Month: January 2017

БСШУС-ын сайдын тушаалын дагуу төрийн өмчит их сургуулиудын
Удирдах зөвлөлийг шинэчлэн байгуулж эхэллээ. Тодруулбал, энэ сарын 02-ны
өдөр МУИС, ШУТИС-ийн Удирдах зөвлөлийг шинэчлэн байгуулжээ.

2017 онд долоон объектыг дуудлага худалдаагаар худалдахаар болсон.
Тэгвэл эхний ээлжид Усан спорт сургалтын төв, Хан-уул дүүргийн
Захирагчийн албаны хоёр барилга, тус дүүргийн 14 дүгээр хорооны Өрхийн
эрүүл мэндийн төв зэрэг барилгуудыг энэ сарын 9-нд дуудлага худалдаагаар
худалдаалах гэж байна.

Нийслэлийн эрүүл мэндийн газрын хүүхэд, өсвөр үеийн асуудал хариуцсан мэргэжилтэн Б.Бадамхандад хандаж уушгины хатгалгаа өвчнөөс хэрхэн сэргийлэх талаар тодруулав. Ханиад томуу ихэссэн учраас НЭМГ-ынхан урьдчилан сэргийлэх зөвлөгөөг хүмүүст хүргэж байгаа юм.

-Б.Бадамханд эмч ярихдаа:

-Уушгины хатгалгаа хүүхэд бүрт өөрөөр илэрдэг. Гол шинж тэмдэг нь амьсгал олшрох, цээж хонхолзох, амьсгал саадтай болох шинжүүд ажиглагддаг. Эдгээр шинжүүд илэрвэл уушгины хатгалаа эхэлж байна гэсэн үг. Үүнээс гадна ханиалгана, халуурна, нус гоожно, хоолонд дургүй болно, амьсгаадна, цээж шуугих шинж илэрнэ.

Эрүүл хүүхдийн амьсгалын тоо минутанд:

0-2 сартай: 60 хүртэл

0-12 сартай 50 хүртэл

1-5 настай 40 хүртэл байдаг.

Үүнээс дээш тоогоор амьсгалж байвал амьсгал олширсон гэж үздэг. Хүүхдийг тайван байх үед амьсгалыг тоолох хэрэгтэй. Хүүхдийг уйлж байгаа үед эсвэл хөхүүлж байгаа үедээ тоолбол буруу гарна. Унтаж байгаа үед нь тоолж болно.

Уушгины хатгалгаа өвчнөөс сэргийлэхийн тулд вакцин хийнэ. Одоогоор Сүхбаатар, Сонгинохайрхан дүүрэгт хатгалгааны эсрэг вакциныг хийж эхэлсэн. Товлолын дагуу бусад вакцинуудыг цаг хугацаанд нь хийлгэх хэрэгтэй. Гэртээ чийгтэй цэвэрлэгээ хийж, хүүхдийн орчинд тамхи татахгүй байх учиртай. Утаа бага гаргадаг түлш сонгохыг хичээгээрэй. Агаар цэвэр үед цонхоо онгойлгож, агаар оруулах, эцэг эх өөрсдийнхөө болон хүүхдийнхээ гарыг сайтар угаах хэрэгтэй.

Бага насны хүүхдийг сайтар асарч, хооллох маш чухал. Зөв хооллох нь бүх төрлийн өвчнөөс урьдчилан сэргийлэхэд тустай. Зургаан сар хүрээгүй хүүхдийг хөхний сүүгээр хооллоно. Зургаагаас дээш сартай хүүхдэд нэмэлт хоол өгнө. Нэмэлт хоол нь шим тэжээлтэй, сүү цагаан идээ байх учиртай. Насанд нь тохирсон илчлэг, хэмжээтэй хоол өгөх хэрэгтэй. Энэ бүгд уушгины хатгалгаанаас урьдчилан сэргийлэхэд чухал нөлөөтэй. Эцэг эхчүүд хүүхдээ олон нийтийн газар авч явахгүй, дааруулахгүй байхыг анхаарна уу. Шингэн сайн уулгаарай. Өвдсөн үед хүүхдийг илүү сайн хооллож, халуун бүлээн шингэн уулгах учиртай. Аарц, аньс, чацарганы шүүс найруулж өгч болно гэв.

Дашрамд дурдахад өртөг өндөртэй вакцины тоонд ордог пневмококкийн эсрэг вакциныг эхний ээлжинд Сүхбаатар, Сонгинохайрхан дүүрэгт хийж эхэлсэн бөгөөд цаашид товлолын вакцинд үе шаттайгаар оруулах юм байна.

2016 оны арванхоёрдугаар сарын 26-ны өдөр утааны эсрэг ээж, аавууд нэгдэн Сүхбаатарын талбайд жагссан билээ. Улмаар жагсаалд оролцогчид өргөдөлд гарын үсэг зурж, УИХ-ын Өргөдлийн байнгын хороонд хүлээлгэн өгсөн юм. Гэвч одоо болтол өргөдлийн хариуг нь өгөөгүй гэнэ.

Түүнчлэн Засгийн газрын зүгээс энэ сарын 1-нээс эхлэн гэр хорооллийн нийт 146 мянган өрхийн цахилгааныг 21:00-06:00 цагийн хоорон тэглэхээр болсон. Гэвч айлуудыг өдөр, шөнийн тарифтай тоолуур 80.000 төгрөгөөр авах хэрэгтэй гэснээр энэ шийдвэр бүх айлуудад хүрч үйлчлэхгүй байгаа юм. Иймд, утааны эсрэг жагсаалыг зохион байгуулагчид энэ Бямба гарагт хоёр дахь жагсаалаа зохион байгуулахаар болжээ.

Дашрамд дурдахад, өмнөх жагсаалын үеэр УИХ-д хаягласан өргөдлийг нийт 2500 орчим хүн бөглөж, гарын үсгээ зуран баталгаажуулсан байна. Харин жагсаалыг зохион байгуулагчдын хэлж буйгаар ойролцоогоор 4000 орчим хүн жагсаалд оролцсон байна.

Засгийн газрын ээлжит хуралдаанаар нийтээр
тэмдэглэх баярын өдрийн холбогдох хуулийн заалтыг үндэслэн 2016 оны
арванхоёрдугаар сарын 30-ны баасан гаригийн ажлын өдрийг 2017 оны
нэгдүгээр сарын 7-ны бямба гаригийн амралтын өдөрт шилжүүлсэн.

Энэхүү шийдвэрийн дагуу энэ сарын 7-нд буюу ирэх бямба гарагт бүх нийтээр ажиллах юм.

НИТХ-ын тогтоолоор автомашины улсын
дугаарын хязгаарлалтыг амралтын өдрүүд болон нийтээр тэмдэглэх баярын
өдрүүдэд үйлчлэхгүй байхаар журамласан байдаг. Үүний дагуу өнгөрсан
арванхоёрдугаар сарын 30-нд автомашины дугаарын хязгаарлалт үйлчлээгүй.

Харин ирэх бямба гарагт 0,5 тоогоор төгссөн улсын дугаартай тээврийн хэрэгслүүд хөдөлгөөнд оролцохгүй юм.

“Номоо
солилцъё” өдөрлөг энэ сарын 7-ны өдрийн бямба гарагт Д.Сүхбаатарын
талбайд болох гэж байна. Тэрбээр уг аяныг Нийслэлийн Соёл Урлагийн
газар, Д.Нацагдоржийн нэрэмжит Улаанбаатар хотын нийтийн төв номын
сан хамтран зохион байгуулахаар болсон байна.

Өдөрлөгийн үеэр номын солилцоо, сурталчилгаа, номын худалдаа зэрэг арга хэмжээнүүд болох аж.