Month: February 2017

Аав, ээжүүдийн санаачилсан утааны эрсэг арга хэмжээ хүрээгээ тэлж, олны танил эрхмүүд нэгдэн хамтдаа утааг эсэргүүцэж буйгаа илэрхийлсээр байгаа билээ. Нийслэлийн иргэд хоёр ч удаа жагсаал зохион байгуулж, хүн бүрт хуулиар олгогдсон аюулгүй, эрүүл орчинд амьдрах эрхээ эдэлмээр байна хэмээн төр засгийн удирдлагуудад дуу хоолойгоо хүргэсэн. Тэгвэл “Никитон” хамтлагийн ахлагч Б.Батчулуун утааны эсрэг дуу зохиожээ. Хатлагийнхаа хөгжимчидтэй өөрийн зохиосон энэхүү дуугаа дуулсан бичлэгийг нь сонирхуулж байна.

Гуравдугаар төв эмнэлгийн амбулатори, оношилгооны тасгууд өнөөдрөөс эхлэн оройн 20 цаг хүртэл өдөр бүр хоёр ээлжээр ажиллаж эхэллээ. Эрүүл мэндийн сайдын 2017 оны нэгдүгээр сарын 31-ний А/48 тоот тушаалын дагуу тусламж үйлчилгээний ачааллыг тэнцвэржүүлэн хүлээгдэл чирэгдлийг багасгах зорилгоор ийнхүү хэрэгжүүлсэн байна. Тус эмнэлэг нь улсын хэмжээний зүрх, мэдрэлийн лавлагаа төв эмнэлгийн хариуцлагатай үүргийг гүйцэтгэн ажилладаг тул дээрх чиглэлийн үзлэг, оношлогооны хүлээгдэл, дараалал байнгын ачаалалтай байдаг юм. Тус эмнэлгийн Зөвлөх поликлиникийн 8-10 кабинет болон дуран, дүрс оношилгоо (рентген, хэвлийн ЭХО), лаборатори, зүрхний бичлэгийн тусламж үйлчилгээг 08:00 – 20:00 цагийн хооронд үзүүлж байгаа юм байна. Амбулаторид хоёр ээлжээр ажиллаж эхэлсэн эхний өдөр буюу хоёрдугаар сарын 01-ний 15:00 цагийн байдлаар 100 гаруй хүн үйлчлүүлэхээр ирсэн байсан юм.

Ерөнхий сайд асан Н.Алтанхуягийн ахлах зөвлөх Л.Гансүх шоронгоос Монгол Улсын Ерөнхийлөгч Ц.Элбэгдоржид хандан захидал илгээжээ. Түүнийг Засгийн газрын “Нүүрс” хөтөлбөрийг хэрэгжүүлэхдээ албан тушаалаа урвуулан ашиглаж, улсад 3.6 тэрбум төгрөгийн хохирол учруулсан хэмээн шүүхээс 3.6 жилийн ял оноосон билээ. Захидлыг дор бүрэн эхээр нь хүргэе.

Монгол Улсын Ерөнхийлөгч Ц.Элбэгдоржид:

Шинэчлэлийн Засгийн газрыг унагаах, Ерөнхий сайд Н.Алтанхуягийг огцруулахын тулд тус Засгийн газраас зохион байгуулсан гэр хорооллын иргэдийг хямд, шигшсэн нүүрсээр хангах ажлын зохицуулагчаар ажилласан надад зориудаар зохион байгуулсан хилс хэрэг үүсгэн хэлмэгдүүлснийг Монголын ард түмэн 5 өдрийн турш телевизээр харсан.

Таны захиалгаар, таны томилдог АТГ, прокурор, Шүүхийн тодорхой бүлэг хүмүүсийн хилс хэрэг зохион хэлмэгдүүлэн байж өгсөн ялыг чинь миний бие өнгөрсөн оны 11 сарын сүүлээр эдлээд дууссан.

Эрүүгийн хуулийн 74-р зүйлийг үндэслэн биеэр эдлэх ялын холбогдох хугацааг дуусгасан, өр төлбөргүй, хэрэг зөрчил ял эдлэх хугацаандаа гаргаагүй учраас хуулийн дагуу хорих ангиас Төв аймгийн прокурор руу 2016 оны 12-р сар, 2017 оны 1-р сард нийт 2 удаа материал явуулсан боловч прокурор миний материалыг шүүх рүү явуулалгүй тухай бүр хорих анги руу буцаан намайг үндэслэлгүй хорьж байна.

Статистик дурьдвал Төв аймгийн шүүхээс 2016 онд 185 хүнийг тэр дундаа миний хоригдож буй ангиас 41 хүнийг энэ хуулиар тэнсэн харгалзаж сулласан байна. Энэ ангид хоригдож байсан УИХ-ын гишүүн асан Ц.Батбаярыг энэ хуулиар хорих ангиас хүсэлт нь очиход прокурор дээр 1 хоногийн дотор шүүх дээр 5 хоногийн дотор шийдэн сулласан байдаг. Гэтэл хамгийн сүүлд 2017 оны 1 сард энэ хорих ангиас 7 хүн прокурор руу очиход 6-г нь цааш нь шүүх рүү явуулаад ганцхан намайг буцааж надад үндсэн хууль, эрүүгийн хуулиар олгогдсон эрхийг минь эдлүүлэхгүй 2 сар боллоо.

Хэрэг хийгээгүй байж танай хуулийн мафийн өгсөн ялыг эдэлж суухдаа өөрөө эрх чөлөөтэй болохдоо яарсан биш хорт хавдартай үлдсэн эхнэрээ хурдан гарч эмчлүүлж асарч сувилах юмсан гэж өдөр хоногийг тоолж суулаа. Үүний тулд шүүхээс оноосон Багануурын уурхайд учруулсан “хохирол” гэгч олон зуун сая төгрөгийг байраа барьцаалан зээл авах, найз нөхдөөсөө тусламж, хандив авах замаар төлж барагдуулсан. Мөн хоригдох хугацаандаа элдэв зөрчил гаргаагүй.

Таны хугацаа дуусахад хэдэн сар дутуу боловч нэг өдрийн өмнө ч гэсэн прокурор, хууль, хүчний байгууллагаас савраа татаж, эдний нэр хүндээр шал арчиж, хуулийг гууль болгохоо зогсоож миний үндсэн хууль, эрүүгийн хуулиар олгогдсон эрхийг эдлүүлэхийг хүсье.

Одоо хуулийн дагуу 3 дахь удаагаа прокурорт хорих ангиас миний тодорхойлолт очсон байгаа.

Цаашид ийм байдлаар намайг магадланд оруулахгүй үндэслэлгүйгээр хориод байвал өлсгөлөн зарлаж тэмцэхээ мэдэгдэж байна. Өөрөө шоронд юу ч хийж чадахгүй байж байгаад эхнэрээ алдсанд орвол энэ шударга бус зүйлсийг чинь засахын төлөө бидний амь хэрэгтэй юм бол ав гэж хэлье.

Замын цагдаагийн алба хаагчид гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодож явсан 20 жолоочийг илрүүлэн саатуулж гарч болзошгүй осол хэргээс урьдчилан сэргийлж ажилалаа.

2017 оны 2 дугаар сарын 01-ний өдөр Замын цагдаагийн албаны ЖШУХ дээр нийт 273 дуудлага, мэдээ мэдээлэл хүлээн авснаас зам тээврийн ослын 215 дуудлага бүртгэгдсэн. Үүнээс гэмт хэргийн шинжтэй гомдол мэдээлэл 5 бүртгэгдэж, 6 хүн хүнд хөнгөн гэмтсэн. Зам тээврийн осолд сургуулийн насны 1 хүүхэд өртсөн.

Тухайлбал: БГД-ийн нутаг Модны 2-н зүүн уулзварт амины T.Pruis маркийн автомашины жолооч М нь явгшан зорчигч 13 настай Х-г мөргөж гэмтээсэн.

Өнөөдөр нийслэлийн 22 агентлагт нарийн мэргэжлээр нээлттэй ажлын байр зарлаж, нийслэлийн үйлчилгээний нэгдсэн төвийн Дүнжингарав салбарт 09:00-17:00 цагийн хооронд өдөрлөг зохион байгуулахаар болжээ.

Ямар нэгэн нам эвслээс үл хамаарч төрд ажиллах хүсэлтэй залуусыг ажлын байраар хангах, тэдний мэдлэг чадварыг нийслэлийн хөгжилд нэмэрлэх зорилгоор дээрх өдөрлөгийг зохион байгуулж байгаа юм байна. Нийслэлийн Засаг даргын эрхлэх асуудлын хүрээнд 33 агентлаг, нийслэл, орон нутгийн өмчит 40 орчим аж ахуйн нэгж үйл ажиллагаагаа явуулж буй аж. Эдгээр байгууллагын үйл ажиллагааны үндсэн чиглэлийг дээрх өдөрлөгөөр танилцуулах юм.

Өнөөдөр Ардын журамт цэргийн бүх цэргийн жанжин, Цэргийн яамны сайд Д.Сүхбаатарын мэндэлсний 124 жилийн ой тохиож байна.

МАН, Aрдын засаг, Tөрийг үүсгэн байгуулагч Mонголын ард түмний гарамгай хүү Д.Сүхбаатар одоогоос 124 жилийн өмнө 1893 оны 2-р сарын 2-нд тэр үеийн Маймаа (одоогийн Амгалан) хотноо ядуу ард Дамдины гэрт төржээ.

1912 онд цэргийн албанд ирж, пулемёт сумангийн даргаар ажилласан.

1917 онд эх орныхоо төлөө дайнд оролцож баатар цолоор шагнагдав.

1921 оны Ардын хувьсгалын удирдагчдын нэг, оросын хувьсгалчидтай холбоо тогтооход онцгой үүрэг гүйцэтгэсэн.

1921.3.1-нд МАН-ын анхдугаар их хуралд төлөөлөгчөөр оролцжээ.

1921.7-р сард Цэргийн яамны сайд, Бүх Цэргийн жанжнаар томилогдсон.

1921.11-р сард ЗХУ-д очиж хоёр улсын хоорондох найрамдлын гэрээнд гарын үсэг зурж, Владимир Ильич Ленинтэй уулзав.

1923.2.20-нд 30 настайдаа хорлогдож таалал төгссөн.

МУИС оюутнуудаасаа улиралд 112 мянган төгрөг, жилд 224 мянган төгрөг, магистрт, докторын хөтөлбөрт хамрагдаж буй оюутнуудаасаа жилдээ 336 мянган төгрөгийн суурь хураамж авдаг. Тэгвэл өчигдөр БСШУСЯ-ны Боловсролын бодлогын газрын дарга Д.Эрдэнэчимэг, Хуулийн хэлтсийн дарга П.Чулуунбаатар нар суурь хураамжийг эсэргүүцэн тайван жагсаал хийсэн МУИС-ийн оюутны төлөөллийг хүлээн авч уулзсан байна.

БСШУСЯ-ны Боловсролын бодлогын газрын дарга Д.Эрдэнэчимэг “Өнөөдөр БСШУС-ын сайд оюутнуудын болон сургуулийн Багш нарын холбооны төлөөллийг хүлээн авч уулзлаа. Бид оюутнуудынхаа санал, хүсэлт, эрх ашигт хүндэтгэлтэй хандах ёстой. Тиймээс ч шаардлагыг нь хүлээн авч холбогдох арга хэмжээг хэрэгжүүлнэ.

Аудитын газраас суурь хураамжийг хуульд нийцэхгүй байна хэмээн дүгнэлт гаргаж, зөрчлийг арилгахыг сургуулийн удирдлага, Удирдах зөвлөлд хүргүүлсэн. МУИС-ийн суурь хураамж бол төлбөрийн бүрэлдэхүүн хэсэгт хамаардаг. Сургалтын төлбөрийг Удирдах зөвлөлийн хурлаар шийдвэрлэдэг. МУИС-ийн Удирдах зөвлөл нэгдүгээр сарын 31-нд хуралдаж, суурь хураамжийн асуудлаар ажлын хэсэг байгуулсан. Ажлын хэсэгт оюутан, багш нарын төлөөлөл багтсан. Асуудлыг хэлэлцэж, хамтдаа шийдвэрлэнэ” гэв.