Month: October 2016

Улсын хэмжээнд энэ оны эхний есөн сарын байдлаар зам тээврийн осол, хэргийн улмаас 45 хүүхдийн амь нас хохирч, 959 хүүхэд хүнд, хөнгөн гэмтжээ.

Нийслэлийн хэмжээнд гурван хүүхдийн амь нас хохирч, 785 хүүхэд хүнд, хөнгөн гэмтсэн. Нийслэлд зам тээврийн ослын улмаас гэмтэж, бэртсэн хүүхдүүдийг насны байдлаар нь үзвэл 0-14 насны хүүхдүүд хамгийн их буюу 85,7%-ийг эзлэж байна.

Хүүхэд өртсөн зам тээврийн ослын тоон мэдээллээс үзэхэд нийслэлд явган зорчигч хэлбэрээр, Орон нутгийн замд тээврийн хэрэгслээр зорчиж байх үедээ буюу эцэг эх, асран хамгаалагчтайгаа явж байхдаа осолд өртөж амь нас, эрүүл мэндээрээ хохирсон байдаг. Энэ нь эцэг эх, асран хамгаалагч нарын хайхрамжгүй, хэнэггүй байдал, буруу дадал зуршил, бага насны хүүхэддээ тавих хараа хяналт сул, харгалзах хүнгүйгээр замын хөдөлгөөнд оролцуулдаг, тээврийн хэрэгсэлд хүүхдийг буруу тээвэрлэдэг зэргээс шалтгаалдаг байна.

Иймд эцэг эх, жолооч та бага насны хүүхдээ харгалзах хүнгүйгээр замын хөдөлгөөнд оролцуулахгүй байх, хараа хяналтаа сайжрууулж, замын хөдөлгөөнд аюулгүй зөв оролцох мэдлэг, дадлыг тогтмол хэвшүүлэхийг Замын цагдаагийн газраас анхааруулж байна.

Монголын уран зургийн галерей, Швейцарийн хөгжлийн агентлаг, харааны бэрхшээлтэй хүүхдийн 116 дугаар сургууль, Клей арт керамик арт студийн хамтран хэрэгжүүлсэн “Аниргүйн мэдрэмж” тэмтрэхүйн төслийн үзэсгэлэнгийн нээлт маргааш буюу энэ сарын 21-ний 15 цагт Уран зургийн галерейн үзэсгэлэнгийн танхимд нээгдэх гэж байна.

Төслийн зорилго нь харааны бэрхшээлтэй хүүхдүүдийн дунд керамик урлалын сургалтыг явуулснаар сургалтад хамрагдсан 20 хүүхдэд урлагийн боловсрол олгох, цаашлаад нарийн мэргэжлийн уран бүтээлч болох, бусдад урлагийн бүтээл туурвих чадвартай, хүсэл сонирхолтой гэдгээ харуулах зорилготой аж. Дээрх төсөлд хамрагдсан 20 хүүхдийн нийт 122 ширхэг керамик гар урлалын бүтээлийг үзэсгэлэнд тавих бөгөөд үзэсгэлэн энэ сарын 25-ныг хүртэл үргэлжилнэ.

Нэр бүхий иргэд Үндсэн хуулийн цэцэд хандаж Хуульчийн эрх зүйн байдлын тухай хуулийн 36 дугаар зүйлийн 36.3 дахь хэсэгт хуульчийн мэргэжлийн үйл ажиллагаа хамтран эрхлэх хуулийн этгээдийн хэлбэр нь хязгаарлагдмал хариуцлагатай нөхөрлөл байхаар хуульчилсан нь Үндсэн хуулийн Арван зургадугаар зүйлийн 4 дэх заалтад заасан хувийн аж ахуй эрхлэх эрхийг хязгаарласан гэх мэдээлэл ирүүлсний дагуу Цэцэд маргаан үүсгэсэн байна.

Уг маргааныг хянан хэлэлцэх Монгол Улсын Үндсэн хуулийн цэцийн дунд суудлын хуралдаан маргааш 9.30 цагаас Цэцийн ордонд нээлттэй болно хэмээн Үндсэн хуулийн цэцийн хэвлэлийн төлөөлөгч мэдээллээ.

Багануур дүүргийн дөрөвдүгээр хороонд оршин суух иргэн Б-гийн гэр есдүгээр сарын 30-ны өдөр шатаж, есөн настай хүү Ү гэртэйгээ шатаж нас барсан харамсалтай хэрэг гарсан юм.

Одоогийн байдлаар хэрэгт Эрүүгийн хуулийн тусгай ангийн 95 дугаар зүйлийн 95.1 дэх хэсэгт зааснаар эрүүгийн хэрэг үүсгэн, Багануур дүүргийн цагдаагийн хэлтсийн Хэрэг бүртгэх, мөрдөн байцаах тасгийн мөрдөн байцаагч, Цагдаагийн хошууч Г.Цэрэнжамц мөрдөн байцаалтын ажиллагаа явуулж, хяналтын прокурор Х.Эрдэнэтуяа хяналт тавьж ажиллаж байгаа аж.

Нийслэлийн 377 жилийн ойн
баярыг тохиолдуулан Нийслэлийн Засаг даргын Тамгын газар, Монголын
Өмгөөлөгчдийн Холбоотой хамтран иргэдэд үнэ төлбөргүй хууль, эрхзүйн зөвлөгөө,
туслалцаа үзүүлэх өдөрлөг зохион байгуулах гэж байна. Энэ үеэр иргэн, хуулийн
этгээдэд хуулийн туслалцаа үзүүлэх, тэдний эрх, хууль ёсны ашиг сонирхлоо
хамгаалахад нь туслах, хуульзүйн ач холбогдол бүхий баримт бичгийг
боловсруулахад мэргэжил аргазүйн дэмжлэг үзүүлэх, хуулийн асуудлаар амаар болон
бичгээр зөвлөгөө өгөх зэрэг үйлчилгээ үзүүлэх юм. Өдөрлөг нийслэлийн
үйлчилгээний нэгдсэн төвийн Дүнжингарав, Мишээл, Драгон дахь салбаруудад 2016
оны 10 дугаар сарын 28-ны өдрийн 10:00-19:00 цагт болно гэж Нийслэлийн ЗДТГ-ын Хэвлэл
мэдээлэл, олон нийттэй харилцах хэлтсээс мэдээллээ.

Энэ оны аравдугаар сарын 9-10-нд шилжих шөнө Сүхбаатар дүүргийн нэгдүгээр хороонд онц ноцтой зэвсэгт дээрмийн хэрэг гарсан. Хэрэгт нийт долоон иргэнийг сэжиглэн шалгаж, голлох үүрэгтэй оролцсон гэх дөрвөн этгээдийг цагдан хорих арга хэмжээ авсан юм. Харин оргон зайлсан гурван этгээдийг эрэн хайх ажиллагаа явуулсны үр дүнд нэг этгээдийг нь баривчлаад байсан бол дахин нэгийг нь өчигдөр буюу аравдугаар сарын 19-ний өдөр Сонгинохайрхан дүүргийн нутаг дэвсгэрээс баривчилжээ.

Хэрэгтэн Б-г Эрүүгийн хуулийн 147.3-т зааснаар гэмт хэрэг үйлдэн оргон зайлсан гэх үндэслэлээр мөрдөн шалгах ажиллагаа эхлүүлсэн байна. Одоогийн байдлаар хоёр этгээдийг дайчлан баривчилсан байгаа юм. Харин үлдсэн хэрэгтэнг орон даяар эрэн хайх ажиллагаа цааш үргэлжилж байна.

Монголбанкны өнөөдрийн зарласан ханшаар нэг ам.доллар 2319 төгрөг 19 мөнгөтэй тэнцэж байна. Харин “Найман шарга” валют арилжааны төвд нэг ам.долларыг 2230 төгрөгөөр авч, 2234 төгрөгөөр арилжиж байна. Түүнчлэн арилжааны банкууд нэг ам.долларыг 2232-2238 төгрөгөөр арилжиж байгаа ба цаашид дээрх ханш өсөх хандлагатай байгааг эдийн засагчдын зүгээс хэлж байна. Манай улсын бусад голлох валютуудын нэг евро 2585 төгрөгтэй тэнцэж байгаа бол БНХАУ-ын юань 346 төгрөгийн ханштай байна.

Сум, дүүргийн ИТХ-ын ээлжит сонгууль өчигдөр улс орон даяар явагдсан. Одоогоор Сонгуулийн ерөнхий хороо санал хураалттай холбоотой мэдээллийг нягтлах, баталгаажуулах ажил хийж байгаа юм. СЕХ-ноос сонгуулийн санал хураалтын ирцийн нэгтгэсэн мэдээг 15:00 цагаас өгөх юм байна. Урьдчилсан байдлаар улсын хэмжээнд нийт сонгогчдын 54.8 хувь нь оролцож саналаа өгчээ. Орон нутгийн хэмжээнд 62.7 хувь, Улаанбаатар хотын хэмжээнд 45.2 хувьтай байна гэсэн дүн мэдээлэл гарсан байна.