Month: October 2016

Замын цагдаагийн албаны ЖШУХ дээр өчигдөр нийт 239 дуудлага, мэдээ мэдээлэл хүлээн авснаас, зам тээврийн ослын 183 дуудлага бүртгэгдсэн байна. Үүнээс гэмт хэргийн шинжтэй гомдол мэдээлэл 2 бүртгэгдэж 4 хүн хүнд хөнгөн гэмтжээ.

Өчигдөр ИТХ-ын сонгуулийн өдөр байсан. Энэ өдөр согтууруулах ундааны зүйл зарж борлуулахыг хориглосон байсан. Тэгвэл эл өдөр согтуугаар тээврийн хэрэгсэл жолоодсон нийт 26 жолоочийг илрүүлж гарч болзошгүй осол хэргээс урьдчилан сэргийлж ажиллажээ.

Тухайлбал, СХД-ийн нутаг Хангайн 16-р гудамжны 23 тоот хашаанд зогсож байсан “H.Porter” маркийн авто машины тэвшин дээр 05 настай эрэгтэй Э нь тоглож байх үед уг авто машин хөдөлснөөс унаж дайрагдан гэмтсэн.

БГД-ийн нутаг Энхтайваны өргөн чөлөө, 10 дугаар хороолын автобусны буудлын замд T.Prius маркийн авто машины жолооч П нь Эрдэм транс ХХK-ийн “H.Aero City” маркийн Д жолоочтой автомашинтай мөргөлдөж зорчигч 29 настай эмэгтэй Х нарын 2 хүн гэмтжээ.

Энэ сарын 12-нд Замын-Үүд боомтоор хар тамхи нэвтрүүлсэн иргэдийг саатуулжээ. Тодруулбал, Эрээнээс орж ирсэн иргэн Б нь 70 гр нунтаг цагаан бодис авчирчээ. Түүнийг нь хүү Н нь А, Д нарын хамт Сонгинохайрхан дүүргийн 19 дүгээр хорооны нутаг дахь нэгэн цэнгээний газарт борлуулж байгаад тагнуул, цагдаагийнханд баригджээ.

Одоогоор ЭЦГ-ын Хар тамхитай тэмцэх хэлтсийнхэн эрүүгийн хэрэг үүсгэн шалгаж буй бөгөөд ээж, хүү хоёрыг найзуудтай нь хамт ШШГЕГ-ын харьяа Цагдан хорих 461 дүгээр ангид саатуулсан байна.

Цагдаагийн байгууллагаас өгсөн мэдээллээр тэд ашиг олох зорилгоор дээрх хэмжээний мансууруулах бодисыг улсын хилээр хууль бусаар нэвтрүүлсэн болохыг тогтоосон гэнэ.

Сэжигтэн Н нь ШШГЕГ-ын харьяа Хонхор дахь Баривчлах ял эдлүүлэх 431 дүгээр ангид хоригдож байхдаа мансууруулах бодис хууль бусаар олж авч, хэрэглээд баривчлагдсан хүмүүстэй танилцаж, тэднээс хар тамхи хилээр оруулж ирэн борлуулбал ашигтай гэсэн ойлголттой болсон аж. Улмаар ээжийгээ явуулж авчруулсан гэх мэдээлэл бий. ЭЦГ-ын Хар тамхитай тэмцэх хэлтсийнхэн дангаараа энэ төрлийн гэмт хэрэгтэй тэмцээд хүчрэхгүй байгаа. Иргэний агаарын тээврийн цагдаагийн хэлтэс, Буянт-Ухаа дахь Гаалийн газрынхан өнгөрсөн сарын 23-нд хамтарсан шалгалт явуулж, Бээжингээс “мөс” оруулан ирж байсан, Улаанбаатар хотын харьяат А, Д нарыг илрүүлэн шалгаж байна. Өдгөө А, Д нарын бүлэг, Б, Н, А, Д нарыг Эрүүгийн хуулийн 188.2, 192.2-т зааснаар сэжигтэн, яллагдагчаар тооцоод байгаа юм.

Өчигдөр орон нутагт ноцтой осол хоёр гарчээ. Тухайлбал, Өмнөговь аймгийн Ханбогд сумын Хайрхан багийн нутаг Цагаан хад гэх газрын шороон замд “Sinotruk ZZ3257” маркийн авто машины жолооч Г нь согтууруулах ундааны зүйл хэрэглэсэн үедээ автомашин жолоодон гэр, цайны газар мөргөж гэрт унтаж байсан 46 настай эмэгтэй Ц-ийн амь насыг хохироож хэргийн газрыг орхиж явсан байна.

Мөн Баянхонгор аймгийн Бөмбөгөр сумын төвд шороон замд улсын дугааргүй “Mустанг-200” маркийн Э жолоочтой мотоциклиос зорчигч 26 настай эрэгтэй С нь үсэрч амиа алдсан хэргийг шалгаж байна.

Завхан аймгийн Идэр сумын нутагт энэ сарын 17-нд газар хөдөлжээ. Тодруулбал, Идэр сумын төвөөс зүүн урд зүгт 37 км зайд, тухайн өдрийн 03:10 цагт 4.1 магнитудын хүчтэй чичирхийлжээ. Харин газар хөдлөлт иргэдэд мэдрэгдээгүй бөгөөд ямар нэгэн хохирол учраагүй гэнэ.

Сүүлийн үед фэйсбүүкээр хуурамч хаяг нээн, гадаад, дотоодын иргэдийг залилан мэхэлдэг, эд зүйлийг нь дээрэмддэг хэрэг ихэсч байна.

ЭЦГ-ын Цахим гэмт хэрэгтэй тэмцэх хэлтсийнхэн Баянзүрх дүүргийн иргэн 23 настай А, 28 настай С, Сүхбаатар дүүрэгт оршин суух М нарыг бусдыг залилан мэхэлсэн, айлган сүрдүүлж, дээрэмдсэн хэрэгт сэжиглэн шалгаж байна.

Тэд фэйсбүүкийн хуурамч хаягаар дамжуулан хүмүүсийг хуурч мэхлэн, уулзахаар болзжээ. Уулзмагцаа гар утас, мөнгийг нь дээрэмдээд зогсохгүй, оршуулгын газарт аваачин хувцсыг нь тайлж, ухсан нүхэнд хийн, аминд нь халдахаар айлган, их хэмжээний мөнгө авсан аж.

Мөн Хан-Уул дүүрэгт оршин суух 20 настай Б бусдын фэйсбүүкийн нууц үгийг олж аван, 20 иргэнийг 12 удаа залилан мэхэлж, мөнгө авсан хэргийг илрүүлэн шалгаж байна.

Олон Улсын Валютын сангийн ажлын хэсэг өнөөдөр Манай улсад айлчилна. Ажлын хэсгийн Техникийн багийн дүгнэлтийн дараа ОУВС-гаас Монгол Улсад “Стэнд бай” хөтөлбөрийг хэрэгжүүлэх эсэх талаарх албан ёсны хариугаа өгөх юм.

Манай улсын хувьд тус хөтөлбөрийн хүрээнд 1-1.5 тэрбум ам.долларын зээл авахаар яригдаж байна. АНУ-ын Вашингтон хотноо Олон улсын валютын сан (ОУВС), Дэлхийн банкны 2016 оны жилийн уулзалтад манай улсаас Сангийн сайд, Монгол банкны Ерөнхийлөгч албаны төлөөлөгчдийн хамт өнгөсөн долоо хоногт оролцсон юм. Уулзалтын үеэр Монгол Улсын нийгэм, эдийн засгийн өнөөгийн нөхцөл байдлын талаар санал солилцжээ.

“Kempinski” зочид буудалд:

08:30 цагт Байгаль Орчин, Аялал Жуулчлалын Яам болон “Тогтвортой хөгжлийн боловсрол” төсөл хамтран “Greening Business DNA” үндэсний хэмжээний форум зохион байгуулна.

Засгийн газрын 11-р байранд:

10:00 цагт ХЭҮК-ын дарга Ж.Бямбадорж МХЕГ-ын дарга Н.Цагаанхүү нар хамтран ажиллах санамж бичигт гарын үсэг зурна.

НЗДТГ-ын А танхимд:

10:00 цагт Нийслэлийн Цэрэг Татлагын Товчооны хурал болно.

Зууны мэдээ сонины Үндэсний мэдээллийн төвд:

11:30 цагт Сонгуулийн талаар Иргэдийн Шударга Шүүх ТББ-аас мэдээлэл хийнэ.

Шангрила моллд:

12:00 цагт Шинээр нээгдэж байгаа Багачуудын Музей сэтгүүлчдэд зориулан урьдчилсан танилцуулах өдөрлөг зохион байгуулна.