“Өдрийн сонин”-ы пүрэв гаригийн дугаар хэвлэгдэн, захиалагчдадаа хүрлээ. Энэ өдрийн дугаарт гарсан нийтлэл, сурвалжлага, ярилцлага, мэдээ мэдээллээс онцолж, тоймлон хүргэж байна.
Нэгдүгээр нүүрт “Хурган дотортой үйтэн хуаран дээл нэг сая таван зуун мянгын үнэтэй” дээлний захаас хийсэн сурвалжлага нийтлэгдлээ. Удахгүй сар шинэ болох гэж байгаатай холбогдуулан хүмүүст хамгийн их эрэлттэй байгаа монгол дээлний үнэ ханш хаана ямар үнэтэй худалдаалагдаж байгааг энэхүү сурвалжлагаас уншаарай.
Мөн энэ дугаарт хачирхалтай нэгэн мэдээлэл багтлаа. Учир нь монголын баячуудын алтан бурхныг солонгосын зартай хулгайч хулгайлан каргогоор хил дамнуулан худалдаж байсан гэвэл та итгэх үү. Тэр гэмт хэрэгтэн улсын бүртгэлд гадаадын иргэний хурууны хээ бүртгэлгүй байдгийг ашиглаад зогсохгүй манай цагдаа нарыг тохуурхан хурууны хээгээ хэргийн газар үлдээдэг байсан гэнэ шүү. Энэ талаар дэлгэрэнгүй мэдээллийг манай сонины эрэн сурвалжлах албаны ноотой, ноцтой мэдээнүүд дэлгэгддэг “Баримт, үйл явдал”-ын 7-р нүүрнээс уншаарай.
Өдрийн сонины нийтлэлийн бодлогыг тодорхойлж, нийгмийн тусгал толь болж байдаг алдартай нүүр бол гуравдугаар нүүр юм. Энэ удаагийн гуравдугаар нүүрийг нэрт нийтлэлч Б.Цэнддоогийн “Солонгос садаа” нийтлэл чимжээ. Тэрбээр энэхүү нийтлэлдээ Солонгосын олон ангит сериалын талаар болон монголчуудад нөлөөлж байгаа нөлөөллийн талаар егөөтэй, сургамжтай талаас нь бичжээ. Та энэхүү нийтлэлийг уншаад огтхон ч уйдахгүй гэдэгт итгэлтэй байна.
Энэ долоо хоногийн гол сэдэв бол яах аргагүй хямдхан архинд хордож нас барсан таван хүний хэрэг билээ. Тэгвэл энэ хэрэгтэй холбогдуулан гурван хоног архи, согтууруулах ундааг худалдахыг хориглосон шийдвэр гарсан. Аливаа юманд сөрөг зүйл заавал байдгийн үлгэрээр цаана чинь “шаг”-ийн архи, пиво энд тэндгүй зарагдаж эхэлжээ. Энэ талаарх сурвалжлагыг өнөөдрийн дугаараас дэлгэрүүлэн унших боломжтой юм.
Алдарт аварга найдвар алддаггүй Найдангийн Түвшинбаяртай хийсэн ярилцлага ч энэ дугаарт багтжээ. Тэрбээр уржигдархан болоод өнгөрсөн жүдо бөхийн УАШТ-ний +100 кг-н төрөлд анх удаагаа аваргалж ард түмнээ дахин баярлуулсан билээ. Энэ талаар болон түүний ирээдүйн зорилгын талаар түүнтэй цөөн хором ярилцсаныг өнөөдрийн дугаараас хүлээн авч үзээрэй.
Мөн удахгүй тоглолтоо хийх гэж байгаа МУГЖ Лосолын Болдбаатартэй хийсэн “Уран бүтээлийн хамгийн үнэнч шүүгч нь түмэн олон байдаг” ярилцлагыг сонирхон уншаарай. Тэрбээр удахгүй хийх тоглолтоо “Хун цагаан хайр” гэж нэрлэжээ.
Аян замын тэмдэглэл буланд Болор цомын эзэн Норовын Гантулгын бичсэн “Эзэн хааны халуун голомт дэлүүн болдогийн зулай дээрээс…” тэмдэглэл нийтлэгдлээ. Тэрбээр шинэ оны эхэнд нарны авшиг ерөөл авна гэж Дэлүүн болдогоо зориод иржээ. Түүний бичсэн аялгуут шүлэг шигээ тансагаар урлан хүүрнэсэн аян замын тэмдэглэлээс очоогүй ч гэсэн дэргэд нь очсон юм шиг сайхан мэдрэмжийг авнаа гэдэгт найдаж байна.
Эдгээр болон бусад мэдээллүүдийн дэлгэрэнгүйг уншихыг хүсвэл дараах линкээр бүртгүүлнэ үү. https://admin.dnn.mn/plugins/news/login/
Эдгээр болон бусад цаг үеийн мэдээ мэдээлэл, ярилцлагуудыг “Өдрийн сонин”-ы пүрэв гаригийн дугаараас уншаарай.
Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудан, “Улаанбаатар”, “Скай” шуудангийн салбаруудаас очиж авч болох ба сонин борлуулах бүхий л цэгүүд, Хэвлэлийн биржээс худалдан авах боломжтой юм. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдах авч болохыг дуулгая. “Өдрийн сонин”-ы өөрийн байранд ирж худалдан авч бас болно.
“Өдрийн сонин”-той холбоотой бүхий л мэдээллийг Мэдээлэх эрхийн утас 19001987-гоос лавлаж болох ба захиалга өгөхийг хүсвэл 9911-2954, 8811-1375 дугаарт холбогдоно уу. Хэрэв цахим хэлбэрээр нь захиалахыг хүсвэл 88071920 дугаарт холбогдож дэлгэрэнгүй мэдээллийг лавлаарай.
“ӨДРИЙН СОНИН” ӨГЛӨӨ БҮХЭН ТАНТАЙ ХАМТ
Шинжлэх ухаан, технологийн сангийн Шинжлэх ухааны паркын менежментийн хэлтсийг “Шинжлэх ухааны паркын захиргаа” болгов. Захиргаа нь инноваци, өндөр технологийн үйлдвэрлэлийг хөгжүүлэх, шинжлэх ухааны парк байгуулах ажлыг удирдан зохион байгуулах үүрэг хүлээж байна.
Монгол Улсын Засгийн газраас “Алт-2” үндэсний хөтөлбөр хэрэгжүүлэх тогтоол батлахаар болов. Хөтөлбөрийн хэрэгжилтийг улсын хэмжээнд зохион байгуулах үүрэг бүхий Ажлын албыг Уул уурхай, хүнд үйлдвэрийн сайдаар ахлуулан байгуулах юм.
ЦЕГ-аас 2016 оны гэмт хэргийн нөхцөл байдлын талаар өнөөдөр мэдээлэл хийлээ. Өнгөрсөн онд иргэд авто зам дээр амь насаа алдсан хэрэг 13.8 хувь, гэмтэж, эрүүл мэндээрээ хохирсон хэрэг 9.8 хувиар тус тус буурсан үзүүлэлт гарчээ. Сар шинийн баярын өдрүүд дөхөж байгаатай холбогдуулан онцгойлон арга хэмжээ авч байгаа талаар Замын цагдаагийн албаны олон нийттэй харилцах хэлтсийн дарга, хурандаа Э.Бөхбат мэдээллэв. 
Архангай аймгийн Цэцэрлэг хотод “Тамирын жавар” Заяын хүрээний наадмыг энэ сарын 21-нд зохион байгуулах гэж байна.
УИХ-ын Аюулгүй байдал, гадаад бодлогын байнгын хорооны өнөөдрийн хуралдаанаар “Төрийн ордны барилгын өнөөгийн төлөв байдлын дүгнэлт, чанар, аюулгүй байдлын шаардлагыг хангах зарим арга хэмжээний талаар” Монгол Улсын сайд, Засгийн газрын Хэрэг эрхлэх газрын дарга Ж.Мөнхбатын мэдээллийг сонсов.
Ажлын хэсэг Төрийн ордонд байрладаг байгууллагуудын аюулгүй байдлыг хангах, цаашид шилжүүлэн байрлуулах талаар санал боловсруулах ажлын хүрээнд Төрийн ордны барилгын өнөөгийн төлөв байдалд мэргэжлийн байгууллагаар оношлогоо, судалгаа хийлгүүлэх болон холбогдох тооцоо, судалгаа хийлгэсний зэрэгцээ төрийн дээд байгууллагуудыг түр байрлуулах боломжит байрыг сонгох, шилжүүлэх асуудлыг судалж, санал боловсруулсан байна. Төрийн ордны барилгын өнөөгийн төлөв байдлыг тогтоосон чанар, аюулгүй байдлын дүгнэлтийг Шинжлэх ухаан технологийн их сургуулийн Барилга, архитектурын сургуулийн багш, доктор Я.Дүйнхэржав, З.Биндэръяа зэрэг барилгын хийц, бүтээцийн чиглэлээр нарийн мэргэшсэн эрдэмтэд, холбогдох байгууллагын 13 мэргэжлийн хүнээс бүрдсэн дэд ажлын хэсэг 4 сарын турш Төрийн ордны барилгад нарийвчилсан үзлэг, шалгалтын ажлыг гүйцэтгэсний үндсэн дээр боловсруулжээ. Энэ талаар Шинжлэх ухаан технологийн их сургуулийн багш, доктор Я.Дүйнхэржав танилцуулга хийсэн юм.
Сайдын мэдээлэлтэй холбогдуулан Улсын Их Хурлын гишүүн О.Баасанхүү, Б.Энх-Амгалан, Г.Занданшатар нар асуулт асууж тодруулан саналаа хэлсэн юм. Мөн байнгын хорооны дарга Ж.Энхбаяр хэлэлцэж байгаа асуудалтай холбогдуулан Байнгын хорооноос тогтоол гаргаж Засгийн газарт чиглэл өгөх нь зүйтэй гэж үзэж буйгаа дурдаад Байнгын хорооны тогтоолын төслийг гишүүдэд танилцуулж санал хураалгахад хуралдаанд оролцсон 13 гишүүний 10 нь буюу 76.9 хувь нь тогтоолын төслийг батлахыг дэмжлээ.
Хараагүй иргэдэд зориулсан анхны орон сууц ирэх сард ашиглалтад орно. Баянгол дүүргийн Засаг дарга С.Одонтуяа хараагүй иргэдэд зориулсан барилгын ажилтай танилцлаа. Барилгын гүйцэтгэлийн ажил 90 хувьтай яваа бөгөөд Цагаан сарын өмнө ашиглалтад орох юм байна. БГД-ийн Засаг дарга С.Одонтуяа “Манай татвар төлөгчдийн мөнгөөр нийслэлд 90 айлын орон сууц барьж байгуулсанд бид баяртай байна. Хамгийн гол нь хараагүй иргэд тав тухтай амьдрах нөхцөл бүрдэж байгаа юм” гэлээ.
Нэгдүгээр сарын 28-ны хагас сайн өдөр 12.00 цагаас Сүхбаатарын талбайд утааны эсрэг “Боож үхлээ” жагсаал болох юм. Жагсаалд байгууллага, компаниудыг нийгмийн хариуцлагын хүрээнд хамт олноо зохион байгуулан олноор оролцохыг “Утааны эсрэг ээж аавууд” ТББ-аас уриаллаа.