Month: December 2016

Өнгөрсөн ням гаригт Нийслэлийн Баянзүрх дүүргийн наймдугаар хорооны нутаг, Эрдэнэтолгойд оршин суух 57 настай А-г зээ хүү Ч нь хөнөөжээ. “Манай хүү өвөөгөө хутгалчихлаа” гэх дуудлагын дагуу цагдаагийн албан хаагчид хэргийн газарт очиход талийгаач А цээжнийхээ баруун хэсэгт мэсний шарх авсан байсан аж. Түүнийг эмнэлэгт хүргэсэн боловч цус их алдсаны улмаас нас баржээ.

Эх сурвалжийн мэдээллэснээр, хүүгийн өвөө болох А агсам тавьсанд 12 настай зээ хүү нь дургүйцэж, мэс барьсан байна. Цагдаагийн алба хаагчид хэргийн газраас хар өнгийн бариултай, ахуйн хэрэглээний хутга зэрэг эд мөрийн баримт хураан авчээ. Одоогийн байдлаар уг хэргийг Баянзүрх дүүргийн Цагдаагийн гуравдугаар хэлтэст шалгаж байна.

“Мэдлэгээ түгээцгээе: Газар хөдлөлтийн гамшгийн эрсдэлийг бууруулахад олон нийтийн оролцоо ба хариуцлага” сэдэвт үндэсний семинар өнөөдөр Төрийн ордонд болж байна. Уг семинарт оролцогчдод хандан Монгол Улсын Ерөнхийлөгчийн Тамгын газрын дарга Ц.Баярсайхан үг хэллээ.

“Төвлөрлийг сааруулах бодлого-Орон нутгийн хөгжил” чуулган өнөөдөр Туушин зочид буудлын “Соёмбо” танхимд эхэллээ. Монгол Улсын Засгийн газрын Хэрэг эрхлэх газар, Монголын нутгийн удирдлагын холбоо, ХБНГУ-ын Конрад-Аденауэр-Сан хамтран уг чуулганыг зохион байгуулж байгаа юм. Чуулганд УИХ-ын гишүүн, Төрийн байгуулалтын байнгын хорооны дарга Н.Энхболд, УИХ-ын гишүүн Д.Тогтохсүрэн, Засгийн газрын Хэрэг эрхлэх газрын дэд дарга У.Бямбасүрэн, Нийслэлийн Засаг дарга бөгөөд Улаанбаатар хотын захирагч, Монголын нутгийн удирдлагын холбооны тэргүүн С.Батболд болон эрдэмтэн, судлаачид оролцож байна.

Төвлөрлийг сааруулж, орон нутгийн бие даасан байдлыг бэхжүүлэх асуудал сүүлийн 20 гаруй жил яригдаж байгаа ч төвлөрөл саарахгүй байгааг чуулганы үеэр оролцогчид онцолж байлаа. Тиймээс уг асуудлыг аймаг, нийслэлийн ИТХ-ын дарга, Засаг дарга нар холбогдох газрын хүмүүс тал бүрээс нь ярилцаж, чуулганы төгсгөлд төвлөрлийг сааруулах чиглэлээр УИХ, Засгийн газраас хийж хэрэгжүүлэх асуудал болон Орон нутгийн удирдлагын хариуцлага, чадварыг бэхжүүлэх чиглэлээр зөвлөмж гаргах юм. Нутгийн удирдлагын шат шатны байгууллагууд хийгээд ирсэн боловсрол, соёл, эрүүл мэнд, нийгмийн хамгаалал, даатгал, байгаль орчин, хөдөлмөр эрхлэлт зэрэг бүхий л салбарын төсөв хөрөнгө яам, агентлагуудад төвлөрч байгаагаас орон нутгийнхан ердөө дээш уламжлах, хөрөнгө мөнгө хүсэх төдий байдалтай болж байна. Энэ нь аймаг, нийслэл, сум, дүүрэг, баг, хорооны түвшинд иргэдтэйгээ ажиллах, тэдэнд чиглэсэн ажил үйлчилгээг шуурхай зохион байгуулахад саад болж байгааг чуулганд оролцогсод хэлэлцэж байна.

Чуулганаар гурван үндсэн илтгэл хэлэлцүүллээ. “Засгийн газраас Төвлөрлийг сааруулах чиглэлд хэрэгжүүлж буй бодлого, түүний чиг хандлага” сэдвээр Засгийн газрын Хэрэг эрхлэх газрын дэд дарга У.Бямбасүрэн, “Төвлөрлийг сааруулах нь өөрөө удирдах ёсны хөгжлийн үндэс” сэдвээр Нийслэлийн Засаг дарга бөгөөд Улаанбаатар хотын захирагч, Монголын нутгийн удирдлагын холбооны тэргүүн С.Батболд, “ХБНГУ-ын нутгийн удирдлагын тогтолцоо” сэдвээр ХБНГУ-ын Кийл хотын Нийтийн удирдлагын дээд сургуулийн захирал, профессор Паул Витт илтгэл тавилаа.

Нийслэлийн Засаг дарга бөгөөд Улаанбаатар хотын захирагч, Монголын нутгийн удирдлагын холбооны тэргүүн С.Батболд “Энэхүү чуулган цаг үеэ олсон, чухал ач холбогдолтой үйл ажиллагаа болж байна. Төвлөрлийг сааруулж, орон нутгийн бие даасан байдлыг бэхжүүлж, чадавхжуулах асуудлаар аймаг, нийслэлийн болон ХБНГУ-ын төлөөлөл ярилцаж, зохих үр дүнд хүрнэ гэдэгт итгэлтэй байна. Чуулганд хүрэлцэн ирсэн та бүхэнд баярлалаа” хэмээгээд чуулганы үйл ажиллагаанд амжилт хүслээ гэж Нийслэлийн ЗДТГ–ын Хэвлэл мэдээлэл, олон нийттэйхарилцах хэлтсээс мэдээллээ.

Азербайжаны “Aзертaк” агентлагаас дэлхийн 80 орны агентлагуудын сор бүтээлийг багтаасан цомог эрхлэн гаргажээ. Тус цомогт Үндэсний мэдээллийн МОНЦАМЭ агентлагийн Гэрэл зургийн албаны дарга Барамсайн Чадраабалын гэрэл зургууд нийтлэгдсэн байна.

Тодруулбал, Азербайжаны нийслэл Баку хотод өнгөрсөн сарын 16-18-ний өдөр Дэлхийн мэдээллийн агентлагуудын V их хурал болжээ. Энэ үеэр хурлын зохион байгуулагч Азербайжаны “Aзертaк” агентлагаас дэлхийн нэр хүндтэй мэдээллийн агентлагуудаас ирүүлсэн чансаа өндөртэй гэрэл зургаар нийт 400 гаруй хуудастай цомог гаргасан байна.

Тус цомогт Үндэсний мэдээллийн “МОНЦАМЭ” агентлагийн Гэрэл зургийн албаны дарга Барамсайн Чадраабалын монгол ахуй, ёс заншил, үндэсний их баяр наадмын сурын харваа, Даншиг наадам болон 2016 оны сонгуулийн үр дүнд бүрэлдсэн парламентын эхний өдрийн хуралдаан, АСЕМ-ын уулзалтыг харуулсан 8 гэрэл зураг нийтлэгджээ.

Түүний гэрэл зургуудыг сонирхуулъя.

Сүүлийн үед эмнэлгүүдийн хүүхдийн тасаг ачааллаа дийлэхгүй болжээ. Ханиадтай хүүхдүүд дүүргийн эмнэлгүүдийн коридорт хэвтэн эмчлүүлж байгаа бол хувийн хүүхдийн эмнэлгүүд хүртэл ачааллаа дийлэхгүй болсон байна. Хэтэрхий олон хүүхэд эмчлүүлж байгаагаас болоод хүүхдүүдийн ханиад бүрэн эдгэхгүй байгаа ажээ. Нэг дүүрэгт гурван эмч зэрэг үзлэг хийж байгаа хэдий ч иргэд доод тал нь нэг цаг дугаарлан байж хүүхдээ үзүүлж байна. Мөн эцэг, эхчүүд хүүхдийнхээ ханиадны эм, эмнэлгийн зардлыг дийлэхгүй байдалд хүрсэн байна. Учир нь ханиадны улиралтай зэрэгцүүлэн эмийн сангууд эмний үнээ нэмсээр байгаа нь иргэдэд хүндрэлтэй байгаа аж. Ханиад томууны гол шалтгаан хүйтний улирал бөгөөд агаарын бохирдлоос ч үүдэлтэй аж. Хортой утаа нь ханиадтай хүүхдүүдийн уушгины цоргыг нарийсгах, амьсгалын замд ачаалал өгөх, хоолой хорсох, өвчлөлийн эдгэрэлтийг удаашруулах гол шалтгаан болдог байна. Түүнчлэн шинээр төрж буй нярай, бага насны хүүхэд төрөлхийн болон олдмол харшилтай байх нь элбэг болжээ. Ийм харшилтай хүүхдүүд ханиад хүрэхдээ маш хурдан төдийгүй уушгины хатгалгаа болон хүндрэх нь их байдаг аж.

Ханиад томуунаас урьдчилан сэргийлэх хамгийн үр дүнтэй арга нь вакцин ажээ. Манайд улсын болон хувийн эмнэлгүүд томуугийн вакцин хийж байна. Эрдэмтэд жил бүр томуугийн хэлбэрийг сайтар судлаж тогтоосны дараа тэр жилдээ дэгдэж болох хамгийн өндөр магадлалтай вирусийн эсрэг, вакциныг бүтээдэг. Хэрэв вирусийн хэлбэр нь үнэн зөв тогтоогдсон бол тэр жилдээ энэ вакцин нь хүмүүсийг ханиад томуутай холбоотой өвчнөөс хамгаалж чаддаг байна. Вирус нь хэдийгээр яг онож тогтоогдоогүй ч байсан энэ вакцин тодорхой хэмжээний хамгаалалт үзүүлдэг ажээ.

Вакцин, хийлгэснээс хойш хоёр долоо хоногийн дараа үйлчилж эхэлнэ. Нэг жил хүртэл хамгаалах үйлчилгээ нь үргэлжилдэг.

Томуугийн вакциныг зургаан сартай болон түүнээс дээш насны хүүхдүүд, хөгшид, насанд хүрсэн хүмүүс ч хийлгэж болно.

Томуугийн вакциныг арав, арваннэгдүгээр сард хийлгэвэл илүү сайн. Гэхдээ арванхоёрдугаар сард ч гэсэн хожимдохгүй. Ес хүртэлх насны хүүхдүүд анх удаа вакцин хийлгэж байгаа үед томуугаас хангалттай сайн хамгаалахын тулд дөрвөн долоо хоногоос багагүй хугацааны дараа давтан хоёр дахь удаа хийлгэх шаардлагатай болдог. Томуугийн вакцинд харшлын урвал өгөх нь ховор. Гэхдээ тус вакциныг өндгөнд ургуулж гаргаж авдаг учраас өндгөнд харшилтай хүмүүс хийлгэх хэрэггүй.

Ямар нэгэн зүйлд хүнд хэлбэрийн харшил өгч байсан хүмүүс вакцин хийлгэхийг хориглоно. Мөн өмнө нь томуугийн вакцин хийлгэхэд мэдэгдэхүйц хариу урвал өгч байсан бол эмчид мэдэгдэж зөвлөгөө авах хэрэгтэй.

Хүндэвтэр болон хүнд өвчтэй хүмүүс өвчнөө эдгэртэл хүлээж бүрэн эрүүлжсэний дараа вакцин хийлгэхийг зөвлөж байна. Хөнгөвтөр өвчлөгсөд харин вакцин хийлгэх боломжтой юм.

Томуу, томуу төст өвчнөөс сэргийлэх сайн дурын дархлаажуулалтыг ХӨСҮТ хийж буй. Мөн нийслэлийн зургаан дүүргийн 86 цэцэрлэгийн 23 мянга гаруй хүүхдэд үнэ төлбөргүй хийж эхэлжээ.

Томуугийн вакциныг:

Сонгинохайрхан дүүрэгт: 38, 78, 80, 81, 84, 90, 91, 111, 116, 117, 125, 127, 148, 156, 158, 163, 170, 188, 192, 195 дугаар цэцэрлэг

Чингэлтэй дүүрэгт: 173, 224, 43, 31, 124, 56, 126, 83, 102, 103, 174, 155, 154 дүгээр цэцэрлэг

Баянгол дүүрэгт: 15, 30, 47, 57, 133, 141, 33 дугаар цэцэрлэг

Багануур дүүрэгт: 131, 132, 138, 139, 142, 193, 194, 235, 241 дүгээр цэцэрлэг

Сүхбаатар дүүрэгт: 36, 51, 109, 130, 150, 159, 166, 171, 175, 205, 217, 225 дугаар цэцэрлэг

Баянзүрх дүүрэгт: 115, 128, 167, 168, 169, 172, 199, 200, 201, 202, 203, 20, 210, 213, 32, 3, 45, 52, 62, 63, 64, 6, 8 дугаар цэцэрлэг, 40 дүгээр хүүхдийн клиник сувилалд тус тус томуугийн вакцин хийж байна.

Н.ГАНЧИМЭГ