчлэн авилга, мафи, гэмт хэргийн шинжтэй байж болзошгүй их хэмжээний мөнгийг энэ сонгуульд урлаг, соёлын зарим одуудыг, хууль хяналтын байгууллагуудыг тэр чигээр нь худалдан авч, мөн иргэдийн мэдэх эрх, эрх чөлөөнд ч халдах үйл ажиллагаандаа ашиглаж байна. Тиймээс өнөөдрийн хэдхэн төгрөгөөр маргаашийн ирээдүйгээ худалдаж болохгүй ээ. Монголчууд бидэнд алдаж мэдэх тусгаар тогтнол, ариун газар шороо, биднийг бүхнээс эрхэмсэг болгодог эрх чөлөө гэж бий шүү гэдгийг сануулахыг хүсч байна. Сонор сэрэмжтэй байгаарай. Ухамсартай сонголт хийгээрэй. Зүрх сэтгэлээрээ зөв сонголт хийгээрэй” хэмээн уриаллаа.

Б.ОД

АН-ын Сонгуулийн штабаас өнөөдөр хэвлэлийн бага хурал зарлаж, УИХ-ын гишүүн Я.Санжмятав, Ардчилсан намын Ерөнхий Нарийн бичгийн дарга Ц.Туваан нар мэдээлэл хийлээ. Мэдээллийн үеэр Я.Санжмятав “Сонгуулийг шударга, үнэн зөв явуулах зорилгын үүднээс бид Сонгуулийн Ерөнхий Хороо, Цагдаагийн Ерөнхий Газар, өрсөлдөгч намуудынхаа штабуудад санал тавьж байна. Ялангуяа СЕХ бидний тавьсан саналыг хүлээн авч, үүргээ биелүүлж байгаад талархал дэвшүүлэхийг хүсье.

Сонгуулийн явцад ирц чухал байдаг. Тэр дундаа Улаанбаатар хотод хамгийн олон сонгогчид саналаа өгдөг. Тодорхой телевиз, хувийн компани хамтраад арга хэмжээ хийхээр зэхэж буй, бид энэ асуудлаар СЕХ, Улаанбаатар хотын захирагч, ЦЕГ, Налайх дүүргийн засаг дарга нарт шаардлага хүргүүлж байна.

Тодруулбал, “Боловсрол суваг” телевиз “Номадс” сүлжээ ресторантай хамтраад энэ зуны хамгийн том задгай талбайн шоу, “Яг түүн шиг” гала тоглолтыг зургаадугаар сарын 25-ны өдрийн 20:00 цагаас Тэрэлжийн замд байрладаг “Magic rock” аялал жуулчлалын компани дээр хийхээр төлөвлөсөн байна. Сонгуулийн өмнөх өдөр бол сурталчилгаа дуусаад саналаа өгөх үе байдаг. Энэ үед Улаанбаатар хотын залуусыг олноор нь тэр газар руу автобусаар зөөвөрлөнө. Энэ нь их эмзэглэл төрүүлж байна. Залуучуудад урлагийн тоглолт хэрэгтэй нь мэдээж. Үүнийг далимдуулаад сонгуулийн ирцийг бууруулахад нөлөөлөхүйц ажил зохион байгуулах гэж байна. Энэ шоугаа Бүтэн сайн өдрийн шөнийн 04:00 цагт дуусгахаар төлөвлөжээ.

Манайх Налайх руу явдаг ганцхан замтай. Түгжрэл их үүснэ. Өглөөнөөс зөөвөрлөсөн машинууд ирээд оройн 22:00 цагт саналаа өгч амжих уу гэдэг эргэлзээтэй шүү дээ. Үүнээс гадна хоёрдугаарт тоглолт үзсэн залуус мэдээж чөлөөт цагаа тэнд өнгөрүүлэх байдал руу шилжинэ. Тухайн газар хоол, архи дарсаар үйлчилнэ гэсэн байна. Сонгуулийн тухай хуулийн 96 зүйлийн 96.1 дээр Сонгуулийн өдөр дараах үйл ажиллагааг хориглох ба хэрэгжилтэд аймаг, нийслэлийн засаг дарга хяналт тавьж ажиллана гэсэн заалт бий.

96.1.1 дээр согтууруулах ундаагаар үйлчлэх, худалдахыг хориглоно, 96.1.2 дээр соёл урлаг, үзвэр үйлчилгээ, спортын арга хэмжээг зохион байгуулахгүй байхаар тусгаж өгсөн. 96.1.3 дээр гадаа болон битүү талбайд үйл ажиллагаа явуулдаг худалдаа үйлчилгээний төвүүдийг үйл ажиллагаа явуулахыг хориглоно гэсэн заалт бий.

92 дугаар зүйлийн 92.14-т сонгогчдыг сонгуульд идэвхтэй оролцуулах арга хэмжээг сонгуулийн төв байгууллага авч хэрэгжүүлнэ гэсэн заалтуудыг энэ зөрчиж байна. Сонгуулийн ирцэнд нөлөөлөхүйц, залуучуудын сэтгэл зүйг буруу тийш нь залахаар эрсдэлтэй алхам хийх гэж байгаа учраас сонгуулийн штабаас энэ арга хэмжээг хуулийн хүрээнд зогсоохыг санал болгож, СЕХ-нд шаардлага хүргүүлж байна. СЕХ хуралдаж шийдвэрээ гаргах байх.

Төрийн тэргүүнээ сонгож байгаа энэ үед ХЗДХЯ, БХЯ харьцангуй тогтвортой, хяналттай ажиллах ёстой байдаг. Тэгвэл энэ арга хэмжээг дэмжиж Монгол Улсад төдийгүй Азидаа нэгт орох хөгжмийн аппаратыг өгч байгаа бололтой. Батлан Хамгаалах Яамны хөгжмийг Төрийн нарийн бичгийн даргын гарын үсэгтэй гаргадаг. Энэ гараад явсныг бодвол даргын шийдвэртэйгээр, яамны холбогдох албан тушаалтнууд оролцжээ.

Мөн бидэнд ирсэн мэдээллээр зохион байгуулагдах газарт зам засчихсан, хүчний байгууллагууд хамгаалалт хийхээр байна. Тухайн компани хэдийгээр хүнд байгаа ч гэсэн Монгол төрийн сонгуулийг хүндэтгэж энэ зүйлээ хойшлуулах хэрэгтэй байх” гэсэн юм.