Month: March 2017

“Эх орны цэрэг” яруу найргийн наадам өчигдөр 25 дахь удаагаа амжилттай зохион байгуулагдлаа.

Өнөө жилийн наадамд Монголын зохиолчдын эвлэлийн шагналт яруу найрагчдаас гадна ЗХЖШ, ҮБХИС, Зэвсэгт хүчний 17 ангийн цэрэг, хилийн цэргийн ахмад дайчин зэрэг 40 гаруй яруу найрагч эхний даваанд шүлгээ уралдуулав. Эх орон, эцэг дээдэс, энхийг сахиулагчид, эгэл цэргийг магтсан шүлгүүд дундаас Зэвсэгт хүчний 326 дугаар ангийн байлдагч Г.Ган-Эрдэнэ гурван давааг дараалан өнгөлсөөр Тэргүүн байрын шагнал хүртэж, үзэгч олноон ч, ангийн цэрэг дайчдаа ч шуугиулсан юм.
Наадмын Ерөнхий шүүгч Монгол улсын Ардын уран зохиолч Т.Галсан “Нэгэнтээ Б.Түвдэндорж аварга торгон ногоон дэвжээнээ ир бяраа гайхуулан тодорч байсан шиг энэ жил Зэвсэгт хүчний байлдагч найргийн томчуулыг магнайлан шалгарлаа…” гэж үнэлэв.

Наадмын дэд байрын шагналыг Монголын зохиолчдын эвлэлийн шагналт яруу найрагч М.Амархүү, гуравдугаар байрыг Монголын зохиолчдын эвлэлийн шагналт яруу найрагч, дэд хурандаа П.Батнайрамдал эзэлж өргөмжлөл хүртэв. Тусгай байрын шагналыг Хөвсгөл аймгийн Ханхаас ирсэн, эмэгтэй яруу найрагч Л.Туяа хүртсэн нь бас нэгэн шинэ өнгө донжийг бий болгов. Найргийн наадмыг МУСГЗ, яруу найрагч Б.Хүрэлбаатар, БХ-ын сайдын хэвлэлийн төлөөлөгч Б.Батцэцэг, МЗЭ-ийн шагналт яруу найрагч Д.Гүнтэвсүрэн, ЗХЖШ-ийн Цэрэг иргэний хэлтсийн дарга, хурандаа Б. Төмөрхуя нар шүүсэн. Ийнхүү цэрэг эх орны яруу найргийн наадам “Болор цом”-оос өвөрмөц, битүү шинэ найрагчид тодрон гарсан нь шударга шүүлттэй болсных гэж үзэгчид үнэлж байлаа.

Монголбанкны Ерөнхийлөгчийн 2016 оны аравдугаар сарын 25-ны өдрийн А295 тоот тушаалаар “Орон сууцны ипотекийн санхүүжилтийн журам”-ыг шинэчлэн баталсан. Энэ дагуу ипотекийн зээлийг ипотекийн зээлээр баталгаажсан бонд (ИЗББ)-ын үндсэн болон купоны төлбөрийн эргэн төлөлтийн орлогоор санхүүжүүлж байна.

Шинэ журам батлагдсанаас хойш 2017 оны хоёрдугаар сарын байдлаар Монголбанкнаас ипотекийн зээлийн санхүүжилтэд нийт 142.3 тэрбум төгрөгийг зарцуулж, 2042 иргэний ипотекийн 8 болон 5 хувийн зээлийг бүрэн шийдвэрлээд байна.

Үүнд:

2016.10-р сард – 35.7 тэрбум төгрөг – 481 зээлдэгч /8%/

2016.10-р сард – 10.92 тэрбум төгрөг – 169 зээлдэгч /5%/

2016.11-р сард – 24.6 тэрбум төгрөг – 373 зээлдэгч /8%/

2016.12-р сард – 23.8 тэрбум төгрөг – 268 зээлдэгч /8%/

2017.01-р сард – 23.6 тэрбум төгрөг – 365 зээлдэгч /8%/

2017.02-р сард 24.3 тэрбум төгрөг – 396 зээлдэгч /8%/ Монголбанкны санхүүжилтээр ипотекийн 5 болон 8 хувийн зээлд хамрагдаад байна.

Монгол Улсын Засгийн газар ОУВС-тай тохиролцсон “Өргөтгөсөн санхүүжилтийн хөтөлбөр”-ийг хүрээнд Монголбанк нь төсвийн шинжтэй үйл ажиллагааг санхүүжүүлэхгүй боловч ипотекийн 8 хувийн зээлийн хөтөлбөрийг 2018 онд багтаан Засгийн газарт шилжүүлнэ.

Монголбанк 2017 оныг дуустал ипотекийн зээлийг сар бүрийн үндсэн төлбөрийн эргэн төлөлтийн хүрээнд үргэлжлүүлнэ. Санхүүжилтийн бусад хэсгийг Монгол Улсын Засгийн газраас улсын төсөвт тусгах замаар шийдвэрлэнэ гэж Монгол банкнаас мэдээллээ.

Монгол Улсын энхийг сахиулагчид буюу цэнхэр дуулгатнууд Өмнөд Суданд үүрэг гүйцэтгэдэг. Тус улсад НҮБ-ын энхийг дэмжих ажиллагаанд оролцож, Монгол Улсын мотобуудлагын батальонд үүрэг гүйцэтгэж байгаа ахлагч Т.Буянзул, дэд ахлагч О.Цэнд-Аюуш нар хоёр настай хүүхдийг илрүүлэн, амийг нь аварчээ. Хүүгээ хайж байсан эцэг, эхэд хүүхдийг нь эсэн мэнд хүлээлгэн өгчээ.

НҮБ-ын цагдаагийн алба болон Дотоодын дүрвэгсдийн хуарангийн аюулгүй байдлыг сайн дураараа хангадаг Community Watch Group-ээс бага насны хүүхдийг гарч болзошгүй эрсдэлээс цаг алдалгүй аварсан Монгол дайчдад талархал илэрхийлсэн байна.

Хэрэглэгчийн эрхийг хамгаалах Олон Улсын өдрийг тохиолдуулан “ХЭРЭГЛЭГЧИЙН ЭРХИЙГ ДЭЭДЭЛЬЕ” өдөрлөг өнөөдөр 10:00-16:00 цагийн хороонд Сүхбаатар дүүргийн ЗДТГ-т болно. Өдөрлөгийн үеэр Сүхбаатар дүүргийн ЗДТГ-ын Хүнс, худалдаа, үйлчилгээний хэлтэс, дүүргийн Хэрэглэгчийн эрх ашгийг хамгаалах нийгэмлэг, Мэргэжлийн хяналтын хэлтсийн улсын байцаагчид болон холбогдох мэргэжилтнүүд иргэдийн гомдол саналыг хүлээн авч, түргэн шуурхай шийдвэрлэх, хүнсний аюулгүй байдлыг хэрхэн хангах, агаарын бохирдлыг бууруулахад аж ахуйн нэгж, иргэдийн оролцоог нэмэгдүүлэх, малын гоц халдварт өвчнөөс урьдчилан сэргийлэх, цахим худалдаан дахь хэрэглэгчийн эрхийн талаар хууль эрх зүйн болон мэргэжил арга зүйн зөвлөгөө өгч ажиллах юм байна.

Боловсролын үнэлгээний төвийнхөн элсэгчдээ бүртгээд сар гаруй хугацаа өнгөрч байна. Энэ жил ЭЕШ бүртгэл дөрөвдүгээр сарын 14-ны орой 18:00 цагт дуусна. Бүртгэлийг уламжлал ёсоор www.eec.mn цахим хаягаар бүртгэхээс гадна дэлгэрэнгүй мэдээллийг үнэлгээний төвийн мэргэжилтнүүдээс 75779498 дугаарын утсаар асууж болох юм байна шүү. Энэ жилийн шалгалтын хураамж шалгалт тус бүрд 5800 төгрөг. Батламж хуудас 700 төгрөг. Харин заавал өгөх монгол хэл бичгийн шалгалт нь бүртгүүлэгчдээс хураамж авахгүй юм байна.

О.ӨНӨР