Month: January 2017

УИХ-ын Байгаль орчин, хүнс, хөдөө аж ахуйн байнгын хорооны өнөөдрийн хуралдаан 09 цаг 30 минутад гишүүдийн 63.2 хувийн ирцтэйгээр эхэллээ. Хуралдааны эхэнд Засгийн газраас 2016 оны 12 дугаар сарын 28-ны өдөр Улсын Их Хуралд өргөн мэдүүлсэн “Мал, амьтны эрүүл мэндийн тухай” төслийн үзэл баримтлалыг хэлэлцэх эсэхийг хэлэлцсэн юм.

Хууль санаачлагчийн илтгэлийг Хүнс, хөдөө аж ахуй, хөнгөн үйлдвэрийн сайд П.Сэргэлэн танилцуулав.

Засгийн газрын 2016-2020 оны үйл ажиллагааны хөтөлбөр”, Улсын Их Хурлын 2015 оны 104 дугаар тогтоолоор баталсан “Төрөөс хүнс, хөдөө аж ахуйн талаар баримтлах бодлого”, Улсын Их Хурлын 2016 оны 19 дүгээр тогтоолоор баталсан “Монгол Улсын тогтвортой хөгжлийн үзэл баримтлал-2030” хэрэгжилтийг хангах зорилгоор Мал, амьтны эрүүл мэндийн тухай болон холбогдох бусад хуулийн төслийг боловсрууллаа. Энэхүү хуулийн төслийн үзэл баримтлал нь мал, амьтны эрүүл мэндийг хамгаалах зорилт, төрөөс баримтлах зарчмыг шинээр тодорхойлсны зэрэгцээ хуулийн үйлчлэх хүрээг өргөжүүлж мал эмнэлгийн байгууллагын үйл ажиллагааг нийтийн эрүүл мэндийг хамгаалах, мал, амьтны гаралтай бүтээгдэхүүний аюулгүй байдлыг хангах, олон улсын худалдаанд үүсч байгаа хориг саадыг арилгахад чиглэсэн гэдгийг салбарын сайд онцолсон юм.

Мал, амьтны эрүүл мэндийн тухай хуулийн төсөл нь 7 бүлэг, 36 зүйлтэй ажээ. Хуулийн төслийн зорилгыг Монгол Улсын нутаг дэвсгэрт мал, амьтны эрүүл мэндийг хамгаалах, мал, амьтны гаралтай түүхий эд, бүтээгдэхүүний ариун цэвэр, эрүүл ахуйн шаардлагыг хангах, нийтийн эрүүл мэндийг хамгаалах, худалдааны чөлөөт байдлыг дэмжихтэй холбогдон үүсэх харилцааг зохицуулна гэж тодорхойлжээ.

Тус хуулийн төслийг мал эмнэлгийн салбарын эрдэмтэд, томилогдсон ажлын хэсэг боловсруулж салбарын эрдэмтэд, холбогдох байгууллагын төлөөлөл, мэргэжилтнүүдийг оролцуулан дөрвөн удаа хэлэлцүүлж, яамны цахим хуудсанд байршуулж олон нийтийн саналыг авч тусгасан байна.

Энэхүү хуулийг баталснаар Монгол Улсын Засгийн газар Дэлхийн мал, амьтны эрүүл мэндийн байгууллага, Дэлхийн худалдааны байгууллага болон бусад олон улсын гэрээгээр хүлээсэн үүргээ биелүүлж, мал, амьтны болон нийтийн эрүүл мэндийг хамгаалах бодлого, чиглэл, стратеги, үйл ажиллагааг тодорхойлсон эрх зүйн таатай орчин бүрдэнэ гэж хууль санаачлагчид үзжээ.

Түүнчлэн мал эмнэлгийн байгууллагын мэргэжлийн босоо удирдлагын тогтолцоог бий болгон, захиргааны, мэргэжлийн, санхүүгийн удирдлагын уялдаа холбоог сайжруулах замаар мал, амьтны халдварт өвчний дэгдэлтээс эрт сэрэмжлүүлэх, хариу арга хэмжээг шуурхай хэрэгжүүлэх бэлэн байдлын чадавхи сайжрах болно. Мөн мал, сүргийнхээ эрүүл мэндийн байдлыг хянан баталгаажуулж, эрүүл тайван байдлаа хадгалах, хөрш зэргэлдээ орнуудаас тавьсан түр хоригийг цуцлуулах, мал аж ахуйн гаралтай түүхий эд, бүтээгдэхүүний чөлөөт худалдаа хийх нөхцөл бүрдэнэ гэж Хүнс, хөдөө аж ахуй, хөнгөн үйлдвэрийн сайд П.Сэргэлэн танилцуулгадаа онцолсон юм.

Хуулийн төсөлтэй холбогдуулж УИХ-ын гишүүн Х.Баделхан, Д.Тэрибшдагва, Л.Элдэв-Очир, Г.Мөнхцэцэг, А.Сүхбат, Ц.Гарамжав, Б.Саранчимэг, Г.Тэмүүлэн нар асуулт асууж, санал хэлж, байр сууриа илэрхийллээ. Гишүүдийн олонхи нь мал, амьтны эрүүл мэндийн тухай хуулийн төсөлд гэрийн тэжээвэр амьтан, зэрлэг амьтан багтаж байгаа эсэх, малын гоц халдварт өвчнөөс урьдчилан сэргийлэх вакцины чанар хүртээмжийн асуудал хэр хүрэлцээтэй байгаа, малын туулга угаалгын зардлыг хуульд хэрхэн тусгасан талаар илүүтэй сонирхож байв.

Хүнс, хөдөө аж ахуй, хөнгөн үйлдвэрийн сайд П.Сэргэлэн, Энэхүү хуулийн төсөлд мал, амьтан гэдэгт гэрийн тэжээвэр болон зэрлэг амьтдын эрүүл мэндийг асуудлыг багтааж, асуудлыг өргөн хүрээнд хамруулсан. Мал эмнэлгийн байгууллагын мэргэжлийн босоо удирдлагын тогтолцоог бий болгож сум, багт мэргэжлийн хүмүүсийг ажиллуулсанаар мал эмнэлэгийн үйл ажиллагаанд хяналт, хариуцлагыг сайжруулна гэж үзэж байгаа. Вакцины асуудал хүндрэлтэй байгаа. Бид олон улсын итгэмжлэгдсэн лабораторийн давхар давхар хяналт дор вакциныг шинжлүүлсэн. Харин хуулийн төсөлд малын гоц халдварт өвчин дэгдсэн зайлшгүй нөхцөл байдлыг үед төсвөөс хөрөнгө гаргаж ажиллахаар тусгагдсан. Тиймээс бусад үед малчид малдаа угаалга, туулга хийхэд өөрсдөөсөө хөрөнгө гаргахаар хуульд тусгагдсан гэж хариулж байлаа.

Ингээд Мал, амьтны эрүүл мэндийн тухай хуулийн төслийг УИХ-ын чуулганы нэгдсэн хуралдаанаар нь хэлэлцэхийг дэмжье гэсэн саналын томьёоллоор санал хураахад хуралдаанд оролцсон гишүүд 100 хувь дэмжив. Байнгын хорооны санал, дүгнэлтийг Улсын Их Хурлын чуулганы нэгдсэн хуралдаанд УИХ-ын гишүүн Х.Баделхан танилцуулахаар болов.

Цагдаагийн албаны тухай хуулийн шинэчилсэн найруулгын төслийн талаар Цагдаагийн ерөнхий газрын Хуулийн хэлтсийн ахлах мэргэжилтэн, цагдаагийн дэд хурандаа Б.Цэнгэлбаяртай ярилцлаа.

---

-Цагдаагийн албаны тухай хууль 2013 онд батлагдан хэрэгжиж эхэлсэн. Гэтэл яагаад шинэчлэн найруулж батлах болов гэдэгт тайлбар өгнө үү?

-Ер нь 1992 оны Үндсэн хуулийг дагаж 1993 онд Цагдаагийн байгууллагын тухай хууль анх батлагдан, 1994 оноос хүчин төгөлдөр хэрэгжиж эхэлсэн. Энэ хууль хүчин төгөлдөр мөрдөгдөх 20 жилийн хугацаандаа цагдаагийн байгууллагын үйл ажиллагаа, хэм хэмжээнд маш сайн үйлчилсэн гэж судлаачид болон цагдаагийн алба хаагчид үздэг. Харин нийгэм, эдийн засгийн байдал, хууль эрх зүйн шинэчлэл, олон улсын эрх зүйн чиг хандлагын хүрээнд Цагдаагийн албаны тухай хуулийг 2013 онд УИХ-аас баталж, 2014 оны нэгдүгээр сарын 1-ээс хүчин төгөлдөр мөрдөгдсөн. Энэ үед Цагдаагийн албаны тухай хуулийн төслийг, Хууль сахиулагчийн эрх зүйн байдлын тухай хуулийн төсөлтэй хамт өргөн мэдүүлсэн боловч албаны хууль батлагдаад, эрх зүйн байдлын тухай хууль батлагдаагүй. Ингээд цагдаагийн байгууллагын үйл ажиллагаатай холбоотой асуудлыг Төрийн албаны тухай хууль болон Хөдөлмөрийн тухай хууль, цагдаагийн байгууллагын үйл ажиллагааны буюу хөдөлмөрийн дотоод журмаар өнөөдрийг хүртэл зохицуулж байна.

Иймд цагдаагийн албаны үйл ажиллагааг шуурхай, үр дүнтэй зохион байгуулах, цагдаагийн алба хаагчийг үр бүтээлтэй, тогтвор суурьшилтай ажиллах нөхцөл боломжийг бүрдүүлэх, хүний эрх, эрх чөлөөг дээдлэн хүндэтгэх, зөвхөн албаны чиг үүргээ хэрэгжүүлэх зорилгоор зайлшгүй тохиолдолд хуулиар зөвшөөрөгдсөн хүрээнд хүний эрх, эрх чөлөөнд халддаг байх болон хуулийг хэрэгжүүлэх явцад гарч буй бусад хүндрэл бэрхшээлийг арилгах зорилгоор Цагдаагийн албаны тухай хуулийн төслийн шинэчилсэн найруулгын төслийг боловсруулж УИХ-д өргөн мэдүүлж чуулганы нэгдсэн хуралданаар хэлэцэхийг дэмжиж, хуулийг анхны хэлэлцүүлэгт бэлтгэж байна.

-Шинээр ямар эрх зүйн зохицуулалтууд орсон бэ?

Цагдаагийн алба хаагчийн үйл ажиллагаатай холбоотой эрх зүйн зохицуулалтыг хоёр бүлэгт заасан. Хуулийн төсөлд цагдаагийн алба хаагчийн өдөр тутмын үйл ажиллагаанд хэрэгжүүлдэг гэмт хэрэг, зөрчилтэй тэмцэх, нийтийн хэв журам хамгаалах, олон нийтийн аюулгүй байдлыг хангах үндсэн чиг үүргээ хэрэгжүүлэхэд зайлшгүй гүйцэтгэдэг бичиг баримт шалгах, үзлэг хийх, тээврийн хэрэгслийг зогсоож шалгах, биеийн хүч, галт зэвсэг, тусгай хэрэгсэл хэрэглэх, бусдын орон байранд нэвтрэн орох зэрэг урьдчилан сэргийлэх үйл ажиллагааг гүйцэтгэх үндэслэл, журмыг тодорхойлон, цагдаагийн алба хаагч эдгээр ажиллагааг зөвхөн хуульд заасан хүрээнд гүйцэтгэдэг байхаар тусгасан.
Тухайлбал, цагдаагийн үйл ажиллагааны үед хүний эрхийг хамгаалах зохицуулалтыг бий болгож, зөвхөн тунхаглалын шинжтэй бус, хэм хэмжээ тогтоож үүрэг болгосон, түүнийг зөрчсөн бол хариуцлага тооцдог байхаар тусгана.

-Тэгвэл алба хаагчдын баталгаатай холбоотой ямар заалтуудыг тусгаж өгсөн бэ?

-2013 оны хуульд байсан тодорхой баталгаануудыг бол энэ хуулийн төсөлд уламжилж авч үлдсэн. Тухайлбал, алба хаагч албан үүргээ гүйцэтгэж яваад амь насаа алдсан тохиолдолд ар гэрт нь 10 жилийн хугацаанд нэг сарын үндсэн цалинтай тэнцэх тэтгэмжийг олгох, аймгийн төвөөс бусад суманд таван жил болон түүнээс дээш хугацаагаар тасралтгүй ажилласан алба хаагчид 30 сарын цалинтай тэнцэх хэмжээний нэг удаагийн тэтгэмж олгох зэрэг зохицуулалт явж байгаа. Алба хаагчийн баталгааг улс төр, нийгэм, эдийн засаг, хууль зүйн баталгаа гэж тусгаж өгсөн. Тухайлбал улс тарийн баталгаанд алба хаагчийг улс төрийн үйл ажиллагаанд хуульд заасан албан үүргээс нь гадуур дайчлах, оролцуулахыг хориглох, үйл ажиллагаандаа улс төрийн намын бэлэг тэмдэг агуулсан эд зүйл, техник хэрэгсэл ашиглахгүй байх гэх мэт.

Хууль зүйн баталгаатай холбоотойгоор хуулиар олгодог чиг үүргээс бусад үүрэг гүйцэтгэхийг хориглох, алба хаагч албан үүргээ зохих ёсоор гүйцэтгэснээс үүссэн хохирлыг хариуцахгүй байх, албан үүргээ гүйцэтгэх явцад гаргасан алдааны улмаас учирсан хохирлыг Засгийн газар хариуцах гэх мэтчилэн баталгаануудыг оруулж өгсөн. Мөн цагдаагийн алба хаагчийг албан үүрэг биелүүлсэнтэй холбогдуулан төрийн эрх бүхий байгууллагаас шалгах тохиолдолд шууд удирдах даргад нь урьдчилан мэдэгдэр, хуульд зааснаас бусад тохиолдолд цагдаагийн алба хаагчийг ажлаас чөлөөлөх, халах, өөр ажил, албан тушаалд шилжүүлэхийг хориглох, удирдах даргад нь мэдэгдэлгүйгээр баривчлах, цагдан хорих, биед нь болон орон байр, өрөө тасалгаанд нэгжлэг хийхийг хориглосон зохицуулалтыг оруулсан.
Нийгмийн баталгаанд гэвэл эргүүл, харуул, жижүүрээр ажилласан алба хаагчдыг нэг жилийг 1.3 жилээр тооцдог байсан бол онц чухал объект, албадан саатуулах, эрүүлжүүлэх, замын хөдөлгөөний зохицуулалт зэрэгт ажиллаж буй алба хаагчдын ажилласан нэг жилийг 1.3 жилээр, нууцалбал зохих албанд гүйцэтгэх ажилтнаар ажилласан нэг жилийг 1.4 жилээр тооцох, алба хаагчийн эрүүл мэндийг хамгаалах зорилгоор эрүүл мэндийн үзлэгт жил бүр хамруулах, албан үүргээ гүйцэтгэх явцад эрүүл мэнд нь хохирсон бол эмнэлгийн байгууллагаар үнэ төлбөргүй эмчлүүлэх зэрэг шинэ зохицуулалтыг тусгаж өгсөн.

-Иргэдэд чиглэсэн, иргэд рүү хандсан ямар өөрчлөлтүүд байгаа бол?

Цагдаагийн алба хаагч бусдад шаардлага тавих, тээврийн хэрэгсэл зогсоож шалгах зэрэг үйл ажиллагаа явуулахдаа ямар үндэслэлээр үүрэг гүйцэтгэж байгаа, хүний эрх, эрх чөлөөнд халдахаа ямар эрх зүйн үндэслэлээр хийж байгааг хуульчилж өгснөөр иргэд “миний эрх эрх чөлөөг зөрчлөө, алба хаагчийн буруутай үйл ажиллагаа” гэдэг гомдол буурах болов уу. Эргээд хууль зүйн талаас авч үзвэл алба хаагч хуулийн дагуу үүргээ гүйцэтгэсэн бол хариуцлага хүлээхгүй байх, энэ нь алба хаагчийн албандаа итгэх хандлага дээшилж, иргэдэд ч ойлгомжтой болох байх гэж харж байгаа.

-Алба хаагчийн амралт бага, ажлын цаг урт байгаа зэрэгтэй холбоотой асуудал, гомдол санал гардаг. Шинэ хуулийн төсөлд үүнийг хэрхэн зохицуулж өгсөн бэ?

-Өнөөдрийн байдлаар цагдаагийн алба хаагчид Хөдөлмөрийн тухай хуулийн дагуу ээлжийн амралтаа эдэлж байна. Цагдаагийн албаны тухай хууль батлагдсан тохиолдолд гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах чиг үүрэг бүхий алба хаагчид хоёр жил тутамд 3 өдрийн нэмэлт, бусад алба хаагчид таван жил тутамд 3 өдрийн нэмэлт амралт эдэлдэг болно. Харин ажлын зайлшгүй шаардлагаар нэмэгдэл амралтаа биеэр бүрэн эдэлж чадаагүй цагдаагийн алба хаагчид түүний зөвшөөрснөөр эдлээгүй хоног тутамд үндсэн цалинг хоёр дахин нэмэгдүүлсэнтэй тэнцэх хэмжээний мөнгөн урамшуулал авах зохицуулалт тусгаж өгсөн.

-Цагдаагийн алба хаагчийн цол олгоход ямар зохицуулалт хийсэн бэ?

-Одоогийн мөрдөж байгаа хуулиар бол албан тушаалын цол эдлэхээр зохицуулсан. Харин шинэ хуулийн төсөлд цолыг ажилласан жил, ажлын үр дүн, албан тушаал аль алийг нь харгалзан үзэхээр байгаа. Тухайлбал: бүх цолд хугацааг заасан. Дэслэгчээс ахлах дэслэгч хүртэл гурван жил, ахлах дэслэгчээс ахмад хүртэл гурван жил гэх мэт. Хуучин Цагдаагийн байгууллагын тухай хуульд байсан хугацаануудыг оруулсан. Цагдаагийн байгууллага бага, дунд, ахлах гэсэн цолтой байх, цагдаагийн ерөнхий газрын удирдлага цэргийн дээд цолтой байхаар хуульд тусгасан.

-Алба хаагчийн сахилга, хариуцлагыг яаж зохицуулсан бэ, шинэ хуулийн төсөлд?

-Одоо бол сахилга, хариуцлагын зөрчил гаргасан цагдаагийн алба хаагчид Төрийн албаны тухай хуулиар сахилгын шийтгэл ногдуулж байна. Шинэ хуулийн төсөлд цагдаагийн алба хаагчид сахилгын 8 төрлийн шийтгэл оногдуулахаар заасан. Энэ нь тухайн алба хаачийн сахилга, хариуцлагыг сайжруулах зорилготой, гарсан зөрчлийн хүнд, хөнгөн, давтан зэргийг харгалзаж оновчтой шийтгэлийг ногдуулахаар заасан.

-Цагдаагийн байгууллагын бүтцийн талаар хэрхэн тусгасан байгаа вэ?

Хуулийн төсөлд цагдаагийн байгууллагын удирдлага, бүтэц зохион байгуулалтын бүтцийг нэгдмэл, төвлөрсөн удирдлагатай байх зарчимд нийцүүлэн уян хатан тодорхойлж, удирдлагыг нь томилох чөлөөлөх, тэдгээрийн ажлаа хариуцан тайлагнах журмыг Монгол Улсын яамны эрх зүйн байдлын тухай, Засгийн газрын агентлагийн эрх зүйн байдлын тухай хуульд заасан нийтлэг журамд нийцүүлсэн.

Цагдаагийн байгууллага нь цагдаагийн төв байгууллага, түүний харьяа алба, нэгж, нутаг дэвсгэр хариуцсан цагдаагийн байгууллагаас бүрдэх ба үндсэн чиг үүргээ хэрэгжүүлэх төрөлжсөн болон үндэстэн дамнасан, зохион байгуулалттай гэмт хэрэгтэй тэмцэх чиглэлээр мөрдөх, гүйцэтгэх ажил явуулах албатай байх боломжтой.
Мөн нутаг дэвсгэр хариуцсан цагдаагийн байгууллагын бүтэц, орон тоог цагдаагийн төв байгууллагын дарга батлана.

Монголын уран хатгамалыг дэмжих зорилгоор байгуулагдсан “Эгнэшгүй санаа төв” ТББ-ын уран хатгамалчид монголын даалин урлалыг ЮНЕСКО-гийн хүн төрөлхтний биет бус соёлын өвд бүртгүүлэхээр зэхэж байна. Үүний эхлэл болгож “Хатгамал урлагийн гайхамшиг” үзэсгэлэн болон “Хүндэтгэлийн даалин” урлалын арга хэмжээг зохион байгуулахаар болжээ. Энэ талаар Богд хааны ордон музей, “Эгнэшгүй санаа төв”-өөс мэдээлэл хийлээ.

Монголын шашин төрийг хослуулан барьж байсан Богд хааны эдэлж хэрэглэж байсан даалинг хөдөө орон нутгийн болон “Эгнэшгүй санаа төв”-ийн урчууд хамтран дөрөв дахин томруулан урлахаар болжээ. Улмаар Гиннесийн номонд бүртгүүлэхээр зорьж буй юм байна.

Харин “Хатгамал урлагийн гайхамшиг” үзэсгэлэнд ХIX зуунаас XX зууны эхэн үед хамаарах эдүгээ Богд хааны ордон музейд хадгалагдаж буй Богд хааны ордны урчуудын шилдэг бүтээлүүдээс гадна орчин үеийн Монголын шилдэг уран хатгамалчдын бүтээл дэлгэгдэх аж.

Үзэсгэлэн энэ сарын 27-ны өдөр “Богд хааны ордон музей”-д нээгдэх юм.

НИТХ-ын Санхүү, төсөв, эдийн засаг, Хууль зүй, төрийн байгуулалт, Нийгмийн хөгжил, Өргөдлийн хорооны хамтарсан хурал өнөөдөр боллоо. Хурлаар Агаарын бохирдлыг бууруулахад авч хэрэгжүүлж байгаа арга хэмжээ, Монгол Улсын Үндэсний аюулгүй байдлын зөвлөлийн зөвлөмжийг хэрэгжүүлэх зарим арга хэмжээний тухай хэлэлцэв.

Хурлын эхэнд нийслэлийн Засаг даргын Ногоон хөгжил, агаарын бохирдлын асуудал хариуцсан орлогч Ж.Батбаясгалан нийслэлийн Засаг даргын гаргасан 3 захирамжийн дагуу болон агаарын бохирдлыг бууруулах чиглэлээр хийж, хэрэгжүүлж буй ажлынхаа талаар танилцууллаа. “210 гаруй мянган өрх гэр хорооллын бүсэд амьдарч байна. Ихэнх айл түүхий нүүрс түлдэг. Гэр хороололд бохир болон дулааны шугам сүлжээний асуудал одоо болтол шийдэгдээгүй учраас агаар, хөрсний бохирдол дээд цэгтээ хүрлээ. Мөн нийслэлийн оршин суугчдын ачаалал хэт ихэсч Улаанбаатар хот ачааллаа дийлэхгүй байна. Тиймээс энэ асуудлыг шийдвэрлэхээр ажиллаж байна. Мөн Улаанбаатар хотын агаарын бохирдлын багагүй хувийг үүсгэж байгаа дулааны цахилгаан станцуудын түүхий нүүрсний хэрэглээг багасгаж, өөр технологиор ажиллуулах зорилт тавьсан. Түүнчлэн ирэх дөрөвдүгээр сарын 1-нээс ахуйн хэрэглээний зуухны шинэ стандартыг мөрдөж эхэлнэ. MNS52162016 стандарт хангасан зуухыг худалдах бөгөөд утаа гаргадаг бусад төрлийн зуух зарахыг хориглосон. Энэ хүрээнд саяхан зуух үйлдвэрлэгчидтэй уулзаж нэлээн сайн ойлголцсон” хэмээн ярилаа.

Хурал төлөөлөгчдийн асуултаар үргэлжилсэн юм. Өдөрт дунджаар 130-140 вагон нүүрсээр суудлын галт тэрэгний дулааны асуудлыг шийддэг аж. Энэ нь төдий чинээ утааг Улаанбаатар хотод бий болгож байгаа талаар төлөөлөгчид санал бодлоо хэллээ. Энэ талаар нийслэлийн Засаг даргын орлогч Ж.Баятбаясгалан “Улаанбаатар төмөр зам нь суурьшлын бүсэд тодорхой хэмжээгээр агаар бохирдуулж байгаа хөдөлгөөнтэй, нэлээн хуучны технологи, техник бүхий аж ахуйн нэгж юм. Үндсэндээ зөвхөн утаа гаргахаас гадна тухайн орчноо үнс, тортог болгодог. Бид бүхэн Улаанбаатар төмөр замын удирдлагуудтай уулзаж, ярилцсан. Тэдний зүгээс суудлын галт тэргийг цахилгаанаар халаадаг болох талаар санал тавиад хамтарч ажиллахыг хүссэн. Энэ асуудлыг Эрчим хүч, Зам тээвэр, хөгжлийн яамтай хамтарч шийдэхээр холбогдох байгууллагад албан ёсны саналаа хүргүүлсэн” гэв.

Хамтарсан хурлын үеэр агаарын бохирдлоос гадна хөрс, усны бохирдол, нөөцийн асуудлыг мөн хэлэлцлээ гэж нийслэлийн ЗДТГ-ын хэвлэл мэдээлэл, олон нийттэй харилцах хэлтсээс мэдээллээ.