УИХ-ын чуулганы хуралдаанаар Олон улсын гэрээний тухай хуулийг хүчингүй болсонд тооцох тухай хуулийн төслийг хэлэлцэж, хууль санаачлагчид нь буцаасан.
Энэ талаар УИХ-ын гишүүн Ж.Батзандан Төрийн ордонд мэдээлэл хийлээ.
Ж.Батзандан гишүүн ярихдаа “Засгийн газар Олон улсын гэрээний тухай хуулийг өөрчлөх замаар УИХ-аар хэлэлцдэг байсан асуудлын жагсаалтаас олон улсын гэрээны асуудлыг гаргах гэж байсан. Үүний цаана стратегийн орд, Монголын үндэсний баялаг, газрын хэвлийн баялгийг хэдхэн гэр бүл авах гэсэн санаархал явж байна гэж бид хардаж байна. Хэрэв энэ хууль батлагдсан бол Тавантолгойг Хятадын аж ахуй нэгжид маш бага үнээр зарж мэдэх юм. Цаашид ийм луйвар хийх гэж оролдвол 3 сая хувьцаа эзэмшигч, Тавантолгой компанийн ажилчид эсэргүүцэн тэмцэх болно. Ардчилсан намаас сонгогдсон гишүүд намын даргын сунгаанд анхаарал хандуулсаныг далимдуулж Тавантолгойг луйвардах санаархлаа зогсоохыг МАН-ын нөхдүүдээс шаардаж байна. Олон улсын гэрээний тухай хуулийг баталж байгаад олон луйвар хийсэн. Одоо Тавантолгойг луйвардах гэж байж мэдэх юм” гэж тэрбээр мэдэгдлээ.
Ж.Батзандан гишүүн мөн “1993 онд батлагдсан Олон улсын гэрээний тухай хуулийн 11.1, 11.2 дугаар заалтад тусгасан Олон улсын гэрээг соёрхон батлах саналыг Гадаад харилцааны асуудал эрхэлсэн гишүүн Засгийн газарт өргөн мэдүүлж шийдвэрлүүлдэг. Засгийн газар дэмжсэний дараа саналаа УИХ-д оруулдаг ёстой. Энэ заалтыг хасах гэж оролдсон. Гэхдээ манай Засгийн газрынхан гэнэн юм. Энэ заалтыг хассан ч Үндсэн хуулийн 25, 38 дугаар заалтууд хэвээр байгаа. Үндсэн хуулийг зөрчих замаар хулгай луйвар хийх бололцоогүй гэж тэр хүмүүст сануулмаар байна. Ард түмний төлөөллөөс нууж хулгай луйвар хийх сонирхол Засгийн газарт байгаа. Тиймээс Үндсэн хуульд нийцсэн хуулийг батлуулах хэрэгтэй гэж Засгийн газарт сануулмаар байна” гэж онцолсон.
Олон улсын хэмжээний мастер, боксчин О.Батхүү улсын аварга шалгаруулах тэмцээний үеэр зодон тайлжээ. Улмаар дасгалжуулагчийн албанд шилжиж байгаа аж. Тэрээр 2001-2006 онд Үндэсний шигшээ багийн тамирчин байсан бөгөөд насанд хүрэгчдийн улсын аварга шалгаруулах тэмцээний 2 алт, 4 мөнгө, 1 хүрэл медальтай юм байна. 2006-2014 оны хооронд АНУ-д ажиллаж амьдарч байгаад эх орондоо ирж, 10 жилийн дараа дэвжээндээ эргэн гарсан байна. Түүний амжилтуудаас дурдвал, 2001 Чехийн Гран при хүрэл медаль, 2003 Куба CORDOVA CARDIN олон улсын тэмцээний хүрэл, 2004 Химийн цом ОУ-ын тэмцээний хүрэл, 2004 Афин-2004 Олимпийн эрхийн тэмцээн хүрэл, 2005 Вьетнамын Ази тивийн аварга шалгаруулах тэмцээний мөнгөн медаль, 2005 Чехийн Гранпри ОУ-ын тэмцээний хүрэл, 2005 Хойд Солонгос Пхеняьян цом ОУ-ын тэмцээн хүрэл медальтай юм байна.
Ховд аймгийн Дарви, Чандмань, Говь-Алтай аймгийн Тонхил, Халиун, Шарга, Дарви, Төгрөг, Хөхморьт, Баян-Уул сумын нутагт бөхөнгийн сүрэг олноороо үхэж хорогдож байна. УМЭАЦТЛ-ийн шинжилгээгээр бог малын мялзан өвчин болох нь тогтоогдсон тул аймаг, орон нутгийн мэргэжлийн байгууллага, иргэд, малчдад доорх сэрэмжлүүлгийг хүргэж байна. 
Агаарын бохирдлыг бууруулах үндэсний хөтөлбөр боловсруулах ажлын хэсэг өнөөдөр БОАЖЯ-нд хуралдлаа. 
Сангийн сайд Б.Чойжилсүрэн харьяа байгууллагуудынхаа ажилтай танилцаж байгаа гэнэ. Өчигдөр тэрбээр Татварын ерөнхий газар, Гаалийн ерөнхий газрын ажилтай танилцаж, удирдлагуудтай нь уулзсан байна. Татварын болон Гаалийн байгууллагуудын удирдлагууд өнгөрсөн жилд хийж хэрэгжүүлсэн ажлууд, Улсын төсвийн бүрдүүлэлт, гүйцэтгэл, өнөөгийн ажлын явц, 2017 оны ажлын төлөвлөгөө зэргийг Сангийн сайдад дэлгэрэнгүй танилцуулжээ. Түүнчлэн байгууллагуудынхаа нөхцөл байдал, хүндрэлтэй тал, тулгамдаад буй асуудлуудыг ч мөн хөндөж ярьсан байна. 
Энэ сарын 15-нд баруун ба төвийн аймгуудын нутгаар, 16-17-нд ихэнх нутгаар ялангуяа 16-нд Алтай, Хангайн уулархаг нутгаар цас ахиухан орж, салхи секундэд 12-14 метр хүрч ихэнх нутгаар цасан шуурга шуурч зам даваа цас шуурганд хаагдах, харагдац муудах, халтиргаа гулгаа нэмэгдэх цаг агаарын нөхцөл бүрдэх төлөвтэй байна.
Италийн алдарт зохиолч Нобелийн шагналт Дарио Фогийн “Чөлөөт хос” мюзикл инээдмийн жүжиг дахин тавигдах нь. Жүжгийг Урлагийн гавьяат зүтгэлтэн Ч.Найдандорж найруулжээ. Гол дүрд Ц.Баясгалан, Э.Тодгэрэл, Г.Дөлгөөн-Аюуш нар тоглох юм байна. Уг жүжиг энэ сарын 27, 28-нд хоёрхон удаа тоглогдох аж. Жүжигт Антония бүсгүй нөхрийнхөө эх захгүй янаг амрагийн явдлаас залхан амиа хорлохыг завдана. Харин өөрийн чөлөөт амьдралыг илүүд үзсэн нөхөр нь түүнийг элдвээр тайтгаруулж ядаад эцэстээ “Чөлөөт хос”-ын амьдралыг санал болгоно.
Үндсэн хууль батлагдсаны 25 жилийн ойд зориулсан архивын баримтын үзэсгэлэнгийн нээлт өнөөдөр Төрийн ордон дахь Төрийн түүхийн музейн үзэсгэлэнгийн танхимд боллоо. Нээлтийн ёслолд УИХ-ын дэд дарга Ц.Нямдорж, БНМАУ-ын Ардын Их Хурлын дарга асан Ж.Гомбожав, Ардын Их Хурлын депутатууд, Улсын Бага Хурлын гишүүд, Үндсэн хуулийн 25 жилийн ойг тэмдэглэн өнгөрүүлэх комиссын гишүүд оролцов. 
Монгол Улсын төр, нийгмийн нэрт зүтгэлтэн, Монгол Улсын хөдөлмөрийн баатар, Ардын багш, Гавьяат хуульч, доктор, профессор Бираагийн Чимидийн нэрэмжит шагнал гардуулах ёслол өнөөдөр Төрийн ёслол хүндэтгэлийн их танхимд боллоо.
Энэхүү шагналыг уламжлал болгон олгож байх шийдвэр гарсан нь утга учиртай. Үндсэн хуулийг боловсруулах, хэлэлцэх, батлах, хэрэгжүүлэх үйлсэд хичээнгүйлэн зүтгэж, улс орныхоо хөгжил дэвшил, ард түмнийхээ эрх чөлөөг баталгаажуулах, хууль, шударга ёсны нийтлэг зарчмыг бэхжүүлэх үйл хэрэгт оруулсан Бяраагийн Чимид агсны гавьяа зүтгэл, хөдөлмөр бүтээлийг мөнхжүүлэх зорилготой юм.
Б.Чимидийн нэрэмжит шагналд нэр дэвшүүлсэн таван бүтээл Улсын Их Хурлын Тамгын газарт ирсэн бөгөөд шалгаруулалтыг хоёр үе шаттайгаар явуулан, Улсын Их Хурлын даргын зөвлөлийн хурлаар хэлэлцэн ялагчийг тодруулсан.
Дараа нь Б.Чимидийн нэрэмжит Улсын Их Хурлын шагнал хүртсэн доктор, профессор Д.Баярсайхан талархлын үг хэлсэн. Тэрбээр, “Улсын Их Хурлын дарга, гишүүд, хамтран зүтгэгчид, шавь нартаа шинэ Үндсэн хууль батлагдсаны 25 жилийн ойн баярын мэнд хүргэе. Энэ сайхан өдөр Б.Чимид багшийн нэрэмжит хүндтэй шагналыг авсандаа баяртай байна. Би Б.Чимид багштайгаа 1982 оноос хойш олон судалгаанд дээр хамтран ажиллаж байсан. 1998 онд хууль зүйн шинжлэх ухааны докторын зэрэг хамгаалсан бүтээлийн минь удирдагч багшаар ажиллаж байсан билээ.
Дараа нь ёслолын үйл ажиллагаанд оролцогчид дурсгалын зураг татуулсан юм.