Нийслэлийн Удирдлагын зөвлөлийн өнөөдрийн хуралдаанаар Төв аймгийн “Баян“ суманд гарсан малын гоц халдварт “Шүлхий” өвчний өнөөгийн нөхцөл байдал, хэрэгжүүлж байгаа арга хэмжээний талаар нийслэлийн Засаг даргын орлогч Ж.Батбаясаглан мэдээлэл хийж, нийслэлийн Онцгой байдлын газрын дарга, Цагдаагийн удирдлага, Мэргэжлийн хяналтынн байгууллагын төлөөллүүд оролцлоо.
Төв аймгийн Баян сум нь нийслэлийн Багахангай дүүрэгтэй хаяа залгаа. Шүлхий өвчин гарсан голомт нь тус дүүргээс 18 километрт оршдог байна. Өнөөдрийн байдлаар Хүнс, хөдөө аж ахуйн дэд сайд Ж. Саульегаар ахлуулсан ажлын хэсэг ажиллаж байна. Малын гоц халдварт ”Шүлхий” өвчнийг нийслэлд оруулж ирэхгүй байх талаар холбогдох бүхий л арга хэмжээг авч, халдваргүйжүүлэлт, ариутгалд шаардагдах хөрөнгийн судалгааг гаргах ажлын хэсгийг ахалж, амралтын өдрүүдэд Багахангай дүүрэгт ажиллах үүргийг нийслэлийн Засаг даргын орлогч Ж. Батбаясгаланд өглөө.
Вакцинжуулалтын ажил уг бүс нутагт эрчимтэй хийгдэж байна. Багахангай дүүрэгт 350 үхэрт вакцинжуулалт хийсэн. Голомтын бүсэд 21 албан хаагч, 6 автомашин ажиллаж байна. Амралтын өдрүүдэд ажлын хэсэг Багахангай дүүрэгт ажиллаж, тус дүүргийн онцгой байдлын комисс хуралдаж, шаардагдах хөрөнгө мөнгө, ариутгалын бодис, хүн хүчний асуудлаар нийслэлийн Онцгой байдлын комиссын хуралдаанд танилцуулна. Нийслэлийн Онцгой байдлын комиссын хурлыг ирэх даваа гарагийн 9 цаг 30 минутад хийх тов гаргалаа.
Эрүүгийн хууль, Зөрчлийн хуулийн хүчин төгөлдөр болох хугацааг 2017 оны 7 дугаар сарын 1-ний өдөр хүртэл сунгах хуулийн төслийн хүрээнд УИХ дахь АН-ын бүлэг нээлттэй хэлэлцүүлэг явуулах болжээ. УИХ-ын ээлжит бус чуулганы хуралдаанаар 2015 оны 12 дугаар сарын 3-ны өдөр батлагдаж, 2016 оны 9 дүгээр сарын 1-ний өдрөөс хэрэгжиж эхлэх байсан Эрүүгийн хууль, Зөрчлийн хуулийн хүчин төгөлдөр болох хугацааг 2017 оны 7 дугаар сарын 1-ний өдөр хүртэл сунгах хуулийн төслийг хэлэлцэж эхлээд байгаа. Уг асуудлаар УИХ-ын АН-ын бүлэг нээлттэй хуралдаан хийж хэлэлцэх болсон байна.
НМХГ-аас 2016-2017 оны хичээлийн шинэ жилийн бэлтгэл ажлыг шалгах хяналт шалгалт явуулж байна. Шалгалтын явцад есдүгээр сарын 01-нд үйл ажиллагаа нь засварын ажлаас шалтгаалан эхэлж чадахгүй цэцэрлэг, сургуулиуд байгаа нь тогтоогджээ.
Бразил улсын Рио Де Жанейро хотноо зуны Олимпийн 31 дүгээр наадмаас манай улсын тамирчид хоёр медальтай ирсэн билээ. Жүдо бөхийн эмэгтэйчүүдийн 57 кг-д хүч үзсэн Азийн аварга МУГТ Доржсүрэнгийн Сумъяа Риогийн дэвжээнээс мөнгөн медаль, 60 кг-ын жинд хүч үзсэн ОУХМ Д.Отгондалай хүрэл медаль хүртсэн. Энэ хоёр тамирчин хоёулаа ХХЕГ-ынх юм.
МҮОНРТ-ийн 2ф300 мм-ийн 65 метрийн хос дулааны шугамыг шинэчлэх ажилтай холбогдуулан Эх хүүхдийн эрүүл мэндийн үндэсний төвийн баруун урд уулварыг өчигдрөөс эхлэн хаалаа. Уг замыг ирэх даваа гаригийн 06:00 цаг хүртэл хугацаанд хэсэгчлэн хаах тул иргэд Та бүхэн өөр замыг сонгон зорчино уу гэж Улаанбаатар хотын Захирагчийн ажлын албанаас мэдээллээ.
“Токицүказэ” дэвжээний сүмоч Монгол Улсын начин Алтангадасын хүү Токитэнкү А.Хүчитбаатар зодог тайлахаар болжээ. Жонокүчи, Жонидан, Санданмэг 7:0 гээд түрүүлээд л гараагаа эхэлж, Жюүрёод 2 түрүүлж, Комүсүби цолтой барилдаж, хөл мэхний уран гайхамшигийг үзүүлж явсан Токитэнкү маань хүнд өвчин тусан чансаа буурсан тул зодог тайлах шийдвэрээ гаргасан байна.
Монголын жүдо бөхийн холбооны удирдах зөвлөлийн хурал өнөөдөр болно. Хурлаар “Рио 2016” Олимпийн наадмын тайлан, “Чингис хаан гран-при улаанбаатар 2016” тэмцээний тайланг тус тус сонсох аж. Мөн Монголын жүдо бөхийн холбооны Их хурлын товыг зарлаж, хэд хэдэн асуудлыг авч хэлэлцэж буй юм байна. Удирдах зөвлөлийн хурал Баянгол зочид буудлын хурлын танхимд болно.
Нийслэлд хөл хөдөлгөөн нэмэгдэж, хөдөө орон нутгаас зорьж ирэгсэдийн тоо ихэссэн энэ үед халаасны хулгайч нар үндсэн ажилдаа эрчимтэй орсон байна. Цагдаагийн байгууллагад бүртгэгдэж байгаа дуудлагын дийлэнх нь олон нийтийн газар явж байгаад утсаа, эд зүйлсээ мөнгө төгрөгөө хулгайд алдлаа гэсэн дуудлага эзэлж байна. Тухайлбал, БЗД-ийн цагдаагийн 2 дугаар хэлтсээс халаасны хулгайч нарыг илрүүлэн баривчилжээ.