Month: December 2016

НҮБ-ын Статистикийн хэлтсээс Эмэгтэйчүүдийн эсрэг хүчирхийллийн судалгааг улс орнуудад зохион байгуулж явуулахыг зөвлөмж болгосны дагуу энэхүү судалгааг Монгол Улс анх удаа 2017 онд зохион байгуулахаар төлөвлөн ажиллаж байна. Уг судалгааг Үндэсний Статистикийн Хороо нь Нэгдсэн Үндэстний Байгууллагын Хүн амын сан болон Швейцарийн Хөгжлийн Агентлагийн техник, санхүүгийн тусламжтайгаар хамтран хэрэгжүүлнэ.

Энэхүү судалгааны зорилго нь хүчирхийллийн түгээмэл хэлбэрүүд нийгэмд хэр өргөн хүрээнд тархсан байгааг олж илрүүлэх цаашдын бодлого хөтөлбөрт энэ талаарх асуудлыг тусгахад ач холбогдолтой бөгөөд жендэрийн статистикт туссан хүчирхийллийн үзүүлэлтүүдийг гаргаж, олон улсад харьцуулагдахуйц хэмжээнд хүрэх юм.Судалгааны бэлтгэл ажлын хүрээнд Ази номхон далайн бүсийн жендэрт суурилсан хүчирхийллийн олон улсын зөвлөх Хэнриеттэ Жэнсен Үндэсний Статистикийн Хороонд ажиллаж байна.

“Монголын эх баригч, бага эмч нарын II чуулган” өчигдөр эхэлж суурь судалгааны үр дүн, зөвлөмжид үндэслэн эх барихын яаралтай тусламжийн чанарыг сайжруулах, эх барихын тусламж, үйлчилгээний бодлогын орчинг боловсронгуй болгох, өнөөгийн байдалд дүгнэлт хийж, цаашдын зорилтын талаар хэлэлцэж байна.

Тус чуулганы нээлтэд Эрүүл мэндийн дэд сайд Л.Бямбасүрэн оролцсон бөгөөд тэрээр хэлэхдээ, эх, хүүхдийн эрүүл мэнд нь аливаа улс орны нийгэм, эдийн засгийн хөгжил, эрүүл мэндийн тусламж, үйлчилгээний чанар, хүртээмж, анагаах ухааны хөгжлийн илэрхийлэл болдог тул Монгол улсын Засгийн газар анхаарал тавьсаар ирсний үр дүнд эхчүүдийн эрүүл мэнд сайжирч, төрөлт, цэвэр өсөлт нэмэгдэж байна. Эх, нярайн эндэгдлийг бууруулахын төлөө манай эх баригч, бага эмч нар маань эх барих, эмэгтэйчүүдийн эмч нартай хамтран, хичээн зүтгэж ажилласны үр дүнд эхийн эндэгдэл буурч, Мянганы хөгжлийн зорилтоо хэрэгжүүлсэн 9 орны нэг болоход нийт эх баригчдын оролцоо, хичээл зүтгэл, хөдөлмөрийн үр дүн тодорхой байр суурийг эзэлдэг гэдгийг онцлов.

Жирэмсэн болон төрөх, төрсний дараах үед эх, нярайд цогц тусламж, үйлчилгээ үзүүлэхэд эх баригч, бага эмч нарын оролцоо нэн чухал байдаг ба Монгол Улсын 2500 эрүүл мэндийн байгууллагад 916 эх баригч эмч ажилладаг байна.

Эх баригчдын 2 дугаар чуулганыг ЭМЯ, Монголын эх баригч, бага эмч нарын нийгэмлэгтэй хамтран НҮБ-ын Хүн амын сан, Франц улсын Санте Сюд төрийн бус байгууллагын санхүүгийн дэмжлэгтэйгээр зохион байгуулж, монгол улсын эх, хүүхдийн эрүүл мэндийн олон тулгамдсан асуудлыг хөндөн хэлэлцэж, шийдвэрлэх арга замыг тодорхойлох юм.

Энэхүү чуулган нь 4 жил тутамд нэг болдог бөгөөд Эх Хүүхдийн Эрүүл Мэндийн Үндэсний Төв дээр 12 дугаар сарын 7-8-ны өдрүүдэд зохион байгуулагдаж, Монгол орны 21 аймаг, зарим сум, Улаанбаатар хотын бүх дүүргийн эмнэлэг, эрүүл мэндийн төвөөс ажил мэргэжлээрээ шалгарсан 120 эх баригч нар оролцож байна.

Булган аймгийн Засаг дарга З.Батзориг захирамж гаргаж, мотоцикл унахыг хоригложээ. Засаг даргын өчигдрийн 529 дүгээр захирамжаар тус аймагт өвөлжилтийн байдал хүндэрч аймгийн бүх нутаг дэвсгэрт цас, мөсөн бүрхүүл үүссэн тул иргэдийн болон хөдөлгөөний аюулгүй байдлыг хангах зорилгоор 2 ба 3 дугуйт тээврийн хэрэгслээр хөдөө хээрт болон орон нутаг, улсын чанартай автозамаар зорчих хөдөлгөөн хийхийг хориглосон байна.

Тус захирамж 2017 оны 4 дүгээр сарын 1-ний өдрийг хүртэл хэрэгжих юм байна.

Берлин хотын Хумбольдт Их сургуулийн Төв Азийн Монгол судлалын тэнхим тус ЭСЯ-тай хамтран “Монголын гэр бүл болон нийгмийн шилжилтийн үйл явц” сэдэвтэй эрдэм шинжилгээний бага хурлыг др. Ута Шөөнэ-гийн 75 насны ойд тохиолдуулан энэ оны арванхоёрдугаар сарын 2-ны өдөр Берлин хотноо зохион байгуулав. Монгол Улс, Холбооны Бүгд Найрамдах Герман Улс хоорондын найрамдалт харилцаа, хамтын ажиллагаанд болон монгол судлалд оруулсан хувь нэмрийг нь төрөөс өндрөөр үнэлж, Монгол Улсын Ерөнхийлөгч Цахиагийн Элбэгдорж др. Ута Шөөнэ-г “Алтан Гадас” одонгоор шагнах зарлиг гаргасан билээ. Элчин сайд Ц.Болор бага хуралд илтгэл тавьсан эрдэмтэд болон бусад хүндэт зочдыг ЭСЯ-ны байрандаа хүлээн авч, УИХ-ын гишүүн Я.Содбаатар др. Ута Шөөнэ-д “Алтан гадас” одонг гардууллаа.

Доктор Ута Шөөнэ анх 1960-аад онд МУИС-д суралцаж, улмаар монгол судлалаар насан турш ажилласан бөгөөд олон оюутан, монгол судлаач нарын багш билээ. Тэрээр 2006 онд Хумбольдт Их сургуулийн Төв Азийн Монгол судлалын тэнхимийн эрхлэгчийн албан тушаалаас тэтгэвэрт гарч, түүнээс хойш өнөөг хүртэл сайн дураараа хичээл зааж байгаа нь тус сургуулийн Төв Азийн Монгол судлалын тэнхимийн төдийгүй ХБНГУ дахь монгол судлалын хөгжилд ихээхэн хувь нэмэр оруулсан юм.

Монгол судлалын энэхүү арга хэмжээнд УИХ-ын гишүүд Я.Содбаатар, Ё.Баатарбилэг нар орж, мөн түүнчлэн монголч эрдэмтэд проф. С.Дулам, проф. Ж.Урангуа, проф. Вероника Файт, проф. Удо Баркманн болон проф. Инес Штольпе, мөн др. Юлиан Диркес болон магистр Кристиан Рессел нар бага хурлын хүрээнд илтгэл тавьж оролцлоо.

Герман Улсын Физик технологийн хүрээлэн(PTB)-ийн санхүүжилтээр явагддаг MEDEA төслийн хүрээнд 2016 оны арваннэгдүгээр сарын 28-наас арванхоёрдугаар сарын 1-ний өдрүүдэд Ази Номхон Далайн Орнуудын Хууль эрхийн Хэмжил Зүйн Хөтөлбөр (APLMF), ХБНГУ-ын Физик-техникийн хүрээлэн (PTB) хамтран Малайз улсад зохион байгуулсан “Автомат бус жин. Хэмжил зүйн болон техникийн шаардлага” сэдэвт сургалтад ХХШБГ-ын ХХШТА-*ны дарга П.Цэрэн-Очир зохион байгуулагч талын зардлаар хамрагдаж амжилттай оролцоод ирлээ.

Энэхүү сургалтаар мэргэжлээ дээшлүүлэх, олон улсын түвшинд түгээмэл ашиглаж буй автомат бус жингийн шалгалт, баталгаажуулалтыг хэрхэн хэрэгжүүлэх талаар судлан, сургалтад хэрэглэсэн хичээлийн материал, оролцсон бүх улсуудын хэмжилзүйн байгууллагын танилцуулга, презентаци болон хэмжил зүйн чиглэлээр хөгжлийн өндөр түвшинд хүрсэн Малайз улсын Үндэсний хэмжил зүйн хүрээлэнгийн танилцуулга 2 видео материал авчирсан.

Эдгээр материал нь хэмжүүрийн улсын шалгагчдын мэрэгжлийг дээшлүүлэх, хэмжих хэрэгслийн баталгаажуулалтын ажлын чанарыг сайжруулах замаар хэрэглэгчдийн эрхийг хамгаалах үйл ажиллагаанд чухал хувь нэмэр болно.

Цаашид шинээр олж авсан мэдлэгээ төв, орон нутгийн улсын шалгагч нарт болон мэргэжлийн сургалтад хамрагдах ажилтнуудад түгээх, видео хичээл болгон байгууллагын сайтад байршуулахаар төлөвлөж байна.

Азийн 11 орны хэмжил зүйн байгууллагын танилцуулгыг авчирсан нь тухайн улсуудын хэмжил зүйн хөгжил ямар түвшинд байгаа болон цаашид хэмжил зүйн салбарт хамтран ажиллахад чухал дэмжлэг болох хүчин зүйл юм. Ялангуяа өндөр хөгжилтэй Малайз улсын хэмжил зүйн салбарт хүрсэн амжилт нь манай хэмжил зүйн салбарын алсын хараагаа тодорхойлоход нөлөөлнө гэж үзэж байна.