Month: January 2017

Монголбанкны захиалгаар Үл хөдлөх хөрөнгийн Тэнхлэг зууч компанийн хараат бусаар хийсэн “Орон сууцны үнийн индекс”-ийн (ОСҮИ) судалгааны 2016 оны арванхоёрдугаар сарын үр дүнг олон нийтэд танилцууллаа. Энэхүү судалгаанд тухайн сард зах зээлд нийлүүлэгдсэн шинэ, хуучин 5,047 орон сууцны үнийг хамруулсан байна. Тухайн сард зах зээлд нийлүүлэгдсэн шинэ орон сууцны үнэ өссөн ч, хуучин орон сууцны үнэ (түүврийн дийлэнх хэсэг нь хуучин орон сууц) бага зэрэг буурсан нь орон сууцны үнийн индекс буурахад нөлөөлжээ.

2013 оны нэгдүгээр сараас эхлэн орон сууцны үнийн индексийг тооцсон бөгөөд орон сууцны үнийн жилийн өсөлт 2014 оны 3 дугаар сард хамгийн өндөр буюу 23.7%-тай гарсан байна.

2014 оны 12 дугаар сараас орон сууцны үнэ (өмнөх оны мөн үетэй харьцуулахад) буурч эхэлсэн бөгөөд орон сууцны үнийн бууралт үргэлжилсэн хэвээр байна.

Харин 2016 оны 6 дугаар сараас орон сууцны үнийн индексийн бууралтын хурд саарч 2016 оны 12 дугаар сарын байдлаар -4.3%-д хүрээд байна.

Шинэ орон сууцны 1м.кв дундаж үнэ нь 2016 оны 12 дугаар сарын байдлаар 2,050,000 төгрөг болж өмнөх сараас 0.55 хувиар, өнгөрсөн оны мөн үеэс 0.02 хувиар тус тус буурсан байна.

Тухайлбал Баянзүрх дүүргийн “Аман хуур” хотхонд 2015 оны арванхоёрдугаар сард 1 м2 дундаж үнэ 1,880,000 төгрөг байсан бол 2016 оны арванхоёрдугаар сарын байдлаар 1,711,000 төгрөг болж, өмнөх оны мөн үеэс 9.0 хувиар буурсан байна.

Сүхбаатар дүүрэгт шинэ орон сууцны 1м.кв-ийн дундаж үнэ хамгийн өндөр байгаа бол Сонгино хайрхан дүүрэгт хамгийн бага байна.

-Иргэдийн хувьд 2 өрөө байр худалдан авах боломж нь 3-4 өрөө байр худалдан авах боломжоос харьцангуй их байна.

Тус судалгаагаар өнгөрсөн арванхоёрдугаар сард Орон сууцны үнийн ерөнхий индекс 0.93 хувьтай гарлаа. Энэ нь өмнөх сараас 0.11 хувиар өссөн үр дүн юм. Ерөнхий индексийг өнгөрсөн оны мөн үетэй буюу 2015 оны 12-р сарын үр дүнтэй харьцуулахад 4,32 хувиар буурсан байна. Харин үнийн индексийн үзүүлэлтийг шинэ орон сууц, хуучин орон сууцаар ангилж үзвэл:

Шинэ орон сууцны үнийн индекс 15.51 хувьтай гарсан. Энэ нь өмнөх сараас 0,17 хувиар буурсан байна. Харин өнгөрсөн оны мөн үетэй харьцуулбал 2,98 хувиар буурсан хэвээр байна.

Хуучин орон сууцны үнийн индекс -7,74 хувьтай гарсан. Энэ нь өмнөх сараас 0.38 хувиар өсч, өнгөрсөн оны мөн үеэс 6,37 хувиар буурсан үзүүлэлт юм.

ОСҮИ-ийг Хедоник регрессийн аргаар тооцоолсон бөгөөд энэхүү тооцоололд тухайн сард Улаанбаатар хотод борлуулагдахаар зах зээлд нийлүүлэгдсэн шинэ, хуучин нийт 5047 орон сууцны мэдээллийг хамрууллаа.

• 2016/12 сарын орон сууцны үнийн индекс

Ховд, Говь-Алтай аймгийн нутагт тархан нутагшдаг Монгол бөхөн мялзан өвчний улмаас олноороо үхэж, сэг зэмийг устгах ажил үргэлжилж байна. Монгол бөхөн малын мялзан өвчнөөр үрэгдэж буй анхны тохиолдол энэ аж. Өмнө нь 2001 оны зудаар өвс тэжээлгүйгээс үрэгдэж, бөхийн тоо толгой 750 хүртлээ буурсан гэдгийг Дэлхийн байгаль хамгаалах сангийн Монгол дахь Хөтөлбөрийн газрын мэргэжилтэн Н.Энхбаяр хэлж байна. Орон нутгийн иргэд, байгаль хамгаалагчдын мэдээллээр бог малын мялзан өвчнөөс болж хорогдсон бөхөнгийн тоо өнөөдрийн байдлаар мянга давжээ. Ховд аймгийн Дарви суманд хамгийн олон бөхөн хорогдсон байна.

Засгийн газрын 2011 оны тогтоолоор ан амьтны экологи, эдийн засгийн үнэлгээг тогтоож бөхөнгийн эрийг 2 сая, эмийг 2.2 сая төгрөгөөр үнэлсэн байдаг. Энэ үнэлгээгээр тооцож үзвэл Монголын байгаль, экологид тэрбум гаруй төгрөгийн хохирол учраад байгаа юм.

Улсын гуравдугаар төв эмнэлэгт төсвийн хөрөнгө оруулалтаар зүрхний электрофизиологийн оношилгоо, эмчилгээний иж бүрэн тоног төхөөрөмжийг суурилуулснаар Монгол Улсын эрүүл мэндийн салбарт анх удаа зүрхний хэм алдагдлын аблаци эмчилгээг шинээр нэвтрүүлсэн билээ.

Уг эмчилгээ нь нарийн мэргэшсэн ур чадвар шаардсан өртөг, зардал өндөртэй эмчилгээний тоонд ордог бөгөөд эмчилгээний зардал нь Азийн орнуудад 8,000-30,000 ам доллар, Америк, Европын орнуудад 20,000-50,000 ам долларыг зөвхөн аблаци эмчилгээнд зарцуулдаг байна. Дээрх эмчилгээг эх орондоо нутагшуулснаар зүрхний хэм алдагдлын аблаци эмчилгээ хийлгэхээр гадаад руу явах урсгалыг сааруулна гэж мэргэжилтнүүд найдаж байна. Зүрхний хэм алдагдалтай иргэд эх орондоо эмчлүүлэх боломжтой боллоо. Зүрхний хэм алдагдалтын эмчилгээ хийлгэсэн иргэний эмчилгээний дундаж зардал манайд 12-14 сая төгрөг болж буй бөгөөд үүний 70 орчим хувийг иргэний Эрүүл мэндийн даатгалаас хөнгөлж, иргэн өөрөө дунджаар 2-4 сая төгрөгийн төлбөр төлж байна.

УГТЭ нь 2016 онд нийт 36 хүнд зүрхний хэм алдагдлын аблаци эмчилгээг хийж, амбулатороор хэм алдагдалтай 1076 хүнд тусламж үйлчилгээ үзүүлсэн байна.

Өчигдөр хар тамхины хэрэгт холбогдсон Тээврийн прокурорын газрын хяналтын прокурор асан Х.Тамир, Тагнуулын ерөнхий газрын Мөрдөн байцаах хэлтэст ажиллаж байсан Б.Амарбаясгалан нарын таван хүнд холбогдох хэргийг Эрүүгийн хэргийн анхан шатны шүүхээр хэлэлцжээ. Шүүгчдэгчид “мөс” хэмээн нэрлэгддэг мансууруулах бодис худалдан авч байгаад үйлдэл дээрээ баригдсан юм.

Шүүхийн шийдвэрээр Н.Сүхбаатарт 6.5 жилийн хорих ял, Х.Тамир болон хамсаатан Б.Амарбаясгалан, Н.Мөнхбат, Д.Жавхлан нарт тус бүр таван жилийн хорих ял оноосон байна.

Өнгөрсөн даваа гаригт “Централ таур”-т гадаадын иргэн тэсрэх бөмбөг тавьсан хэмээн сүрдүүлсэн хэрэг гарсан билээ. Тэгвэл тус хэргийг АНУ-ын иргэн 52 настай Майкл гэх эр хийжээ. Тэрээр тус барилгын 15 дугаар давхарт байрладаг Дани улсын Өргөмжит консул, М-Си-Эс группийн Ж.Одтой уулзах хүсэлт тавиад боломжгүй гэсэн хариу сонссон тул бөмбөг тавина гэж сүрдүүлсэн нь Тагнуулын байгууллагын шалгалтаар тогтоогдсон байна. Тухайн үед орчуулагч бөгөөд зочин угтагч анх цагдаагийханд дээрх мэдээлэл буруу өгснөөр үл ойлголцол үүссэн аж.

Цагдаа тагнуулынхны шалгалтаар “Централ таур”-ээс ямар ч тэсрэх бодис олдоогүй бөгөөд АНУ-ын иргэнд Терроризмтой тэмцэх тухай хууль зөрчсөн гэх үндэслэлээр захиргааны арга хэмжээ авч явуулжээ. Дээрх хуулийг зөрчсөн этгээдэд эрүүгийн хариуцлага хүлээлгэхгүй бол 30-50 мянган төгрөгөөр торгох шийтгэл шүүх гаргах заалт хуулинд байдаг байна.