Өнөөдөр өглөө 07:00 цагийн орчимд “Шарга морьт” чиглэлийн замд ноцтой осол гарчээ. Тодруулбал, жижиг оврын тээврийн хэрэгсэл зуслангийн замд хэт хурдтай явсны улмаас осолдож, машин дотор сууж явсан нэг хүн амь насаа алдсан гэж эх сурвалж мэдээлж байна. Осол болсон хэргийн газарт Чингэлтэй дүүргийн Замын цагдаагийн хэлтсийн албан хаагчид ажиллаж, анхны үзлэгээр осол гаргасан автомашин хурд хэтрүүлсэн болох нь тогтоогджээ.
Зуслангийн замд ачаалал ихтэй байгаа энэ өдрүүдэд иргэдийг анхаарал болгоомжтой явахыг замын цагдаагийн байгууллагаас анхаарууллаа.
Б.УЯНГА
Туркийн Анкара хотод дэлбэрэлт болж одоогийн байдлаар 14 хүн амь үрэгдэж, 220 хүн шархдаад байна. Курдын босогчид бөмбөг дэлбэлсэн гэж үзэж байгаа аж. Туркт өнгөрсөн сард ачааны машин доторх бөмбөг дэлбэрч 270 хүн амиа алдаж байсан билээ. Энэ бүхэн өнгөрсөн сард Туркт болсон цэргийнхний төрийн эргэлт хийх гэсэн санаархлыг дэмжсэн гэх Фетуллах Гулентэй холбогдож байна. Өнгөрсөн лхагва гаригт машин дотор бөмбөг дэлбэрч нэг цагдаа, хоёр иргэн нас барж, 53 энгийн иргэн, 20 цагдаагийн албан хаагч шархадсан аж. 
Энэ сарын 17 буюу өнгөрсөн лхагва гаригт цагдаагийн албан хаагчид мансууруулах үйлчилгээтэй ургамлын төрөлд орох “каннабис” гэх ургамлыг их хэмжээгээр түүж бэлтгэн, бусдад зарж борлуулах зорилгоор авч явж байсан хэргийг илрүүлжээ. Уг үйлдлийг иргэн П хийсэн бөгөөд түүнд эрүүгийн хуулийн тусгай ангийн 192-192.2-т зааснаар эрүүгийн хэрэг үүсгэн шалгаж байгаа хэмээн цагдаагийн байгууллагааас мэдээлэв.
УИХ-ын гишүүн Н.Амарзаяа, А.Ундраа, Б.Саранчимэг, Л.Энхболд нар өнөөдөр Канадын парламентын гишүүн Брэд Трост тэргүүтэй төлөөлөгчдийг хүлээн авч уулзлаа. УИХ-ын гишүүд Канадын төлөөлөгчдийг Монгол оронд тавтай зочлохыг хүсээд хоёр орны парламент хоорондын харилцааг улам өргөжүүлэхийн төлөө ажиллах болно гэдгээ илэрхийлсэн аж.
Хичээлийн шинэ жил эхэлж байгаатай холбогдуулан эцэг эхчүүддээ сурагчийн дүрэмт хувцас хаана, ямар үнэ ханштай байгааг хүргэж байна. БСШУСЯ-наас дүрэмт хувцас үйлдвэрлэгчдэд өндөр шаардлага тавьж бөөсөрдөггүй, хөвөн даавуун материалтай, хоёр жилийн эдэлгээ даах ёстойгоос гадна үнэ ханшаа нэмэхгүй байхыг үүрэгдсэн. Энэ жилийн дүрэмт хувцасны чанар, материал, өнгө, хийц, сайжирсан хэмээн эцэг эхчүүд онцолж байгаа юм.
Өчигдөр буюу наймдугаар сарын 18-нд таксины жолооч эмэгтэйг айлган сүрдүүлж, хоолойг нь боож, дээрэмдэхийг завдсан хэрэг гарчээ. Тодруулбал, Чингэлтэй дүүргийн XII хорооны нутаг дэвсгэрт байрлах “Хадат” гэх дэлгүүрийн орчимд уг хэрэг гарсан байна.
“Азийн ховор цусны бүлэг” семинар манай улсад анх удаа зохиогдож байна. “Шанхайн цусны төв” болон “Монгол цус судлалын үндэсний төв”-ийн хамтарсан семинар “Бишрэлт” зочид буудалд өнөөдөр болов. Семинарт есөн орны цусны мэргэжилтэн, докторууд оролцлоо. Энэхүү арга хэмжээний гол ач холбогдол нь ховор бүлгийн цусны донорын нөөцтэй болох цаашлаад Азийн орнуудтай хамтран ажиллах эхлэл болж байгаа аж. Дэлхийд 100 гаруй ховор бүлгийн цус байдаг талаар Дэлхийн эрүүл мэндийн байгууллагаас судалгаа гаргасан байна. Уулзалтын үеэр Монгол Улсад 15 орчим төрлийн ховор цус илрүүлээд байгаа талаар онцоллоо. 
Хятадын 15 настай тамирчин Рен Киан алтан медаль авч Риогийн олимпийн хамгийн залуу алтан медальтан боллоо. Тэрбээр 10 метр тавцангаас усанд үсрэлтийн төрөлд түрүүлсэн ажээ. Түүний хийсэн гурван эргэлт үзүүлбэр нь шүүгчдээс өндөр үнэлгээ авчээ. 
Онцгой байдлын ерөнхий газрын дэргэдэх Гамшиг судлалын хүрээлэн нь МУИС-ийн Олон улсын харилцаа, нийтийн удирдлагын сургууль, Япон Улсын Ногаягийн их сургууль хамтран байгуулсан Резилиенс судалгааны төвтэй хамтран ажиллах санамж бичгийг өнгөрсөн тавдугаар сард байгуулсан юм.
Соёл урлагийн ахмад уран бүтээлчид нэгдэн “Итгэлийн гэрэл” хэмээх тоглолтыг хийхээр болжээ. Тодруулбал, 29 настай О.Баясгалан залуу, дөрвөн жилийн өмнөөс элэг нь өвдөж өвчинтэйгээ тэмцсээр ирсэн аж. О.Баясгалангийн төрсөн дүү нь ахынхаа донор болох бөгөөд элэг шилжүүлэх хагалгааг эх орондоо хийлгэхээр болсон байна. Түүний аав, ээж, найз нөхөд нь эмчилгээнд зарцуулагдах зардлыг нь бүрдүүлэхээр урлагийнхантай нэгдэж хандивын тоглолт хийхээр болжээ. Хандивын тоглолтонд МУАЖ Ч.Мөнхшүр, МУГЖ Ц.Үенч, МУГЖ Л.Чаминчулуун, МУГЖ Ж.Одмаа, МУГЖ Н. Төмөрхуяг урлагийн алдартнууд болоод бусад уран бүтээлчид нэгдэн ирэх есдүгээр сарын 3-нд “бөхийн өргөө”-нд тоглохоор болжээ.