Month: October 2016

Ахмад настан, алдар цолтнуудад нэмэгдэл, хөнгөлөлөлт олгоно

Ахмад настны тухай болон алдар цолтон ахмад настанд төрөөс нэмэгдэл, хөнгөлөлт олгох тухай хуулийн шинэчилсэн найруулгын төслийг хэлэлцэн УИХ-д өргөн мэдүүлэхээр болов.

Эдийн засаг хүндрэлтэй байгаа хэдий ч ахмад настны нийгмийн хамгааллыг сайжруулах, ая тухтай амьдрах нөхцөлийг бүрдүүлэх, мэдлэг, ур чадвараа өвлүүлэн үлдээх, нийгмийн амьдралд идэвхтэй оролцох боломжийг нь нэмэгдүүлэх үүднээс хуулийн төслүүдийг боловсруулжээ.

Засгийн газар үйл ажиллагааныхаа хөтөлбөрт Ач санах хууль баталж, азай буурлууддаа “Насны хишиг” олгох эрх зүйн орчныг бүрдүүлэхээр тусгасан. Энэ дагуу 65 ба түүнээс дээш насны ахмадууддаа жилд хоёр удаа 100-300 мянган төгрөг олгохоор ирэх оны төсвийн төсөлд тусгаад байгаа юм.

Ахмад настны тухай хуулийн төсөл нь ахмад настны амьжиргаа, хөгжил, оролцоог дэмжих, үйлчилгээ авах боломжийг бүрдүүлэх зорилготой бөгөөд 4 бүлэг, 17 зүйлтэй. Ахмадуудад лавлагаа, мэдээллийн зөвлөгөө өгөх, сургах, хөгжүүлэх явуулын үйлчилгээ үзүүлэх, хэрэгцээтэй дэмжлэг, туслалцаа, үйлчилгээний талаарх мэдээллийг утсаар болон онлайн хэлбэрээр хүргэх зэрэг шинэлэг хэлбэрийн ажлыг хэрэгжүүлэхэд 750 сая төгрөг зарцуулахаар төлөвлөв.

319 иргэний хилийн хоригийг цуцалжээ

Монгол Улсын Ерөнхий сайдын захирамжаар байгуулагдсан Хөрөнгө оруулагчид, аж ахуй эрхлэгчдэд төрийн захиргааны болон хуулийн байгууллагаас хууль бусаар дарамт учруулсан, хүнд суртал гаргасан, үндэслэлгүйгээр мөрдөн шалгасан зэргээр эрх ашгийг нь хохироосон асуудлыг шалгаж судлах Ажлын хэсэг Засгийн газрын ээлжит хуралдаанд санал дүгнэлтээ танилцууллаа. ХЗДХ-ийн сайд С.Бямбацогтын ахалсан тус Ажлын хэсэг дэргэдээ дэд ажлын хэсэг байгуулан ажиллав. Ажлын хэсэг хөрөнгө оруулагч, аж ахуй эрхлэгчдийг Монгол Улсын хилээр гарахыг түдгэлзүүлсэн талаарх судалгааг хийж санал дүгнэлт гаргажээ. 2016 оны 8 дугаар сарын 31-ний өдрийн байдлаар хил нэвтрэх эрхийг нь түдгэлзүүлсэн Монгол Улсын 5391, гадаадын 191, нийт 5582 иргэн бүртгэлтэй байсан бол ялын хугацаа дууссан, эрүүгийн хэргийг эцэслэн шийдвэрлэсэн, шүүхийн шийдвэрийг биелүүлсэн зэрэг хуульд заасан үндэслэлээр Монгол Улсын 298 иргэн, гадаадын улсын 21 иргэн, нийт 319 иргэнийг Монгол Улсын хилээр гарахыг түдгэлзүүлсэн шийдвэрийг цуцлажээ. Үүнд:

Прокурорын байгууллагын шийдвэрээр Монгол Улсын 164 иргэн, гадаад улсын 13 иргэн,

Шүүхийн шийдвэр гүйцэтгэх байгууллагын шийдвэрээр Монгол Улсын 128 иргэн, гадаад улсын 2 иргэн,

Шүүхийн шийдвэрээр Монгол Улсын 6 иргэн, гадаад улсын 6 иргэн тус тус хамрагдсан байна.

Мөн тухайн хүнд өөрт нь мэдэгдэлгүйгээр төрийн албан хаагч дур зоргоороо авирлаж хилийн хориг тавьдаг, хориг тавьчихаад түүнийгээ таг мартдаг асуудлыг нэг мөр цэгцлэхээр шийдвэрлэлээ. Тухайлбал, Монгол Улсын хилээр гарахыг түдгэлзүүлэх шийдвэр гаргах, түүнийг цуцлах үйл ажиллагааг нэг цонхоор явуулах, хилээр гарахыг түдгэлзүүлсэн иргэдийн бүртгэл, хяналт, мэдээллийн нэгдсэн сантай болох нь зүйтэй гэж үзэв. Түүнчлэн хилээр гарахыг түдгэлзүүлсэн шийдвэрийг ямар албан тушаалтан хэзээ гаргасан, хэзээ цуцлахыг тодорхой заах, Эрүүгийн байцаан шийтгэх хууль, Монгол Улсын иргэн гадаадад хувийн хэргээр зорчих, цагаачлах тухай хууль, Шүүхийн шийдвэр гүйцэтгэх тухай хууль, Гадаадын иргэний эрх зүйн байдлын тухай зэрэг хуулиудад холбогдох өөрчлөлт оруулах санал гаргав.

Үндэслэлгүйгээр эрүүгийн хэрэг үүсгэдэг явдлыг таслан зогсооно

Ажлын хэсгийнхэн хөрөнгө оруулагч, аж ахуй эрхлэгчдэд холбогдуулан үүсгэсэн эрүүгийн хэргийн шийдвэрлэлтийн талаар судалгаа хийж үзэхэд Эрүүгийн хуулийн тусгай ангийн 35 зүйл хэсэгт заасан 374 хэрэгт 403 иргэнд холбогдуулан эрүүгийн хэрэг үүсгэн шалгасан болох нь тогтоогджээ. Мөн эрүүгийн 93 хэрэгт сэжигтэн, яллагдагчийн гэм буруутайг нотлох баримтаар тогтоож, яллах дүгнэлт үйлдүүлэхээр прокурорт шилжүүлсэн бол эрүүгийн 139 хэргийг хэрэгсэхгүй болгох санал гаргаж прокурорт шилжүүлсэн байна. Үүнээс харахад хэрэгсэхгүй болгосон хэрэг нь шүүхэд шилжүүлсэн хэргээс 33 хувиар их байна. Энэ нь гэмт хэргийн шинжтэй гомдол мэдээллийг сайн шалгаж үзэлгүй үндэслэлгүйгээр эрүүгийн хэрэг үүсгэн шалгаж байна гэсэн үг юм. Тиймээс хөрөнгө оруулагч, аж ахуй эрхлэгчдэд хууль бусаар эрүүгийн хэрэг үүсгэдэг, эрүүгийн хэрэг үүсгээд дарамталдаг, нэг талыг барьж шалгадаг, танил талдаа үйлчилдэг, хууль зөрчдөг, олон арван сар шалгадаг явдлыг таслан зогсоож, хууль эрх зүйн орчныг сайжруулах нь зүйтэй гэж үзлээ.

Хуулиас давсан заалттай 86 шийдвэрийг хүчингүй болгож, ТУСГАЙ ЗӨВШӨӨРЛИЙН ТООГ 2-3 дахин ЦӨӨЛНӨ

Өнөөдөр Захиргааны хэм хэмжээний актын улсын нэгдсэн санд бүртгэлтэй, хүчин төгөлдөр мөрдөгдөж байгаа 971 захиргааны хэм хэмжээний актаас хөрөнгө оруулалт, аж ахуйн үйл ажиллагаа эрхлэхтэй холбоотой Сайдын тушаал 168, Агентлагийн даргын тушаал 25, аймаг, нийслэлийн Засаг даргын захирамж 44 нийт 237 шийдвэр байна. Уг 237 захиргааны хэм хэмжээний актыг Ажлын хэсгийн хүрээнд хянан үзээд холбогдох хуулиудад нийцээгүй 100 шийдвэр байсныг тогтоож, хууль зөрчсөн зөрчлийг арилгах үүднээс Хууль зүй, дотоод хэргийн яам 86 шийдвэрийг хүчингүй болгох, 14 шийдвэрийг шинэчлэн баталж бүртгүүлэх тухай дүгнэлтийг холбогдох байгууллага, албан тушаалтанд хүргүүлжээ. Ажлын хэсэг мөн өнөөдөр байгаа 1400 гаруй нэр төрлийн тусгай зөвшөөрлийн тоог 2-оос 3 дахин бууруулж, зөвшөөрснөөс бусдыг хориглох бус хориглосноос бусдыг зөвшөөрч,эдийн засаг, бизнесийн үйл ажиллагааг дэмжих санал гаргасныг Засгийн газар дэмжлээ.

Төрийн албан хаагчийн хууль зөрчсөн буруутай үйлдлээс болж 15 тэрбум 319 сая төгрөгийн хохирол учирчээ

Төрийн албан хаагчийн буруутай үйл ажиллагааны улмаас иргэн, хуулийн этгээдэд учирсан хохиролд 2013-2015 онд нийт 164 гүйцэтгэх баримт бичгийн 15,319,861,889 төгрөг олгохоор шийдвэрлэсэн байна. Үүнээс хөрөнгө оруулагч, аж ахуй эрхлэгчид төрийн албан хаагчийн буруутай үйл ажиллагааны улмаас учирсан хохиролд нийт 23 аж ахуйн нэгжид 25 гүйцэтгэх баримт бичгийн 11,843,753,084 төгрөг олгохоор шийдвэрлэсэн байна. Нөхөн төлбөр төлөх болсон шалтгааныг судлаж үзвэл: Худалдан авагчаас шилжүүлсэн мөнгөнөөс их хэмжээний мөнгө завшсан Төрийн өмчийн хорооны ажилтнуудтай холбоотой, татварын өрөнд хуулийн этгээдээс хураасан орон сууцыг завшсан сумын Засаг даргатай холбоотой, шан харамж өгөөгүйгээс онцгой албан татвар төлүүлэх тухай хууль бус шийдвэр гаргасан гаалийн байцаагчтай холбоотой төрийн албан хаагчдад холбогдох нэхэмжлэлд хохирол нөхөн төлөхөөр шүүхийн шийдвэр гарсан байна. Тиймээс цаашид төрийналбанхаагчийнбуруутайүйлажиллагааныулмаасүүссэнөртөлбөрийг төр хариуцаад өнгөрөх биш тухайн гэм буруутай этгээдээр нөхөн төлүүлдэг байх хууль журам боловсруулахаар тогтлоо. Засгийн газрын хуралдаанаар Ажлын хэсгийн санал дүгнэлтэд тусгагдсан хууль тогтоомжийг боловсронгуй болгох саналыг “Монгол Улсын хууль тогтоомжийг 2020 он хүртэл боловсронгуй болгох үндсэн чиглэл”-д тусгаж, хэрэгжүүлэхийг Хууль зүй, дотоод хэргийн сайд С.Бямбацогт болон холбогдох сайд нарт даалгалаа. Мөн Засгийн газар, яам, агентлагийн түвшинд хэрэгжүүлэхээр санал болгосон арга хэмжээг яам, агентлагийн төлөвлөгөөнд тусгах, хэрэгжилтэд нь хяналт тавьж 2017 оны II дугаар улиралд Засгийн газарт танилцуулахыг Засгийн газрын Хэрэг эрхлэх гарын дарга Ж.Мөнхбат, Үндэсний хөгжлийн газрын дарга Б.Баярсайханд үүрэг болгов.

Шилэн дансны хуулийн хэрэгжилт, хөтлөлтийг сайжруулахыг үүрэг болголоо

Монгол Улсын Засгийн газрын хуралдаанаар Шилэн дансны тухай хуулийн хэрэгжилтийн талаар Сангийн сайдын мэдээллийг сонсч холбогдох сайд нарт үүрэг өглөө. Тухайлбал, Шилэн дансны тухай хуулийн хэрэгжилтэд дотоод аудит хийх, хуулийн хэрэгжилтийг бүрэн хангуулах, хууль зөрчсөн албан тушаалтанд хариуцлага тооцож ажиллахыг төсвийн ерөнхийлөн захирагч нарт даалгав. Мөн төрийн өмчийн болон төрийн өмчийн оролцоотой аж ахуйн нэгжүүдийн Шилэн дансны хуулийн хэрэгжилтэд тавих хяналт, шалгалтыг сайжруулахыг Төрийн өмчийн бодлого, зохицуулалтын газрын дарга Ц.Ням-Осорт үүрэг болгов. Шилэн дансны хөтлөлт, мэдээллийг нэгдсэн цахим хуудсанд хуульд заасан хугацаанд тогтмол нээлттэй байршуулж хэвшүүлэхийг Шилэн дансны хуулийн хүрээнд багтах бүх шатны байгууллагын удирдлагуудад даалгав.

Товч мэдээ

– Монгол Улсын Засгийн газрын үйл ажиллагааны хөтөлбөрийг хэрэгжүүлэх арга хэмжээний төлөвлөгөөг батлав. Төлөвлөгөөнд нийгэм, эдийн засаг, байгаль орчин, засаглалын үндсэн 4 салбар, чиглэлийн 383 зорилт тусгав.

– Эдийн засгийн хүндрэлийг даван туулах, тогтворжуулах хөтөлбөрийн төслийг хэлэлцээд ҮАБЗ-өөс өгсөн зөвлөмжийг тусган УИХ-д өргөн мэдүүлэхээр тогтов.

– Монгол Улсын гаалийн тариф, гаалийн татварын тухай хуульд нэмэлт өөрчлөлт оруулах тухай хуулийн төслийг хэлэлцээд УИХ-д өргөн мэдүүлэхээр тогтов.

– Монгол Улсын Засгийн газар, ЮНЕСКО хооронд 2016-2021 онд хамтран ажиллах тухай харилцан ойлголцлын Санамж бичгийн төслийг дэмжив.

– 2016 оны 09 дүгээр сарын 08-ны өдөр Улаанбаатар хотноо гарын үсэг зурсан “Хөрөнгө оруулалтыг хөхиүлэн дэмжих, харилцан хамгаалах тухай Монгол Улс, Канад Улс хоорондын хэлэлцээр”-ийг батлав. Хэлэлцээрт дотоод, гадаадын хөрөнгө оруулагчдад эрх тэгш нөхцөл олгох, хөрөнгийг нь нөхөн төлбөргүйгээр албадан хураахаас хамгаалах, олон улсын гэрээгээр хүлээсэн үүргээ биелүүлэх зэрэг асуудлыг тусгажээ.

– Ази, Номхон далайн худалдааны хэлэлцээрт нэгдэн орох асуудлыг хэлэлцээд зарчмын хувьд дэмжиж, УИХ-ын холбогдох Байнгын хороотой зөвшилцөхөөр тогтов гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Гадаад харилцааны сайд, УИХ-ын гишүүн Ц.Мөнх-Оргил Төрийн ордны Нутгийн удирдлагын танхимд мэдээлэл хийлээ.

Тэрбээр “Төрийн өндөр албан тушаалтнуудын Хөрөнгө орлогын мэдүүлгийг Авлигатай тэмцэх газар /АТГ/ олон нийтэд дэлгэсэнтэй холбоотойгоор “Мөнх-Оргил асар их хэмжээний өртэй” гэх мэдээлэл тарсан. Энэ асуудлаар би хариуцлагатайгаар мэдэгдэж байна. Надад тийм их хэмжээний өр байхгүй. Би УИХ-д нэр дэвшихэд ч байгаагүй. Дараа нь УИХ, Засгийн газрын гишүүнээр сонгогдоход ч байгаагүй. Өмнө нь байсан уу гэвэл байсан. Хэзээ байсан бэ гэхээр 2013-2016 оны тавдугаар сар хүртэл энэ өр байсан. Энэ өр хаанаас гарч ирсэн бэ гэхээр манай гэр бүлийн хүн 2013 оны дөрөвдүгээр сард “Гоёо” компанийг “MCS” компаниас худалдаж авсан. Худалдаж авахдаа 25 хувийн төлбөрийгн бэлнээр төлөөд 75 хувийг зээлээр авсан. Тэгэхээр Мөнх-Оргил бэлнээр болон бэлэн бусаар мөнгө зээлээгүй. Нэгэнт манай гэр бүлийн хүний нэр дээр өр байгаа учраас хөрөнгө орлогын мэдүүлэгт тайлагнана. Тайлагнахдаа 2015 оны арванхоёрдугаар сарын 31-ны байдлаар хөрөнгө орлогын мэдүүлгээ гаргасан учраас зургаан сарын хоцрогдолтой гарсан байна. Үүнээс хойш 2016 оны тавдугаар сарын 2-нд хувьцаа буцаах тухай гэрээ байгуулаад хувьцааг нь буцааж өгсөн өр тэглэгдсэн. Өртэй холбоотой зээлийн хүү төлөгдсөн. Манай гэр бүлийн хүн өнөөдөр ямар ч өргүй “Гоёо” компанийн 25 хувийг эзэмшиж байгаа” гэлээ.

Мөн хөрөнгө орлогын мэдүүлэг дээр Мөнх-Оргил байргүй гэж мэдүүлэг гаргасан байна. Энэ нь АТГ-ын бичилтийн алдаа гэж тайлбарлалаа. Энэхүү бичилтийн алдаагаа хүлээж уучлалт гуйсан бичиг хүргүүлсэн байна. Тодруулбал, орон сууц гэдэг хэсэгт тоо байхгүй, бусад барилга гэдэг дээр нэг гэсэн тоо тавьсан байгаа нь бичилтийн алдаа болсон гэж тайлбар хийлээ.

Монгол Улсын Их Хурлын дарга М.Энхболд Туркийн Үндэсний Их Хурлын Турк-Монголын найрамдлын бүлгийн дарга Мехмет Эрдоан тэргүүтэй төлөөлөгчдийг хүлээн авч уулзлаа.

Уулзалтын эхэнд УИХ-ын дарга М.Энхболд удахгүй болох Турк Улсын үндэсний баярыг тохиолдуулан Бүгд Найрамдах Турк Улсын Үндэсний Их Хурлын дарга Исмаил Кахраманд чин сэтгэлийн мэндчилгээ уламжилж, Мехмет Эрдоан тэргүүтэй төлөөлөгчдөд Монголд тавтай зочлохыг хүсэн ерөөв.

Тэрбээр Монгол Улсын гуравдагч хөрш Турк улстай хөгжүүлж буй иж бүрэн түншлэлийн харилцаа, хамтын ажиллагаа идэвхтэй явагдаж байгааг тэмдэглээд энэ үйл ажиллагаанд хоёр талын хооронд хийгдэж буй айлчлалууд, түүний дотор хоёр улсын хууль тогтоох дээд байгууллага хооронд хэрэгжүүлсэн айлчлалууд ач холбогдолтой болсныг дурдлаа. Цаашид хоёр талын эдийн засаг, хөрөнгө оруулалтын хамтын ажиллагааг өргөжүүлж, нөөц боломжийг ашиглахын чухлыг тэмдэглээд, Үндэсний Их Хурал дахь Турк, Монголын Парламентын найрамдлын бүлгээс дэмжиж ажиллахыг хүсэв.

Ноён Мехмет Эрдоан хүлээн авч уулзаж байгаад нь УИХ-ын даргад талархаад, өнгөрсөн зургаадугаар сард болсон УИХ-ын сонгуульд МАН үнэмлэхүй ялалт байгуулсан болон М.Энхболдыг УИХ-ын даргаар томилогдсонд нь баяр хүргэв.

Тэрбээр “Туркийн төр засаг, ард түмэн Монгол Улсыг Евразийн уудам дэлгэр нутагт харилцаа хамтын ажиллагаа хамгийн амжилттай хөгжиж буй түнш орон, ах дүү ард түмэн хэмээн үздэг” гэж онцлоод Монгол Улстай бүхий л салбарын хамтын ажиллагаа өрнүүлэх эрмэлзэл бидэнд бий хэмээв.

Ноён Мехмет Эрдоан Туркт төрийн эргэлт хийх оролдлогын үеэр Монголын төр засаг, ард түмэн Туркийн хууль ёсны засаг төр, иргэдийн нийтлэг эрх ашгийг дэмжиж байсанд талархал илэрхийлээд төрийн эргэлт хийхийг оролдогчид, хууль бус бүлэглэлүүдтэй хийж буй тэмцлийн талаар УИХ-ын даргад танилцууллаа.

УИХ-ын дарга М.Энхболд хоёр орны хамтын ажиллагааг идэвхжүүлэх, бэрхшээл саадыг арилгахад парламентуудын үүрэг чухал бөгөөд эрх зүйн орчныг сайжруулах нь бидний үүрэг юм хэмээн онцлоод Туркийн олон улсын хамтын ажиллагаа, хөгжлийн байгууллага ТИКА Монгол Улсад 450 гаруй төсөл хөтөлбөрийг 30 орчим сая ам.доллараар санхүүжүүлээд байгаа бөгөөд энэ үйл ажиллагаа цаашид өргөжөөсэй гэж хүсэж байна гэв. Түүнчлэн Туркийн Засгийн газрын тэтгэлгээр олон монгол залуус Туркт боловсрол эзэмшсэнийг тэмдэглээд, энэхүү оюуны томоохон хөрөнгө оруулалт цаашид үргэлжилнэ гэдэгт итгэлтэй байгаагаа илэрхийллээ.

М.Энхболд нэлээд хэдэн жилийн өмнө Туркийн талаас амласан 300 сая ам.долларын буцалтгүй тусламжийн хэрэгжилт удааширч байгааг анхааралдаа авахыг ноён Мехмет Эрдоанаас хүсэв. Ноён Мехмет Эрдоан буцаж очоод энэ асуудлыг Засгийн газартаа хандаж тавина. Хоёр улсын Засгийн газар хоорондын комисс энэ чиглэлээр идэвхтэй ажиллана гэдэгт итгэж байна гэв.

Ноён Мехмет Эрдоаныг дагалдан Туркийн ҮИХ-ын гишүүн, ҮИХ дахь Турк-Монголын найрамдлын бүлгийн дэд дарга Нурэддин Нэбати, ҮИХ-ын гишүүн, ҮИХ дахь Турк-Монголын найрамдлын бүлгийн гишүүн Хамза Даг, Бүлэнт Енэр Бэкташоглу, Эркан Хабэрал, БНТУ-аас Монгол Улсад суугаа Онц бөгөөд Бүрэн эрхт Элчин сайд Мурат Карагөз нарын зэрэг хүмүүс байлцав.

Улсын Их Хурлын гишүүн, УИХ дахь Монгол-Туркийн парламентын бүлгийн дарга Т.Аюурсайхан өнөөдөр /2016.10.26/ Бүгд Найрамдах Турк Улсын Үндэсний Их Хурлын гишүүн, ТҮИХ дахь Турк-Монголын парламентын бүлгийн дарга Мехмед Эрдоган тэргүүтэй төлөөлөгчидтэй уулзлаа.

Уулзалтын эхэнд Улсын Их Хурлын гишүүн, УИХ дахь Монгол-Туркийн парламентын бүлгийн дарга Т.Аюурсайхан ТҮИХ дахь Турк-Монголын парламентын бүлгийн дарга, гишүүдтэй уулзаж байгаадаа баяртай байгаагаа илэрхийлээд Монгол оронд тавтай зочлохыг хүсэв. Тэрбээр УИХ дахь Монгол-Туркийн парламентын бүлгийн даргаар томилогдсонд баяр хүргэж, захидал ирүүлсэнд ноён Мехмет Эрдоганд талархал илэрхийлээд хоёр улсын парламентын гишүүд хоорондын ойр дотно, ажил хэрэгч хамтын ажиллагааг цаашид өргөжүүлэн хөгжүүлэхэд ноён Мехмет Эрдогантай хамтран ажиллахдаа баяртай байхаа илэрхийлэв. Мөн Монгол, Турк хоёр улс төр, нийгмийн ардчилсан тогтолцоо, парламентын засаглалтай улсууд. Иймд хоёр улсын харилцаанд парламент хоорондын харилцаа, хамтын ажиллагаа чухал үүрэг гүйцэтгэдэгийг тэмдэглээд Монгол Улсын хувьд Турк Улсыг гуравдагч хөршөө хэмээн үздэг. Сүүлийн жилүүдэд хоёр улсын харилцаа иж бүрэн түншлэлийн хэмжээнд бүхий л салбарын харилцаа эрчимтэй хөгжиж байгааг цохон тэмдэглэсэн.

Бүгд Найрамдах Турк Улсын Үндэсний Их Хурлын гишүүн, ТҮИХ дахь Турк-Монголын парламентын бүлгийн дарга Мехмед Эрдоган найрсаг дотноор хүлээн авч уулзаж байгаад талархал илэрхийлээд ах, дүүгийн найрамдалт харилцаатай Монгол Улсад гурав дахь удаагаа айлчлан ирсэндээ баяртай байна гэв. Тэрбээр “Манай хоёр улс газар нутгийн хувьд хол байдаг учраас харилцаа холбоогоо сайжруулах нь чухал. Энэ ч үүднээс Истанбул-Улаанбаатарын чиглэлд долоо хоногт тогтмол гурван удаагийн нислэг үйлдэх болсон нь хоёр талын харилцааг хөгжүүлэхэд чухал түлхэц үзүүлж байна. Хоёр орны харилцаа сүүлийн 26 жилийн хугацаанд эрчимтэй хөгжиж, 100 гаруй гэрээ, хэлэлцээрийг хийсэн байна. Хоёр орны иргэд харилцан 30 хоног визгүй зорчиж байгаа нь дээрх гэрээ, хэлэлцээрийн нэг үр дүн юм. Өнөөг хүртэл бататган бэхжүүлсэн энэ харилцаагаа хамгаалах, сайжруулах, хоёр орны харилцааг стратегийн түншлэлийн хэмжээнд хүргэхийн төлөө аль аль тал дээр анхаарч ажиллах хэрэгтэй байна” хэмээн онцоллоо.

Түүнчлэн Туркийн олон улсын хамтын ажиллагааны байгууллага /ТИКА/ Монгол Улсад үйл ажиллагаа явуулж ирсэн 20 жилийн хугацаанд 450 гаруй төсөл, хөтөлбөр хэрэгжүүлж, хоёр орны хамтын ажиллагаанд чухал хувь нэмэр оруулж байгааг дурдав.

Уулзалтын үеэр талууд хоёр орны худалдаа, эдийн засаг, хөдөө аж ахуй, хөнгөн үйлдвэрийн салбарын хамтын ажиллагааг өргөжүүлж, харилцан туршлага солилцох, Монгол оюутнуудыг техник, технологи, инженерийн чиглэлээр Турк Улсад суралцуулах талаар болон цаг үеийн бусад асуудлаар ярилцаж, харилцан санал солилсон юм.

Энэхүү уулзалтад Улсын Их Хурлын гишүүн, УИХ дахь Монгол-Туркийн парламентын бүлгийн гишүүн Н.Энхболд, Д.Ганболд, Г.Солтан, Б.Ундармаа, Туркийн ҮИХ-ын гишүүн, ҮИХ дахь Турк-Монголын парламентын найрамдлын бүлгийн дэд дарга Нурэддин Нэбати, Туркийн ҮИХ-ын гишүүн, ҮИХ дахь Турк-Монголын парламентын найрамдлын бүлгийн гишүүн Хамза Даг, Бүлэнт Енэр Бэкташоглу, Эркан Хабэрал, БНТУ-аас Монгол Улсад суугаа Онц бөгөөд Бүрэн эрхт Элчин сайд Мурат Карагөз нар болон албаны бусад хүмүүс байлцав.

Хууль зүйн байнгын хорооны өчигдрийн хуралдаанаар “Эрдэнэт” үйлдвэрийн Оросын талын 49 хувийг хувьчилсан асуудлыг хэлэлцсэн. Ингээд байнгын хорооноос ажлын хэсэг гаргаж тус үйлдвэрийн хувьчлалтай холбоотой асуудлыг шалгах дүгнэлтэд хүрсэн юм.

Уг хуралдаанд “Эрдэнэт”-ийн 49 хувийг хувьчлах шийдвэрийг гаргасан өмнөх Засгийн газрын тэргүүн Ч.Сайханбилэг болон “Худалдаа хөгжлийн банк”-ны гүйцэтгэх захирал О.Орхон нар оролцож УИХ-ын гишүүдийн сонирхсон асуултад хариулт өгсөн юм.

“Эрдэнэт” үйлдвэртэй холбоотой Засгийн газрын ажлын хэсгээс гаргасан дүгнэлтийг УИХ-ын Эдийн засгийн байнгын хорооны хуралдаанаар өнөөдөр мөн хэлэлцэх аж.Түүнчлэн Хууль зүйн байнгын хороо үргэлжлүүлэн тус асуудлаар хуралдах юм. Энэ хуралдаанд Сангийн сайд асан Б.Болор оролцох аж.