Month: December 2016

Гадаад харилцааны яамны Төрийн нарийн бичгийн дарга Д.Даваасүрэн БНСУ-аас Монгол Улсад суугаа Элчин сайд У Сунг урьж уулзан хоёр орны хооронд иргэд харилцан зорчих нөхцлийг шат дараалан хөнгөвчлөх, улмаар ирээдүйд харилцан визгүй зорчих боломжийг судалж үзэх асуудлаар санал солилцжээ. Мөн жилдээ 500 сая төгрөгөөс дээш татвар төлдөг Монголын аж ахуйн нэгжийн удирдлага, ажилтнуудад олон удаагийн виз олгуулж байх хүсэлт бүхий ноот гардуулсан байна.

Төрийн нарийн бичгийн дарга хоёр талын худалдаа, эдийн засгийн харилцаа, хамтын ажиллагаа өргөжүүлэх, хөрөнгө оруулалтыг нэмэгдүүлэх, БНСУ-д оршин суугаа болон зорчиж буй иргэдийн эрх ашгийг хамгаалах, тулгарч буй асуудлуудыг шйидвэрлэхэд хоёр талын консулын зөвлөлдөх уулзалт чухал үүрэгтэйг онцлон тэмдэглээд өнгөрсөн хоёр жилд тасалдаад байсан энэхүү уулзалтыг 2017 оны эхний хагаст зохион байгуулахаар зарчмын хувьд харилцан тохиролцлоо.

Консулын харилцааг өргөжүүлж, хилийн чанадад буй иргэдээ хамгаалах, тэдэнд төрийн үйлчилгээ үзүүлэх тогтолцоог шинэ түвшинд гаргах зорилт тавин ажиллаж байгаагаа Төрийн нарийн бичгийн дарга Д.Даваасүрэн уулзалтын үеэр тэмдэглээд Монголын талаас тавьсан эдгээр саналуудаа ажил хэрэг болгохын төлөө хичээнгүйлэн ажиллах болно гэв.

Энэ онд БНСУ-д ажлын айлчлал хийсэн Гадаад харилцааны сайд Ц.Мөнх-Оргил иргэд харилцан зорчих нөхцлийг хөнгөвчлөх асуудлыг дэс дараатай шийдвэрлэх, хүмүүнлэгийн шугамаар зорчих болон оюутан, бизнес эрхлэгчдэд виз олгох нөхцлийг хөнгөвчлөх санал тавьсныг хэрэгжүүлэхээр Гадаад харилцааны яам ийнхүү ажиллаж байна. Татвар төлөгч компаниудад олон удаагийн виз олгох нь төрөөс тэдний гадаад харилцаа, үйл ажиллагааг дэмжсэн ач холбогдолтой гэж үзэж буй юм.

Арванхоёрдугаар сар гарснаар албан байгууллагуудын шинэ жил, төрсөн өдрийн баяр ихэсдэг билээ. Шинэ жилийн баярын ширээний гол чимэг болсон амтат бялууг худалдан авахдаа доорхи зүйлийг анхаараарай. Үүнд:

• Сав баглаа боодлын бүрэн бүтэн байдал. Бүтээгдэхүүний хаяг шошгонд /орц, найрлага, үйлдвэрлэсэн он, сар, өдөр, хадгалах нөхцөл, хугацаа зэрэг/ үйлдвэрлэсэн мэдээлийг бүрэн тусгасан эсэх
• Хэлбэр дүрсний бүрэн бүтэн байдал алдагдсан эсэх. Өнгө өөрчлөгдсөн эсэх /хөгцөрсөн, харласан, хатсаж өнгөн хэсэг хагарсан/
• Ямар нэгэн гадны биетээр бохирлогдсон эсэх /хүн, амьтны үс, хялгас тоос г.м/
• Үнэр өөрчлөгдсөн эсэхийг сайтар шалгах
• Хадгалах болон хэрэглэж дуусах хугацааг шалгах
• Худалдааны газарт зориулалтын тоног төхөөрөмжинд хадгалаагүй, гудамж, талбайд ил задгай худалдалдан борлуулж байвал тухайн бүтээгдэхүүнийг худалдан авахгүй байхыг зөвлөж байна.

Эрхэм уншигч та: Кремт бүтээгдэхүүнийг зөв сонгон аюулгүй хүнс хэрэглэснээр та хоол хүнсээр дамжин халдварлаж болзошгүй аливаа өвчний эрсдэлээс өөрийгөө болон гэр бүлээ хамгаалах болно.

Мөн та шаардлагатай тохиолдолд “Хэрэглэгчийн эрхийг хамгаалах туай” хуульд заасны дагуу худалдан борлуулагчаас чанар аюулгүй байдлын баталгаажилт, лабораторийн шинжилгээний баримт бичгийг шаардан үзэх эрхтэй.

Улс үндэстэн бүр өөр өөрийн гэсэн тэмдэглэлт баярын өдрүүдтэй. Тэр баяраа тэмдэглэх мөн л өөрийн гэсэн дэг жаяг, ёс жудагтай. Манай Улсын хувьд тэмдэглэлт баяр маш олон бий. Худал ярьсан хүнд бараг өдөр бүр нэг баяр тохиж байдаг гэлтэй. Хамгийн өргөн дэлгэр ач холбогдол өгч тэмдгэлэдэг баяр бол яах аргагүй Шинэ жилийн баяр юм.

Өмнөх жилүүдэд баярын үеэр ёслолын буудлага буюу пиротехникийн хэрэгслийг зориулалтын дагуу ашиглаагүйгээс иргэд эрүүл мэндээрээ хохирох тохиолдол гарсан.

Тиймээс цагдаагийн байгууллагаас шинэ жилийн үеэр пиротехникийн хэрэгслийн ашиглалтад анхаарч, хяналт тавьж ажиллаж байна. Мөн иргэд, байгууллага шинэ жилийн баярынхаа ёслолын буудлагыг зөвшөөрөлтэй компани, мэргэжлийн операторчин, инженерүүдээр хийлгүүлж, аюулгүй байдлаа хангах хэрэгтэйг хэлж байна.

Өнөөдөр өдөр төв болон говийн аймгуудын нутгаар цас орж, говь талын нутгаар салхи шуургатай байна. Харин маргааш буюу энэ сарын 12-нд баруун аймгуудын нутгийн өмнөд хэсэг, зүүн аймгуудын зарим газраар, нөгөөдөр буюу энэ сарын 13-нд говийн аймгуудын өмнөд хэсгээр цас орно. Бусад хугацаанд цас орохгүй.

Салхи 12-нд говь талын нутгаар секундэд 12-14 метр хүрч ширүүснэ. Хугацааны эхээр хүйтэрч Дархадын хотгороор шөнөдөө 33-38 градус, өдөртөө 21-26 градус, Увс нуурын хотгор болон Идэр, Тэс, Орхон-Сэлэнгэ, Эгь, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 30-35 градус, өдөртөө 15-20 градус, говийн бүс нутгийн өмнөд хэсгээр шөнөдөө 12-17 градус, өдөртөө 3-8 градус, бусад нутгаар шөнөдөө 21-26 градус, өдөртөө 8-13 градус хүйтэн байна. 14-нд нутгийн баруун хэсгээр цаашдаа ихэнх нутгаар өдөртөө дулаарна.

БАРУУН АЙМГУУДЫН НУТГААР ӨНӨӨДӨР: Солигдмол үүлтэй. Шөнөдөө зарим газраар цас орно, өдөртөө цас орохгүй. Салхи баруун хойноос секундэд 6-11 метр, явган шуурга шуурна. Увс нуурын хотгор болон Идэр, Тэс голын хөндий, Хүрэн бэлчир орчмоор шөнөдөө 27-32 градус, өдөртөө 15-20 градус, Эхийн голын Баянбүрд орчмоор шөнөдөө 7-12 градус, өдөртөө 0-5 градус, бусад нутгаар шөнөдөө 13-18 градус, өдөртөө 4-9 градус хүйтэн байна.

ТӨВИЙН АЙМГУУДЫН НУТГААР ӨНӨӨДӨР: Үүлшинэ. Шөнөдөө нутгийн хойд хэсгээр, өдөртөө ихэнх нутгаар цас орно. Салхи зүүн өмнөөс баруун хойш эргэж секундэд 5-10 метр, зарим газраар секундэд 12-14 метр хүрч зөөлөн цасан шуурга шуурна. Дархадын хотгороор шөнөдөө 31-36 градус, өдөртөө 21-26 градус, Хангай, Хөвсгөл, Хэнтийн уулархаг нутаг, Орхон-Сэлэнгэ, Эгь, Хараа, Ерөө, Туул, Тэрэлж голын хөндийгөөр шөнөдөө 22-27 градус, өдөртөө 10-15 градус, бусад нутгаар шөнөдөө 16-21 градус, өдөртөө 5-10 градус хүйтэн байна.

ЗҮҮН АЙМГУУДЫН НУТГААР ӨНӨӨДӨР: Үүлшинэ. Шөнөдөө цас орохгүй, өдөртөө зарим газраар цас орно. Салхи зүүн өмнөөс баруун хойш эргэж секундэд 5-10 метр, өдөртөө зарим газраар секундэд 12-14 метр хүрч зөөлөн цасан шуурга шуурна. Хэрлэн, Онон, Улз голын хөндийгөөр шөнөдөө 21-26 градус, өдөртөө 12-17 градус, бусад нутгаар шөнөдөө 15-20 градус, өдөртөө 8-13 градус хүйтэн байна.

ГОВИЙН АЙМГУУДЫН НУТГААР ӨНӨӨДӨР: Үүлшинэ. Шөнөдөө цас орохгүй, өдөртөө нутгийн өмнөд хэсгээр цас орж, цасан шуурга шуурна. Салхи зүүн өмнөөс баруун хойш эргэж секундэд секундэд 6-11 метр, өдөртөө ихэнх нутгаар секундэд 14-16 метр хүрч ширүүснэ. Өмнөговийн нутгаар шөнөдөө 8-13 градус хүйтэн, өдөртөө 1 градус дулаанаас 4 градус хүйтэн, бусад нутгаар шөнөдөө 14-19 градус, өдөртөө 2-7 градус хүйтэн байна.

УЛААНБААТАР ХОТОД ӨНӨӨДӨР: Үүлшинэ. Шөнөдөө цас орохгүй, өдөртөө бага зэргийн цас орно. Салхи зүүн өмнөөс баруун хойш эргэж секундэд 7-12 метр, явган шуурга шуурна. Шөнөдөө Яармаг-Сонгины орчмоор 26-28 градус, бусад хэсгээр 19-21 градус, өдөртөө 11-13 градус хүйтэн байна.

Хүний эрхийн олон улсын өдрийг тохиолдуулан хүний эрхийг хангах, хамгаалах үйлсэд хувь нэмрээ оруулж, амжилт гаргасан хүмүүсийг ХЭҮК-ын дээд шагнал “Хүний эрх хүндэт тэмдэг”-ийг гардуулдаг уламжлалтай. Хан-Уул дүүргийн хөгжлийн бэрхшээлтэй иргэдийн салбар зөвлөлийн даргаар олон жил үр бүтээлтэй ажиллаж буй Ч.Уранчимэгт “Хүний эрх хүндэт тэмдэг”-ийг Комиссын гишүүн Н.Ганбаяр гардуулан өглөө. Ч.Уранчимэг нь хүний эрхийг хангах, хамгаалах, хөхиүлэн дэмжих, тэр дундаа хөгжлийн бэрхшээлтэй иргэдийн эрхийг эрхийг хамгаалах, тэднийг нийгэмшүүлэх үйлсийн төлөө 20 гаруй жил ажилласан учир дээрх шагналаар шагнасан байна.

2009 оны 12 дугаар сарын 10-ны өдөр Ардчилсан хувьсгалын 20 жилийн ойг орон даяар тэмдэглэж энэ өдрийг “Ардчилал, хүний эрхийн өдөр” болгох Засгийн газрын тогтоол гарчээ. “Ардчилал, хүний эрхийн өдөр” буюу жил бүрийн арванхоёрдугаар сарын 10-ны өдрийг тохиолдуулан нийслэлийн удирдлагууд болон анд нөхөд нь төр, нийгмийн зүтгэлтэн Ж.Батмөнхийн хөшөөнд хүндэтгэл үзүүллээ. Ж.Батмөнх агсан Монгол Улсын өөрчлөлт, шинэчлэлтийг тайван замаар хүлээн авч тухайн үед ардчиллын төлөө тэмцэж явсан залуучуудтай ойлголцож, ямар нэгэн эсэргүүцэл, тэмцэлгүйгээр ухаалаг шийдвэр гаргасан нь ардчиллын үйл хэрэгт үнэлж баршгүй хувь нэмэр оруулсан хэмээн хүндэтгэл үзүүлэхээр ирсэн андууд нь дурсаж байлаа. Ж.Батмөнх агсан их сургуулийн багшаас хөдөлмөрийн гараагаа эхэлж, БНМАУ-ын Сайд нарын Зөвлөлийн орлогч дарга, БНМАУ-ын Сайд нарын Зөвлөлийн дарга буюу Ерөнхий сайдаар томилогдон түүхэн цаг үед ажилласан зүтгэлтэн байв. Тэрээр 1974 онд БНМАУ-ын Сайд нарын Зөвлөлийн орлогч дарга, мөн оны зургаадугаар сард БНМАУ-ын Сайд нарын Зөвлөлийн дарга буюу ерөнхий сайдаар томилогдсон. 1984 он хүртэл БНМАУ-ын 13 дахь ерөнхий сайдаар, 1984-1990 онд АИХ-ын Тэргүүлэгчдийн даргаар буюу Төрийн тэргүүнээр ажиллаж байжээ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Цагдаагийн ерөнхий газрын Сургалтын төв Гадаад хэлний танхимтай боллоо. Тус танхимийг “Абсолют” гадаад хэл сургалтын төвийн дэмжлэгтэйгээр тохижуулжээ.

Цагдаагийн ерөнхий газраас алба хаагчдыг мэргэшүүлэх ур чадварын олон сургалтыг зохион байгуулж байгаагийн нэг нь гадаад хэлний сургалт юм. Цагдаагийн алба хаагчид сургалтад хамрагдсанаараа хэлний мэдлэгээ дээшлүүлэх, гадаадад мэргэжил дээшлүүлэх курс, сургалтад хамрагдах боломж нээгдэж байна.