Month: March 2017

Ахуйн гал түймрийн улмаас гэртэйгээ
шатаж амиа алдах явдал гарсаар байна. Тухайлбал, Говьсүмбэр аймагт зургаан настай Д, дөрвөн настай А нар гэртэйгээ шатаж амиа алдсан хэрэг гарчээ. Юунаас болж гал гарсныг цагдаагийнхан шалгаж байгаа аж.

Мөн Сүхбаатар дүүргийн 20-р
хороо “Хадатын … тоотод гал гарч хүн нас барсан байна” гэсэн
мэдээллийн дагуу шалгахад тус хороонд оршин суух 47 настай эрэгтэй Ш
гэртэйгээ шатаж нас барсан байна.

Гэртээ бага насны хүүхдүүдээ
харгалзах хүнгүйгээр орхиж явахгүй байх, ахуйн цахилгаан
хэрэгслийнхээ аюулгүй байдлыг хангаж байхыг цагдаагийн газраас анхааруулж
байна.

МУИС-ийн захирал Р.Бат-Эрдэнэ хүсэлт гаргаж, ажлаасаа
чөлөөлөгдсөн байна. Түүний оронд захирлын ажлыг түр орлон гүйцэтгэгчээр
Я.Төмөрбаатарыг томилжээ.

МАН Ардчилсан намтай хамтран Засгийн
газрыг барьж байх үед Я.Төмөрбаатар нь Боловсрол, соёл, шинжлэх ухааны
дэд сайдаар ажиллаж байсан. Тэрбээр Улсын багшийн дээд сургуулийг түүхийн багш, нийгмийн ажилтан мэргэжлээр төгсчээ. 1999-2007 онд “Кёкшюүзан хөгжил сан”-гийн
зөвлөх, дэд захирал, 2007-2008 онд МАН-ын Удирдах зөвлөлийн Хэрэг эрхлэх
газрын Хэвлэл мэдээлэл, олон нийттэй харилцах хэлтсийн дарга, 2008-2009
онд Монгол Улсын Ерөнхийлөгчийн зөвлөх, хэвлэлийн албаны дарга, 2009
оноос МАН-ын Ерөнхий нарийн бичгийн даргын зөвлөх, ахлах зөвлөх,
“Стратеги” академийн захирлаар ажиллаж байжээ.

МУИС-ийн захирлын албыг хуульд заасны дагуу сонгон шалгаруулалтаар тодруулж, томилох аж.

Нийслэлийн хэмжээнд зөрчилтэй барилгууд болон ухсан нүхний талаар Нийслэлийн мэргэлжийн хяналтын газраас мэдээлэл хийв. Шалгалтаар барилгын ажлыг эхлэх,
үргэлжлүүлэх зөвшөөрөлгүй, архитектур төлөвлөлтийн даалгавар аваагүй,
техникийн нөхцөлгүй, батлагдсан ажлын зураггүй, гүйцэтгэгч нь тодорхой
бус, суурийн нүх ухаад орхидог зэрэг нийтлэг зөрчлүүд илэрсэн байна.

Нийслэлийн хэмжээнд нийт зөрчилтэй 23
барилга бүртгэгдсэн бөгөөд үүнээс Баянзүрх дүүрэгт 5, Хан-Уул дүүрэгт 4,
Сонгинохайрхан дүүрэгт 2, Баянгол дүүрэгт 12 байгаа аж. Эдгээр барилга нь
“Барилгын тухай” хуулийн 40 дүгээр зүйлийг зөрчсөн, холбогдох бичиг
баримт иж бүрдэл дутуу, зураг төсөл нь баталгаажаагүй, барилга угсралтын
ажил эхлэх үргэлжүүлэх зөвшөөрөлгүй зэрэг зөрчилтэй байжээ. Улмаар
улсын байцаагчийн дүгнэлт үйлдэн зөвшөөрлийг цуцлуулах саналыг Барилга,
хот байгуулалтын яаманд хүргүүлсэн байна.

Өнөөдөр буюу гуравдугаар сарын 17-ны баасан
гарагт дараах байршил дахь хэрэглэгчдийг цахилгаанаар хангадаг шугам
тоноглолд урсгал засвар хийхээр болжээ.

Сүхбаатар дүүрэг

10:30-17:30 – 9, 11-р хороо Алтайн 10, Нуурын 7, Алтайн 23, 24, 25 Чингэлтэйн 14-17-р гудамж, эдгээрийн ойр орчмоор

Хан-Уул дүүрэг

10:30-18:00 –
9, 10-р хороо Нисэхийн гэр хороолол, орон сууцууд, 7-р сургууль, 49-р
цэцэрлэг, ЦТП, Гүнийн худаг, Амин тус өрхийн эмнэлэг, ХУД-ийн Тамгын
газар, Янгир хайрхан ХХК

Сонгино хайрхан дүүрэг

10:00-17:00 – 20-р хороо Барилгын цэргийн анги

11:00-12:00 – УСУГ-ын Төв цэвэрлэх байгууламж

11:00-18:00 –
20-р хороо Т-10, Т-46, 7-р хороо Монлааны 1, 2, 5, 6, 10, Колонкийн 1-3,
Горькийн 3, ЦА-ийн 13-р гудамж, эдгээрийн ойр орчмоор

“Mon CL fertility center” эмэгтэйчүүдийн нөхөн үржихүйн төв эмнэлэг саяхан нээлтээ хийсэн. Энэ нь Монголын гурав дахь үр шилжүүлэн суулгах төв юм.

Солонгос улсын сүүлийн үеийн тоног төхөөрөмжтэй, дэлхийн жишигт нийцсэн эмнэлэг ажээ. Тус үр шилжүүлэн суулгах төв нь үр шилжүүлэх бэлтгэл ажлаас эхлээд бяцхан үрээ өлгийдөн авах хүртэл бүх оношлогоо, шинжилгээ, эмчилгээг хийх юм.

“Mon CL fertility center” эх барих эмэгтэйчүүдийн үзлэг зөвөлгөөнөөс эхлээд хэт авиан оношлогоо, хөлдөөсөн үр хөврөл суулгах ажилбар, умайн хүзүүний нянгийн үрэвслийн шинжилгээ, умайн хүзүүний эсийн шинжилгээ гэх зэрэг бүх төрлийн үзлэг оношлогоо эмчилгээ үзүүлэх цогц төв юм. Тус эмнэлэг хоёрдугаар сарын1-нд ашиглалтад орсноос хойш үр шилжүүлэн суулгах ажилбараар буюу хуруу шилний аргаар нийтдээ 10 гаруй гэр бүл үрийн зулай үнэрлэжээ.

“Mon CL fertility center” эмэгтэйчүүдийн эмнэлгийн захирал доктор Бум Чай Чой ярихдаа “2010 оноос хойш маш олон монгол эмэгтэйг эмчилж үзлэгт хамруулсан байна. Өмнө нь маш олон гэр бүл Монголоос зорьж ирдэг байсан. Зургаан жилийн турш тасралтгүй энэ талын асуудалтай хүмүүс ирж ажилбар хийлгэсэн. Ийм учраас монголчуудад тулгамдаж буй асуудлын нэг нь үргүйдэл юм байна гэдгийг мэдэрсэн. Маш олон гэр бүл холын орныг зорьж, цаг хугацаа алдаж, санхүүгийн хувьд дарамт ихээр тулгардаг. Зургаан жилийн турш эх нялхасын төвтэй хамтран 300 орчим гэр бүлийг хүүхэдтэй болгосон. Цаашид хүүхэдтэй болох гэж байгаа гэр бүлүүдэд эх орондоо Солонгосын төвшинд ажилладаг эмнэлэгтэй болж, олон асуудлыг шийдэж өгч байгаадаа баяртай байна” гэлээ.

Эмчилгээний зардал нь 8-10 сая орчим төгрөг болох юм байна. Тус эмнэлгийн эмчилгээ 65 хувийн магадлалтай гэнэ шүү.

“Монголын хөрөнгийн бирж” ТӨХК-д бүртгэлтэй нээлттэй хувьцаат компанийн
жагсаалтаас долоон компанийг хассан байна. Тодруулбал, Симбол, “Баянтолгой”,
“Гантөмөрт”, “Завхан тээх”, “Монгол эсгий эсгий гутал”, “Оргил
Говь-Алтай”, “Улиастай тэгш” зэрэг компанийг хассан байна. Компанийн
тухай хуулийн 83.1 дүгээр заалт, “Монголын хөрөнгийн бирж” ТӨХК-ийн
компанийн дүрмийн 8.10.11-р заалт, “Үнэт цаасны бүртгэлийн журам”-ын
24.8 дугаар заалтыг тус тус үндэслэн хасалт хийжээ.