АНУ-ын Вашингтон хотноо болж буй Дэлхийн банк болон ОУВС-ын ээлжит уулзалтад Сангийн сайд Б.Чойжилсүрэн, Монголбанкны Ерөнхийлөгч Н.Баяртсайхан, Санхүүгийн зохицуулах хорооны дарга С.Даваасүрэн нар оролцож байгаа бөгөөд өчигдөр Дэлхийн банкны Зүүн Ази, Номхон далайн бүсийн Дэд Ерөнхийлөгч, хатагтай Викториа Кваква, Монгол Улс дахь Суурин төлөөлөгч Жеймс Андерсон тэргүүтэй Дэлхийн банк, ОУВС-гийн удирдлагуудтай уулзлаа. Уулзалтаар монголын төлөөлөгчид улс орны санхүү, эдийн засгийн өнөөгийн байдал, тулгамдаж байгаа асуудлуудыг танилцуулж, санхүүгийн хүндрэл бэрхшээлийг даван туулахын тулд маш их зүйл хэрэгтэй байгааг Сангийн сайд Б.Чойжилсүрэн чухалчлан онцлов.
Уулзалтын үеэр манай төлөөлөгчид монголын санхүүгийн бодлого, зохицуулалтын байгууллагуудад Дэлхийн банк, ОУВС-гийн дэмжлэгтэйгээр хэрэгжүүлэх олон салбарыг хамарсан текник туслалцааны хоёр дахь шатны төслийн саналыг гардуулан өглөө. Банк, Сангийн бүсийн удирдлагууд төслийн саналыг сайтар судлан үзэж, боломжтой бүх талаар дэмжиж ажиллахаа илэрхийлжээ.
УИХ-ын гишүүн Б.Батзоригт луйвардуулсан гэх иргэд эсэргүүцэл илэрхийлж, Төрийн ордны газар жагсаж байсан цаг саяхан. Гэтэл өнөөдөр мөн л эсэргүүцлийн цуглаанаа Төрийн ордны гадна зохион байгуулж байна. Тэд өмнө нь УИХ-ын дарга М.Энхболдод бичиг хүргүүлж, “Авлигач албан тушаалаас илүү ард түмэн хүчтэй гэдгийг бүү март, шаардлага гарвал тэмцлийн бүх хэлбэрийг сонгох болно” гэсэн лоозон барьж, УИХ-ын гишүүн Б.Батзоригийг гарч ирэхийг шаардаж байсан юм.
Монгол Улсын сум, дүүргийн ИТХ-ын ээлжит сонгуулийг зохион байгуулж байгаатай холбогдуулан Авлигатай тэмцэх газраас Авлигын эсрэг хуулийн 18 дугаар зүйлийн 18.1.6-д заасныг үндэслэн Сонгуулийн ерөнхий хороонд Зөвлөмж хүргүүлжээ. 
Олон улсын багш нарын өдрийг өнөөдөр “Дуурь бүжгийн эрдмийн театр”-т тэмдэглэж байна. 2014 оноос эхлэн жил бүрийн 10 сарын тавны өдрийг “Монголын багш нарын өдөр” болгон тэмдэглэдэг болжээ. “Дэлхийн багш нарын 22, Монголын багш нарын 50 дахь өдөр” өнөөдөр тохиож байгаа юм байна. НҮБ-аас 2016 оныг “Тогтвортой хөгжил-2030” хөтөлбөрийн дор “Багш нарын үнэлэмж, тэдний статусыг дээшлүүлэх жил” болгон зарласан билээ. Энэ удаагийн багш нарын баяр НҮБ-аас дэвшүүлсэн зорилттой уялдаж байгаагаараа онцлог юм байна.
“Оны тэргүүний багш”-аар шалгарсан ХААИС-ийн тэнхимийн эрхлэгч Д.Баатархүү “2016 оны тэргүүний багшаар шалгарсандаа туйлын их баяртай байна. Миний бие улсад ажиллаад 17 жил өнгөрсөн байна. Сургалтын таатай орчинг бүрдүүлж өгсөн ХААИС-ийн тэр дундаа цахилгаан хангамж, электроникийн тэнхмийн хамт олны минь шагнал юм гэдгийн хэлмээр байна. Цааш цаашдаа манай тэнхмийн хамт олон үр бүтээлтэй ажиллах болно” гэлээ.
Бүх нийтээр мод тарих үндэсний өдөр 10 дугаар сарын 15-нд тохиож байна. Энэ өдрийн хүрээнд Толгойтоос Амгалан өртөө хүртэл 17 км төмөр замын хамгаалалтын зурваст, төмөр замын 2 талаар Сибирийн 3.5-4 м өндөртэй 8000 улиас модыг Улаанбаатар хотын Захирагчийн ажлын алба, “Улаанбаатар төмөр зам” Монгол-Оросын хувь нийлүүлсэн нийгэмлэгтэй хамтран тарихаар болжээ. Энэхүү ажлыг ногоон байгууламжийн чиглэлээр мэргэшсэн, мод үржүүлгийн газарууд болон хүн хүч, машин техник технологийн нөөцтэй хувийн хэвшлийн байгууллагуудтай хамтран хэрэгжүүлж, 3 жилийн турш арчилгааг нь хариуцуулахаар болсон байна.
ХЗДХ-ийн сайд С.Бямбацогт Бүгд Найрамдах Казахстан Улсаас Монгол Улсад суугаа Онц бөгөөд Бүрэн Эрхт Элчин сайд К. И. Кобландиныг өнөөдөр хүлээн авч уулзав. Уулзалтын эхэнд ноён Кобландин өнгөрөгч зун Улаанбаатар хотноо болсон АСЕМ-ын хуралд Казахстан улсын Ерөнхий сайд биечлэн оролцож улмаар Монгол Улсын Ерөнхийлөгч, Ерөнхий сайд нартай хоёр улсын хамтын ажиллагааг эрчимтэй хөгжүүлэх талаар ярилцсан болохыг дурдав.
“Дарханы төмөрлөгийн үйлдвэр” ТӨХК-ийг 2014 онд Концессын гэрээгээр хувьчилсан. Үүнээс хойш тус үйлдвэрийн ажилчид хохирч байгаа талаар Эрчим хүч, геологи, уул уурхайн үйлдвэрчний эвлэлийн холбооны дарга Х.Буянжаргал мэдээллээ.
Улаанбаатар хотод орчин цагийн боловсролыг хөгжүүлэх үйлсийг удирдан зохион байгуулдаг “Нийслэлийн Боловсролын газар байгуулагдсаны түүхэн 85 жилийн ой” энэ өдрүүдэд тохиож байна. Тус газраас ойн баяраа угтаж 85 бүтээлч ажлыг хэрэгжүүлжээ. Энэ хичээлийн жилд нийслэлийн хэмжээнд 618 цэцэрлэгт 100 728 хүүхэд, ерөнхий боловсролын 220 сургуульд 236 973 сурагч суралцаж 25 413 багш сурган хүмүүжүүлэгч, ажилтан албан хаагч ажиллаж байгаа юм байна.
УИХ дахь АН-ын бүлгийн өргөтгөсөн хуралдаан Төрийн ордонд болж байна. Уг хуралдаанаар ирэх оны төсвийн төсөл, мөнгөний бодлого болон цаг үеийн асуудлыг хэлэлцэж байгаа юм. Хуралдааны дараагаар сэтгүүлчдэд мэдээлэл хийх ажээ.