Month: August 2016

Монголын маркетигийн хобооноос “Smart 2016” маркетеруудын чуулганыг ирэх есдүгээр сарын 14-нд хоёр дахь жилдээ “BlueSky”-д зохион байгуулах гэж байна. Маркетеруудын чуулганы гол зорилго нь бизнесийн ба төрийн болон төрийн бус байгууллагуудын маркетинг, олон нийтийн харилцаа хариуцсан менежер, ажилтнуудад өдрөөс өдөрт хувьсан өөрчлөгдөж байгаа маркетингийн шинжлэх ухааны талаарх хамгийн сүүлийн үеийн ойлголт, арга, техник, чиг хандлага, бүтээгдэхүүнүүдийг тайлбарлан, танилцуулах замаар маркетингийн үйл ажиллагаагаа илүү хямд зардлаар, илүү олон хүнд хүргэх боломжийг олгох аж.

Үүнтэй уялдан, бизнесийн байгууллагуудад бүтээгдэхүүн үйлчилгээгээ хэрэглэгчиддээ мэдээлэх, санал болгох, тэдэнтэй харилцаа үүсгэх шинэ арга хэрэгтэй болж байна. Хэрэглэгчид уламжлалт маркетингийн арга, бүтээгдэхүүнүүдээс илүү ухаалаг, бүтээлч байдлыг эрэлхийлэх юм.

Иймд ММХ-ны дэлхийн орчин цагийн маркетингийн шинэ мэдлэг мэдээлэл хийгээд бодит туршлагыг эх орондоо нэвтрүүлэх, Монголын шилдэг маркетерууд нэгэн дор хуран чуулж, хоорондоо болон бусаддаа мэдлэг туршлагаа хуваалцах нөхцөлийг бүрдүүлэх зорилгоор чуулах ажээ.

Монгол улсын Засгийн газрын 286 дугаар тогтоолын дагуу Ус цаг уур, орчны судалгаа, мэдээллийн хүрээлэнд 2016-2017 оны өвөл, хаврын бэлчээрийн даацыг баг бүрийн бэлчээрийн ургац, малын тоо, бэлчээрийн талбайн хэмжээ, бэлчээр ашиглах хугацаа зэрэг мэдээлэл дээр үндэслэн багийн нутгаар тооцоолж гаргажээ.

Тухайлбал зуншлагын байдал наймдугаар сарын 20-ны байдлаар нийт нутгийн 60 орчим хувьд хэвийн, 35 орчим хувьд гандуу, 5 хүрэхгүй хувьд гантай байна.

Энэ зун ихэнх нутгаар зуншлага хэвийн байсан ба долоодугаар сарын сүүлчээс эхлэн говийн нутгийн зүүн хэсэг болон зүүн зүгийн нутгаар гандуу байдалтай байгаа талаар УЦУОСМ хүрээлэнгээс мэдэгдлээ.

Бэлчээрийн даацыг нийт нутгаар тооцоолж гаргасан дүнгээс үзвэл:

60% нь 50 хүртэлх хувь (бэлчээрийн нөөцтэй)

20% нь 51-100 хувь (бэлчээр хүрэлцээтэй)

10% нь 101-300 хувь (даац 1-3 дахин хэтэрсэн)

5% нь 301-500 хувь (даац 3-5 дахин хэтэрсэн)

5% нь 500 хувиас их (даац олон дахин хэтэрсэн) байна. Өөрөөр хэлбэл нутгийн 80 орчим хувьд мал өвөлжилт, хаваржилт хэвийн байх боломжтой гэж үзэж болохоор байна.

Харин нутгийн 20 гаруй хувь нь өөрийн сумын нутагт мал сүргээ онд оруулах бэлчээрийн боломж муу байгаа нь өөр нутагт отор нүүдэл хийх, нэмэгдэл тэжээл бэлтгэх, малын тоог бууруулах зэргээр мал өвөлжилт, хаваржилтын ажлыг эртнээс анхаарах, зохицуулах шаардлагатайг санууллаа.

Аймгийн дүнгээр авч үзвэл Увс, Баян-Өлгий, Ховд, Архангай, Өвөрхангай, Булган, Төв, Дархан-Уул, Хэнтий, Сүхбаатар, Дорноговь, Дундговийн аймгуудын зарим сумдын нутгаар бэлчээрийн даац олон дахин хэтэрч гарсан тул мал өвөлжилт, хаваржилтын нөхцөл хүндрэхээр байна.

Даац их хэмжээгээр хэтэрсэн нутагт Баян-Өлгийн Өлгий, Ногооннуур, Толбо, Цэнгэл, Сагсай, Увсын Тэс, Наранбулаг, Тариалан, Малчин, Завхан, Ховдын Дөргөн, Мянгад, Зэрэг Ховд, Чандмань, Дарви, Манхан, Буянт, Говь-Алтайн Дарви, Баянхонгорын Жинст, Архангайн Өлзийт, Өгийнуур, Төвшрүүлэх, Хотонт, Хайрхан, Хашаат, Өвөрхангайн Сант, Баянгол, Гучин-Ус, Булганы Сайхан, Орхон, Дашинчилэн, Баяннуур, Рашаант, Гурванбулаг, Төвийн Өндөрширээт, Эрдэнэсант, Баянхангай, Хэнтийн Дадал, Өмнөдэлгэр, Сүхбаатарын Уулбаян, Сүхбаатар, Мөнххаан, Говьсүмбэрийн Сүмбэр, Дундговийн Адаацаг, Дорноговийн Иххэт, Өмнөговийн Даланзадгад сумдын зарим баг орж байна.

Бэлчээрийн даац онцгой их хэтэрч гарсан дээрх сумдад мал өвөлжих, хаваржих нөхцөл хүндрэхээр байгаа тул эртнээс зохицуулалт хийх зайлшгүй шаардлагатай хэмээн холбогдох албаныхан мэдээллээ.

Өнгөрөгч долоодугаар сарын 20-ноос эхлэн жолооны үнэмлэхийг албан ёсоор хэвлэж эхэлсэн билээ. Одоогийн байдлаар зургаадугаар сард жолооны курс төгссөн төгсөгчдийн жолооны үнэмлэх хэвлэж байгаа аж. Тодруулбал жолооны үнэмлэхийг “Смарт солушин” компани хэвлэж байгаа бөгөөд иргэдийн жолооны үнэмлэхийг хэвлэх ажил хэвийн үргэлжилж байгаа талаар албаныхан мэдээллээ.

Замын цагдаагийн газарт жолооны үнэмлэх шинээр авах болон хаяж, үрэгдүүлсэний улмаас солиулах хүсэлтэй 40 мянга гаруй иргэний жолооны үнэмлэх хэвлэх юм. Үүнээс одоогийн байдлаар дөрөв, тавдугаар сард жолооны курс төгссөн 20 мянга орчим төгсөгчид үнэмлэхээ авсан ажээ.

Нийслэлийн онцгой байдлын газрын аврах ангийн алба хаагчид орон сууцны таван давхраас унах гэж байсан хүүхдийг аварчээ. Тодруулбал, өнгөрөгч амралтын өдөр нийслэлийн Баянгол дүүргийн 4-р хороо “Голден парк” хотхоны 101 дүгээр байрны 5 дугаар давхрын тагтан дээрээс хүүхэд унах гээд байна гэх дуудлагын дагуу аврах ангийн найман алба хаагч 5 давхраас унах гэж байсан таван настай У гэх охиныг аварч, ээж Ш-д эсэн мэнд хүлээлгэн өгсөн байна. Иймд бага насны хүүхдийг хараа хяналтгүй нь орхихгүй байх, эцэг эхчүүд асран хамгаалагч нар нь хүүхдэд тавих хяналтаа сайжруулж болзошгүй эрсдлээс урьдчилан сэргийлэхийг Онцгой байдлын газраас анхааруулж байна.

Хичээлийн шинэ жил эхэлж байгаатай холбогдуулан автобусны буудал орчимд халаасны хулгайн гэмт хэрэг үйлдэгдэх нь ихэсчээ. Энэ төрлийн гэмт хэрэг өчигдөр л гэхэд цагдаагийн байгууллагад хоёр бүртгэгджээ.

Тодруулбал, Баянгол дүүргийн 20 дугаар хороо Таван шарын автобусны буудал орчимд өглөөний 09:20 цагийн үед 28 настай иргэн М-ийн “Скай Вега А900” гар утсыг, 33 настай Х гэх эрэгтэй хулгайлж байсныг цагдаагийн алба хаагчид үйлдэл дээр нь илрүүлэн баривчилсан байна.

Мөн Баянгол дүүргийн 18 дугаар хорооны иргэн 55 настай Б-г автомашиндаа сууж байхад нь 14.00 цагийн үед 35 настай Б гэх эрэгтэй согтуурсан үедээ анхаарлыг нь сарниулж, 115 мянган төгрөг бүхий гар цүнхийг нь хулгайлахыг завджээ.

Дээрх хэрэгтэй холбогдуулан цагдаагийн байгууллагаас иргэдийг олон нийтийн үйлчилгээний газар болон хөл хөдөлгөөн ихтэй газраар явахдаа сонор сэрэмжээ дээшлүүлэхийг зөвлөлөө. Түүнчлэн хулгайд алдсан эд зүйлээ цагдаагийн байгууллагад бүртгүүлж, хамтарч ажиллахыг уриаллаа.

БОАЖ-ын сайдын 2014 оны “Ойн дагалт баялгийг хамгаалах зохистой ашиглах, журам”- д хуш модны самрыг аравдугаар сарын 15-наас дараа оны гуравдугаар сарын 15-ны хооронд бэлтгэнэ гэж заасан байдаг.

Гэвч иргэд наймдугаар сар гарсаар самар түүхээр ойд гарч, мунаар цохих, мөчир хугалах зэргээр буруу аргаар түүж байгаа талаар холбогдох байгаль хамгаалагчид ярьж байна.

Тухайлбал хуш модноос самар түүх гэсэн иргэд бүдүүн мунаар, буюу хүнд төмөм шидэж, мөчир, навтай нь цуг унагааж байгаа юм. Үүнээс болоод хүчтэй доргисноор модны махлаг эд эс гэмтэж, экосистем, ургалтад нь сөргөөр нөлөөлдөг ажээ.

Манай орны ойн санд ургадаг Сибир хуш ойн сангийн 5.5 хувь, ойн нөөцийн 9.3 хувийг эзэлдэг гэсэн тоон судалгаа бий. Самар нь хур, сойр, самрын шаазгай, хөтүү, жирх, хэрэм, мэрэгч баавгай, гахай зэрэг олон амьтдын гол хүнс тэжээл болдог аж. Иймд БОАЖ-ын яамнаас самар түүж буй иргэддээ байгаль эхээ хайрлаж, аль болох болц нь гүйцсэн жимс, жимсгэн түүхийг уриаллаа.