-ОХУ-ын Ерөнхийлөгч В.Путин “Алеппо хотод түр гал зогсоох хугацааг боломжийн хүрээнд сунгахад бэлэн байна” гэж мэдэгдлээ. Тэрээр цааш нь “Бид агаарын цохилтыг түр зогсоох хугацааг нөхцөл байдлыг харгалзан үзсэний үндсэн дээр тогтоохоор төлөвлөж байна. АНУ нь Сирийн сөрөг хүчнийхнийг “Жебхат аль-Нусра” зэрэг террорист бүлэглэлээс ялгаж салгана гэсэн амлалтаа биелүүлнэ гэж бид найдаж байна. Ингэснээр бид цаашид хамтын ажиллагаагаа хэрхэн явуулах талаар ойлголцох юм” гэв.
-Берлин хотноо Нормандын дөрвөлийн уулзалт болж өндөрлөжээ. Украины Ерөнхийлөгч П.Порошенко, ХБНГУ-ын Канцлер А.Меркель, Францын Ерөнхийлөгч Ф.Олланд, ОХУ-ын Төрийн тэргүүн В.Путин нарын уулзалт дөрвөн цаг орчим үргэлжилсэн бөгөөд хаалттай болсон байна. Тэд Сири, Украины асуудлаар хэлэлцэж, санал бодлоо солилцжээ.
-Аргентинд өсвөр насны охиныг хүчирхийлэн хөнөөснийг эсэргүүцэн олныг хамарсан жагсаал болсон байна. Тус улсын Мар-дель-Плата хотод 16 настай Люсия Перес охиныг мансууруулж, хүчирхийлсний дараа амийг нь хөнөөсөн хэрэг саяхан гарчээ. Хүний эрхийг хамгаалагчид иргэдийг хар хувцас өмсч, эсэргүүцлийн жагсаалд нэгдэхийг уриалсан аж. Аргентиний нийслэл Буэнос-Айрес болон бусад хотын иргэд ч жагсаалд нэгджээ. Жагсагчид “Хэрэв хэн нэгэн бидэнд гар хүрвэл бид хамтдаа хариуг нь өгөх болно” гэсэн бичээс бүхий лоозон гартаа барьцгаасан байжээ.
АНУ-ын Ерөнхийлөгчийн сонгууль болоход хорь ч хүрэхгүй хоног үлдээд байна. Тус сонгуульд өрсөлдөх Х.Клинтон, Д.Трамп нарын хэн нь дараагийн Ерөнхийлөгч болох нь дэлхий нийтийн анхаарлыг татсаар байна.
АНУ-ын Төрийн нарийн бичгийн дарга асан Х.Клинтон сонгуулийн өмнөх сунгааны нийт дүн болон гурван удаа болсон халз мэтгэлцээний дүнгээр ч ялалт байгуулаад буй.
“СNN” телевиз өчигдөр болж өндөрлөсөн хамгийн сүүлчийн халз мэтгэлцээний талаар үзэгчдийн дунд санал асуулга явуулсан байна. Санал асуулгын дүнгээр Ардчилсан намаас өрсөлдөх Х.Клинтон 52 хувийн саналаар өрсөлдөгчөө ялаад буй юм.
Бүгд найрамдах нам ба Ардчилсан намын хоёр нэр дэвшигч энэ удаагийн мэтгэлцээнээр улс орны өр ба эдийн засгийн байдал, нийгмийн эрүүл мэнд, нийгэмд тулгамдсан асуудал, дүрвэгсдийн асуудал, Дээд шүүхийн хараат бус байдал, олон улсад тулгамдаж буй асуудлууд гэсэн зургаан сэдвээр мэтгэлцжээ.
Халз мэтгэлцээн Дээд шүүх, АНУ-ын Үндсэн хууль гэсэн сэдвээр эхэлсэн байна. Ардчилсан намаас нэр дэвшигч Х.Клинтон Дээд шүүх томоохон корпораци, бизнесмэнүүдийн талд биш харин энгийн иргэдийн эрх ашгийн төлөө ажиллах ёстой гэв. Мөн тэрбээр эмэгтэйчүүд ба бэлгийн цөөнхийн эрхийг хамгаалахын төлөө тууштай тэмцэнэ гэдгээ ч мэдэгдсэн юм. Үр хөндөлтийн тухайд, Х.Клинтон үр хөндүүлэх эрхийг хамгаална гэдгээ амлав. Харин Д.Трамп “Хэрэв би Ерөнхийлөгчөөр сонгогдвол үр хөндүүлэхийг зөвшөөрсөн хуулийг хүчингүй болгоно” гэжээ.
Улсын өрийн асуудлаар Х.Клинтон өрийг нэмэгдүүлэхгүйгээр шинээр 10 сая ажлын байрыг бий болгоно гээд хэрэв АНУ-ын Ерөнхийлөгч болбол жижиг, дунд бизнесийг дэмжин хөгжүүлэхэд гол анхаарлаа хандуулна” гэсэн байна. Харин Бүгд найрамдах намаас нэр дэвшигч Д.Трамп 3.5 сая ажлын байр бий болгоно гэж онцлов. Тэрбээр “Бид өрийг хэрхэн хянахыг мэднэ” гэж байлаа.
Саналд оролцогчид энэ удаагийн мэтгэлцээнд Х.Клинтоныг тухайн сэдвээр хариулахдаа илүү гаргалгаатай байсан гэв. Мөн зөв няцаалт хийж байсан хэмээн үзсэн байна. Тухайлбал, өрийн тухай асуудлаар мэтгэлцэх үед Х.Клинтон “АНУ-ын худалдааны эргэлт энэ оны хувьд бага зэрэг буурсан. Гэвч ирэх дөрвөн жилд тогтвортой байх боломжтой. Учир нь банкуудын зөв бодлого явуулсныг үйлдвэрлэл, экспортын орлого хэр нэмэгдсэнээс харж болно” гэжээ. Харин Д.Трамп “Обамаг засаг барих үед өрийн хэмжээ жил бүр нэмэгдсээр байгаа. Үүний дагуу эргэн төлөлтийн эрсдэл дагаж өссөөр буй” гэж шүүмжилсэн байна.
Халз мэтгэлцээний нэг гол сэдэв бол ОХУ, АНУ-ын харилцааны тухай асуудал байжээ. Тэрбумтан Д.Трамп мэдэгдэхдээ ОХУ-ын төрийн тэргүүн Х.Клинтоныг хүндэлдэггүй гэжээ. Харин АНУ-ын Төрийн нарийн бичгийн дарга асан хариулахдаа В.Путин АНУ-ын Ерөнхийлөгчөөр өөрийнхөө утсан хүүхэлдэйг сонгогдоосой гэж хүсч байгаа” гэв. Мөн тэрбээр цөмийн зэвсгийг хянах эрхийн тухайд Д.Трампад итгэл хүлээлгэж болохгүй гэсэн байна. Үүний хариуд Д.Трамп өөрийг нь 200 гаруй цэргийн өндөр албан тушаалтан дэмждэг хэмээн онцолж байв. Тэрбээр “Бид татвар төлөгчдийн мөнгийг өөр улс орнуудыг хамгаалахад зарцуулж байна. Саудын Араб, Япон, Өмнөд Солонгос, Герман зэрэг улсуудыг хамгаалахад дахин төсвийн мөнгө хуваарилахыг би зөвшөөрч чадахгүй. Бид уг асуудлаар бусад улстай байгуулсан гэрээ хэлэлцээрээ дахин нягтлах хэрэгтэй” гэв.
Ширүүхэн уур амьсгал дунд болж өндөрлөсөн энэхүү мэтгэлцээний эхлэл болон төгсгөлд хоёр нэр дэвшигч гар барилгүй салсан талаар хэвлэл мэдээллийн хэрэгслээр онцолж байлаа. Мэтгэлцээн 90 минут үргэлжилсэн бөгөөд чиглүүлэгчээр нь “Fox News” телевизийн хөтлөгч Крис Уоллес ажиллажээ. Зарим хэвлэл мэдээллийн хэрэгслийн онцолсноор үзэгчдийн 36 хувь нь Ардчилсан намын дэмжигчид байсан, харин 29 хувь нь Бүгд найрамдах намын дэмжигчид гэсэн байна. Мөн арван үзэгч тутмын зургаа нь Д.Трампыг таамаглаж байснаас илүү сайн оролцсон гэсэн аж. Түүнчлэн үзэгчдийн 44 хувь нь Д.Трамп, Х.Клинтон нар адил үзүүлэлттэй байсан гэж үзжээ.
Зарим ажиглагчдын онцолж буйгаар гурван мэтгэлцээнд Х.Клинтон ялсан нь түүнийг хүлээн зөвшөөрсөн хэрэг бус гэв. Учир нь сонгох нэр дэвшигч байхгүй, мөн Ардчилсан намын дэмжигчид дийлэнх хувийг эзэлж байсан зэрэг нь АНУ-ын Төрийн нарийн бичгийн дарга асан Х.Клинтон ялах нөхцөл болсон юм гэв.
Бэлтгэсэн Д.ЦЭРЭНДОЛГОР