Month: March 2017

Дараа сарын эхээр явуулахаар төлөвлөж буй Ардчилсан намын дотоод сонгуулийг зохион байгуулахтай холбоотой тогтоол нь АН-ын Үндсэн дүрмийг зөрчиж байна гэж үзсэн тус намын гишүүд сунгаагаар тодорсон шинэхэн намын даргадаа шаардлага хүргүүлжээ.

Шаардлагыг бүрэн эхээр нь хүргэе.

“Ардчилсан намын дарга С.Эрдэнэ танаа

ШААРДЛАГА ХҮРГҮҮЛЭХ НЬ

Ардчилсан намын Дотоод сонгуулийн хорооны 2017 оны 02 дугаар сарын 21-ний өдрийн 04 тоот “Нэр дэвшигчдийн дэнчин, сонгуулийн хураамжийг тогтоох тухай” тогтоол нь Ардчилсан намын VII Их хурлаас баталсан Үндсэн дүрмийн дараах заалтуудыг ноцтой зөрчиж байна. Үүнд:

• Дотоод Сонгуулийн Хороо нь 04 тоот тогтоолоороо намын бүх шатны сонгуульт албан тушаалд нэр дэвшигчдийн дэнчин, сонгуулийн хураамжийг тогтоосон нь Үндсэн дүрмийн 5.22.5-д заасан Дотоод сонгуулийн хорооны бүрэн эрхэд хамааралгүй байна.
• Дотоод Сонгуулийн Хорооны дээрх тогтоол нь 8.3.1-ээр “Намын гишүүний татвар, сонгуульт гишүүний хураамжийн доод хэмжээг Үндэсний Бодлогын Хорооноос тогтооно. Нийслэл, аймаг, дүүргийн намын хороо сонгуульт гишүүний хураамжийн хэмжээг нэмэгдүүлж болох бөгөөд тогтоосон доод хэмжээний 50 хувиас хэтрэхгүй байна” гэж Үндсэн дүрмээр Үндэсний бодлогын хороонд олгогдсон бүрэн эрхэд бүдүүлгээр халдсан, улмаар дүрмийн бус тогтоол байна.
• Намын шат шатны сонгуульт албан тушаалд нэр дэвшигчид бүртгүүлээгүй, нэр дэвшигчдийн тоо тодорхой болоогүй байхад дээрх тогтоолын 2 дугаар хавсралтаар намын бүх шатны сонгуульт албан тушаалд нэр дэвшигчийн сонгуулийн хураамж буюу сонгуулийг зохион байгуулах зардлыг тогтоосон нь Үндсэн дүрмийн 8.4.1-д “Намын дотоод болон төрийн сонгуультай холбогдон гарах зардлыг өөрөөр шийдвэрлээгүй бол нэр дэвшигчид тэнцүү хэмжээгээр хариуцна.” гэсэн заалтыг зөрчиж гишүүдийн сонгогдох эрхийг мөнгөөр боомилж, ямарч тооцоо үндэслэлгүй, асар их хэмжээний мөнгөн төлбөр тавьж нэр дэвшигчдийн бүрэн эрхэд халдсан байна.
• Дотоод сонгуулийн хороо нь “Дотоод сонгуулийн хорооны дүрэм”, “Намын бүх шатны байгууллага, удирдах бүрэлдэхүүнийг сонгох сонгуулийн дүрэм”-ийг баталсан нь Үндсэн дүрмийн 5.13.12.27-д “Үндэсний бодлогын хороо нь намын Үндсэн дүрэмд нийцүүлэн 5.13.12.27.9 АН-ын ДоСХ-ны тухай; 13.12.27.10 Гишүүний намын сонгуульт албанд нэр дэвших, сонгох, сонгогдох, томилогдох үйл ажиллагааны тухай дүрмүүдийг баталж, мөрдүүлнэ гэсэн заалтыг ноцтой зөрчиж байна.

Энэ бүхнээс үзэхэд Дотоод Сонгуулийн Хорооны 2017 оны 02 дугаар сарын 21-ний өдрийн 04 тоот “Нэр дэвшигчдийн дэнчин, сонгуулийн хураамжийг тогтоох тухай” тогтоол, “Дотоод сонгуулийн хорооны дүрэм” зэрэг нь бүхэлдээ намын Үндсэн дүрмийг зөрчсөн, өөрт олгогдоогүй эрхийг хэрэгжүүлж баталсан дүрмийн бус акт гэж үзэж байна.

Шинээр эмхлэгдэн байгуулагдсан намын удирдлага, Дотоод сонгуулийн хороо Намын YI, YII Их хурлаас дэвшүүлсэн намын шинэчлэлийн бодлогыг гажуудуулж, гишүүдийн сонгох сонгогдох эрхийг боогдуулсан, АН-ын гишүүдийг бүх шатанд мөнгөөр боомилохыг санаархсан, нээлттэй нам болох шинэчлэлийн гол зорилтыг умартсан хариуцлагагүй шийдвэрийг гаргасанд бид туйлын харамсаж байна.

Дүрмийн бус, эрх зүйн чадамжгүй дээрх тогтоол шийдвэрээр хүч түрэмгийлэн дотоод сонгуулийг явуулах гэж оролдох нь АН-ыг хагалан бутаргах, цаашлаад Монголын ардчилалд асар их хохирол авчрах хорт ажиллагаа гэж бид үзэж байна. Тиймээс бид АН-ын эв нэгдлийг эрхэмлэн, Монгол Улсад ардчилалыг бэхжүүлэх манлайллаа ухамсарлан Үндсэн дүрэм зөрчсөн дүрэм журмаар сонгууль явуулахыг тууштай эсэргүүцэж байна. Намаа дотоод ардчилалтай, гишүүддээ нээлттэй, тэгш оролцоотой, бодлогын нам болгож шинэчлэхийг зорьж байгаа намын анхан шатны байгууллагууд, жирийн гишүүд, Их хурлын төлөөлөгчид улс орны өнцөг булан бүрт энэхүү бусармаг шийдвэрт эгдүүцэн эсэргүүцэж байна.

Энэхүү эрх зүйн олон зөрчилтэй тогтоолоор дотоод сонгууль явуулбал намын бүх шатны бүтцийн байгууллага, тэдгээрийн удирдлага, цаашдын бүх шийдвэр эрх зүйн чадамжгүй болох ноцтой үр дагавар бодитой байх тул эдгээр зөрчлүүдийг бүрэн арилгаж Үндсэн дүрэмд бүрнээ нийцсэн дотоод сонгууль явуулахыг бид танаас хатуу ШААРДАЖ БАЙНА.

Хэрэв бидний энэхүү шаардлагыг хүлээн авахгүй бол Ардчилсан намын гишүүд бид хууль бус сонгуулийн эсрэг гишүүдийнхээ өргөн оролцоо дэмжлэгтэйгээр Үндсэн дүрмээ мөрдүүлэх, намаа нээлттэй, тэгш оролцоотой, хууль, шударга ёсыг дээдлэгч, мөнгөний бус, бодлогын нам болгон шинэчлэхийн төлөө дараа дараагийн алхмуудыг тууштай хийх болно” гэжээ.

АРДЧИЛСАН НАМЫН ГИШҮҮД

Монгол Улсын Засгийн газар, Канад Улсын Засгийн газар хоорондын хамтын ажиллагааны Дугуй ширээний долдугаар уулзалт 2017 оны 3 дугаар сарын 9-нд Оттава хотноо болж өндөрлөв. Дугуй ширээний уулзалтыг Монголын талаас Уул уурхай, хүнд үйлдвэрийн сайд бөгөөд Дугуй ширээний уулзалтын монголын хэсгийн дарга Ц.Дашдорж, Канадын талаас Канадын Гадаад хэргийн туслах дэд сайд Доналд Бобиаш нар ахлан явуулж, Монгол, Канадын улс төр, эдийн засаг, хөрөнгө оруулалт, батлан хамгаалах, боловсрол, шинжлэх ухаан, соёлын салбарын хамтын ажиллагааны өнөөгийн байдлыг дүгнэж, ойрын жилүүдэд хэрэгжүүлэх асуудлаар дэлгэрэнгүй санал солилцов.

Талууд хоёр орны харилцаанд эдийн засаг, хөрөнгө оруулалтын хамтын ажиллагаа чухал байр суурь эзэлдгийг нотлохын зэрэгцээ уул уурхай, хөдөө аж ахуй, дэд бүтэц, байгаль орчин зэрэг салбарын хамтын ажиллагааг идэвхжүүлж ажиллахаар болов. Саяхан хүчин төгөлдөр болсон Хөрөнгө оруулалтыг хөхиүлэн дэмжих, харилцан хамгаалах тухай хэлэлцээр нь Монгол, Канадын эдийн засгийн хамтын ажиллагааг өргөжүүлэн бэхжүүлэхэд чухал түлхэц болно гэдэгт итгэлтэй байгаагаа хоёр тал санал нэгтэй тэмдэглэв.

Мөн хөгжлийн хамтын ажиллагааны үр өгөөжийг нэмэгдүүлэх, хамрах хүрээг өргөжүүлэхээр хэлэлцэн тохиров. Канадын Засгийн газар Монгол Улсыг хөгжлийн албан ёсны тусламж үзүүлдэг орнуудынхаа жагсаалтад 2014 онд оруулсан бөгөөд эдүгээ уул уурхай, хөдөө аж ахуй, төрийн алба зэрэг салбарт зургаан төсөл амжилттай хэрэгжиж байна.

Уулзалтаар олон улсын болон бүс нутгийн харилцаа, хамтын ажиллагааны харилцан сонирхсон асуудлуудаар мэдээлэл солилцож, ардчилал, хүний эрх, эрх чөлөө, НҮБ-ын шинэчлэл, энхийг сахиулах үйл ажиллагаа зэрэг чиглэлээр үргэлжлүүлэн хамтран ажиллахаар тохиров.

Монгол, Канадын хамтын ажиллагаа “өргөн хүрээтэй түншлэл”-ийн хүрээнд амжилттай өргөжин тэлж, эдүгээ Канад нь манай улсын Хойд Америк дахь чухал түнш, гуравдагч хөрш, тэргүүлэх хөрөнгө оруулагч болсон билээ.

Монгол, Канадын Дугуй ширээний долдугаар уулзалт нь хоёр орны өргөн хүрээтэй түншлэлийн харилцааг дүгнэн, цаашдын хамтын ажиллагааны зорилтуудыг тодорхойлж, ажил хэрэгч, үр дүнтэй болж өндөрлөв.

УИХ-ын Хууль зүйн байнгын хорооноос өнөөдөр /2017.03.10./ Хууль зүй, дотоод хэргийн яам, Хууль зүйн үндэсний хүрээлэнтэй хамтран “Зөрчлийн тухай хуулийн шинэчилсэн найруулгын төслийн танилцуулга” сэдэвт хэлэлцүүлэг зохион байгууллаа.

Хууль зүйн үндэсний хүрээлэнд болсон тус хэлэлцүүлэгт хууль хэрэгжүүлэх, хууль сахиулах байгууллагын төлөөлөгчид оролцсон юм.

Хэлэлцүүлгийг УИХ-ын Хууль зүйн байнгын хорооны ахлах зөвлөх Б.Баасандорж хөтөлж явуулсан.

УИХ-ын гишүүн, Зөрчлийн тухай хуулийн ажлын хэсгийн ахлагч Х.Нямбаатар хэлэлцүүлгийг нээж, үг хэллээ.

Тэрбээр ярихдаа “Монгол Улсын эрхзүйн тогтолцоонд цоо шинэ Зөрчлийн тухай хуулийг 2017 оны долдугаар сарын 01-нээс дагаж мөрдөхөөр төлөвлөн ажиллаж байна. Зөрчлийн тухай хуульд 232 хууль дахь журмын эсрэг зөрчлүүдийг төрөлжүүлэн нэгтгэсэн. Та бүхнийг хэлэлцүүлэгт идэвхтэй оролцож, эрх зүйн шинэтгэлийг дэмжсэн, бүтээлч шинэлэг саналуудыг хэлэхийг хүсье” гэв.

Зөрчлийн тухай хуулийн шинэчилсэн найруулгын төслийг Хууль зүй, дотоод хэргийн дэд сайд Б.Энхбаяр танилцууллаа.

Танилцуулгадаа “Зөрчлийн тухай хуулийн төсөл олон жил яригдсан. Өнөөдрийн байдлаар Х.Нямбаатар гишүүний хэлснээр 232 хуулиар зөрчилд шийтгэл ногдуулж байгаа. Үүнийг тодорхой хэмжээнд системчилж, төрөлжүүлж, нэгтгэх зүй ёсны шаардлагатай. Ингэснээр хуулийг хэрэгжүүлж буй байгууллагуудын хувьд хийдэл гаргахгүй, шийтгэлийг тухай бүрт нь ногдуулах, иргэд ч хуулийг нэг мөр ойлгож, мэдээлэлтэй байх, ямар зүйлийг зөрчилд тооцох, ямар зөрчил гаргавал ямар шийтгэл хүлээх вэ гэдгийг нэг хуулиар дамжуулж нэгмөр ойлгох ач холбогдолтой болно” гэж дурьдав.

Дараа нь Улсын ерөнхий прокурорын газрын хяналтын прокурор, ажлын дэд хэсгийн гишүүн Г.Оюунболд “Зөрчлийн тухай хуулийн онолын үндэслэл-бусад орны туршлага” сэдвээр илтгэл тавилаа.

Төгсгөлд нь, Зөрчлийн тухай хуулийн шинэчилсэн найруулгын төсөлтэй холбогдуулан оролцогчид асуулт асуун, санал хэлсэн.

Хуульчдын холбооны бодлого, зохицуулалтын хэлтсийн дарга А.Оюунчимэг, Хууль зүйн доктор, профессор Д.Зүмбэрэлхам, Зам тээврийн яамны мэргэжилтэн А.Энхболд, Улсын ерөнхий прокурорын газрын хяналтын прокурор Б.Бат-Орших, Цагдаагийн ерөнхий газрын ахлах мэргэжилтэн, цагдаагийн хурандаа Б.Эрдэнэбилэг, Мөрдөн байцаах газрын Хулгайн хэлтсийн дарга, цагдаагийн хурандаа Х.Буянтүмэн нар асуулт асууж, санал хэлэв.

Асуултад ажлын хэсгийн ахлагч, УИХ-ын гишүүн Х.Нямбаатар болон ажлын дэд хэсгийн гишүүд хариулт өгч, санал солилцсон юм.

Хэлэлцүүлгийг хааж УИХ-ын гишүүн, Ажлын хэсгийн ахлагч Х.Нямбаатар “Та бүхний гаргасан чухал саналуудыг хуулийн төсөлд тусгана. Бичгээр санал өгөх нээлттэй. Өнөөдөр ирсэн хүмүүс Зөрчлийн хуулийг нийгмийн амьдралд нэг мөр хэрэгжүүлэхэд өөр өөрсдийн санаа бодлыг нэмэрлэх зорилго агуулсан гэж ойлгож байна. Анх удаагаа бид амьдралд зөрчилтэй холбоотой төрөлжсөн хууль хэрэглэх гэж байна. Амьдрал баян учраас хэрэгжих явцад алдаа, оноо гарахыг үгүйсгэх аргагүй, тухай бүрт засаж сайжруулах зорилга тавьж ажиллана. Зөрчлийг шалган, шийдвэрлэх субектүүд тухай бүрт зөрчлийг шийддэг байя гэсэн зарчим бид барьж байгаа” хэмээн хэллээ гэж УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Нийслэлийн иргэдийн амьдрах таатай нөхцөлийг бүрдүүлэх, нийслэлийн зам, тээврийн сүлжээг өргөтгөн хөгжүүлэх, эрэлтэд нийцсэн тээврийн үйлчилгээг үзүүлэх нөхцөлийг бүрдүүлэхэд Зам, тээврийн хөгжлийн яам Улаанбаатар хоттой хамтран ажиллахаар боллоо. Ирэх 4 жилд зам, тээврийн салбарт хамтран ажиллах тухай санамж бичигт Зам тээврийн хөгжлийн сайд Д.Ганбат, нийслэлийн Засаг дарга бөгөөд Улаанбаатар хотын Захирагч С.Батболд нар өнөөдөр гарын үсэг зурлаа.

Хоёр тал хамтран Улаанбаатар хотын хөгжлийн ерөнхий төлөвлөгөөтэй уялдуулан авто замын сүлжээг өргөтгөн хөгжүүлэх, түгжрэлийг бууруулах арга хэмжээнүүдийг хэрэгжүүлэн, авто зогсоолын тоо, багтаамжийг нэмэгдүүлэх, хотын ачаа тээврийн нэгдсэн логистикийг хөгжүүлэх, авто тээвэр, агаарын тээвэр, төмөр замын тээврийн үйлчилгээний нэгдсэн сүлжээг бий болгох замаар нийтийн тээврийн үйлчилгээний хүртээмжийг нэмэгдүүлэх, эрэлтэд нийцсэн, хүрээлэн буй орчинд ээлтэй тээврийн ухаалаг систем, тээврийн шинэ үйлчилгээ нэвтрүүлэх зэрэг олон ажил хийж хэрэгжүүлэхээр төлөвлөсөн байна.

Нийслэлийн Засаг дарга бөгөөд Улаанбаатар хотын Захирагч С.Батболд “Улаанбаатар хотын зам тээврийн салбарт бид томоохон зорилтуудыг тусгасан байгаа. Энэ онд багтааж шинэ нисэх онгоцны буудлаа хүлээн авах болно. Үүнийг нийслэлтэй холбосон тээвэр логистикийн сүлжээг бий болгох зайлшгүй шаардлагатай. Түүнчлэн нийслэлийн дундуур дайран өнгөрөх төмөр зам тулгамдсан асуудлын нэг болоод байгаа. Төмөр замыг нийслэлийг тойруулан гаргах ерөнхий төлөвлөгөөнд тусгагдсан зорилт бий. Эдгээр асуудал дээр хэрхэн хамтран ажиллах талаар санамж бичигт тусгагдсан байгаа. Үүнээс гадна агаарын бохирдлыг бууруулах тал дээр анхаарч нийтийн тээврийн үйлчилгээнд цахилгаан болон хий түлшийг хэрхэн нэврүүлэх тал дээр Зам тээврийн хөгжлийн яамтай бодлогын хүрээнд хамтран ажиллах зайлшгүй шаардлагатай” хэмээлээ.

Зам, тээврийн хөгжлийн сайд Д.Ганбат “Улаанбаатар хотын хөгжлийн ерөнхий төлөвлөгөөтэй уялдуулан зам, тээврийн салбарт дээрх чиглэлээр хамтран ажилласнаар нийслэлийн иргэдийн аюулгүй, тав тухтай зорчих нөхцлийг бүрдүүлж, тээврийн үйлчилгээг илүү хүртээмжтэй болгох боломж бүрдэх ач холбогдолтой. Хамтын ажиллагааны хүрээнд хэд хэдэн томоохон зорилтыг бид шийдэж ажиллана” гэдгийг онцолж байлаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.