Month: October 2016

Өндөржүүлсэн бэлэн байдлыг 7 хоногийн хугацаатай үргэлжлүүлэхээр боллоо

Ховд аймгийн Онцгой комисс 09-р сарын 30 нд хуралдаж, Улсын онцгой комисстой зөвшилцсөний эцэст хорио цээрийн дэглэм, өндөржүүлсэн бэлэн байдлыг дахин 7 хоног үргэлжлүүлэхээр боллоо. Ховд аймгийн 11 сумын 45 багийн 930 орчим өрхийн 65 голомтод Олон улсын хорио цээрийн ангилалд багтах бог малын гоц халдварт мялзан өвчин оношлогдсоноос хойш 18 хоног өнгөрч байна. 2016 оны 09-р сарын 30-ны байдлаар уг өвчнөөр 73423 толгой мал өвчилж, 11840 мал хорогдож, 40 толгой малыг устгажээ. Харин 57977 толгой мал эдгэрч 3566 толгой мал өвчтэй байгаа мэдээлэл байна. Мялзан өвчний тархалт өвчлөл буурч байгаа боловч Мөст, Жаргалант, Буянт сумдад голомтын бүсдээ өвчлөл нэмэгдсээр байгаа юм. Вакцинжуулалтыг ойрын хугацаанд эхлүүлэх юм байна. Харин вакцинжуулалт эхлэхээс өмнө албан байгууллага, айл өрх бүр мах нөөцлөхөд анхаарах хэрэгтэйг мэргэжлийнхэн зөвлөж байна.

Нийслэлийн Засаг Даргын “Хүн, мал амьтны гоц халдварт өвчин, тарваган тахал өвчнөөс урьдчилан сэргийлэх ажлыг эрчимжүүлэх тухай” А/594, “ Мал амьтны гоц халдварт шүлхий өвчинтэй тэмцэх, түүнээс урьдчилан сэргийлэх талаар авах арга хэмжээний тухай” А/628 дугаар захирамжийн хэрэгжилтийн талаар нийслэлийн Мэргэжлийн хяналтын газар, Мал эмнэлгийн газар, Цагдаагийн газар, Онцгой байдлын газрын хамтарсан ажлын хэсэг хуралдлаа.

Ажлын хэсгийн хурлаар нийслэлийн алслагдсан дүүргүүдийн нутаг дэвсгэрийн хил залгаа Төв аймгийн сумдад гарсан малын гоц халдварт шүлхий, хонины цэцэг өвчний нөхцөл байдал, түүнээс урьдчилан сэргийлэх талаар хэрэгжүүлж буй ариутгал халдваргүйтгэлийн ажлын үр дүн, БХД, БНД, БЗД-ийн бог, бод малд хийгдэж байгаа вакцинжуулалтын ажлын гүйцэтгэл, цаашид хэрэгжүүлэх арга хэмжээний саналыг тус тус хэлэлцлээ.

Энэ хугацаанд нийслэлийн шалган нэвтрүүлэх 9 товчоогоор нэвтэрсэн 163675 автомашиныг халдваргүйжүүлж ариутгал хийсэн байна.

“Монгол бахархлын өдөр” буюу Их эзэн Чингис хааны мэндэлсэн өдөр энэ сарын 31-нд тохионо. Чингис хааны мэндэлсэн өдрийг билгийн тооллын гуравдугаар жарны усан морин жил буюу 1162 оны өвлийн тэргүүн сарын шинийн 1-ний өдөр хэмээн тогтоосон. “Нийтээр тэмдэглэх баярын болон тэмдэглэлт өдрүүдийн тухай” хуулийн 4 дүгээр зүйлийн 1.8-д жил бүрийн өвлийн тэргүүн сарын шинийн 1-нд Их Эзэн Чингис хааны мэндэлсэн өдрийг тэмдэглэж, бүх нийтээр амарч байхаар болсон юм. Мөн энэ сарын 19-нд сум, дүүргийн ИТХ-ын сонгуулийн өдөр тохиох тул бүх нийтээр амарна.

Хилийн боомтууд өнөөдрөөс цагийн хуваарийн дагуу ажиллаж эхэллээ. Тусгаар тогтнолын баярын өдрийг тохиолдуулан Монгол, Хятадын авто замын хилийн боомтууд энэ сарын 1-3-ныг хүртэл амарсан. Монгол, Хятадын хилийн боомт, тэдгээрийн дэглэмийн тухай Монгол Улсын Засгийн газар, БНХАУ-ын Засгийн газар хоорондын хэлэлцээр”-т заасны дагуу хилийн боомтуудыг 3 хоног хаагаад байсан билээ.

Намрын тохижилт, өвөлжилтийн бэлтгэлийг хангах ажлын хүрээнд нийслэлийн есөн дүүргийн хэмжээнд хийгдэх зам засвар, тохижилтын ажлыг Нийслэлийн Иргэдийн Төлөөлөгчдийн Хурлын төлөөлөгчдөд танилцууллаа.

Энэ ажлын хүрээнд орон сууц болон гэр хорооллын дундах ус ихээр тогтдог, эвдрэл ихтэй, явган зорчигч болон тээврийн хэрэгслийн хөдөлгөөнд саад учруулдаг зайлшгүй засварлах шаардлагатай замуудыг засварлах юм байна. Гэр хорооллын ус ихээр тогтдог замуудыг тэгшлэх, хайрга асган нягтруулах, асфальт бетон хучилтад гарсан эвдрэлд нөхөөс хийх ажлууд хийгдэж эхлээд байна.

Нийслэл хотын авто замын хөдөлгөөний ачааллыг бууруулах шинэ төлөвлөгөөг яг одоо Нийслэлийн хэвлэл мэдээллийн төвд танилцуулж байна

Тодруулбал,авто замын уулзваруудад ногоон гэрлээр баруун гар тийш эргэхийг зөвшөөрөхөөр зохицуулалт хийж байгаа юм. Өөрөөр хэлбэл, нийслэл хотын боломжит уулзваруудад энэ хувилбарыг хэрэгжүүлэх бэлтгэл ажлыг хангаад байгаа аж.

Энэ өөрчлөлтийг энэ сарын 10-ны өдрөөс хэрэгжүүлж эхлэх юм байна.