Month: October 2016

Улсын Их Хурлын Өргөдлийн байнгын хорооны өнөөдрийн /2016.10.25/ хуралдаан 15 цаг 27 минутад 52.6 хувийн ирцтэй эхэллээ. Хуралдааны эхэнд тус байнгын хорооны 2016 оны намрын ээлжит чуулганы хугацаанд хийх ажлын төлөвлөгөө батлах тухай асуудлыг хэлэлцсэн юм.

Хэлэлцэж буй асуудалтай холбогдуулан УИХ-ын гишүүн Ё.Баатарбилэг Соёлын өвийг хамгаалах тухай хууль тогтоомжийн хэрэгжилтэд хяналт тавих, сайжруулах талаарх өргөдлүүдийг хэлэлцэх ажлын бүрэлдэхүүнд орох мөн УИХ-ын гишүүн А.Сүхбат Хүнсний аюулгүй байдлын хууль тогтоомжийн хэрэгжилтийн талаарх өргөдлүүдийг хэлэлцэх ажлын бүрэлдэхүүнд орох хүсэлт тус тус гаргасныг Байнгын хорооны дарга дэмжиж буйгаа илэрхийллээ. Түүнчлэн 2016 оны намрын ээлжит чуулганы хугацаанд сургуулийн өмнөх боловсролыг сайжруулах, иргэдээс ирүүлсэн өргөдлийн дагуу холбогдох хуулийн хэрэгжилтэд хяналт тавих ажиллагаа хийхээс гадна тухайн асуудлын хүрээнд газар дээр нь ажиллах асуудлыг төлөвлөгөөнд оруулах саналыг УИХ-ын гишүүн Ё.Баатарбилэг, Г.Мөнхцэцэг нар гаргасан юм. Ийнхүү УИХ-ын гишүүд байр сууриа илэрхийлж, санал хэлж дууссаны дараа Өргөдлийн байнгын хорооны 2016 оны намрын ээлжит чуулганы хугацаанд хийх ажлын төлөвлөгөө 90.9 хувийн саналаар батлагдав.

Дараа нь Улсын Их Хурлын гишүүдийн хариуцан ажиллах салбарын хуваарийг шинэчлэн батлах тухай тус байнгын хорооны тогтоолын төслийг хэлэлцлээ. Хэлэлцэж буй асуудалтай холбогдуулан санал хэлэх гишүүн гараагүй тул тус Байнгын хорооны Улсын Их Хурлын гишүүдийн хариуцан ажиллах салбарын хуваарь гишүүдийн 100 хувийн саналаар батлагдлаа.

Өнөөдрийн хуралдаанаар хэлэлцэх Бусад асуудлын хүрээнд Ажлын хэсэг байгуулах тухай байсан ба Байнгын хорооны дарга Д.Сарангэрэл өчигдөр /2016.10.24/ зохион байгуулагдсан нээлттэй хэлэлцүүлгийн үеэр Туул голын бохирдлыг бууруулах Ажлын хэсэг байгуулах талаар хэлэлцсэн болохыг танилцуулсан юм. Тэрээр тус Ажлын хэсгийн ахлагчаар УИХ-ын гишүүн А.Сүхбатыг томилох горимын санал гаргав. УИХ-ын гишүүд Ажлын хэсгийн ахлагчийг дэмжиж буйгаа илэрхийлэхийн сацуу Туул голын бохирдлыг бууруулах ажлыг цаг алдалгүй эхлүүлэх хэрэгтэйг дурдаж байсан юм.

Ингээд Туул голын бохирдлын асуудлаар ирүүлсэн өргөдлийн дагуу холбогдох хууль тогтоомжийн хэрэгжилтийг судалж, шийдвэрийн төсөл боловсруулан Байнгын хорооны хуралдаанаар хэлэлцүүлэхэд бэлтгэх үүрэг бүхий Ажлын хэсгийг байгуулж, УИХ-ын гишүүн А.Сүхбатаар ахлуулахыг олонхийн саналаар батлав.

Өнгөрсөн ням гаригт болсон сум, дүүргийн ИТХ-ын сонгуулийн үр дүнд Баянзүрх дүүргийн Ардчилсан нам олонх болж, 22 суудал авсан. Гэвч дүүргийн Сонгуулийн хорооны дарга О.Бат-Өлзий хууль бусаар АН-аас нэр дэвшин ялалт байгуулсан зургаан хүний нэрийг жагсаалтаас хасах тухай тогтоолыг гаргасан талаар эх сурвалжууд мэдээлж байна.

Сонгуулийн тухай хууль тогтоомжид зааснаар дээрх нэр дэвшигчдийн хууль бус үйл ажиллагаа явуулсныг тухайн орон нутгийн цагдаагийн байгууллага тогтоогоогүй байхад ийнхүү дур мэдэн тогтоол гаргасан нь Сонгуулийн тухай хуулийн 159.3, 3.1.7, 116.1, 116.2, 117.1, 117.2 болон 118.1 дэх заалтуудыг ноцтой зөрчжээ.

Тодруулбал, дүүргийн Сонгуулийн хорооны дарга О.Бат-Өлзийгийн тогтоолд сонгуулийн хорооны нарийн бичгийн дарга Ч.Мэндсайхан болон хорооны бусад гишүүд гарын үсэг зурж баталгаажуулаагүй байгаа нь уг тогтоол хүчин төгөлдөр бус байгаа ажээ.

Төрийн ордонд Хууль зүйн байнгын хорооны хуралдаан болж байна. Хуралдаанаар Эрдэнэтийн асуудлыг хэлэлцэж байна. Ерөнхий сайд асан Ч.Сайханбилэг хуралд оролцон асуултад хариулж байна.

Ч.Сайханбилэг: Би Эрдэнэтийг бүр мөсөн алдах эрсдлээс аварсан. Сонгуулийн сурталчилгаа нэгэнт эхэлчихсэн байсан учир ЗГ-ын хуралдааныг хаалттай хийсэн. Эрдэнэтийн 49 хувийг ЗГ худалдаж авах боломжгүй байсан. Харин Ц.Нямдорж үүнийг үгүйсгэх хувийн компани зээл аваад авч болж байхад төр яахаараа авч болдоггүй юм бэ гэв.

Мөн хуралд ХХБ-ы гүйцэтгэх захирал О.Орхон оролцож байна.

О.Орхон: ОХУ өмнө нь Цагаан суварга ордыг эзэмших амлалтаасаа буцаж байсан. Тэд монголын төрд итгэдэггүй. Бид ЗГ-ын баталгаагаар 500 сая ам.долларын бонд босгосон. Тэр өдрөө МБ-д тушаан мөнгөтэй болсон. Сангийн сайдын тогтоолоор Эрдэнэтийн ТУЗ-ийг томилсон. Мөн шинэ дүрмийг баталсан гэв.

Ө.Энхтүвшин: Төрийн өмчийн хороог татан буулгаснаар та нар бэлтгэлээ эртнээс базаасан гэж буруутгав. Харин Ч.Сайханбилэг, Та нар төрд олон жил ажиллачихаад хуйвалдаад байх хэрэггүй. Төрийн өмчийн хороог ЗГ биш УИХ тогтоол гарган татан буулгасан. Маргааш Б.Болор өөрөө ирж тайлбараа тавина гэв.

Харин УИХ-ын гишүүн А.Сүхбат: Чоно борооноор гэгчээр ард түмний баялгийг бид сонгуулийн үеэр алдсан гэв.

Ч.Сайханбилэг:Засгийн газрын бондын дийлэнхийг энэ банк худалдан авсан байсан. ХХБ-наас гаргасан мөнгө цэвэр үү, бохир уу гэдгийг ч асуулаа. Энэ талаар Засгийн газрын хуралдаанаар ч хэлэлцсэн гэв.

УИХ-ын гишуун Ж.Батзандан: Сахал Эрдэнэбилэг үлгэрийн баатар болж тоглох ёсгүй. Одоо болсон. Ч.Сайханбилэг О.Орхоны үгээр шийдвэр гаргасан гэдэг нь Засгийн газрын хуралдааны шийдвэрт тов тодорхой бий. Надад ХХБ- тай ашиг сонирхлын зөрчил байхгүй. Яагаад Хөгжлийн банкны мөнгө энэ банкаар дамжаад байна.
Хууль зүйн байнгын хорооны хуралдааны дүрс бичлэгийг хүргэе.

Ийнхүү “Эрдэнэт”-ийн асуудлаар байнгын хорооны хуралдаан үргэлжилж байна.

О.ӨНӨР

УИХ дахь МАН-ын бүлгийн хуралдаан саяхан дууслаа. Тус бүлгийн хуралдаанаар “Эрдэнэт”-ийн асуудлыг хэлэлцэж, байр сууриа нэгтгэсэн юм. Харин одоо Хуульзүйн байнгын хороо хуралдана. Хуралдаанаар “Эрдэнэт”-ийн асуудлыг хэлэлцэх юм. Хуульзүйн байнгын хорооны хуралдаан экс Ерөнхий сайд Ч.Сайханбилэг оролцоно гэсэн мэдээлэл байна.