Гадаад худалдаа, автомашин импортын чиглэлээр үйл ажиллагаа явуулдаг гэх “Алтан харилцаа” ХХК 100 орчим хүнийг луйвардаж 520 сая төгрөгийг залилсан гэх асуудлаар хохирогчид өнөөөдөр буюу наймдугаар сарын 24-нд хэвлэлийн бага хурал хийлээ.
Хэвлэлийн хурлаар “хохирогч” гэх иргэд дараах мэдээллийг хүргэсэн юм.
“Алтан Харилцаа” ХХК-ий захирал С.Цэвэлмаа, түүний ах С.Мягмардаш нар уг залиланг үйлдсэн. Мөн цаашлаад бусад хүмүүс ч холбогдох үндэслэлтэй гэж хохирогчид үзэж байна.
Эдгээр этгээдүүд нь “Dreamcar” гэх хаягийн дор Япон болон бусад орноос автомашин худалдан авч импортоор оруулж ирэх гэрээг хохирогчидтой байгуулан урьдчилгаа 30-100 хувийн төлбөрийг авдаг байсан нь баримтаар ногтлогдсон. Гэвч Японоос захиалсан гэх автомашин Монгол улсын хилээр огт орж ирээгүй төдийгүй автомашинаа хүлээсэн иргэдэд “гааль дээр асуудал гарсан”, “ замдаа яваа” гэх зэргээр хүлээлгэсээр хагас жилийн нүүрийг үзжээ.
Өнгөрөгч тавдугаар сард эхний хохирогч цагдаагийн байгууллагад өргөдөл гаргасан, тухайн үед хохирогсдын тоо харьцангуй цөөн, хугацаандаа ирээгүй машин асууж сураглах хүмүүсийн тоо 10 гаруй байсан талаар хохирогчид хэлж байгаа юм. Гэвч хэрэг хариуцсан холбогдох албаныхан ажилдаа хайхрамжгүй хандсаны улмаас гэмт этгээдүүд дахин 60 хүнийг сарын дотор залилсан байна.
Хохирсон иргэд Баянгол дүүргийн цагдаагийн нэгдүгээр хэлтэст хандсан боловч, хууль хяналтынхан үүргээ үл ухамсарлан уг үйлдлийг таслан зогсоох арга хэмжээ аваагүйн улмаас хохирлын хэмжээ үлэмж нэмэгдэн өнөөдөр хагас тэрбум төгрөгийг даваад байгаа юм.
Тиймээс Хууль зүйн яам болон цагдаа, прокурорын байгууллагууд дээрх хэрэгт анхаарлаа хандуулж хэргийг үйлдсэн этгээдүүд хуулийн дагуу хариуцлагаа хүлээлгээсэй хэмээн хохирогчид мэдээллээ.
УИХ-ын дарга М.Энхболд наймдугаар сарын 24-ний өдөр УИХ-ын ээлжит бус чуулган товлон зарлах тухай захирамж гаргалаа. Захирамжид УИХ-ын ээлжит бус чуулганыг наймдугаар сарын 25-ны өдрөөс есдүгээр сарын 15-ны өдрийг хүртэл зарлан хуралдуулж, дараах асуудлыг хэлэлцэхээр заажээ. Тухайлбал, Юмжаагийн Цэдэнбалын мэндэлсний 100 жилийн ойг тэмдэглэн өнгөрүүлэх тухай тогтоолын төсөл, Монгол Улсын Засгийн газрын 2016-2020 оны үйл ажиллагааны хөтөлбөр батлах тухай тогтоолын төсөл, Сум, дүүргийн иргэдийн Төлөөлөгчдийн Хурлын 2016 оны ээлжит сонгуульд техник хэрэгсэл хэрэглэх тухай тогтоолын төсөл, Сум, дүүргийн иргэдийн Төлөөлөгчдийн Хурлын 2016 оны ээлжит сонгуулийн зардлын хэмжээг батлах тухай” Улсын Их Хурлын тогтоолын төсөл зэрэг нийт 23 асуудлаар хэлэлцэхээр заажээ. Мөн УИХ-ын ээлжит бус чуулганыг маргааш буюу наймдугаар сарын 25-ны өдөр 10:00 цагт эхлэхээр товлосон ажээ.
Монгол Улсын Ерөнхийлөгчийн тамгын газрын дарга П.Цагаан мэдээлэл хийлээ.
Өнөө маргаашдаа төв, зүүн аймгуудын нутгаар бороо орж, нийт нутгаар сэрүүснэ. 25-28-нд ихэнх нутгаар бороо хур багатай байна. Маргааш төвийн аймгуудын хойд хэсгээр, 26-нд зүүн аймгуудын нутгаар, 28-нд Хангай, Хөвсгөлийн уулархаг нутгаар түр зуурын бороо орно. Хугацааны эхээр сэрүүхэн Алтай, Хангай, Хөвсгөл, Хэнтэйн уулархаг нутгаар шөнөдөө 1 градус хүйтнээс 4 градус дулаан , өдөртөө 12-17 градус, говийн бүс нутгийн өмнөд хэсгээр шөнөдөө 9-14 градус, өдөртөө 20-25 градус, бусад нутгаар шөнөдөө 3-8 градус, өдөртөө 16-21 градус дулаан байна. Хугацааны сүүлчээр өдөртөө дулаарна.
Намар болж, газар тариалангийн ажил ид явагдаж байна. ХХААХҮЯ-наас гаргасан урьдчилсан балансаар энэ жил 501 мянган тонн үр тариаг хураан авах төлөвтэй байгаа ажээ. Үр тарианы болц, ургац хураалтын бэлтгэл ажил, цаг агаарын нөхцөл байдал ургац хураалтад хэрхэн нөлөөлсөн талаар холбогдох газрын мэргэжилтнүүдээс тодрууллаа. 
Зуны Олимпийн 31 дүгээр XXXI наадам Бразилийн Рио Де Жанейро хотод болж өндөрлөлөө. Олимпийн наадам дууссаны дараа Олимпийн байгууламжийг улс орнууд ямар зорилгоор ашигладаг талаар Лондонгийн Эдийн засаг, улс төр судлалын сургуулиас судалжээ. Эдгээр байгууламжийг улс, орнууд төрөл бүрийн зорилгоор ашиглаж байна. Тухайлбал 2004 онд Афинд болсон Олимпийн бейсболын талбайд дүрвэгчид суурьшиж 1000 гаруй хүн амьдарч байгаа бол 2012 оны Лондонгийн Олимпийн цогцолборт их сургууль баригдсанаас гадна усан парк, загварын шоуны газар зэрэг олон төрлийн арга хэмжээ зохион байгуулж байна. Гэхдээ Олимпийн барилга, байгууламжийг хэвээр хадгалахын тулд их хэмжээний хөрөнгө зарцуулдаг учир ихэнх бүтээн байгуулалт нь ашиглагдахгүй үлддэг төдийгүй зохион байгуулагчдын хувьд хөрөнгө, санхүүгийн тодорхой алдагдал хүлээдэг аж.
