Month: January 2017

Дархан-Уул аймгийн Онцгой байдлын газрын Гал түймэр унтраах, аврах 22
дугаар ангийн ахлагч бүрэлдэхүүн үүрийн жингээс үдшийн бүрий хүртэл
амсхийх завгүй ажиллаж, хотынхоо өнгө үзэмжийн төлөө зүтгэж явдаг зам
талбайн үйлчлэгч нарт сэтгэлийн дэм өгч, халуун хоол, цайгаар дайллаа.

Албан хаагчид тус аймгийн Нийтийн аж ахуй, үйлчилгээний газрын зам
талбайн 43 үйлчлэгчийг “Өглөөний цай”-гаар дайлахын зэрэгцээ замын цас
цэвэрлэж иргэдэд учирч болзошгүй авто ослын болон олон төрлийн гэмтэл
бэртлээс урьдчилан сэргийлсэн нийгмийн сайн үйлсийн ажилд хувь нэмрээ
оруулав.

Тэдний энэхүү сайн санааны үйлсийг тус Онцгой байдлын газрын бэлтгэл
ахлах ахлагч Л.Мөнхнасан дэмжиж, дөрвөн үйлчлэгчид дулаан хувцас
бэлэглэсэн юм гэж Дархан-Уул аймгийн Онцгой байдлын газраас мэдээллээ.

“Агаарын бохирдол ба Улаанбаатарын утаа” сэдэвт хэлэлцүүлэг боллоо. Хэлэлцүүлгийн үеэр Нийгмийн эрүүл мэндийн хүрээлэнгийн дарга Б.Цогтбаатар судалгааны дүнг мэдээлэв.

Тус хүрээлэнгийн эрдэмтэд Канад улсаас 600 сая төгрөгийн хөрөнгө оруулалт босгож, агаарын бохирдол эрүүл мэндэд хэрхэн нөлөөлж байгаа тухай судалгаа хийсэн байна. Судалгаагаар “Уушгины хорт хавдрын 39 хувь нь агаарын бохирдолтой шууд холбоотой байна. Үүнээс гадна амьсгалын замын өвчлөлийн 28 хувь, цаг уурын хүчин зүйлээс үүдэлтэй амьсгалын замын өвчлөл 53 хувийг эзэлж байна. Харин ураг амьгүй болох тохиолдол ч эрс нэмэгджээ. Зуны улиралд 1000 ураг тутмын 23 нь энддэг бол өвлийн улиралд энэ тоо 70 болж өсдөг. Өөрөөр хэлбэл ураг амьгүй болох тохиолдол өвлийн улиралд 3,15 дахин их байна” гэлээ.

Түүнчлэн 2009 оны статистик тоо баримтыг загварчлаад 2011 онд олон улсад хэвлэгдсэн судалгааны үр дүнгээр Улаанбаатар хотын хүн амын нийт нас баралтын 9-13 хувь нь агаарын бохирдлоос үүдэж өвчин нь хүндэрсэн болох нь тогтоогджээ.

УИХ-ын гишүүн, Дэд бүтцийн сайд Зоригийн амийг хөнөөлгөсөн захиалагчийн хэргийг тусгаарлан шалгаж эхэлсэн хэмээн Улсын Ерөнхий прокурорын газрын Хэвлэл, мэдээлэл, олон нийттэй харилцах ажил хариуцсан хяналтын прокурор Ц.Өлзийжаргал өчигдөр мэдээлсэн билээ.

Тэрбээр “Ц.Амгаланбаатар нарыг С.Зоригийн амь насыг хөнөөсөн гэж буруутган шалгаж эхлэх тэр үед тэдэнд хэн захиалга өгсөн бэ гэдгийг давхар шалгаж байсан. Хэргийн захиалагч хэн байв гэдэгт ч нотлох баримтууд ч цуглаж байгаа. Гэхдээ Ц.Амгаланбаатар нарын С.Зоригийг хөнөөс үйлдлийг хэргийн захиалагчаас нь тусгаарлан шалгах шаардлага тулгарсан. Энэ дагуу л 18 жилийн өмнө гарсан хүн амины хэргийг цагдаа, прокурор, тагнуулынхан хамтран шалгасаар байна” гэлээ.

С.Зоригийн амь насыг бүрэлгэсэн хэрэг гарснаас хуулийн байгууллагаас хойш удтал шалгалт явуулсаны эцэст хэргийн шүүх хурал өнгөрсөн сард болсон.

Хорих 461-р ангид таван өдөр хаалттай горимоор үргэлжилсэн шүүх хуралдаанаар Орхон аймгийн харьяат гурван иргэнийг гэм буруутай гэж үзэн ялын дээд хэмжээг оноосон.

Харин яллагдагчдын ар гэрийнхэн шүүхийн шийдвэртэй санал нийлэхгүй байгаагаа шүүх хурлын дараа мэдэгдэж, давж заалдахаа илэрхийлсэн юм. Яллагдагч Б.Содномдаржаагийн ар гэрийнхэн энэ сарын 7-ны өдөр буюу бямба гаригт 12 цагаас Эрдэнэт хотын Соёлын төвийн урд талбайд тайван жагсаал хийж, “С.Зоригийн хэрэг”-ийн шинэ баримтыг дэлгэнэ гэв.

“Ардын их хурал” хөдөлгөөнөөс
мэдээлэл хийлээ. Мэдээллийн эхэнд ЦЕГ болон ТЕГ иргэдийнхээ эрх чөлөөг
хангаж ажиллах, Үндсэн хуульд заасан чиг үүргээ сахин ажиллахгүй байгааг
тэд онцолсон юм.

Тус хөдөлгөөн нь өнгөрсөн оны есдүгээр сард байгуулагдсан бөгөөд хөдөлгөөний зохицуулагч Б.Батсүх болон хотын Ерөнхий менежер асан С.Бадрал нарын 200 гаруй гишүүнтэй юм байна. Энэ үеэр “Ардын их хурал” хөдөлгөөний зохицуулагч Б.Батсүхээс зарим асуултад хариулт авлаа.

-Та сая “Ард түмний сонорт” гэх
ухуулах хуудсыг хотын гудамжинд наасан талаараа ярилаа. Ямар утгатай
ухуулах хуудас байсан юм бэ?

-Улс оронд үүсээд буй нийгэм, эдийн
засгийн хямрал нь одоогийн төрийн тогтолцооноос үүдэлтэй гэж бидний
хэсэг залуус санал нэгдсэн. Цаашид уг хямралыг давах шийдэл нь
олигархуудын биш, ард түмэн засаглаж, эрхээ эдлэх “Ардын их хуралтай” байх юм гэдэг утга бүхий ухуулах хуудас юм.
Бид энэ ухуулах хуудсаа өнгөрсөн оны арванхоёрдугаар сарын 5-ны өдөр
Улаанбаатар хотын гудамжаар наасан. Ухуулах хуудсаа наах явцад бидний
зарим нөхдийг ТЕГ-ын ажилтнууд барьж, хорьсон.

-Ямар үндэслэлээр барьж хорьсон юм бэ?

-Манай хүмүүсийг “Энэ үйл ажиллагаа чинь
таван жилийн хорих ялтай” гэж айлган сүрдүүлж, ганцаарчлан тусгай
өрөөнд оруулж байцаасан байсан. Мөн бичиг баримтыг нь ухуулах
хуудаснуудтай нь хураан авч, гар утсан дахь мэдээллийг нь шалгасан.
Мөн энэ үйл явдлыг мэдээлсэн хэвлэл мэдээллийн байгууллагуудыг
дарамталсан. Ингээд арванхоёрдугаар сарын 6-ны өдөр ТЕГ болон Эрүүгийн
Цагдаагийн газраас шалтгаангүйгээр биднийг дуудсан.

-Та бүхэн Эрүүгийн Цагдаагийн газарт очсон уу?

–Очсон. Биднийг “Хийж байгаа үйлдлээ зогсоо” гэж шаардсан. Уг
нь Монгол Улсын бүх иргэн Үндсэн хуульд зааснаар “Үзэл бодлоо чөлөөтэй
илэрхийлэх, хэвлэн нийтлэх, үгээ хэлэх” эрхтэй шүү дээ. Тийм болохоор
бид ЦЕГ болон ТЕГ-ыг иргэдийнхээ эрх чөлөөг хангаж ажиллах, Үндсэн
хуульд заасан чиг үүргээ сахин ажиллахыг мэдэгдэж, барьж дуудаж
байцаасан, айлган сүрдүүлсэн хариуцлагагүй үйлдлүүдээ нэн даруй зогсоохыг шаардаж байгаа юм.

-Танай хөдөлгөөнийнхөн цаашид ямар ажлууд хийхээр төлөвлөж байна вэ?

-Бидний цаашдын зорилго бол олигархуудыг халж, ард түмэн засаглаа эрхээ эдлэх “Ардын их хуралтай” болох юм.

Сүхбаатар дүүрэг дэх цагдаагийн
хоёрдугаар хэлтсийн алба хаагчид олон удаагийн үйлдлээр “Приус”
автомашины толь хулгайлсан Д гэгч, тээврийн хэрэгсэл ашиглаж автомашин
болон машины эд анги хулгайлдаг А нарыг үйлдэл дээр нь илрүүлэн шалгаж
эхэлжээ. Гэмт этгээдүүд нь автомашины толь, толины хавтас, бүтээлэг,
“приус” автомашины баттерей зэргийг хулгайлж бусдад хямд үнээр зарж
борлуулдаг байсан нь тогтоогдсон байна.

Тус цагдаагийн хэлтсээс энэ төрлийн
болон бусад гэмт хэргээс урьдчилан сэргийлэх чиглэлээр иргэдтэй хамтран
ажиллаж байна. Тухайлбал, Орон сууцны СӨХ-той хамтран хяналтын эргүүл
ажиллуулж эхэлжээ. Сүхбаатар дүүргийн 11 дүгээр хорооны нутаг дэвсгэрт
байрладаг “Хангай” хотхоны СӨХ-ны хяналтын эргүүл С.Шижирбат “Бид
Сүхбаатар дүүрэг дэх цагдаагийн хоёрдугаар хэлтэстэй хамтарч, оршин
суугчдын автомашин, түүний эд зүйл хулгайд алдагдах гэмт хэргээс
урьдчилан сэргийлэн эргүүлийн үүрэг гүйцэтгэн ажиллаж байна. Гэмт
хэргийн шинжтэй үйлдэл гарахад цаг алдалгүй цагдаад мэдэгддэг. Хяналтын
эргүүл ажиллаж эхэлсэнд иргэд таатай хандаж байгаа” гэж ярилаа.

Мөн Сүхбаатар дүүрэг дэх цагдаагийн
хоёрдугаар хэлтсийн хамаардаг нутаг дэвсгэрт хэв журмын урамшуулалт
эргүүл ажиллаж байгаа юм.

Иргэдийг автомашинаа гэрэлтүүлэггүй
газар орхихгүй байх, ил зогсоол, дулаан гараажид тавих, дохиоллын систем
суулгах зэргээр эд зүйлээ хамгаалах, цагдаагийн байгууллагатай хамтарч
ажиллахыг цагдаагийн байгууллагаас анхааруулж байна.