Month: October 2016

“Тархины харвалтын эсрэг дэлхийн өдөр”-ийг жил бүрийн аравдугаар сарын 29-ний өдөр тэмдэглэдэг. Тархины харвалт нь хөдөлмөрийн чадвар алдалтад хүргэх гол шалтгаан болдог гэдгийг мэргэжилтнүүд онцолж байна. Харвалт нь дэлхий дээрх нас баралтын хоёрдугаарт эрэмбэлэгддэг, аюултайд тооцогддог өвчний нэг аж.

Жилд 17 сая хүн тархины харвалттай амьдардаг бөгөөд 6 секунт тутамд нэг хүн тархины харвалтанд өртдөг гэнэ.

Энэ талаар өнөөдөр Нийгмийн эрүүл мэндийн хүрээлэнгээс сэтгүүлчдэд мэдээлэл хийлээ.

Манай улсын хувьд 2009 онд харвалт судлалын нийгэмлэг байгуулагджээ. Энэ тухай Монголын харвалт судлалын нийгэмлэгийн тэргүүн, Улсын нэгдүгээр эмнэлгийн мэдрэлийн зөвлөх эмч Р.Амарбаясгалан хэлэхдээ “Энэ жил долоо дахь жилдээ эл өдрийг тэмдэглэж байгаа. Энэ жил “Тархины харвалт эмчлэгддэг, мэдлэг, арга, үйл ажиллагаа чухал” уриан дор тус өдрийг тэмдэглэн өнгөрүүлэх гэж байна. Одоогоор манайд улсын нэг болон гуравдугаар төв эмнэлэг эмнэлэгт Тархины харвалтын төв ажиллаж байна” гэлээ.

“Тархины харвалтын дэлхийн өдөр”-ийг угтан энэ сарын 27-ны өдөр нэг болон гуравдугаар эмнэлэг нээлттэй хаалганы өдөрлөг зохион байгуулах аж. Энэ хүрээнд иргэд олон нийтэд харвалтын эрсдэл, түүнээс урьдчилан сэргийлэх, дасгал хөдөлгөөний ач холбогдлыг сурталчлахаас гадна эмч, мэргэжилтнүүд зөвлөгөө өгч, үнэ төлбөргүй үзлэг хийх аж.

Мөн дүүргийн нэгдсэн эмнэлэг, эрүүл мэндийн төв, нийслэлийн түргэн тусламжийн эмч нарыг сургагч багшийн сургалтанд хамруулахаар төлөвлөөд байгаа юм байна.

Дашрамд, Дэлхийн эрүүл мэндийн байгууллагаас харвалтаас урьдчилан сэргийлэхийн тулд:

• Иргэд шинж тэмдгийг эрт тани, түргэн тусламж дуудах
• Анхны арга хэмжээг зөв авах
• Харвалтын төвд 3 цагийн дотор яаралтай хандах ёстой гэж зөвлөж байна.

Улсын ерөнхий прокурорын туслах, Дотоод аюулгүй байдлын албаны дарга Э.Амарбат, Нийслэлийн прокурорын хяналтын прокурор Б.Бясман нар өнөөдөр сэтгүүлчдэд мэдээлэл хийлээ. Тэд Улсын ерөнхий прокуророос үндсэн чиг үүргийн хүрээнд 2016 оны гуравдугаар улирлын байдлаар хийсэн ажлаа танилцуулсан юм.

Мөн энэ үеэр олны анхаарлын төвд байгаа гэмт хэргүүдийн талаар сэтгүүлчдийн асуултад хариуллаа. Хөгжлийн банкны удирдлагуудтай холбоотой хэргийн талаар тодруулахад Нийслэлийн прокурорын хяналтын прокурор Б.Бясман “Хөгжлийн банкны удирдлагуудтай холбоотой хэрэг мөрдөн байцаалтад шалгагдаж байна. Одоогоор хэргийн улмаас хэдий хэр хэмжээний хохирол үүссэн асуудал тодорхой болоогүй. Хохиролтой холбоотой шинжээч томилж шаардлагатай ажиллагаануудыг хийж байна.

Удирдлагуудтай холбоотой хэрэгт нийт 4-6 хүнийг холбогдуулан сэжигтнээр татан шалгаж эхэлсэн байгаа.Таслан сэргийлэх арга хэмжээний хувьд гэвэл Хөгжлийн банкны гүйцэтгэх захирлаар ажиллаж байсан Нанжидын Мөнхбатыг хорьсон. Түүнийг 2016 оны аравдугаар сарын 11-ний өдрөөс эхлэн сэжигтнээр тооцон таслан сэргийлэх арга хэмжээг авч Сүхбаатар дүүргийн Эрүүгийн хэргийн анхан шатны шүүгчийн захирамжаар хорьсон. Шалгалтын ажиллагаа эхлээд удаагүй байгаа учраас илүү дэлгэрэнгүй мэдээлэл өгөх боломжгүй гэв.

Хүний эрхийн хууль М.Ичинноров болоод бусад хуульчид нэгдэн “Тогтвортой амжиргаа III төсөл”-ийн ажилтнуудыг хоморголон халсан асуудлаар Сангийн яамыг Захиргааны хэргийн шүүхэд өгөх болжээ. Тодруулбал, Сангийн яам, Дэлхийн банк болон Швейцарийн Хөгжлийн агентлагтай хамтран “Тогтортой амжиргаа III төсөл”-ийг 2015 оноос хэрэгжүүлж /2018 он хүртэл/ эхэлжээ. Энэхүү төслийн хүрээнд 21 аймагт Сум дэмжих баг байгуулж үйл ажиллагаа явуулж эхэлсэн ба сум дэмжих багуудад нийт 105 иргэнийг зургаан сарын хугацаатай хөлсөөр ажиллах гэрээгээр ажилд авсан байна. Гэрээнд зургаан сарын хугацаа дууссаны дараа ажилтнуудын мэдлэг, чадварыг үнэлж, гэрээг нэг жилээр сунгана гэж заажээ. Гэвч өнгөрсөн сарын 28-нд Сангийн яамны ТНБД-ын албан үүргийг түр орлон гүйцэтгэгч, Санхүүгийн бодлогын газрын дарга Б.Нямаагийн албан тоотоор ажлаас нь чөлөөлсөн ажээ.

Нийслэлийн 377 жилийн ойг тохиолдуулан Батлан хамгаалахын сайд Улаанбаатар хотын удирдлагуудыг хүлээн авч уулзлаа. Цаашдын хамтын ажиллагааны талаар санал бодлоо солилцсон байна. Энэ үеэр Батлан хамгаалахын сайд Б.Бат-Эрдэнэ болон Нийслэлийн Засаг дарга бөгөөд Улаанбаатар хотын захирагч С.Батболд нар 2016-2020 онд хамтран ажиллах санамж бичигт гарын үсэг зурлаа.

Санамж бичигт нийслэлийн тохижилт, бүтээн байгуулалтын ажилд Батлан хамгаалах яам дэмжлэг үзүүлэн ажиллахаар тусгасан байна. Нийслэл хотод хэрэгжиж байгаа гэр хорооллын дахин төлөвлөлтийн арга хэмжээнд Батлан хамгаалах салбарын алба хаагчдыг хамруулж, нийслэл, дүүргийн бүтээн байгуулалтын ажилд Зэвсэгт хүчний барилга-инженерийн ангиуд, төрийн өмчит үйлдвэрийн газруудыг оролцуулах болон хуулийн хүрээнд гүйцэтгүүлэх талаар дэмжлэг үзүүлэх юм.

Зэвсэгт хүчнийг сурталчлах, иргэн-цэргийн харилцааг бэхжүүлж, эх оронч үзлийг төлөвшүүлэхэд талууд хамтран ажиллана. Мөн Нийслэлийн хэмжээнд Батлан хамгаалах төрийн үйлчилгээг иргэдэд түргэн, шуурхай хүргэх, Зэвсэгт хүчний анги, байгууллагын үйл ажиллагааг нээлттэй сурталчлах зэрэг заалтууд санамж бичигт тусгагджээ. Нийслэлийн ногоон байгууламжийг хамгаалахад мөн талууд хамтарна. Тухайлбал, нийслэлийн хэмжээнд цэргийн алба хаагчдыг ногоон бүсийн ойг хамгаалах, нөхөн сэргээх ажилд оролцуулахаас гадна хуурайшилт ихтэй улиралд ой, хээрийн түймрээс урьдчилан сэргийлэх ажилд цэргийн албыг дүйцүүлэн хааж буй иргэдийг татан оролцуулна. Талууд санамж бичгийн хүрээнд тухайн жилд хийх ажлаа төлөвлөн, хэрэгжилтэд нь харилцан хяналт тавьж, оны эцэст дүгнэж байх юм.

Нийслэлийн Засаг дарга бөгөөд Улаанбаатар хотын захирагч С.Батболд “Батлан хамгаалах яам, нийслэл хотын хооронд уламжлалт хамтын ажиллагаа байдаг. Нийслэл хот бол Монгол улсын хүн амын тал хувь нь суурьшсан хот. Тэр утгаараа батлан хамгаалахын чиглэлээр иргэдийг сургаж, дадлагажуулах, цэргийн насны хүмүүсийн дайчилгаа сургалтын чиглэлээр хамтран ажилладаг. Энэ мэтчилэн ирэх 4 жилд хэрхэн хамтарч ажиллах талаар өнөөдөр гарын үсэг зурлаа. Онцгой байдал тохиолдсон үед болон тайван цагт талууд ямар үүрэг хүлээж ажиллах вэ гэдгийг тодорхой тусгаж өгсөн байгаа” гэлээ.

Батлан хамгаалахын сайд Б.Бат-Эрдэнэ “Өмнө ч бид нягт хамтын ажиллагаатай байсан. Өнөөдөр санамж бичигт гарын үсэг зурснаар энэ харилцаа илүү тодорхой болох ач холбогдолтой. Батлан хамгаалах салбарын багц хуулиуд батлагдсантай холбоотойгоор салбарын үйл ажиллагаа, цар хүрээ өргөжсөн. Энэ хэрээр батлан хамгаалах салбарын бодлого, ажиллагааг сурталчлах, иргэдтэйгээ хамтарч ажиллах шаардлага бий болж байна. Тиймээс салбарын яам нийслэлтэй хамтарч, өргөн цар хүрээтэй ажиллахаар төлөвлөж байна.” гэсэн юм.

Үүний дараа Батлан хамгаалахын сайд Б.Бат-Эрдэнэ, Нийслэлийн Засаг дарга бөгөөд Улаанбаатар хотын захирагч С.Батболд, НИТХ-ын дарга Ц.Сандуй болон албаны бусад хүмүүс Бүх цэргийн хар сүлдэнд хүндэтгэл үзүүллээ.

Цагдаагийн байгууллагаас жолооны үнэмлэхээ солиулах, нөхөн авахаар захиалга өгсөн иргэдэд тухайн хүний ажиллаж, амьдарч буй газарт нь хаягаар нь хүргэж өгөх үйлчилгээг нэвтрүүлсэн байна. Энэ үйлчилгээг ТҮЦ машин, Төрийн үйлчилгээний нэгдсэн төв, ezasag.mn сайтаар дамжуулан авах боломжтой юм байна. Жолооны үнэмлэхийг хүндрэл бэрхшээлгүй, хурдан шуурхай олгохоор Дүнжингарав үйлчилгээний төвд байрлах Төрийн үйлчилгээний нэгдсэн төвөөр дамжуулан цагдаагийн байгууллагаас жолооны үнэмлэх солих, нөхөн авах, лавлагаа гаргах, цахим шалгалт авах үйлчилгээг амралтын өдрүүдэд ч үзүүлж байна. Өнөөдрийн байдлаар 6143 иргэн энэ төрлийн үйлчилгээ үзүүлсэн гэлээ.

Засгийн газраас нийслэлд 24 цаг
тасралтгүй үйл ажиллагаа явуулах “Шөнийн гудамж”-ны төслийг эхлүүлэхээр зэхээд
байна. Улаанбаатар хотын төв цэг болох Сеүлийн гудамжийг сонгожээ.
Манай орныг зорин ирсэн жуулчид шөнийн цагаар үйлчилгээ авах, амарч зугаацах,
алжаалаа тайлах, хоол унд зооглох боломж хязгаарлагдмал байдаг зэрэг нь
жуулчдын сэтгэл ханамжийн байдалд шууд нөлөөлдөг гэдгийг судалгаагаар нотлосон
байдаг. Аялал жуулчлал өндөр хөгжсөн Нью Йорк, Токио, Сеүл, Бээжин, Банкок,
Куала-Лампур зэрэг хотод худалдаа үйлчилгээний шөнийн гудамж, захууд олноор
байдаг бөгөөд энд жуулчид амарч зугаалах, чөлөөт цагаа өнгөрүүлэх, худалдаа
үйлчилгээ авах бүхий л нөхцөл боломжийг бүрдүүлсэн байдаг байна.