Month: October 2016

ЦАГ АГААРЫН АЮУЛТАЙ ҮЗЭГДЛЭЭС СЭРЭМЖЛҮҮЛЭХ МЭДЭЭ:

Өнөөдар Архангай, Булган, Сэлэнгийн нутаг, төв аймгийн хойд хэсгээр цасан шуурга шуурна.

МАЛЧИД, ТАРИАЛАНЧИД, ТЭЭВЭРЧИД, ИРГЭДИЙН АНХААРАЛД:

Өнөө маргаашдаа баруун болон төвийн нутгаар, 16-нд нутгийн зүүн хэсгээр цас орж цасан шуурга шуурч, хүйтрэх тул зам даваанд халтиргаа гулгаа үүсч болзошгүйг анхааруулж байна.

2016 оны 10 дугаар сарын 15-ны 08 цагаас 20 цаг хүртэлх цаг агаарын урьдчилсан мэдээ:

Баруун аймгуудын нутгаар үүлэрхэг. Бусад нутгаар үүлшинэ. Баруун аймгуудын зүүн хэсэг, Төвийн аймгуудын ихэнх нутгаар хур тунадас, цас орно. Салхи баруун аймгуудын нутгаар баруун хойноос, бусад нутгаар баруун өмнөөс баруун хойш эргэж секундэд 7-12 метр, зарим газраар секундэд түр зуур 18-20 метр хүрч шороон болон цасан шуурга шуурна. Хүйтэрч Алтай, Хангай, Хөвсгөл, Хэнтэйн уулархаг нутгаар 0-5 градус хүйтэн, говийн бүс нутгийн өмнөд хэсэг, Дорнод, Дарьгангын тал нутгаар 16-21 градус, бусад нутгаар 2-7 градус дулаан байна.

УЛААНБААТАР ХОТ: Үүлшинэ. Хур тунадас орохгүй. Салхи баруун өмнөөс баруун хойш эргэж секундэд 6-11 метр, зарим үед секундэд 14-16 метр хүрч шороон шуурга шуурна. Өчигдрөөс хүйтэрч 5-7 градус дулаан байна .

Өглөө 05 цагт Улаанбаатарт: 4 градус дулаан, харьцангуй чийг 52 хувь, агаарын даралт 863 гектопаскаль байлаа. Даралт өдөртөө буурч байгаад өснө.

“Өдрийн сонин”-ы бямба гаригийн дугаар 12 нүүрээр хэвлэгдэн, захиалагчдадаа хүрлээ. Энэ өдрийн дугаарт гарсан нийтлэл, сурвалжлага, ярилцлага, мэдээ мэдээллээс онцолж, тоймлон хүргэж байна.

Нэгдүгээр нүүрээс шавь нартайгаа тэмцээнд оролцоод аварга болсон тулааны спортын аварга Ө.Саруул-Одын тухай уншаарай. Үргэлжлэл нь тавдугаар нүүрт нийтлэгджээ.

Нийслэлийн сонгуулийн хорооны дарга Ү.Ганболдтой хийсэн ярилцлагыг хоёрдугаар нүүрээс уншаарай. Түүний ярилцлагаас орон нутгийн сонгуулийн чанар, зохион байгуулалтын талаар сонирхоорой.

Гуравдугаар нүүрт манай сонины залуу сэтгүүлч С.Алтанцэцэгийн “Албан тушаалд очсон залуусын зам АТГ-аар төгсдөг нь гунигтай” нийтлэл хэвлэгджээ. Өнөөгийн улс төрд орох гэж яарч байгаа залуучуудад зориулсан чин сэтгэлийн зөвлөгөөг та эндээс уншаарай.

Монголчуудын хувьд эрчим хүчний дутагдалтай байдаг билээ. Тэгвэл шинээр ашиглалтад орох гэж байгаа Хөшигийн хөндийн нисэх буудлын дэргэд сэргээгдэх эрчим хүчний салбарт хувь нэмэр оруулан 50 мВт-ын нарны цахилгаан станц баригдах гэж байгаа юм байна. Шав тавих үйл ажиллагаа нь өчигдөр болжээ. Энэ тухай “Хөшигийн хөндийн дахин нэг бүтээн байгуулалт” талаар сурвалжлага, ярилцлагыг өнөөдрийн дугаараас уншаарай.

Дөрөвдүгээр нүүрэнд иргэдийн хэлэх үгийн чөлөөт индэр булан хэвлэгджээ. Та эндээс элдэв цензургүй өөрсдийн үзэл бодлыг илэрхийлсэн нийгэмд тулгамдаж буй асуудлуудыг сонирхоорой.

Хавдрыг даван туулагчдын талархлын баярын талаар сурвалжлага зургаадугаар нүүрэнд оржээ. Эндээс та энэхүү аюулт өвчнийг хэрхэн даван туулсан хүмүүсийн чин сэтгэлийн яриаг уншаарай.

Дэлхийн хүн булангаас Сэргэн мандалтын үеийн төлөөлөл болсон Италийн нэрт зураач Санти Рафаэлийн амьдрал уран бүтээлтэй танилцаарай.

Наймдугаар нүүрт Булган аймгийн Хишиг-Өндөр сумын найман жилийн дунд сургуулийг 1970 онд төгссөн ангийнханы дурсамж тэмдэглэл оржээ. Хүүхэд насны гэнэн томоогүй адал явдал болоод хүсэл мөрөөдлийнх нь талаар эндээс уншаарай. Эдний ангиас Боловсролын тэргүүний 16 багш төрсөн гэнэ.

Мөн өнөөдрийн дугаараас монголд анх удаа тоглолтоо хийж буй аав, ээж, хүү гурван дельфиний тоглолтын талаар хийсэн сонирхолтой сурвалжлага болон энэ намрын тренд болж буй хувцас загварын талаар сонирхоорой.

Эдгээр болон бусад цаг үеийн мэдээ мэдээлэл, ярилцлагуудыг “Өдрийн сонин”-ы бямба гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудан, “Улаанбаатар”, “Скай” шуудангийн салбаруудаас очиж авч болох ба сонин борлуулах бүхий л цэгүүд, Хэвлэлийн биржээс худалдан авах боломжтой юм. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдах авч болохыг дуулгая. “Өдрийн сонин”-ы өөрийн байранд ирж худалдан авч бас болно.

“Өдрийн сонин”-той холбоотой бүхий л мэдээллийг Мэдээлэх эрхийн утас 19001987-гоос лавлаж болох ба захиалга өгөхийг хүсвэл 9911-2954, 8811-1375 дугаарт холбогдоно уу. Хэрэв цахим хэлбэрээр нь захиалахыг хүсвэл 88071920 дугаарт холбогдож дэлгэрэнгүй мэдээллийг лавлаарай.

“ӨДРИЙН СОНИН” ӨГЛӨӨ БҮХЭН ТАНТАЙ ХАМТ

Харааны бэрхшээлтэй хүүхдийн 116 дугаар
сургуулийнхан брайль сурах бичигээ өөрсдөө хэвлэх болжээ. Тодруулбал, Японы
“Taipei Tian Mo rotary” клуб болон Олон улсын ротари клубийн санхүүжилтээр 116
дугаар сургуульд хамгийн сүүлийн үеийн гурван төрлийн брайль принтер, хоёр
компьютер, сурах бичиг хэвлэх программыг тусламжаар олгосон байна. Өнөөдөр энэ
үйлдвэрийн нээлт боллоо.

Сум, дүүргийн иргэдийн Төлөөлөгчдийн Хурлын ээлжит сонгуулийн санал авах өдөр буюу 2016 оны 10 дугаар сарын 19-ний өдөр буюу ирэх долоо хоногийн Лхагва гараг.

Энэ өдөр нийтийг хамарсан арга хэмжээг бүртгэж, зөвшөөрөл олгохгүй, соёл урлаг, үзвэр, спортын арга хэмжээ зэрэг олныг хамарсан аливаа арга хэмжээ зохион байгуулахгүй.

Мөн сонгуулийн санал авах болон техникийн тооллого хийх өдөр буюу 2016 оны 10 дугаар сарын 19, 20-ны өдрүүдэд архи, согтууруулах ундаа худалдах, түүгээр үйлчлэхийг түр зогсоолоо.

Түүнчлэн энэ өдрүүдэд гарч болзошгүй гэмт хэрэг зөрчлөөс урьдчилан сэргийлэх, замын хөдөлгөөний ачааллыг бууруулах зорилгоор нийслэлийн нутаг дэвсгэрт үйл ажиллагаа явуулж байгаа хүнс, барилгын материал, мод, модон материал, түүхий эд, техникийн захууд болон худалдааны төвүүдийн тухайн 7 хоногийн амралтын өдрийг сонгуулийн санал авах өдөр буюу 2016 оны 10 дугаар сарын 19-ний өдөр шилжүүлэхээр боллоо.

Өөрөөр хэлбэл, хүнс, барилгын материал, мод, модон материал, түүхий эд, техникийн захууд болон худалдааны төвүүд аравдугаар сарын 19-нд амарна.

Нийслэлийн Засаг дарга бөгөөд Улаанбаатар хотын Захирагч С.Батболд “Сонгуулийн тухай хуулийн хэрэгжилтийг хангах зарим арга хэмжээний тухай” захирамж гаргасны дагуу дээрх зохицуулалтуудыг хийж байгаа аж.

Аравдугаар сарын 15-наас /Маргааш/ эхлэн тээврийн хэрэгслийн улсын дугаарын хязгаарлалт өвлийн бүсчлэлд шилжинэ.

Өвлийн бүсчлэлд шилжсэн өдрөөс эхлэн 08:00-20:00 цагийн хооронд улсын дугаар нь хязгаарлагдсан тээврийн хэрэгсэл хязгаарлалт тогтоосон замуудад хөдөлгөөнд оролцохгүй.

Тухайлбал, Геологийн төв лабораторийн уулзвараас Саппорогийн уулзвар хүртэл дугаарын хязгаарлалт үйлчлэхгүй болж байна. Зуны бүсчлэлээр энэ зам хязгаарлалтад ордог байсан.

Мөн 7 буудлын арын цагдаагийн постоос 32-ын тойрог хүртэл, Дамбадаржаагаас Бэлх салдаг уулзвараас Дарь эхийн уулзвар хүртэл хязгаарлалт үйлчлэхгүй.

Дөрөвдүгээр сарын 15-ныг хүртэлх хугацаанд өвлийн бүсчлэл үйлчлэх юм.

Дундговь аймгийн Цагдаагийн газрын Хэрэг бүртгэх, мөрдөн байцаах тасгаас Эрүүгийн хуулийн тусгай ангийн 181 дүгээр зүйлийн 181.2.1 дэх хэсэгт зааснаар эрүүгийн хэрэг үүсгэн шалгасан тус аймгийн Сайнцагаан суманд байрлах “Оюуны хөгжил” хувийн цэцэрлэгт хүмүүжиж байсан арван сартай охиныг тус цэцэрлэгийн тогооч “хоолоо идсэнгүй” гэх шалтгаанаар зодож танхайрсан хэргийг шалгаж эхэлсэн талаар бид өмнө нь мэдээлж байсан. Тус аймгийн Прокурорын газраас Эрүүгийн хуулийн тусгай ангийн 181 дүгээр зүйлийн 181.1 дэх хэсэгт зааснаар яллах дүгнэлт үйлдэж энэ оны зургадугаар сарын 27-ны өдөр шүүхэд шилжүүлсэн юм.

Сум дундын Эрүүгийн хэргийн Анхан шатны шүүхээс 2016 оны долдугаар сарын 25-ны өдөр хэрэгт нэмэлт мөрдөн байцаалтын ажиллагаа хийлгүүлэхээр буцаасныг прокурор эс зөвшөөрч эсэргүүцэл бичсэн ба давж заалдах шатны шүүх 2016 оны есдүгээр сарын 2-ны өдөр хянан хэлэлцээд прокурорын эсэргүүцлийг хүлээн авч, хэргийг анхан шатны шүүхэд дахин хэлэлцүүлэхээр буцааж шийдвэрлэсэн.

Анхан шатны шүүхээс гурав хоногийн өмнө /2016.10.11/ хэргийг хянан хэлэлцээд тогооч О-д Эрүүгийн хуулийн тусгай ангийн 100 дугаар зүйлийн 100.1 дэх хэсэгт зааснаар 1 жил 6 сарын хугацаагаар хорих ял оногдуулж, ялыг жирийн дэглэмтэй эмэгтэйчүүдийн хорих ангид биечлэн эдлүүлэхээр шийдвэрлэжээ.