Month: January 2017

МУИС-ийн оюутнууд өнөөдөр 13:00 цагт сургуулийнхаа гадаа тайван жагсаал хийж эсэргүүцлээ илэрхийлэхээр болжээ. Тус сургууль оюутан бүрээс суурь хураамж хэмээн 224 мянган төгрөгийг авдаг аж. Гэвч оюутнууд суурь хураамжийг ямар ч үндэслэлгүйгээр хураан авч байна хэмээн үзэж, үүнийг эсэргүүцэж байгаа юм байна.

Оюутнуудаас авч буй 224 мянган төгрөгийг сурч боловсрох таатай орчныг бүрдүүлэхэд зарцуулагдах ёстой. Гэтэл зориулалтын бусаар ашиглаж байна хэмээн үзжээ.

Өнгөрсөн амралтын өдрүүдэд баруун, төв, говь, зүүн аймгуудын зарим нутгаар цаг агаар эрс хүйтэрч, цас орж, цасан шуурга шуурсан. “Цасанд суусан, сураггүй болсон” гэх дуудлагаар Онцгой байдлын албаныхан ажиллажээ.

Ховд аймгийн Булган сумын Алаг толгой багийн “Дашваанжил” гэдэг газар Булган голын мөсөн дээгүүр зорчиж явсан долоон зорчигчтой суудлын автомашин мөсөнд саатжээ. Сэлэнгэ аймгийн Сүхбаатар сумын Буурхээр багийн “Гахайн байр” гэдэг газар хоёр зорчигчтой суудлын автомашин, мөн аймгийн Мандал сумын Баянсуудал багийн “Бэрх” гэдэг газар зургаан зорчигчтой суудлын автомашин, Завхан аймгийн Тэс сумын Баян-Уул багийн “Цэцэн” гэдэг газар зургаан зорчигчтой суудлын автомашин, мөн аймгийн Тосонцэнгэл сумын Оргих багийн “Гол-Эхний хясааны шил” гэдэг газар гурван зорчигчтой суудлын автомашин, Сүхбаатар аймгийн Эрдэнэцагаан сумын Хадын булаг багийн “Долоон даваа” гэдэг газар хоёр зорчигчтой суудлын автомашин тус тус цасанд саатсан байна. Хэнтий аймгийн Мөрөн сумын Хэрмийн дэрс гэдэг газар иргэн Б (40 настай, эрэгтэй) малдаа яваад сураггүй болсон гэсэн дуудлагууд ирж Онцгой байдлын албан хаагчид ажиллалаа.

Мөн Говьсүмбэр аймгийн Сүмбэр сумын Малх багийн Мухар гэдэг газар иргэн Ө (40 настай, эрэгтэй) малдаа гарч яваад сураггүй болсон тухай дуудлага тус аймгийн Онцгой байдлын газарт ирж, дуудлагын дагуу дөрвөн албан хаагч, нэг автомашинтай, орон нутгийн гурван иргэн, нэг автомашинтайгаар эрэн хайх ажиллагааг зохион байгуулах явцад иргэн Ө өөрөө гэртээ ирсэн тул эрлийн ажиллагааг зогсоосон байна.

Хэнтий аймгийн Баянхутаг сумын Цантын хоолой багийн Сайрын худаг гэдэг газар иргэн С (49 настай, эмэгтэй) малдаа яваад сураггүй болсон тухай дуудлага аймгийн Онцгой байдлын газарт ирж, долоон албан хаагч, нэг автомашинтай, орон нутгийн 14 иргэн, гурван автомашинтай, нийт 21 хүн, 4 автомашинтайгаар эрэн хайх ажиллагааг зохион байгуулжээ. Эрлийн дүнд иргэнийг тус багийн Цант гэдэг газраас эсэн мэнд олсон байна.

Дорнод аймгийн Матад сумын Ялалт багийн Ямаатай салаа гэдэг газар иргэн Г (28 настай, эрэгтэй) малдаа яваад сураггүй болсон тухай дуудлага аймгийн Онцгой байдлын газарт ирснээр эрэн хайх ажиллагаа зохион байгуулахад гэрээсээ баруун урд зүгт 50 км газарт иргэн Б-ийнд эсэн мэнд байхад нь олсон байна.

Дархан-Уул аймгийн Хонгор сумын II багийн Нумтын даваа гэдэг газар иргэн Д-ийн эзэмшлийн нэг зорчигч бүхий суудлын автомашин цасанд суусан тухай дуудлагаар тус аймгийн Онцгой байдлын газрын албан хаагчид ажиллаж, автомашиныг цаснаас татан гаргасан байна.

Төв аймгийн Мөнгөнморьт сумын Майдлаг багийн Хөшийн-Ам гэдэг газар иргэн Г-ийн эзэмшлийн хоёр зорчигч бүхий бага оврын ачааны автомашин цасанд суусан тухай дуудлагаар Багануур дүүргийн Онцгой байдлын хэлтсийн таван албан хаагч, нэг автомашинтай ажиллаж автомашиныг цаснаас татан гаргасан байна. Гэвч автомашин нь явах боломжгүй болсон тул газар дээр нь орхиж хоёр иргэнийг аюулгүй газарт хүргэж өгчээ.

Хэнтий аймгийн Цэнхэрмандал сумын Хужиган багийн Могой мод гэдэг газар иргэн Н-н эзэмшлийн улсын дугаартай, дөрвөн зорчигч бүхий суудлын автомашин цасанд суусан тухай дуудлагаар нийслэлийн Налайх дүүргийн Онцгой байдлын хэлтсийн найман албан хаагч, нэг автомашинтай ажиллаж дөрвөн иргэнийг аюулгүй газарт хүргэж автомашиныг цаснаас татан гаргасан байна.

Ийнхүү найман аймгийн 11 сумын нутагт, нийт 42 хүний амь нас, эрүүл мэндийг авран хамгаалахад Онцгой байдлын байгууллагын 46 албан хаагч, 10 автомашинтай, орон нутгийн 39 иргэн, 9 автомашинтай ажиллалаа гэж Онцгой байдлын ерөнхий газраас мэдээллээ.

Сүхбаатар дүүргийн Иргэдийн Төлөөлөгчдийн Хурлын Ажлын алба, Авлигатай тэмцэх газартай хамтран хувийн ашиг сонирхлын болон хөрөнгө, орлогын мэдүүлэг гаргагч нарт зориулсан сургалтыг 2017 оны 1 дүгээр сарын 27-ны өдөр дүүргийн хурлын их танхимд зохион байгууллаа.

Сургалтаар Авлигын эсрэг хууль, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөсурьдчилан сэргийлэх тухай хууль тогтоомжийг хэрэгжүүлэх тухай, Хувийн ашиг сонирхлын болон хөрөнгө, орлогын мэдүүлгийг хэрхэн бөглөх талаар мэдээлэл өгсөн юм.

Сургалтыг Авлигатай тэмцэх газрын Хяналт шалгалт, дүн шинжилгээний хэлтсийн ажилтан н.Баасандэлгэр удирдан явуулсан ба сургалтад Сүхбаатар дүүргийн Иргэдийн Төлөөлөгчдийн Хурлын дарга Э.Ганбат, төлөөлөгчид, тэргүүлэгчдийн нарийн бичгийн дарга Д.Азжаргал, Ажлын албаны хэлтсийн дарга нар болон хороодын Засаг дарга нар хамрагдсан юм.

Мэдүүлэг гаргагч та 2016 оны ХАСХОМ-ээ 2017 оны 2 дугаар сарын 15-ны дотор хугацаанд нь мэдүүлээрэй гэж Сүхбаатар дүүргийн ИТХ-ын ажлын албанаас мэдээллээ.

Хөрш орнуудтай байгуулсан Засгийн газар хоорондын хэлэлцээр, түүнд оруулсан өөрчлөлтийг дипломат шугамаар тохиролцсоны дагуу Хятадын уламжлалт цагаан сарын баяр тохиолдуулан 2017 оны нэгдүгээр сарын 27, 28, 29-ний өдрүүдэд Монгол-Хятадын хилийн авто замын боомтууд амарсан. Харин Олон улсын галт тэрэг болон нисэх онгоцны үйлчилгээ хэвийн явагдаж байгаа бөгөөд өнөөдрөөс эхлэн автозамын боомтууд нээгдэн хэвийн ажиллаж эхэллээ.